WETA 17
“Mìde Hinhẹn Lodo to Dodonu Yise Mìtọn He Wé Hugan lọ Tọn Ji”
“Gbọn mìde hinhẹn lodo to dodonu yise mìtọn he wé hugan lọ tọn ji dali, . . . mì hẹn mìde do owanyi Jiwheyẹwhe tọn mẹ.”—JUDA 20, 21, NW.
1, 2. Azọ́n họgbigbá tọn tẹ wà wẹ a te, podọ naegbọn lehe a wà azọ́n towe do yin nujọnu sọmọ?
HIẸ to azọ́nwa vẹkuvẹku to azọ́n họgbigbá tọn de tẹnmẹ. Azọ́n lọ ko to yìyì na ojlẹ de bo nasọ zindonukọn na owhe susu. Kakajẹ din, nulẹpo dohia dọ azọ́n lọ kàn dẹpẹ biọ ṣogan ayajẹ tin to e mẹ. E tlẹ to kínni bo to kànna, hiẹ magbe ma nado gbọjọ kavi wàdidọ, na lehe a wà azọ́n lọ do na gando gbẹzan towe go, etlẹ yin sọgodo towe lọsu. Etẹwutu? Na hiẹ wẹ ohọ̀ he to yinyin gbigbá lọ!
2 Devi Juda zinnudeji dọ mí dona hẹn míde lodo kẹdẹdile ohọ̀ de nọ yin hinhẹn lodo dogọ do. To whenuena e dotuhomẹna Klistiani lẹ dọ “mì hẹn mìde do owanyi Jiwheyẹwhe tọn mẹ,” e sọ do onú tangan he na gọalọna mí nado wàmọ hia to wefọ dopolọ mẹ dọmọ: “Gbọn mìde hinhẹn lodo to dodonu yise mìtọn he wé hugan lọ tọn ji dali.” (Juda 20, 21) Etẹwẹ yin delẹ to aliho he mẹ hiẹ sọgan hẹn dewe lodo bo hẹn yise towe sinyẹn dogọ nado sọgan gbọṣi owanyi Jiwheyẹwhe tọn mẹ te lẹ mẹ? Mì gbọ mí ni lẹnnupọndo adà atọ̀n azọ́n họgbigbá gbigbọmẹ tọn he hiẹ dona wà lẹ ji.
TO YISE HẸN LODO TO NUBIỌTOMẸSI DODO JEHOVAH TỌN LẸ MẸ ZỌNMII
3-5. (a) Pọndohlan agọ̀ tẹwẹ Satani na jlo dọ a ni tindo gando nubiọtomẹsi Jehovah tọn lẹ go? (b) Pọndohlan tẹwẹ mí dona tindo gando nubiọtomẹsi Jiwheyẹwhe tọn lẹ go, podọ nawẹ enẹ dona yinuwado numọtolanmẹ mítọn ji gbọn? Na apajlẹ.
3 Tintan whẹ́, mí dona hẹn yise mítọn lodo to osẹ́n Jiwheyẹwhe tọn lẹ mẹ. Sọn whenue a to owe ehe plọn, a ko mọ nubiọtomẹsi dodo Jehovah tọn susu gando walọyizan go. Etẹwẹ a lẹn gando yé go? Satani na jlo nado klọ we nado nọ pọ́n osẹ́n, nunọwhinnusẹ́n, po nujinọtedo Jehovah tọn lẹ po hlan taidi aliglọnnamẹnu kavi kọgbidinamẹnu de. E ko to ayikinkan gigẹdẹ ehe zan sọn whenue ayikinkan lọ wazọ́n na ẹn taun to jipa Edẹni tọn mẹ. (Gẹnẹsisi 3:1-6) Be ayikinkan gigẹdẹ etọn na duto jiwe wẹ ya? Ehe na sinai taun do pọndohlan he a tindo ji.
4 Di apajlẹ: Dile a to sadi gbọn jipa whanpẹnọ de mẹ, a doayi e go dọ pákàn yiaga he ló ganji de glọn apadewhe jipa lọ tọn. Pákàn lọ godo dọ́n dọnmẹdogo taun. To tintan whenu, a sọgan lẹndọ pákàn lọ yin aliglọnnamẹnu he ma yin dandan de na mẹdekannujẹ towe. Ṣigba dile a to lẹdo he yin ginglọn lọ pọnhlan gbọn pákàn lọ mẹ, a doayi e go dọ kinnikinni hùnylantọ de tọ̀pọwu do adà awetọ ji dọ́n! Todin a mọ nuhewutu pákàn lọ do tin to finẹ—enẹ wẹ nado basi hihọ́namẹ. Be gbekanlin ylankan de to pọ̀wutọna we to alọnu din wẹ ya? Ohó Jiwheyẹwhe tọn na avase dọmọ: “Mì yin huwhẹnọ bosọ nọ họ́ mìde: na Lẹgba, mẹglatọ mìtọn, di kinnikinni he to lìlì, e to zọnlinzin pé, bo to mẹhe e na tlẹndù dín.”—1 Pita 5:8.
5 Kanlin ylankan nuwledutọ de wẹ Satani yin. Na Jehovah ma jlo dọ mí ni jẹ alọ Satani tọn mẹ wutu, e ko wleawuna osẹ́n lẹ nado basi hihọ́na mí sọn “bublu” kavi ayiha wintinwintin mẹylankan enẹ tọn lẹ si. (Efesunu lẹ 6:11) Enẹwutu, whedepopenu he mí to ayihamẹlẹnpọndo osẹ́n Jiwheyẹwhe tọn lẹ ji, mí dona nọ pọ́n yé hlan taidi dohia owanyi tọn de sọn Otọ́ olọn mẹ tọn mítọn dè. Eyin mí yí nukun mọnkọtọn do pọ́n osẹ́n Jiwheyẹwhe tọn lẹ, yé nọ lẹzun asisa hihọ́ po ayajẹ po tọn de. Devi Jakobu wlan dọmọ: “Ewọ he zín nukun do osẹ́n pipé he yin mẹdekannujẹ tọn lọ mẹ bo zindonukọn to e mẹ . . . na yin ayajẹnọ to bibasi i mẹ.”—Jakobu 1:25, NW.
6. Aliho dagbe hugan tẹ mẹ wẹ mí sọgan hẹn yise lodo to osẹ́n po nunọwhinnusẹ́n dodo Jiwheyẹwhe tọn lẹ po mẹ te? Na apajlẹ.
6 Gbẹninọ sọgbe hẹ gbedide Jiwheyẹwhe tọn lẹ wẹ aliho dagbe hugan lọ nado hẹn yise mítọn lodo to Sẹ́nnamẹtọ lọ po nuyọnẹn osẹ́n etọn lẹ tọn po mẹ. Di apajlẹ, “osẹ́n Klisti tọn” bẹ gbedide Jesu tọn nado plọn mẹdevo lẹ “nudepope he [e ko] degbè” etọn hẹn. (Galatianu lẹ 6:2; Matiu 28:19, 20) Klistiani lẹ sọ nọ yí nukun nujọnu tọn do pọ́n gbedide lọ nado nọ pli dopọ na sinsẹ̀n-bibasi po gbẹdido mẹjlọdote tọn lẹ po. (Heblu lẹ 10:24, 25) Gbedide Jiwheyẹwhe tọn lẹ sọ bẹ tudohomẹnamẹ lọ nado nọ hodẹ̀ hlan Jehovah to gbesisọ mẹ podọ sọn ahun mẹ wá hẹn. (Matiu 6:5-8; 1 Tẹsalonikanu lẹ 5:17) Dile mí to gbẹnọ sọgbe hẹ gbedide mọnkọtọn lẹ, e nọ họnwun na mí hezeheze dọ anademẹ owanyinọ lẹ wẹ yé yin nugbonugbo. Tonusisena yé nọ hẹn mí tindo ayajẹ po pekọ vonọtaun he mí ma sọgan mọ gbede sọn asisa devo mẹ to aihọn hunyanhunyan tọn ehe mẹ po. Dile a to ayihamẹlẹnpọndo ale he tonusisena osẹ́n Jiwheyẹwhe tọn lẹ ko hẹnwa na we lẹ ji, be yise he a tindo to yé mẹ ma nọ lodo dogọ ya?
7, 8. Nawẹ Ohó Jiwheyẹwhe tọn vọ́ jide na mẹhe nọ hanú dọ yé sọgan nọma penugo nado hẹn dodowiwa yetọn go dile owhe lẹ to jujuyi gbọn?
7 Mẹdelẹ nọ hanú to whedelẹnu dọ dile owhe lẹ to jujuyi, tonusisena osẹ́n Jehovah tọn lẹ na vẹawu. Yé nọ dibu dọ emi sọgan gboawupo to aliho de mẹ. Eyin linlẹn enẹ ko wá ayiha towe mẹ pọ́n, flin hogbe ehelẹ dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọn. Eyin dọ hiẹ ko dotoai hlan osẹ́n ṣie! Whenẹnu wẹ jijọho towe do ko taidi otọ̀, dodo towe di agbówhẹn ohù tọn.” (Isaia 48:17, 18) Be a ko yiagbọji gbede bo lẹnnupọndo lehe ohó enẹlẹ vọ́ jide namẹ do ji ya?
8 Tofi, Jehovah flin mí dọ mí nọ hẹn ale wá na míde gbọn tonusisena ẹn dali. E dopagbe onú awe tọn na mí eyin mí wàmọ. Tintan, jijọho mítọn na taidi otọ̀—yèdọ otọ̀ he gọfla bo to sisà. Awetọ, dodo mítọn na taidi agbówhẹn ohù tọn. Eyin a ṣite to huto bo to agbówhẹn he to bibli yì nukọn podọ yì godo lẹ pọ́n, ayihaawe ma tin dọ hiẹ nọ mọ dewe taidi mẹhe ma na yin tẹnsẹna kẹdẹdile agbówhẹn nọ to bibli tẹgbẹ do. A yọnẹn dọ agbówhẹn lọ ma na doalọte gbede ṣigba e na to gbigbà do agé kakadoi. Mọdopolọ, Jehovah dọ dọ dodowiwa towe sọgan gbọṣi aimẹ kakadoi. Dile e na dẹnsọ bọ a to vivẹnudo nado yin nugbonọ na ẹn, e ma na dike a ni gboawupo gbede! (Psalm 55:22) Be opagbe homẹmiọnnamẹ tọn mọnkọtọn lẹ ma hẹn yise towe lodo to Jehovah po nubiọtomẹsi dodo tọn etọn lẹ po mẹ ya?
“DOVIVẸNU BO LẸZUN MẸHE WHÈWHÍN”
9, 10. (a) Naegbọn lilẹzun mẹhe whèwhín do yin yanwle dagbe hugan Klistiani lẹ tọn? (b) Nawẹ pọndohlan gbigbọmẹ tọn nọ yidogọna ayajẹ gbọn?
9 Adà awetọ azọ́n họgbigbá gbigbọmẹ tọn towe yin didohia to ohó gbọdo ehelẹ mẹ dọmọ: “Mì gbọ mí ni dovivẹnu bo lẹzun mẹhe whèwhín.” (Heblu lẹ 6:1, NW ) Yanwle dagbe hugan Klistiani de tọn wẹ nado lẹzun mẹhe whèwhín. Gbẹtọvi lẹ ma sọgan jẹ pipé kọ̀n todin, ṣigba lilẹzun mẹhe whèwhín yin yanwle he kọ̀n yé sọgan jẹ. Humọ, Klistiani lẹ nọ mọ ayajẹ daho to Jehovah sinsẹ̀n mẹ dile yé to nukọnyi to gbigbọ-liho. Etẹwutu?
10 Klistiani he whèwhín yin gbẹtọ gbigbọnọ. E nọ pọ́n nulẹ hlan dile Jehovah nọ wà do. (Johanu 4:23) Paulu wlan dọmọ: “Na yé he tin gbọn agbasalan dali lẹ nọ pọ́n onú he yin agbasalan tọn lẹ go; ṣigba omẹ he tin gbọn [gbigbọ] dali lẹ nọ pọ́n onú he yin [gbigbọ] tọn lẹ go.” (Lomunu lẹ 8:5) Pọndohlan agbasalan tọn ma nọ hẹn ayajẹ susu wá, na e nọ saba yin ṣejannabi tọn, nọ do numamọhlannukọn hia, bosọ nọ sinai do agbasanu lẹ ji. Pọndohlan gbigbọmẹ tọn nọ hẹn ayajẹ wá, na e nọ yin zize sinai do Jehovah, ‘Jiwheyẹwhe ayajẹnọ lọ’ ji. (1 Timoti 1:11) Gbẹtọ gbigbọnọ nọ to jejeji nado hẹn homẹ Jehovah tọn hùn bo nọ jaya to whenuena e tlẹ tin to whlepọn glọ. Etẹwutu? Na whlepọn lẹ nọ hùn dotẹnmẹ dotena mí nado do Satani hia di lalonọ podọ nado wleawuna tenọgligo-hinhẹn he nọ hẹn Otọ́ olọn mẹ tọn mítọn jaya wutu.—Howhinwhẹn lẹ 27:11; Jakobu 1:2, 3.
11, 12. (a) Etẹwẹ Paulu dọ dogbọn “huhlọn wuntuntun tọn” Klistiani de tọn dali, podọ etẹwẹ hogbe he yin lilẹdo “plọn” zẹẹmẹdo? (b) Azọ́nplọnmẹ tẹwẹ agbasa dona mọyi nado whẹ́n bọ awutugonu etọn lẹ na wazọ́n ganji?
11 Nupinplọn wẹ nọ hẹn mí zun gbẹtọ gbigbọnọ podọ mẹhe whèwhín. Lẹnnupọndo wefọ ehe ji: “Núdùdù sinsinyẹn yin mẹhe ko whẹ́n lẹ tọn, mẹhe ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn lẹ.” (Heblu lẹ 5:14, NW ) To whenuena Paulu dọ dọ huhlọn wuntuntun tọn mítọn nọ yin ‘pinplọn,’ e yí hogbe Glẹkigbe tọn de zan he sọgan ko nọ yin yiyizan to paa mẹ to aihundatẹn Grèce owhe kanweko tintan whenu tọn lẹ mẹ, na e sọgan yin lilẹdo yinyin ‘pinplọn taidi aihundatọ lanmẹyiya tọn he nọ lilẹ́ ede gbọn jẹhọn mẹ de.’ Todin, lẹnnupọndo nuhe azọ́nplọnmẹ mọnkọtọn bẹhẹn ji.
Agbasa aihundatọ de tọn nọ yin pinplọn gbọn yíyí i zan dali
12 To whenuena mí yin jiji, agbasa mítọn ma ko yin pinplọn. Di apajlẹ, viyẹyẹ de ma nọ penugo nado deanana awà po afọ etọn lẹ po. Enẹwutu, viyẹyẹ de nọ to awà etọn lẹ yìn do jẹhọn mẹ bo tlẹ nọ hò nukunmẹ na ede to mayọnẹn mẹ, podọ ehe nọ vẹ́ ẹ taun. Ṣigba vudevude, agbasa lọ nọ yin pinplọn dile viyẹyẹ lọ to tintẹnpọn nado yí awutugonu etọn lẹ zan. Viyẹyẹ lọ nọ jẹ sisá ji, nọ jẹ zọnlinzin ji, bo tlẹ nọ wá họ̀nwezun to godo mẹ.a Todin, etẹwẹ dogbọn aihundatọ lanmẹyiya tọn he nọ lilẹ́ ede gbọn jẹhọn mẹ de dali? Eyin a mọ aihundatọ mọnkọtọn he to linlọ́n bo yí awuvivi do to ede lilẹ́ gbọn jẹhọn mẹ pludopludo po gbesisọ po, a ma na tindo ayihaawe depope dọ agbasa lọ ko yin pinplọn na ojlẹ dindẹn nado wà ehe. Nugopipe aihundatọ lọ tọn lẹ ma wá gbọn kosọ dali gba—e biọ nupinplọn ganhiho susu lẹ tọn. Biblu dohia dọ agbasa pinplọn to aliho enẹ mẹ yin “alenọ na pẹvide.” Lehe huhlọn wuntuntun gbigbọmẹ tọn mítọn pinplọn yin nuhọakuẹ tlala humọ do sọ!—1 Timoti 4:8.
13. Nawẹ mí sọgan plọn huhlọn wuntuntun tọn mítọn gbọn?
13 To owe ehe mẹ, mí ko dọhodo nususu he na gọalọna we nado plọn huhlọn wuntuntun tọn towe na hiẹ nido sọgan gbọṣi nugbonọ-yinyin mẹ na Jehovah taidi gbẹtọ gbigbọnọ de ji. Nọ lẹnnupọndo nunọwhinnusẹ́n po osẹ́n Jiwheyẹwhe tọn lẹ po ji to odẹ̀ mẹ dile a to nudide lẹ basi to gbẹzan egbesọegbesọ tọn towe mẹ. Whẹpo do basi nudide depope, nọ kanse dewe dọ: ‘Osẹ́n kavi nunọwhinnusẹ́n Biblu tọn tẹlẹ wẹ gando whẹho ehe go? Nawẹ n’sọgan yí yé do yizan mẹ gbọn? Nuyiwa tẹwẹ na hẹn homẹhun Otọ́ ṣie olọn mẹ tọn?’ (Howhinwhẹn lẹ 3:5, 6; Jakobu 1:5) Nudide depope he a basi to aliho ehe mẹ na plọn huhlọn wuntuntun tọn towe dogọ. Azọ́nplọnmẹ mọnkọtọn na gọalọna we nado lẹzun gbẹtọ gbigbọnọ podọ nado hẹn gbigbọnọ-yinyin towe go.
14. Ojlo sinsinyẹn tẹwẹ mí dona wleawuna nado sọgan whẹ́n to gbigbọ-liho, ṣogan avase tẹwẹ mí dona hẹn do ayiha mẹ?
14 Dile etlẹ yindọ mẹde sọgan wá lẹzun mẹhe whèwhín, whinwhẹ́n gbigbọmẹ tọn yin nuyiwa he ma nọ doalọte. Núdùdù yin dandannu nado whẹ́n zun mẹho. Abajọ Paulu dọmọ: “Núdùdù sinsinyẹn yin mẹhe ko whẹ́n lẹ tọn.” Nado sọgan to yise towe hẹn lodo, hiẹ dona to núdùdù sinsinyẹn gbigbọmẹ tọn dù zọnmii. Eyin a nọ yí nuhe a plọn lẹ do yizan mẹ, a na tindo nuyọnẹn, podọ Biblu gbọn gbesisọ dali dọmọ: “Nuhe yè sọgan jlo, ode ma tin bọ yè sọgan do jlẹ ẹ.” Enẹwutu, mí dona wleawuna ojlo nujọnu tọn na nugbo họakuẹ he Otọ́ mítọn nọ na mí lẹ. (Howhinwhẹn lẹ 8:11; 1 Pita 2:2) Na nugbo tọn, oyọnẹn po nuyọnẹn Jiwheyẹwhe tọn po tintindo ma yin whẹwhinwhẹ́n nado lẹzun goyitọ kavi saklanọ. Mí dona nọ gbeje mídelẹ pọ́n whẹwhẹ ma nado dike goyiyi kavi madogán devo ni doadọ̀do to ahun mítọn mẹ. Paulu wlan dọmọ: “Mì [nọ] dindona mìde, eyin mì tin to yise mẹ; mì mọdona mìde dagbedagbe.”—2 Kọlintinu lẹ 13:5.
15. Naegbọn whinwhẹ́n gbigbọmẹ tọn do sinai do owanyi ji?
15 Ohọ̀ de sọgan yin gbigbá fó, ṣogan azọ́n nọ pò to yìyì nado hẹn ẹn do ninọmẹ dagbe mẹ. Dandannu wẹ e yin nado penukundo ohọ̀ lọ go bo nọ basi vọjlado he jẹ lẹ, podọ e sọgan biọ dọ abò devo lẹ ni yin yiyidogọ dile ninọmẹ lẹ to didiọ. Nuhudo etẹ tọn wẹ mí tindo nado sọgan lẹzun mẹhe whèwhín bo hẹn gbigbọnọ-yinyin mítọn go? Onú tangan lọ wẹ owanyi. Mí dona dike owanyi mítọn na Jehovah po yisenọ hatọ lẹ po ni to whinwhẹ́n zọnmii. Eyin mí ma tindo owanyi, oyọnẹn po azọ́n yise mítọn tọn lẹpo po na yin ovọ́—taidi awhágbe tata de poun. (1 Kọlintinu lẹ 13:1-3) Eyin mí tindo owanyi, mí sọgan lẹzun Klistiani he whèwhín bo na to whinwhẹ́n deji to gbigbọ-liho.
HẸN TODIDO HE JEHOVAH NA WE DO AYIHA MẸ GLIGLI
16. Nulẹnpọn nankọ wẹ Satani nọ nọgodona, podọ avùnlọyinu tẹwẹ Jehovah ko wleawuna?
16 Gbọ mí ni gbadopọnna adà atọ̀ntọ azọ́n họgbigbá gbigbọmẹ tọn towe. Nado sọgan hẹn dewe lodo taidi hodotọ nugbo Klisti tọn de, a dona nọ basi hihọ́na nulẹnpọn towe. Satani, he to aṣẹpa do aihọn ehe ji, bikan taun to gbẹtọ lẹ kiklọ mẹ nado joawuna nulẹnpọn he ma sọgbe, pọndohlan agọ̀, jimadedomẹgo po todido matindo po. (Efesunu lẹ 2:2) Nulẹnpọn mọnkọtọn yin owùnu na Klistiani kẹdẹdile kọsukọsu yin na họ̀-dòtin de do. Ayajẹnu wẹ e yin dọ Jehovah wleawu avùnlọyinu tangan de tọn na mí—enẹ wẹ todido.
17. Nawẹ Ohó Jiwheyẹwhe tọn do nujọnu-yinyin todido tọn hia gbọn?
17 Biblu slẹ adà voovo gbaja gbigbọmẹ tọn he mí tindo nuhudo etọn nado hoavùn sọta Satani po aihọn ehe po. Adà tangan gbaja lọ tọn dopo wẹ ogangbakun, he yin “todido whlẹngán tọn.” (1 Tẹsalonikanu lẹ 5:8) To ojlẹ Biblu tọn lẹ mẹ, awhànfuntọ de yọnẹn dọ eyin emi ma ṣinyọ́n ogangbakun, e na vẹawu nado lùn awhàn tọ́n. Avọ̀ kavi ayú nọ yin titẹdo ogangbakun lọ mẹ, podọ ogangbakun lọ nọ zọ́n bọ suhugan awhànfunnu he yin didlan do ota awhànfuntọ lọ tọn lẹ tọn nọ de huhlọn pò bo masọ nọ hẹn awugble susu wá. Kẹdẹdile ogangbakun nọ basi hihọ́na ota do, todido sọgan basi hihọ́na ayiha po nulẹnpọn towe po.
18, 19. Apajlẹ tẹwẹ Jesu zedai taidi mẹhe hẹn todido etọn go, podọ nawẹ mí sọgan hodo apajlẹ etọn gbọn?
18 Jesu ze apajlẹ dagbe hugan dai taidi mẹhe hẹn todido etọn go. Flin nuhe e doakọnna to ozán he e yizan gbọngodo to aigba ji mẹ. Họntọn alọmayiemẹ de yí akuẹ nado de e hia. Họntọn devo tlẹ mọ́n dọ emi ma yọ́n ẹn. Mẹhe pò lẹ jo e do bo họnyi. Tòmẹnu etọn titi lẹ diọnukunsọ ẹ bo biọ dọ awhànfuntọ Lomu tọn lẹ ni sayana ẹn hù. Ayihaawe ma tin dọ Jesu pehẹ whlepọn he sinyẹn taun hugan dehe mí sọgan pehẹ to gbẹ̀mẹ lẹ. Etẹwẹ gọalọna ẹn? Heblu lẹ 12:2 na gblọndo dọmọ: “Na ayajẹ he yè ze do nukọn etọn wutu e doakọnna [yatin] lọ, ma hò winyan lọ pọ́n, bosọ sinai to adusilọ ofìn Jiwheyẹwhe tọn ji.” Nukun Jesu tọn nọ tin to “ayajẹ he yè ze do nukọn etọn” ji to whepoponu.
19 Ayajẹ tẹwẹ yin zizedonukọnna Jesu? Na nugbo tọn, e yọnẹn dọ eyin emi doakọnnanu, emi na tindo mahẹ to oyín wiwe Jehovah tọn kinklandowiwe mẹ. E na na kunnudenu dagbe hugan lọ dọ Satani yin lalonọ. Todido devo depope ma sọgan hẹn ayajẹ he klohugan wá na Jesu! E sọ yọnẹn dọ Jehovah na suahọ nugbonọ-yinyin etọn tọn susugege bosọ flindọ ojlẹ jiawu de tin to nukọnna ẹn to whenuena ewọ na kọnawudopọ hẹ Otọ́ etọn. Jesu ze ayidonugo lẹpo do todido ayajẹnọ enẹ ji to ojlẹ he sinyẹn hugan lẹ gblamẹ. Nudopolọ wẹ mílọsu dona wà. Ayajẹ yin zizedonukọnna mílọsu. Jehovah ko doyẹyigona dopodopo mítọn po lẹblanulọkẹyi lọ po nado tindo mahẹ to oyín daho etọn kinklandowiwe mẹ. Mí sọgan do Satani hia di lalonọ eyin mí kẹalọyi Jehovah taidi Nupojipetọ mítọn bo hẹn míde do owanyi Otọ́ mítọn tọn mẹ to whepoponu mahopọnna whlepọn depope he mí sọgan pehẹ.
20. Etẹwẹ na gọalọna we ma nado joawuna nulẹnpọn agọ̀?
20 Gbọnvona dọ Jehovah tindo ojlo nado suahọ devizọnwatọ nugbonọ etọn lẹ, e sọ tin to jejeji nado wàmọ ga. (Isaia 30:18; Malaki 3:10) Homẹ etọn nọ hùn nado hẹn pekọwana ojlo he sọgbe devizọnwatọ etọn lẹ tọn. (Psalm 37:4) Enẹwutu, hẹn todido he tin to nukọnna we lọ do ayiha mẹ gligli. Ma joawuna nulẹnpọn ylankan, he gblezọn bo yin tasọdona aihọn Satani tọn he to kukujei ehe tọn gbede blo. Eyin a mọdọ gbigbọ aihọn lọ tọn to lìnlìn biọ ayiha po ahun towe po mẹ, hodẹ̀ vẹkuvẹku hlan Jehovah nado na we “jijọho Jiwheyẹwhe tọn he hú nuyọnẹn lẹpo.” Jijọho he Jiwheyẹwhe nọ namẹ enẹ na basi hihọ́na ahun po huhlọn nulẹnpọn tọn towe po.—Filippinu lẹ 4:6, 7.
21, 22. (a) Todido gigonọ tẹwẹ “gbẹtọ susugege” lọ tindo? (b) Todido Klistiani tọn tẹwẹ yin nujọnu hugan na we, podọ etẹwẹ yin gbemima towe?
21 Todido jiawu nankọ die he tin to nukọnna we! Eyin hiẹ yin apadewhe “gbẹtọ susugege” he na “tọ́n sọn nukunbibia daho” lọ mẹ tọn, lẹnnupọndo ogbẹ̀ he a na duvivi etọn to madẹnmẹ ji. (Osọhia 7:9, 14) Na Satani po aovi etọn lẹ po masọ tin ba wutu, hiẹ na tindo numọtolanmẹ kọgbọ de tọn he e na vẹawu nado basi zẹẹmẹ etọn todin. To popolẹpo mẹ, mẹnu to mí mẹ wẹ tin to ogbẹ̀ bo ma nọ mọ nuhahun he aihọn ylankan Satani tọn nọ hẹnwa lẹ? Todin he nuhahun enẹlẹ ko busẹ, ayajẹ nankọtọn die e na yin nado tindo mahẹ to aigba didiọzun paladisi mẹ to anademẹ Jesu po gbẹtọ 144 000 he na dugán hẹ ẹ to olọn mẹ lẹ po tọn glọ! Lehe homẹ mítọn na hùn do sọ nado mọdọ azọ̀n po madogán lẹpo po ko yin didesẹ, nado dokuavọna mẹyiwanna mítọn lẹ sọn yọdò mẹ, podọ nado nọgbẹ̀ to aliho he mẹ Jiwheyẹwhe jlo dọ mí ni nọgbẹ̀ te to bẹjẹeji! Dile mí to nukọnyi biọ pipé mẹ, ahọsumẹ daho hugan de na ko tin to yakẹ, enẹ wẹ opagbe he yin didehia to Lomunu lẹ 8:21 mẹ—yèdọ ‘mẹdekannujẹ gigonọ ovi Jiwheyẹwhe tọn lẹ tọn.’
22 Jehovah jlo dọ a ni tindo mẹdekannujẹ susu zẹ̀ nuhe ji hiẹ lọsu tlẹ sọgan lẹnnupọndo go. Tonusise wẹ na plan we jẹ mẹdekannujẹ enẹ kọ̀n. Be e ma jẹ dọ a ni dovivẹnu lẹpo todin nado nọ setonuna Jehovah to whepoponu ya? Enẹwutu, wà nuhe go a pé lẹpo nado nọ hẹn dewe lodo to dodonu yise towe he wé hugan lọ tọn ji, na hiẹ nido sọgan gbọṣi owanyi Jiwheyẹwhe tọn mẹ kakadoidoi!
a Lẹnunnuyọnẹntọ lẹ dọ dọ mí nọ wá tindo nugopipe vonọtaun agbasa mítọn titi tọn de he nọ deanana awutugonu lẹ. Di apajlẹ, nugopipe agbasa tọn ehe nọ hẹn ẹn yọnbasi na we nado hopẹ́ eyin a tlẹ miyọnnukun. Awutunọ mẹhomẹ de hẹn nugopipe agbasa tọn ehe bu podọ taidi kọdetọn de e ma sọgan ṣite, zinzọnlin, kavi tlẹ sinai ba.