Lehe Mí Sọgan Hẹn Homẹ Jiwheyẹwhe Tọn Hùn Do

ETẸWẸ mí sọgan wà nado hẹn homẹ Jiwheyẹwhe tọn hùn? Etẹwẹ mí sọgan na ẹn?⁠— Jehovah dọmọ: “Ṣie wẹ kanlin he tin to ozùn mẹ lẹpo.” E sọ yidogọ dọmọ: “Ṣie wẹ fataka, podọ ṣie wẹ sika.” (Psalm 24:1; 50:10; Hagai 2:8) Etomọṣo, nude tin he mí sọgan na Jiwheyẹwhe. Etẹwẹ nulọ?⁠—

Jehovah na dotẹnmẹ mí nado basi dide eyin mí na sẹ̀n ẹn kavi lala. E ma nọ yí huhlọn do hẹn mí nado wà nuhe e jlo dọ mí ni wà lẹ gba. Gbọ mí ni pọ́n nuhewutu Jiwheyẹwhe do dá mí to aliho enẹ mẹ na mí nido sọgan basi dide eyin mí na sẹ̀n ẹn kavi lala.

Vlavo a yọnẹn dọ maṣinu delẹ tin he nọ wàzọn taidi gbẹtọ. Maṣinu mọnkọtọn lẹ yin bibasi na yé nido wà nudepope he gbẹtọ jlo dọ yé ni wà. Maṣinu lọ lẹ ma sọgan deanana yedelẹ gba. Jehovah sọgan ko basi mímẹpo di maṣinu mọnkọtọn lẹ. E sọgan ko basi mí to aliho de mẹ nado nọ wà nuhe e jlo dọ mí ni wà lẹ kẹdẹ. Ṣigba Jiwheyẹwhe ma wàmọ gba. Be a yọ́n nuhe zọ́n ya?⁠— Aihundanu delẹ nọ taidi maṣinu he mí ṣẹṣẹ dọho etọn lẹ. To whenuena aihundanu lọ yin anadena, e nọ wà nuhe mẹhe basi i ko wleawuna ẹn nado wà lẹ. Be a ko mọ aihundanu mọnkọtọn de pọ́n ya?⁠— Apọ̀ nọ yawu ṣì gbẹtọ nado nọ yí aihundanu lọ zan nado nọ to onú dopolọ vọ́ basi to whepoponu dile basitọ etọn ko basi i do. Jiwheyẹwhe ma jlo dọ mí ni nọ setonuna ẹn bo nọ sẹ̀n ẹn di maṣinu he ko yin awuwlena nado wàmọ de gba. Jehovah nọ jlo dọ mí ni sẹ̀n ẹn na mí yiwanna ẹn podọ na mí jlo nado setonuna ẹn wutu.

Etẹwẹ a lẹndọ e na yin numọtolanmẹ Otọ́ mítọn olọn mẹ tọn eyin mí setonuna ẹn sọn ojlo mẹ wá?⁠— Eyọn, nawẹ a lẹndọ aliho he mẹ a yinuwa te lẹ nọ yinuwado mẹjitọ towe lẹ ji gbọn?⁠— Biblu dọ dọ ovi nuyọnẹntọ nọ hẹn “homẹhun otọ́ etọn” ṣigba ovi nulunọ “wẹ awubla onọ̀ etọn tọn.” (Howhinwhẹn lẹ 10:1) Be a doayi e go dọ homẹ onọ̀ towe po otọ́ towe po tọn nọ hùn to whenuena a wà nuhe yé zọ́n we lẹ ya?⁠— Ṣigba nawẹ yé nọ yinuwa gbọn to whenuena a vẹtoli na yé?⁠—

Todin, dike mí ni lẹnnupọndo Otọ́ mítọn olọn mẹ tọn, Jehovah ji. E dọ lehe mí sọgan hẹn homẹ etọn hùn do na mí. Jaale, ze Biblu towe bo hùn Howhinwhẹn lẹ 27:11. Jiwheyẹwhe wẹ to hodọna mí to finẹ dọmọ: ‘Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.’ Be a yọ́n nuhe e zẹẹmẹdo nado vlẹ mẹde kò ya?⁠— Nado vlẹ mẹde zẹẹmẹdo nado ṣàn mẹlọ kò bo dọ dọ e ma penugo nado wà nuhe e dọ emi na wà. Nawẹ Satani vlẹ Jehovah kò gbọn?⁠— Dike mí ni pọ́n.

Flindọ, mí plọn to Weta 8tọ owe ehe tọn mẹ dọ Satani jlo nado yin Nukọntọ podọ e sọ jlo dọ mẹlẹpo ni nọ setonuna ẹn. Satani dọ dọ na ogbẹ̀ madopodo he Jehovah jlo na na gbẹtọ lẹ wẹ zọ́n poun bọ yé do to Jehovah sẹ̀n. To whenuena Satani ko klọ Adam po Evi po nado vẹtoli na Jehovah godo, Satani diọavunnukunsọ Jiwheyẹwhe. E dọna Jiwheyẹwhe dọ: ‘Dagbe he gbẹtọ lẹ to mimọyi sọn dè we wẹ zọ́n bọ yé do to sinsẹ̀n we. Eyin a na mi dotẹnmẹ, yẹn sọgan hẹn mẹlẹpo nado gbẹ́ we dai.’

Nugbo wẹ dọ hogbe ehelẹ pẹpẹ ma tin to Biblu mẹ gba. Ṣigba eyin mí hia otàn Job tọn, mí na mọdọ Satani dọ onú mọnkọtọn na Jiwheyẹwhe. Na nugbo tọn, whẹho titengbe de wẹ e yin na Satani podọ na Jehovah eyin Job yin nugbonọ na Jiwheyẹwhe kavi lala. Dike mí ni hùn Biblu mítọn do Job weta 1 po 2 po nado pọ́n nuhe jọ.

Doayi e go to Job weta 1 mẹ dọ Satani lọsu tin to olọn mẹ to whenuena angẹli lẹ wá Jehovah nukọn. Enẹwutu Jehovah kanse Satani dọ: “Fie wẹ hiẹ sọn wá?” Satani gblọn dọ emi to sadi lẹdo aigba pé. Enẹgodo Jehovah kanse e dọ: ‘Be a ko doayi Job go dọ e nọ sẹ̀n mi bo ma nọ wà onú ylankan de ya?’—Job 1:6-8.

To afọdopolọji, Satani dín whẹjijọ lẹ. ‘Job to sinsẹ̀n we na e ma tindo nuhahun depope wutu. Eyin a doalọtena hihọ́-basinamẹ towe bo masọ dona ẹn ba, e na gbẹ́ we dai to nukun towe lẹ mẹ.’ Enẹwutu Jehovah gblọn dọ: ‘Eyọn, Satani, hiẹ sọgan wà nuhe jlo we lẹpo na ẹn, ṣigba ma doalọ Job lọsu go blo.’—Job 1:9-12.

Etẹwẹ Satani wà?⁠— E zedo ahun mẹ na gbẹtọ lẹ nado fìn oyìn po kẹtẹkẹtẹ Job tọn lẹpo po bo hù kanlinyìntọ etọn lẹ. Enẹgodo hẹviosò de abì bo hù lẹngbọ etọn lẹ po mẹhe nọ penukundo yé go lẹ po. Enẹgodo, gbẹtọ lẹ wá bo fìn kanklosọpoawenọ etọn lẹ bosọ hù mẹhe to nukunpedo yé go lẹ. Podọ to godomẹ, Satani hẹn jẹhọn ahizi de nado yìn bo họ́ ohọ̀ he mẹ ovi Job tọn ao lẹpo te, bo hù yemẹpo dopọ. Mahopọnna ehe lẹpo, Job gbẹ́ to Jehovah sẹ̀n.—Job 1:13-22.

To whedevonu he Jehovah mọ Satani, Jehovah dọna ẹn dọ Job gbẹ́ hẹn tenọgli etọn go. Satani sọ vọ́ whẹjijọ lẹ dín dọmọ: ‘Eyin a na dotẹnmẹ mi nado sayana agbasa etọn, ewọ na gbẹ́ we dai to nukun towe lẹ mẹ.’ Enẹwutu Jehovah na dotẹnmẹ Satani nado sayana agbasa Job tọn ṣigba e kọ́ na ẹn ma nado hù Job.

Satani hẹn agbasa Job tọn gọna nútitẹ. Agbasa etọn yọ̀n bo nọ lunwan sọmọ bọ mẹdepope ma jlo nado sẹpọ ẹ ba. Asi Job tọn lọsu tlẹ dọna ẹn dọ: “Gbẹ́ Jiwheyẹwhe dai, bo kú.” Mẹhe dọ dọ yé yin họntọn Job tọn lẹ lọsu dla ẹ pọ́n bo hẹn homẹgble e tlala gbọn didọna ẹn dali dọ ylando sinsinyẹn de wẹ e ko wà wẹ zọ́n bọ nuhahun ehe lẹpo do to wiwá e ji. Ṣigba mahopọnna nuhahun po awufiẹsa lẹpo he Satani hẹnwa Job ji po, Job zindonukọn bo to Jehovah sẹ̀n po nugbonọ-yinyin po.—Job 2:1-13; 7:5; 19:13-20.

Etẹwẹ a lẹndọ e na yin numọtolanmẹ Jehovah tọn na nugbonọ-yinyin Job tọn?⁠— E hẹn homẹ etọn hùn, na Jehovah penugo nado dọna Satani dọ: ‘Pọ́n Job! E to sinsẹ̀n mi na e jlo nado wàmọ wutu.’ Be hiẹ na taidi Job, mẹhe Jehovah sọgan dlẹnalọdo taidi apajlẹ de he do Satani hia di lalonọ ya?⁠— Na nugbo tọn, lẹblanulọkẹyi de wẹ e yin na mí nado wleawu gblọndo tọn na lalo Satani tọn dọ emi penugo nado lẹ́ mẹlẹpo sọn Jehovah sinsẹ̀n mẹ. Na nugbo tọn, Jesu pọ́n ehe di lẹblanulọkẹyi de.

Mẹplọntọ Daho lọ ma dike Satani ni hẹn ẹn nado wà nudepope he ylan gba. Yí nukun homẹ tọn do pọ́n lehe apajlẹ etọn na ko hẹn homẹ Otọ́ etọn tọn hùn sọ! Jehovah sọgan dlẹnalọdo Jesu bo gblọnna Satani dọ: ‘Pọ́n Ovi ṣie! E yin nugbonọ mlẹnmlẹn hlan mi na e yiwanna mi wutu!’ Sọ yí nukun homẹ tọn do pọ́n ayajẹ he Jesu na ko tindo to homẹ Otọ́ etọn tọn hinhẹn hùn mẹ. Na ayajẹ enẹ wutu, Jesu tlẹ doakọnna okú to yatin ji.—Heblu lẹ 12:2.

Be hiẹ lọsu jlo na taidi Mẹplọntọ Daho lọ nado hẹn homẹ Jehovah tọn hùn ya?⁠— Eyin mọwẹ, zindonukọn nado to nuhe Jehovah jlo dọ a ni wà lẹ plọn, bo nọ basi yé nado hẹn homẹ etọn hùn!