Nuhewutu Mí Ma Dona Dolalo

MÍ NI dọ dọ viyọnnu de dọna onọ̀ etọn dọ: “Na wá whégbè to wehọmẹ godo tlolo.” Ṣigba to whenuena yé tọ́nsọn wehọmẹ, e nọte bo daihun hẹ họntọn etọn lẹ bo wá dọna onọ̀ etọn to whenuena e lẹkọwa whé dọ: “Mẹplọntọ ṣie wẹ hẹn mi dote to wehọmẹ godo.” Be e sọgbe nado dọmọ ya?⁠—

Kavi vlavo visunnu de hò bọlu to họmẹ ṣigba bo dọna otọ́ etọn dọ: “Yẹn ma hò bọlu to họmẹ gba.” Ṣigba e wàmọ na nugbo tọn. Be e na sọgbe nado dọ dọ emi ma wàmọ ya?⁠—

Mẹplọntọ Daho lọ do nuhe sọgbe bọ mí dona wà lọ hia mí. E dọmọ: ‘Mì gbọ hogbe mìtọn Mọwẹ ni yin Mọwẹ, podọ Lala mìtọn ni yin Lala; na nudepope he gbọnvona ehe wá sọn mẹylankan lọ dè.’ (Matiu 5:37) Etẹ dọ wẹ Jesu te?⁠— Nuhe dọ e te wẹ yindọ mí dona nọ wà nuhe mí dọ.

Otàn de tin to Biblu mẹ he do nuhewutu e yin nujọnu nado nọ dọ nugbo hia. Otàn lọ gando omẹ awe delẹ go he dọ dọ emilẹ yin devi Jesu tọn. Gbọ mí ni pọ́n nuhe jọ.

E ma pé osun awe to okú Jesu tọn godo, bọ gbẹtọ susu he tọ́nsọn fidindẹn lẹ wá Jelusalẹm na hùnwhẹ titengbe Ju lẹ tọn he nọ yin yiylọdọ Pẹntikọsti. Apọsteli Pita dọ hodidọ ayidego tọn de to ehe mẹ e dọhona gbẹtọ lẹ dogbọn Jesu dali, mẹhe Jehovah fọnsọnku. Whla tintan lọ die bọ suhugan mẹhe wá Jelusalẹm lọ lẹ tọn do sèhó dogbọn Jesu dali. Ṣigba yé jlo na yọ́n nususu dogọ. Enẹwutu, etẹwẹ yé wà?

Yé nọ finẹ dẹn hú lehe yé donukun etọn do. Ṣigba to whenu vude godo, akuẹ vọ̀ do mẹdelẹ to yé mẹ bọ yé tindo nuhudo alọgọ tọn nado sọgan họ̀ núdùdù. Devi he tin to Jelusalẹm lẹ basi dide nado gọalọna jonọ lọ lẹ. Enẹwutu, susu yetọn sà nutindo yetọn lẹ bo hẹn akuẹ lọ wá apọsteli Jesu tọn lẹ dè. Enẹgodo apọsteli lẹ nọ yí akuẹ lọ na mẹhe tindo nuhudo etọn lẹ.

Ananias po asi etọn, Safila po, he tin to agun Klistiani tọn mẹ to Jelusalẹm, kán aigba yetọn de sà. E mayin mẹde wẹ dọna yé nado sà ẹ gba. Yé lọsu wẹ basi dide nado sà ẹ. Ṣigba e mayin owanyi he yé tindo na devi yọyọ Jesu tọn lẹ wẹ sisẹ yé nado basi dide ehe gba. Na taun tọn, Ananias po Safila po jlo dọ gbẹtọ lẹ ni pọ́n yé di mẹdagbe hú nuhe yé yin taun lọ. Enẹwutu yé bladọ to yedelẹ ṣẹnṣẹn nado dọ dọ akuẹ lọ lẹpo wẹ emilẹ to zize jo nado gọalọna mẹdevo lẹ. Na taun tọn, apadewhe akuẹ lọ tọn poun wẹ yé jlo na ze jo ṣigba yé dọ dọ popolẹpo wẹ emilẹ to zize jo. Etẹwẹ hiẹ lẹn gando ehe go?⁠—

Todin, Ananias wá apọsteli lẹ dè. E bẹ akuẹ lọ na yé. Na nugbo tọn, Jiwheyẹwhe yọnẹn dọ e mayin akuẹ lọ lẹpo wẹ e to bibẹ jo gba. Enẹwutu Jiwheyẹwhe dehia apọsteli Pita dọ Ananias ma to nugbo dọ gba.

Gbọnmọ dali Pita dọmọ: ‘Ananias, etẹwutu wẹ a dike na Satani nado klọ we nado wà ehe? Towe wẹ aigba lọ. E mayin dandan wẹ dọ a ni sà ẹ gba. Podọ whenuena a tlẹ sà aigba lọ, a sọgan basi dide na dewe nuhe a na yí akuẹ etọn do wà. Ṣigba etẹwutu a to lalodo dọ akuẹ lọ pete wẹ emi to zizejo to whenuena e yindọ vude poun wẹ a to zizejo sọn e mẹ? Gbọnmọ dali, hiẹ ma to lalodo na míwlẹ kẹdẹ gba, ṣigba na Jiwheyẹwhe ga.’

Whẹho sinsinyẹn de wẹ ehe yin. Lalodo wẹ Ananias te! E ma to nuhe dọ e te basi gba. Mẹklọ wẹ e te poun. Biblu dọ kọdetọn etọn na mí. E dọmọ: ‘To whenuena e sè ohó Pita tọn lẹ, Ananias jai bo kú.’ Jiwheyẹwhe hù Ananias! Enẹgodo, oṣiọ etọn yin zize jẹgbonu bo yin didi.

To nudi ganhiho atọ̀n godo, Safila lọsu biọ họmẹ. E ma yọnẹn dọ nude ko jọ do asu etọn go gba. Pita sọ kanbiọ ewọ lọsu dọmọ: ‘Be akuẹ he mì omẹ awe lẹ sà aigba lọ yin janwẹ mì bẹ na mí ya?’

Safila gblọn dọmọ: ‘Mọwẹ, sọha he mí sà aigba lọ yin niyẹn.’ Ṣigba lalo wẹ! Yé ko kán apadewhe akuẹ lọ tọn dai do whégbè. Enẹwutu Jiwheyẹwhe sọ hù Safila lọsu ga.⁠—Owalọ lẹ 5:1-11.

Etẹwẹ mí dona plọn sọn nuhe jọ do Ananias po Safila po go mẹ?⁠— E plọn mí dọ Jiwheyẹwhe ma yiwanna lalodotọ lẹ gba. E jlo dọ mí ni nọ dọ nugbo to whepoponu. Ṣigba mẹsusu nọ dọ dọ nude ma ylan to e mẹ nado dolalo gba. Be a lẹndọ nugbo dọ wẹ yé te ya?⁠— Be a yọnẹn dọ lalodido dopo wẹ hẹn awutu, awufiẹsa, po okú he to aigba ji todin po wá ya?⁠—

Flindọ, Lẹgba dolalo na yọnnu tintan lọ, Evi. E dọna ẹn dọ e ma na kú gba eyin e vẹtoli na Jiwheyẹwhe bo dù atin-sinsẹ́n he Jiwheyẹwhe ko dosẹ́n na ẹn ma nado dù. Evi yí nuhe Lẹgba dọ sè bo dù atin-sinsẹ́n lọ, bosọ klọ Adam lọsu nado dù ga. To whenuena yé ko dù i pó godo, yé lẹzun ylandonọ bọ ovi yetọn lẹpo sọ yin jiji di ylandonọ ga. Podọ na yé yin ylandonọ lẹ wutu, ovi Adam tọn lẹpo wẹ nọ jiya bosọ nọ kú. Etẹwẹ hẹn nuhahun ehe lẹpo wá aimẹ?⁠— Lalo dopo poun wẹ.

Abajọ Jesu dọ dọ Lẹgba yin “lalonọ de” podọ “otọ́ etọn”! Ewọ wẹ yin omẹ tintan he dolalo. Eyin mẹdepope dolalo, e to nuhe Lẹgba basi jẹnukọn basi. Enẹwutu mí dona nọ lẹnnupọndo ehe ji to whedepopenu he mí yin whiwhlepọn nado dolalo.⁠—Johanu 8:44.

Whetẹnu wẹ hiẹ sọgan yin whiwhlepọn nado dolalo?⁠— Be e mayin whenue a ko ṣinuwa wẹ ya?⁠— A sọgan hẹn nude gbà to mayọnẹnmẹ. Ṣigba eyin mẹde kanse we, be a na dọ dọ nọvi towe de wẹ hẹn ẹn gbà wẹ ya? Kavi be a na nabọẹ bo basi taidi dọ a ma yọ́n mẹhe hẹn nulọ gbà wẹ ya?⁠—

Vlavo yè na we azọ́ndenamẹ whégbè tọn delẹ sọn wehọmẹ, ṣigba a ma penugo bo basi popolẹpo, etẹwẹ a na dọ? Be a na dọ dọ emi basi popolẹpo, to whenuena a yọnẹn ganji dọ emi ma wàmọ wẹ ya?⁠— Mí dona flin Ananias po Safila po. Yé ma dọ nugbo lọ lẹpo gba. Podọ Jiwheyẹwhe hù yé nado dohia dọ onú ylankan taun wẹ yé wà.

Na enẹwutu, mahopọnna nudepope he mí ṣì wà, e na ylan taun eyin mí dolalo nado ṣinyọnnudo whẹho lọ. Podọ, mí ma tlẹ dona dè nugbo pò do dọ gba. Biblu dọmọ: “Nọ dọ nugbo.” E sọ yidogọ dọ: “Mì dolalo na mìnọzo blo.” Jehovah nọ dọ nugbo to whepoponu, podọ e nọ donukun dọ mí ni wà nudopolọ.⁠—Efesunu lẹ 4:25; Kọlọsinu lẹ 3:9.