Osin Và Aihọn de Sudo—Be Enẹ Nasọ Vọ́ Jọ Wẹ Ya?

BE HIẸ ko sè mẹde dọho gando opodo aihọn tọn go pọ́n ya?⁠— Mẹsusu nọ dọho gando ehe go to egbehe. Mẹsusu nọ lẹndọ aihọn lọ na yin vivasudo to awhàn de mẹ, to ehe mẹ gbẹtọ lẹ na yí bọmbu miyọnnọ lẹ zan te. Be a lẹndọ Jiwheyẹwhe na và aigba whanpẹnọ mítọn po olọn dagbedagbe mítọn po gọna sunwhlẹvu he nọ na hinhọ́n lẹ sudo pọ́n gbede wẹ ya?⁠—

Dile mí ko plọn do, Biblu dọho gando opodo aihọn tọn go. Biblu dọmọ: “Aihọn sọ to juju jei.” (1 Johanu 2:17) Be a lẹndọ opodo aihọn tọn na zẹẹmẹdo opodo aigba tọn wẹ ya?⁠— Lala, na Biblu dọ dọ Jiwheyẹwhe dá aigba ‘na mí nido nọ nọ̀ e mẹ,’ mọwẹ, yèdọ na gbẹtọ lẹ nido nọ nọ̀ e ji bo duvivi etọn. (Isaia 45:18) Psalm 37:29 dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” Enẹ wẹ zọ́n bọ Biblu sọ dọ dọ aigba na nọte kakadoi.—Psalm 104:5; Yẹwhehodọtọ 1:4.

Eyin opodo aihọn tọn ma zẹẹmẹdo opodo aigba tọn, etẹwẹ e zẹẹmẹdo lo?⁠— Mí na mọ gblọndo lọ eyin mí yí sọwhiwhe do gbadopọnna nuhe jọ to azán Noa tọn gbè. Biblu basi zẹẹmẹ dọ: ‘Aihọn he tin to whenẹnu, le yè yí osin [kavi, singigọ] do gọ́ ẹ, e sudo.’—2 Pita 3:6.

Be mẹdepope lùn opodo aihọn tọn enẹ tọ́n to Singigọ daho enẹ whenu to azán Noa tọn gbè ya?⁠— Biblu dọ dọ Jiwheyẹwhe “whlẹn Noa po omẹ ṣinawe po, yẹwhehodọtọ dodo tọn, whenuena e túntún osin kọ̀n do aihọn mẹylankan lẹ tọn ji.”—2 Pita 2:5.

To whelọnu lo, aihọn tẹwẹ wá opodo? Be aigba lọ wẹ ya, kavi gbẹtọ ylankan lẹ?⁠— Biblu dọ dọ ‘aihọn mẹylankan lẹ tọn’ wẹ. Ṣigba doayi e go dọ Noa yin yiylọdọ “yẹwhehodọtọ” de. Yẹwheho etẹ tọn wẹ a lẹndọ Noa to didọ?⁠— Noa to avase na gbẹtọ lẹ dogbọn opodo ‘aihọn he tin to whenẹnu’ tọn dali.

To whenuena Jesu dọho Singigọ daho lọ tọn, e dọna devi etọn lẹ nuhe gbẹtọ lẹ to wiwà jẹnukọnna wiwá opodo lọ tọn. E dọna yé dọmọ: ‘To azán nẹlẹ mẹ he tin to singigọ lọ nukọn yé to dùdù, bo to nùnù, bo to alọwle, bosọ to nina to alọwiwle mẹ, kakajẹ azán he gbè Noa biọ ohún mẹ, yé masọ yọnẹn kaka singigọ do wá, bo plọ́ yemẹpo yì.’ Jesu dọ dọ nudopolọ wẹ gbẹtọ lẹ na to wiwà kaka bọ opodo aihọn ehe tọn nado wá.—Matiu 24:37-39.

Ohó Jesu tọn dohia dọ mí sọgan plọnnu sọn nuhe gbẹtọ lẹ to wiwà jẹnukọnna Singigọ lọ mẹ. To Weta 10tọ owe ehe tọn mẹ, be a flin nuhe omẹ lọ lẹ wà ya?⁠— Sunnu delẹ nọ vánnukundomẹ bo nọ wà danú do gbẹtọ lẹ. Ṣigba Jesu dọ dọ, mẹsusu devo lẹ ma dotoai to whenuena Jiwheyẹwhe do Noa hlan nado dọyẹwheho na yé.

Enẹwutu, to whenuena ojlẹ lọ wá, Jehovah dọna Noa dọ Emi na yí Singigọ do và mẹylankan lẹ sudo. Osin na ṣinyọ́n aigba lẹpo ji, kakajẹ osó lẹ ji. Jehovah dọna Noa nado gbá aki daho de. Aki lọ taidi apotin daho de dile a sọgan mọ ẹn to weda 238 ji do.

Jiwheyẹwhe dọna Noa nado gbá aki he na klo ganji de, ehe na hẹn ewọ po whẹndo etọn po gọna kanlin susu lẹ nado mọ whlẹngán. Azọ́n sinsinyẹn de wẹ ehe yin na Noa po whẹndo etọn po. Yé gbò atin daho lẹ, bo yí owhlẹ etọn lẹ zan nado jẹ aki lọ gbá ji. Owhe susu taun wẹ yé yido gbá aki lọ, na e klo taun.

Be a flin azọ́n devo he Noa sọ wà gbọnvona azọ́n aki lọ gbigbá tọn ya?⁠— E dọyẹwheho, bo na avase gbẹtọ lẹ gando Singigọ he ja lọ go. Be depope to yé mẹ dotoai ya? Mẹdepope ma dotoai adavo whẹndo Noa tọn kẹdẹ. Mẹhe pò lẹ hẹn alọnu yetọn ján po onú devo lẹ po. Be a gbẹsọ flin nuhe Jesu dọ yé to wiwà ya?⁠— Yé to dùdù bo to nùnù bosọ to alọwle. Yé ma yọnẹn dọ mẹylankan wẹ yé yin gba, podọ yé ma dotoai na Noa. Enẹwutu gbọ mí ni pọ́n nuhe jọ do yé go.

To whenuena Noa po whẹndo etọn po biọ aki lọ mẹ, Jehovah sú ohọ̀n lọ. Mẹhe ma biọ aki lọ mẹ lẹ ma yise kakajẹ whenẹnu dọ Singigọ lọ na wá gba. Ṣigba to ajijimẹ, osin jẹ kinkọ̀n sọn olọn mẹ ji! E mayin jikun tata de poun wẹ gba. Osin to kinkọ̀n wududu! To madẹnmẹ, osin lọ wá lẹzun otọ̀ daho de, bo to sisà po zingidi po. E họ́ atin daho lẹ bo bli zannu dahodaho lẹ taidi osé flinflin nkọtọn. Ṣigba etẹwẹ jọ do mẹhe ma biọ aki lọ mẹ lẹ go?⁠— Jesu dọmọ: ‘Singigọ wá bo plọ́ yemẹpo yì.’ Mẹhe ma biọ aki lọ mẹ lẹpo wẹ kú. Etẹwutu?⁠— Jesu dọ dọ, ‘yé ma doayi e go.’ Yé ma dotoai!—Matiu 24:39; Gẹnẹsisi 6:5-7.

Todin flindọ, Jesu dọ dọ oplọn de wẹ nuhe jọ do omẹ enẹlẹ go yin na mí to egbehe. Etẹwẹ mí sọgan plọn sọn e mẹ?⁠— Do glido, gbẹtọ lọ lẹ ma yin vivasudo na yé yin mẹylankan wutu poun gba ṣigba na yé hẹn alọnu yetọn ján zẹjlẹgo bo ma sè Ohó Jiwheyẹwhe tọn po nuhe e jlo na wà po wutu. Mí dona to aṣeji ma nado taidi yé, kavi e mayin mọwẹ?⁠—

Be hiẹ lẹndọ Jiwheyẹwhe na gbẹsọ yí singigọ do và aihọn lọ sudo wẹ ya?⁠— Lala, Jiwheyẹwhe ko dopagbe dọ emi ma na wàmọ. E dọmọ: “Yẹn yí aidowhẹdo ṣie do aslọ mẹ, e nasọ yin ohia alẹnu de tọn.” Jehovah dọ dọ aidowhẹdo lọ na yin ohia de dọ ‘osin ma nasọ gọfla nado và nutẹgbẹ̀ lẹpo sudo ba.’—Gẹnẹsisi 9:11-17.

Enẹwutu mí sọgan deji dọ Jiwheyẹwhe ma nasọ yí singigọ do và aihọn sudo pọ́n gbede ba. Ṣigba, dile mí ko yọnẹn do, Biblu gbẹsọ dọ dogbọn opodo aihọn tọn dali. To whenuena Jiwheyẹwhe na hẹn vasudo aihọn ehe tọn wá, mẹnu lẹ wẹ e na whlẹngán?⁠— Be mẹhe tindo ojlo to onú devo lẹ mẹ sọmọ bo ma nọ jlo nado plọnnu dogbọn Jiwheyẹwhe dali gbede lẹ wẹ ya? Be mẹhe nọ hẹn alọnu yede tọn ján zẹjlẹgo bo ma nọ plọn Biblu wẹ ya? Kavi mẹnu lẹ wẹ hiẹ lẹn?⁠—

Be mí ma na jlo nado nọ mẹhe Jiwheyẹwhe na whlẹngán lẹ mẹ ya?⁠— Be e ma na yọ́n eyin whẹndo mítọn sọgan taidi Noa tọn bọ Jiwheyẹwhe na whlẹn mímẹpo gán dopọ ya?⁠— Eyin mí jlo na lùn opodo aihọn lọ tọn tọ́n, mí dona yọ́n lehe Jiwheyẹwhe na và ẹ sudo bo hẹn aihọn yọyọ dodo tọn etọn wá gbọn. Dike mí ni dindona lehe e na wà ehe gbọn.

Biblu dọ ehe na mí to owe Daniẹli tọn mẹ, weta 2, wefọ 44. Wefọ lọ to hodọ gando azán mítọn go dọmọ: “To azán ahọlu nẹlẹ tọn lẹ mẹ wẹ Jiwheyẹwhe olọn tọn na ze ahọludu de daga, he ma na yin vivà gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.”

Be a mọnukunnujẹ wefọ enẹ mẹ ya?⁠— Biblu dọ dọ gandudu Jiwheyẹwhe tọn na và gandudu aigba ji tọn lẹpo sudo. Etẹwutu wẹ?⁠— Na yé ma setonuna Mẹhe Jiwheyẹwhe ko dè taidi Ahọlu wutu. Ṣigba mẹnu wẹ yin mẹlọ?⁠— Jesu Klisti wẹ!

Jehovah Jiwheyẹwhe tindo jlọjẹ lọ nado dè mẹhe e jlo dọ e ni dugán, podọ e ko dè Ovi etọn, Jesu, nado yin Ahọlu. To madẹnmẹ, Ahọlu he Jiwheyẹwhe dè lọ, Jesu Klisti, na yin nukọntọ nado và gandudu aigba ji tọn lẹpo sudo. To Osọhia weta 19, wefọ 11 jẹ 16 mẹ, Biblu basi zẹẹmẹ lehe e na wà ehe gbọn tọn, dile yẹdide ehe lọsu dohia do. To Biblu mẹ, awhàn Jiwheyẹwhe tọn to ehe mẹ e na và gandudu aigba ji tọn lẹpo sudo te yin yiylọdọ Amagẹdọni.

Jiwheyẹwhe dọ dọ Ahọluduta emitọn na và gandudu gbẹtọvi tọn lẹpo sudo. Ṣigba be alọ mítọn mẹ wẹ e ze azọ́n ehe do ya?⁠— Lala, to Biblu mẹ, Amagẹdọni yin yiylọdọ “awhàn azán daho Jiwheyẹwhe Ganhunupo tọn.” (Osọhia 16:14, 16) Do glido, Amagẹdọni yin awhàn Jiwheyẹwhe lọsu tọn, podọ e na yí Jesu Klisti zan di awhàngán na awhànpa angẹli lẹ tọn to awhànfunfun lọ mẹ. Be awhàn Amagẹdọni tọn ko sẹpọ wẹ ya? Dike mí ni dindona ehe.