Yé Wlanwe Gando Jesu Go

Be a mọ sunnu he to yẹdide lọ mẹ lẹ ya?— Matiu, Malku, Luku, Johanu, Pita, Jakọbu, Juda, po Paulu po wẹ. Sunnu ehe lẹpo nọgbẹ̀ to ojlẹ dopolọ mẹ po Jesu po, podọ yé wlanwe gando Jesu go. Gbọ mí ni dọhodo yé ji.

Atọ̀n to yé mẹ yin apọsteli he dọyẹwheho po Jesu po lẹ. Be a yọ́n omẹ atọ̀n enẹlẹ ya?— Matiu, Johanu, po Pita po wẹ. Apọsteli Matiu po Johanu po yọ́n Jesu ganji, podọ dopodopo yetọn wẹ wlan owe de gando gbẹzan Jesu tọn go. Apọsteli Johanu sọ wlan owe devo he nọ yin yiylọdọ Osọhia. E sọ wlan wekanhlanmẹ atọ̀n he nọ yin yiylọdọ Johanu Tintan, Johanu Awetọ, podọ Johanu Atọ̀ntọ. Apọsteli Pita wlan wekanhlanmẹ awe delẹ he tin to Biblu mẹ. Wekanhlanmẹ awe lọ lẹ wẹ Pita Tintan po Pita Awetọ po. To wekanhlanmẹ awetọ he Pita wlan lọ mẹ, ewọ dọhodo whenue Jehovah dọho sọn olọn mẹ gando Jesu go ji. To whelọnu, Jehovah dọmọ: ‘Visunnu ṣie die. N’yiwanna ẹn, podọ homẹ ṣie nọ hùn do e go.’

Sunnu he pò to yẹdide lọ mẹ lẹ lọsu plọnnu mí gando Jesu go to owe he yé kàn lẹ mẹ. Dopo to yé mẹ wẹ Malku. Malku na ko tin to fie yè wle Jesu te, podọ e na ko mọ nuhe jọ lọ lẹpo. Mẹdevo wẹ Luku. Doto de wẹ ewọ yin, podọ e taidi dọ whenue Jesu kú godo wẹ e wá lẹzun Klistiani.

Biblu-kantọ awe devo he to yẹdide lọ mẹ lẹ yin nọvisunnu Jesu tọn lẹ. Be a yọ́n yinkọ yetọn ya?— Jakọbu po Juda po wẹ. To bẹjẹeji, yé ma yí Jesu sè. Yé tlẹ lẹndọ e jlo na hùn tadu. Amọ́ to nukọn mẹ, yé wá yí Jesu sè bo lẹzun Klistiani.

Biblu-kantọ godo tọn he to yẹdide lọ mẹ wẹ Paulu. Saulu wẹ e nọ yin whẹpo do lẹzun Klistiani. E gbẹwanna Klistiani lẹ bo nọ yinuwa hẹ yé po kanyinylan po. Be a yọ́n nuhe zọ́n bọ Paulu do lẹzun Klistiani ya?— To gbèdopo, Paulu to yìyì to aliji bọ to ajiji mẹ, e sè ogbè de sọn olọn mẹ. Jesu wẹ to hodọna ẹn! Jesu kanse e dọmọ: ‘Naegbọn a to nuyiwa hẹ devi ṣie lẹ po kanyinylan po sọmọ?’ To nujijọ enẹ godo, Paulu lẹnvọjọ bo lẹzun Klistiani. Paulu wlan owe Biblu tọn 14, enẹ wẹ owe Lomunu lẹ tọn jẹ owe Heblu lẹ tọn.

Egbesọegbesọ wẹ mí nọ hia Biblu, kavi?— To whenue mí hia Biblu, mí nọ plọn nususu gando Jesu go. Be a jlo na plọnnu nususu dogọ gando Jesu go ya?—