Jiwheyẹwhe Ma Wọnji Ovi Etọn Go

JESU viavi to whenuena họntọn etọn Lazalọsi kú. Be hiẹ ma lẹndọ Jehovah lọsu blawu to whenuena Jesu jiya bo kú wẹ ya?⁠— Biblu dọ dọ nujijọ de sọgan hẹn ‘homẹgble’ Jiwheyẹwhe bo tlẹ sọgan hẹn ‘awufiẹsa’ wá na ẹn.—Psalm 78:40, 41; Johanu 11:35.

Be a sọgan mọ lehe awufiẹsa Jehovah tọn na ko sù sọ dile e to Ovi yiwanna etọn pọ́n bọ e to kúkú?⁠— Jesu deji dọ Jiwheyẹwhe ma na wọn emi gba. Enẹ wẹ zọ́n bọ e do zan hogbe ehelẹ whẹpo do kú dọmọ: “Otọ́, alọ towe mẹ wẹ yẹn jo [ogbẹ̀] ṣie do.”—Luku 23:46.

Jesu deji dọ emi na yin finfọnsọnku dandan, dọ emi ma na yin jijodo “kutomẹ,” kavi yọdo mẹ kakadoi gba. To whenuena Jesu ko yin finfọnsọnku godo, apọsteli Pita yihodọ sọn nuhe yin kinkàndai to Biblu mẹ gando Jesu go mẹ, dọmọ: ‘Yè ma jo e do kutomẹ gba, mọ agbasa etọn masọ mọ ogble.’ (Owalọ lẹ 2:31; Psalm 16:10) Agbasa Jesu tọn ma dẹn to yọdo mẹ sọmọ nado gble bo lunwán gba.

To whenuena Jesu pò to aigba ji, e tlẹ ko dọna devi etọn lẹ dọ emi ma na yin oṣiọ na ojlẹ dindẹn gba. E basi zẹẹmẹ dọ emi na ‘yin hùhù, podọ to azán atọ̀ntọ gbè, emi na yin finfọ́n do ogbẹ̀.’ (Luku 9:22) Enẹwutu, na nugbo tọn, e ma dona ko paṣa devi etọn lẹ gba to whenuena Jesu yin finfọnsọnku. Ṣigba be e paṣa yé ya?⁠— Dike mí ni pọ́n.

Nudi ogàn atọ̀n mẹ to Ahọluzangbe whèmẹ wẹ Mẹplọntọ Daho lọ kú to yatin ji. Josẹfu, dawe adọkunnọ de he yin hagbẹ Tohodọtọ Ju lẹ tọn, ko yise to Jesu mẹ ṣigba bo ma ko do e hia to gbangba. To whenuena e mọdọ Jesu ko kú, e yì Pilati, togán Lomu tọn dè, bo biọgbè nado ze oṣiọ Jesu tọn jẹte sọn atin lọ ji nado di i. Enẹgodo, Josẹfu ze oṣiọ Jesu tọn yì jipa de mẹ fie yọdo de tin te, fie oṣiọ lẹ nọ yin didi do.

To whenuena oṣiọ lọ ko yin zizedo yọdo lọ mẹ, zannu daho de yin bibli do e ji. Bọ yọdo lọ yin nuṣinyọndo. To whenuena e jẹ azán atọ̀ntọ gbè, he yin Sẹgbe to afọnnu fuu, nukunmamọnu. Sunnu lẹ gbẹ́ pò to finẹ bo to yọdo lọ ṣọ́. Yẹwhenọ daho lẹ wẹ ze yé do finẹ nado ṣọ́ yọdo lọ. Be a yọ́n nuhewutu wẹ ya?⁠—

Yẹwhenọ lẹ lọsu ko sè dọ Jesu dọ emi na yin finfọnsọnku. Enẹwutu yẹwhenọ lẹ ze sunnu lọ lẹ do finẹ nado ṣọ́ yọdo lọ na devi Jesu tọn lẹ ni ma wá fìn oṣiọ Jesu tọn ze sọn yọdo lọ mẹ bo na dọ dọ e ko fọnsọnku blo. Ṣigba to ajijimẹ, aigba jẹ sisọsisọ ji. Hinhọ́n sọ tá gblegede to zinvlu lọ mẹ. Angẹli Jehovah tọn de wẹ! Awhànfuntọ lọ lẹ dibu sọmọ bọ yé ma sọgan sẹtẹn. Angẹli lọ yì yọdo lọ kọ̀n bo bli zannu lọ sẹ̀. Yọdo lọ sọ jẹvọ́!

Mọwẹ, e jọ pẹpẹ dile apọsteli Pita dọ to godo mẹ do dọ: “Jesu he lọ wẹ Jiwheyẹwhe ze tite.” (Owalọ lẹ 2:32) Jiwheyẹwhe fọ́n Jesu dogbẹ̀ bo na ẹn agbasa he nkọ e tindo to olọn mẹ whẹpo do wá aigba ji. Jesu yin finfọn po agbasa gbigbọnọ de po taidi angẹli lẹ tọn nkọ. (1 Pita 3:18) Enẹwutu whẹpo gbẹtọ lẹ nado mọ Jesu, e dona ze agbasa gbẹtọ tọn de dó whẹ́. Be e ka wàmọ nugbo ya?⁠— Gbọ mí ni pọ́n.

Todin owhè ko to zizẹ. Bọ awhànfuntọ he to yọdo lọ ṣọ́ lẹ ko yì. Malia Magdaleni po yọnnu devo lẹ po he yin devi Jesu tọn lẹ jei yọdo lọ kọ̀n. Yé to didọ to yedelẹ ṣẹnṣẹn dọ: ‘Mẹnu wẹ na bli zannu daho enẹ sẹ̀ na mí?’ (Malku 16:3) Ṣigba whenuena yé jẹ yọdo lọ kọ̀n, zannu lọ ko yin bibli sẹ̀. Etẹ nkọ, yọdo lọ ko jẹvọ́! Agbasa Jesu tọn masọ tin to e mẹ ba! To afọdopolọji, Malia Magdaleni họ̀nwezun nado yì dín apọsteli Jesu tọn delẹ mọ.

Yọnnu he pò lẹ ṣite do yọdo lọ kọ̀n. E paṣa yé dọ: ‘Fie wẹ agbasa Jesu tọn tin te?’ Ṣigba to ajijimẹ sunnu awe he dó avọ̀ he to sisẹ́ mlánmlán lẹ sọawuhia yé. Angẹli lẹ wẹ yé yin! Yé dọna yọnnu lọ lẹ dọmọ: ‘Etẹwutu mì to Jesu dín tofi? E ko yin finfọn do ogbẹ̀. Mì yawu yì bo dọna devi etọn lẹ.’ Eyọn, hiẹ lọsu sọgan yí nukun homẹ tọn do pọ́n lehe yọnnu lọ lẹ na ko họ̀nwezun sọ! Ṣigba dawe de pé yé to aliho ji. Be a yọ́n dawe lọ ya?⁠—

Jesu lọsu wẹ, e ko ze agbasa gbẹtọ tọn dó! E sọ dọna yọnnu lọ lẹ dọmọ: ‘Mì yì dọna devi ṣie lẹ.’ Homẹ yọnnu lọ lẹ tọn hùn taun. Yé dín devi lẹ mọ bo dọna yé dọ: ‘Jesu ko fọ́n! Míwlẹ mọ ẹn!’ Malia ko dọna Pita po Johanu po dọ yọdo lọ ko jẹvọ́. Enẹwutu yelọsu yì pọ́n yọdo lọ dile a to mimọ do tofi. Yé yí sọwhiwhe do pọ́n alavọ he yè hizí do Jesu, ṣigba yé ma yọ́n nuhe yé sọgan dọ. Yé jlo na yise dọ Jesu ko fọ́n, ṣigba enẹ taidi nuhe jiawu hugan nado yin nugbo.

To whèjai Sẹgbe enẹ tọn, Jesu sọawuhia awe to devi etọn lẹ mẹ he to zọnlinzin to aliho ji jei otò Emausi tọn mẹ. Jesu zọnhẹ yé to aliji bo dọhodopọ hẹ yé, ṣigba yé ma yọnẹn dọ ewọ wẹ, na agbasa etọn ma yin nudopolọ po dehe e tindo dai po. Kakajẹ whenue Jesu dùnú dopọ hẹ yé bo hodẹ̀ na yé, whenẹnu wẹ yé wá yọnẹn dọ ewọ wẹ. Homẹ devi lọ lẹ tọn hùn sọmọ bọ yé họ̀nwezun na kilomẹtlu susu lẹkọyi Jelusalẹm! Vlavo to ehe godo tlolo wẹ Jesu sọawuhia Pita nado dohia ẹ dọ Emi ko fọ́n do ogbẹ̀.

Enẹgodo to Sẹgbe whèjai lọ, devi susu pli do abò de mẹ. Ohọ̀n lẹ to súsú. Ṣigba to ajijimẹ Jesu sọawuhia to ṣẹnṣẹn yetọn to abò lọ mẹ! Todin yé yọnẹn dọ Mẹplọntọ Daho lọ ko gọwá ogbẹ̀ whladopo dogọ nugbo. Pọ́n lehe ayajẹ yetọn na ko sù sọ!—Matiu 28:1-15; Luku 24:1-49; Johanu 19:38–20:21.

Jesu sọawuhia gbẹtọ lẹ to agbasa gbẹtọ tọn voovo lẹ mẹ na azán 40 nado dohia devi etọn lẹ dọ emi ko gọwá ogbẹ̀. Enẹgodo e tọ́nsọn aigba ji bo lẹkọyi Otọ́ etọn dè to olọn mẹ. (Owalọ lẹ 1:9-11) To enẹgodo tlolo, devi etọn lẹ jẹ didọna mẹlẹpo ji dọ Jiwheyẹwhe ko fọ́n Jesu sọnku. To whenuena yẹwhenọ lẹ tlẹ hò yé bo hù delẹ to yé mẹ, yé ma doalọtena yẹwhehodidọ. Yé yọnẹn dọ eyin emi tlẹ kú, Jiwheyẹwhe na flin yé kẹdẹdile e flin Ovi etọn do.

Lehe hodotọ Jesu tọn whenẹnu tọn lẹ gbọnvona mẹsusu do sọ to egbehe! To adà aihọn lọ tọn delẹ ji, gbẹtọ lẹ to egbehe ma nọ lẹn nudevo depope hú azui Paaki tọn po azìn Paaki tọn lẹ po poun to owhe dopodopo mẹ to ojlẹ he mẹ Jesu yin finfọnsọnku te. Ṣigba Biblu ma dọ nudepope gando azui po azìn Paaki tọn lẹ po go gba. Jiwheyẹwhe sinsẹ̀n go wẹ e dọhodo.

Mí sọgan hodo apajlẹ devi Jesu tọn lẹ tọn gbọn didọna gbẹtọ lẹ dali dọ Jiwheyẹwhe wà onú jiawu de to whenuena e fọ́n Ovi etọn sọnku. Mí ma dona dibu gbede, eyin gbẹtọ lẹ tlẹ dọ dọ yé na hù mí. Eyin mí tlẹ kú, Jehovah na flin mí bo fọ́n mí sọnku, kẹdẹdile e fọ́n Jesu do.

Be homẹ mítọn ma hùn dọ Jiwheyẹwhe na flin mẹhe sẹ̀n ẹn lẹ bo na tlẹ fọ́n yé sọnku ya?⁠— Ehelẹ yinyọnẹn dona whàn mí nado dindona lehe mí sọgan hẹn homẹ Jiwheyẹwhe tọn hùn gbọn. Be a yọnẹn dọ mí sọgan hẹn homẹ etọn hùn nugbo ya?⁠— Gbọ mí ni dọhodo ehe ji to weta he bọdego mẹ.