Weta 42

Nuhewutu Mí Dona Nọ Wazọ́n

ETẸWẸ nọ jlo we hugan nado wà, azọ́n kavi aihun?⁠— Na nugbo tọn, nudepope ma ylan to aihundida mẹ gba. Biblu dọ dọ Jelusalẹm “tin gọ́ na yọpọ sunnu lẹ po yọpọ yọnnu lẹ po to aihunda to alihogbó etọn lẹ ji.”—Zekalia 8:5.

Homẹ Mẹplọntọ Daho lọ tọn nọ hùn nado mọ yọpọvu lẹ to aihunda. Whẹpo e do wá aigba ji, e dọmọ: “Yẹn tin to [Jiwheyẹwhe] dè di azọ́nwatọgan de . . . yẹn to ayajẹ whepoponu to nukọn etọn.” Doayi e go dọ Jesu yin azọ́nwatọ de hẹ Jehovah to olọn mẹ. Podọ to whenuena e to olọn mẹ, e dọmọ: “Homẹhunhun ṣie sọ tin to ovi gbẹtọ tọn lẹ mẹ.” Dile mí ko plọn wayi do, Mẹplọntọ Daho lọ tindo ojlo taun to mẹlẹpo mẹ, gọna yọpọvu lẹ ga.—Howhinwhẹn lẹ 8:30, 31.

Etẹwẹ Mẹplọntọ Daho lọ duvivi etọn whẹpo do wá aigba ji?

Be a yọnẹn eyin Jesu nọ daihun to whenuena e pò to ovu?⁠— Vlavo e nọ wàmọ. Ṣigba to whenuena e yindọ “azọ́nwatọgan de” wẹ dai to olọn mẹ, be ewọ sọ wazọ́n to aigba ji ya?⁠— Jesu yin yiylọdọ “visunnu atinpatọ tọn.” Ṣigba ewọ lọsu sọ yin yiylọdọ “atinpatọ” ga. Etẹwẹ ehe dohia?⁠— E dohia dọ Josẹfu he pọ́n Jesu go whẹ́n taidi ovi etọn titi dona ko plọnazọn ẹn. Enẹwutu Jesu lọsu lẹzun atinpatọ de.—Matiu 13:55; Malku 6:3.

Atinpatọ nankọ wẹ Jesu yin?⁠— To whenuena e yindọ azọ́nwatọgan de wẹ e yin to olọn mẹ dai, be a ma lẹndọ e sọ yin atinpatọ azọ́nyọnẹntọ de to aigba ji ga?⁠— Pọ́n lehe azọ́n atinpatọ tọn nọ vẹawu sọ to whenẹnu. Vlavo Jesu dona yì gbò atin lẹ to zùnmẹ, bo zẹ̀ yé do flinflin, bosọ bẹ yé wá whégbè, whẹpo do yí ì zan nado basi tafo, oján, kavi nuyizan devo lẹ.

Be a lẹndọ homẹ nọ hùn Jesu to azọ́n ehe kọ̀n ya?⁠— Be homẹ towe ma na hùn eyin hiẹ lọsu sọgan nọ basi tafo dagbe lẹ po oján lẹ po, kavi onú dagbe devo lẹ na mẹdevo lẹ ya?⁠— Biblu dọ dọ onú dagbe wẹ e yin na mẹde nado “to ayajẹ to azọ́n etọn titi mẹ.” Azọ́nwiwa nọ namẹ homẹhunhun he nkọtọn aihundida ma sọgan namẹ.—Yẹwhehodọtọ 3:22.

Na nugbo tọn, azọ́nwiwa nọ wà dagbe na apọ̀n po agbasa mítọn po. Ovi delẹ nọ sinai bo nọ to televiziọn pọ́n kavi nọ to aihunda hẹ họntọn lẹ poun. Bọ yé nọ wá lẹzun adidọnọ po tasinyẹntọ po, podọ yé ma nọ tindo ayajẹ. Podọ yé masọ nọ hẹn mẹdevo lẹ jaya gba. Etẹwẹ mí dona wà nado tindo ayajẹ?⁠—

Mí plọn to Weta 17tọ owe ehe tọn mẹ dọ nunamẹ po alọgigọna mẹdevo lẹ po nọ hẹn ayajẹ wá. (Owalọ lẹ 20:35) Biblu ylọ Jehovah dọ ‘Jiwheyẹwhe ayajẹnọ.’ (1 Timoti 1:11) Podọ, dile mí hia to Howhinwhẹn lẹ mẹ do, Jesu “to ayajẹ whepoponu to nukọn etọn.” Etẹwutu Jesu do to ayajẹ?⁠— E dọ dopo to nuhe zọ́n lọ lẹ mẹ to whenuena e dọmọ: “Otọ́ ṣie wazọ́n kakajẹ dinvie, yẹn sọ [to azọ́n wà].”—Johanu 5:17.

To whenuena Jesu to aigba ji, e mayin gbẹzan etọn lẹpo wẹ e yido wazọ́n di atinpatọ gba. Jehovah Jiwheyẹwhe de azọ́n vonọtaun de na ẹn nado wà to aigba ji. Be a yọ́n azọ́n lọ ya?⁠— Jesu dọmọ: ‘Yẹn dona lá wẹndagbe ahọluduta Jiwheyẹwhe tọn, na ehe wutu wẹ yẹn yin didohlan.’ (Luku 4:43) Eyin Jesu dọyẹwheho na gbẹtọ lẹ to whedelẹnu, yé nọ yí ì sè bo nọ dọ nuhe yé ko sè lẹ na mẹdevo lẹ, dile yọnnu Samalianu ehe a mọ tofi basi do.⁠—Johanu 4:7-15, 27-30.

Azọ́n voovo awe tẹlẹ wẹ Jesu wà to whenuena e to aigba ji?

Be Jesu yiwanna azọ́n ehe wiwà ya? Be a lẹndọ e nọ jlo nado wà ẹ ya?⁠— Jesu dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.” (Johanu 4:34) Nawẹ e nọ vivi na we sọ nado dù núdùdù he a yiwanna hugan?⁠— Mọwẹ e nọ vivi na Jesu lọsu do nado wà azọ́n he Jiwheyẹwhe dena ẹn.

Jiwheyẹwhe dá mí to aliho de mẹ bọ pinplọn nado wazọ́n nọ hẹn ayajẹ wá na mí. E dọ dọ nunina he Emi na gbẹtọ wẹ yindọ e ni ‘jaya to azọ́n etọn mẹ.’ Enẹwutu, eyin a plọn nado nọ wazọ́n to whenuena a to ovu, e na hẹn gbẹzan towe lẹpo yin ayajẹnọ dogọ.—Yẹwhehodọtọ 5:19.

Ehe ma zẹẹmẹdo dọ yọpọvu de sọgan wà azọ́n he mẹhomẹ de dona wà gba, ṣigba mímẹpo wẹ sọgan wà azọ́n. Mẹjitọ towe lẹ sọgan nọ yì azọ́n mẹ egbesọegbesọ nado sọgan mọ akuẹ nado na núdùdù whẹndo lọ bo wleawuna ohọ̀ he mẹ mì na nọ. Ṣigba hiẹ lọsu dona yọnẹn dọ, azọ́n susu wẹ tin to whégbè he dona yin wiwà nado hẹn owhé lọ gbè do wiweji po titoji po.

Azọ́n tẹlẹ wẹ a sọgan wà to whégbè he sọgan hẹn ale wá na whẹndo lọ blebu?⁠— A sọgan nọ bẹ agbán lẹ wá tafo he ji mì nọ dùnú te, klọ núdùgbán lẹ, yì kọ̀n ogbó, zà fie a nọ dọ́, bosọ nọ gọ̀ aihundanu towe lẹ do otẹn yetọn mẹ. Vlavo a to delẹ basi to onú ehelẹ mẹ. Alenu de wẹ azọ́n enẹlẹ wiwà yin na whẹndo lọ.

Naegbọn e do yin nujọnu nado gọ̀ aihundanu towe lẹ do otẹn yetọn mẹ to whenuena a ko daihun pó godo?

Gbọ mí ni pọ́n nuhewutu azọ́n mọnkọtọn lẹ do yin dona de. Aihundanu lẹ dona yin gigọ̀ do otẹn yetọn mẹ to whenuena a ko yí yé do daihun pó godo. Etẹwutu hiẹ lẹndọ ehe yin nujọnu?⁠— E nọ hẹn whégbè do wiweji, podọ e sọgan sọ zọ́n bọ owùnu ma na jọ to whégbè. Eyin a ma nọ gọ̀ aihundanu towe lẹ do otẹn yetọn mẹ, onọ̀ towe sọgan to zọnlinzin wá jei po agbàn po to alọmẹ, bo tùnafọ aihundanu de ji to ajijimẹ. E sọgan dídí bo jai bosọ gbleawu. Awugble lọ sọgan sinyẹn bọ e dona yì dotowhé. Enẹ na ylan taun, kavi e mayin mọwẹ?⁠— Enẹwutu eyin a nọ gọ̀ aihundanu towe lẹ do otẹn yetọn mẹ to whenuena a yí yé do daihun pó godo, alenu de wẹ e na yin na mẹlẹpo.

Azọ́n devo lẹ gbẹsọ tin he yọpọvu lẹ dona wà ga. Di apajlẹ, azọ́n wehọmẹ tọn lẹ. A nọ plọn wehihia to wehọmẹ. Wehihia nọ vivi na ovi delẹ, ṣigba e ma nọ bọawu na ovi devo lẹ. Ṣigba eyin etlẹ sinyẹn na we to bẹjẹeji, homẹ towe na hùn eyin a plọn bo yọ́n wehia ganji. Eyin a yọ́n wehia, onú dagbe susu wẹ tin he a sọgan plọn. A tlẹ sọgan penugo nado hia Biblu na dewe, he yin owe Jiwheyẹwhe tọn. Enẹwutu eyin a nọ wà azọ́n wehọmẹ tọn towe lẹ ganji, e na yin alenu de na we, kavi e mayin mọwẹ?⁠—

Mẹdelẹ tin he nọ họ̀nna azọ́n. Vlavo hiẹ lọsu yọ́n mẹde he nọ wàmọ. Ṣigba na Jiwheyẹwhe dá mí nado wazọ́n wutu, mí dona plọn lehe mí sọgan duvivi etọn do. Nawẹ Mẹplọntọ Daho lọ duvivi azọ́n etọn sọ?⁠— E nọ taidi núdùdù he e yiwanna hugan de dùdù nkọtọn. Podọ azọ́n tẹ hodọ wẹ e te?⁠— Enẹwẹ ohó Jehovah Jiwheyẹwhe tọn lilá na mẹdevo lẹ podọ lehe yé sọgan mọ ogbẹ̀ madopodo yí do.

Enẹwutu, nude die he sọgan gọalọna mí nado duvivi azọ́nwiwa tọn. Kanse dewe dọ, ‘Etẹwutu wẹ azọ́n ehe dona yin wiwà?’ Eyin a yọ́n nuhewutu nude do yin nujọnu, e na bọawu na we nado wà ẹ. Podọ eyin azọ́n lọ yin daho kavi pẹvi, tẹnpọn bo wà ẹ ganji. Eyin a wàmọ, a na mọ ayajẹ to azọ́n towe lẹ mẹ, kẹdẹdile Mẹplọntọ Daho mítọn basi do.

Biblu sọgan gọalọna mẹde nado lẹzun azọ́nwatọ dagbe. Hia nuhe Biblu dọ to Howhinwhẹn lẹ 10:4; 22:29; Yẹwhehodọtọ 3:12, 13 po Kọlọsinu lẹ 3:23 po mẹ.