Mí Sọgan Fọnsọnku!

EYIN mí kú, be Jiwheyẹwhe na jlo nado fọ́n mí sọnku, kavi hẹn mí gọwá ogbẹ̀ ya?⁠— Dawe nugbonọ lọ he yin Job yise dọ Jiwheyẹwhe jlo nado wàmọ. Enẹ zọ́n bọ whenuena Job lẹndọ okú emitọn ko sẹpọ, e dọna Jiwheyẹwhe dọmọ: “Hiẹ na ylọ yẹn nasọ siọ we.” Job dọ dọ Jehovah Jiwheyẹwhe na yiwanna, kavi tindo ojlo vẹkuvẹku nado fọ́n emi sọnku.—Job 14:14, 15.

Jesu lọsu nọ yinuwa taidi Otọ́ etọn, Jehovah Jiwheyẹwhe. Jesu jlo nado gọalọna mí. To whenuena dawe he to pòzọ̀n jẹ de dọna ẹn dọ, ‘Eyin hiẹ jlo, hẹn mi zun wiwe,’ Jesu gblọn dọ: ‘Yẹn jlo.’ Podọ e hẹnazọ̀ngbọna dawe he to pòzọ̀n jẹ lọ.—Malku 1:40-42.

Jesu plọn sọn Otọ́ etọn dè nado yiwanna yọpọvu lẹ. To ojlẹ dindẹn lẹ die, whlaawe wẹ Jehovah yí devizọnwatọ etọn lẹ zan nado fọ́n yọpọvu lẹ sọnku. Elija vẹ̀ Jehovah nado fọ́n visunnu yọnnu he wadagbe na Elija tọn de sọnku. Podọ Jehovah sọ wàmọ. Jehovah sọ yí devizọnwatọ etọn Eliṣa zan nado fọ́n visunnu pẹvi de sọnku.—1 Ahọlu lẹ 17:17-24; 2 Ahọlu lẹ 4:32-37.

Be e mayin ayajẹnu de wẹ e yin nado yọnẹn dọ Jehovah yiwanna mí taun ya?⁠— E mayin whenue mí tin to ogbẹ̀ kẹdẹ wẹ e nọ flin mí gba. E sọ nọ flin mí eyin mí tlẹ ko kú. Jesu dọ dọ Otọ́ emitọn tlẹ nọ pọ́n oṣiọ he e yiwanna lẹ taidi dọ yé gbẹ́ pò to ogbẹ̀ nkọtọn! (Luku 20:38) Biblu dọ dọ ‘okú, kavi ogbẹ̀, kavi onú whenu he tọn lẹ, kavi onú he ja lẹ ma na tin sọgan nado klan mí sọn owanyi Jiwheyẹwhe tọn go.’—Lomunu lẹ 8:38, 39.

To whenuena Jesu to aigba ji, e dohia dọ Jehovah nọ hò ovi pẹvi lẹ tọn pọ́n. Hiẹ na flin dọ Jesu yí whenu zan nado dọ ohó Jiwheyẹwhe tọn na ovi flinflin lẹ. Ṣigba be a yọnẹn dọ Jiwheyẹwhe na huhlọn Jesu nado fọ́n yọpọvu lẹ sọnku ya?⁠— Dike mí ni dọhodo viyọnnu Jailu tọn heyin owhe-12-mẹvi he Jesu fọnsọnku lọ ji.

Jailu po asi etọn po tindo viyọnnu dopo akàn bo nọ nọ̀ sẹpọ Ohù Galili tọn. Viyọnnu pẹvi lọ bẹ azọ̀n sinsinyẹn de to gbèdopo, bọ Jailu mọdọ awutu lọ na hù i. Ṣigba e flin Jesu, yèdọ dawe azọ́njiawu-watọ lọ he Jailu ko sè dọ e sọgan hẹnazọ̀ngbọnamẹ. Enẹwutu Jailu yì nado dín in mọ. E mọ Jesu to Ohù Galili tọn tó, bọ e to mẹplọn to finẹ.

Jailu tẹnpọn bo dín ali gbọn gbẹtọgun lọ ṣẹnṣẹn bo yì jẹklo to Jesu nukọn. Bo dọna Jesu dọmọ: ‘Viyọnnu ṣie pẹvi to azọ̀njẹ sinsinyẹn. Yẹn vẹ̀ we, be a sọgan wá gọalọna ẹn ya?’ To afọdopolọji, Jesu hodo Jailu. Gbẹtọgun he tin to finẹ po Mẹplọntọ Daho lọ po lẹ lọsu hodo yé. Ṣigba to whenuena yé yì nukọn vude, sunnu delẹ wá sọn owhé Jailu tọn gbè bo dọna ẹn dọ: “Viyọnnu towe ko kú, etẹwẹ hiẹ sọ to tuklado Mẹplọntọ na ba?”

Jesu gblató nuhe dawe lọ lẹ dọ. E yọ́n lehe awubla Jailu tọn sù sọ nado hẹn ovi dopo akàn etọn bu. Enẹwutu e dọna ẹn dọmọ: ‘A dibu blo. Saa ko tindo yise to Jiwheyẹwhe mẹ poun, viyọnnu towe nasọ jẹgangan.’ Yé to yìyì kaka yé do jẹ owhé Jailu tọn gbè. Họntọn whẹndo lọ tọn lẹ ko to avivi to finẹ. Yé to awubla na ovi pẹvi lọ ko kú wutu. Ṣigba Jesu dọna yé dọmọ: ‘Mì gbọ avivi. Viyọnnu pẹvi lọ ma kú gba, ṣigba amlọndọ wẹ e te.’

To whenuena Jesu dọmọ, gbẹtọ lẹ jẹ kikò e ji, na yé yọnẹn dọ viyọnnu lọ ko kú. Ṣigba etẹwẹ hiẹ lẹndọ e na ko zọ́n bọ Jesu do dọ dọ e to amlọndọ?⁠— Etẹwẹ a lẹndọ Jesu jlo na plọn gbẹtọ lẹ?⁠— E jlo dọ yé ni yọnẹn dọ okú sọgan yin yiyijlẹdo amlọn yìkànmẹ sisosiso de go. E jlo na plọn yé dọ emi sọgan yí huhlọn Jiwheyẹwhe tọn zan nado hẹn mẹhe ko kú lẹ gọwá ogbẹ̀ kẹdẹdile e nọ bọawu na mí nado fọ́n mẹde sọn amlọn mẹ do.

Jesu dọna mẹlẹpo nado tọ́nsọn ohọ̀ lọ mẹ, bọ e pò apọsteli etọn Pita, Jakobu po Johanu po gọna mẹjitọ viyọnnu lọ tọn lẹ kẹdẹ. Enẹgodo e yì abò he mẹ ovi lọ te. E hẹn alọ go na ẹn bo dọmọ: ‘Viyọnnu, fọnṣite!’ Podọ e fọnṣite to afọdopolọji bo jẹ zọnlinzin ji! Homẹhun otọ́ po onọ̀ viyọnnu lọ tọn po taun.—Malku 5:21-24, 35-43; Luku 8:40-42, 49-56.

Todin lẹnnupọndo ehe ji. Eyin Jesu penugo bo hẹn viyọnnu pẹvi enẹ gọwá ogbẹ̀, be e sọgan wà onú dopolọ na mẹdevo lẹ ya?⁠— Be a lẹndọ e na wàmọ nugbonugbo ya?⁠— Mọwẹ, e na wàmọ. Jesu lọsu dọmọ: “Ojlẹ lọ ja, to ehe mẹ mẹhe tin to yọdo mẹ lẹpo na sè ogbè [ṣie], bo na tọ́njẹgbonu.”—Johanu 5:28, 29.

Be a lẹndọ Jesu nọ jlo nado fọ́n gbẹtọ lẹ sọnku ya?⁠ — Apajlẹ devo to Biblu mẹ gọalọna mí nado mọ gblọndo kanbiọ enẹ tọn. Nuhe jọ to gbèdopo sẹpọ otò Naini tọn mẹ do numọtolanmẹ Jesu tọn na mẹhe to aluẹmẹ lẹ hia.

Yọnnu de zọnpọ hẹ gbẹtọgun de sọn otò Naini tọn mẹ bo jei oṣiọ visunnu etọn tọn di gbé. Asu yọnnu lọ tọn ko kú wayi, podọ todin ovi etọn dopo akàn lọ lọsu sọ kú. Lehe awubla etọn sù do sọ! Mẹsusu wẹ hodo e sọn Naini dile yé ze oṣiọ visunnu etọn tọn jei tòdaho lọ godo. Yọnnu lọ to avivi badabada bọ gbẹtọ lẹ ma penugo nado miọnhomẹna ẹn.

To gbènẹgbè, Jesu po devi etọn lẹ po ja otò Naini tọn mẹ. To whenuena yé sẹpọ họngbó otò lọ tọn, yé dukosọhẹ gbẹtọgun he jei oṣiọ visunnu lọ tọn di gbé lẹ. To whenuena Jesu mọ yọnnu he to avivi lọ, lẹblanu whàn ẹn. Awubla sisosiso yọnnu lọ tọn yinuwado Jesu ji. E jlo nado gọalọna ẹn.

Enẹwutu Jesu yí awuvẹmẹ do dọho ṣigba bo do nujikudo hia nado hẹn yọnnu lọ dotoai, e dọna ẹn dọ: “A sọ viavi blo.” Nuyiwa etọn hẹn mẹlẹpo nado jẹ pinpọn ẹn ji tlíntlín. Dile Jesu yì oṣiọ lọ kọ̀n, e na ko paṣa mẹlẹpo nuhe e jlo na wà taun. Jesu degbè dọmọ: “Visunnu, yẹn dọ hlan we, Fọ́n.” E sọ fọ́n sinai to afọdopolọji! Podọ e sọ jẹ hodọ ji.—Luku 7:11-17.

Pọ́n lehe ayajẹ yọnnu lọ tọn na ko sù sọ! Nawẹ homẹ towe na hùn sọ nado dokuavọna mẹyiwanna towe he ko kú de wá ogbẹ̀?⁠— Be ehe ma dohia dọ Jesu yiwanna gbẹtọ lẹ nugbo bosọ nọ jlo nado gọalọna yé ya?⁠— Saa pọ́n lehe e na vivi namẹ do sọ to aihọn yọyọ Jiwheyẹwhe tọn mẹ nado dokuavọna gbẹtọ lẹ gọwá ogbẹ̀!—2 Pita 3:13; Osọhia 21:3, 4.

Delẹ to mẹhe na fọnsọnku to whenẹnu lẹ mẹ na yin mẹhe mí yọnẹn dai lẹ, po ovi flinflin lẹ po. Mí na yọ́n yé kẹdẹdile Jailu yọ́n viyọnnu etọn to whenuena Jesu fọ́n ẹn sọnku do. Mẹdevo lẹ na yin mẹhe ko kú sọn owhe kanweko susu kavi owhe fọtọ́n susu die wayi lẹ. Ṣigba Jiwheyẹwhe ma na wọ̀n yé gba mahopọnna dọ yé ko nọgbẹ̀ to ojlẹ dindẹn die.

Be e mayin ayajẹnu de wẹ e yin nado yọnẹn dọ Jehovah Jiwheyẹwhe po Ovi etọn Jesu po yiwanna mí sọmọ ya?⁠— Yé jlo dọ mí ni nọgbẹ̀, e mayin na owhe vude poun gba, ṣigba kakadoi!