Lehe Mì Sọgan Nọ Jijọho mẹ hẹ Hẹnnumẹ Mìtọn lẹ Do

To whenue sunnu po yọnnu de po wlealọ, yé nọ lẹzun whẹndo yọyọ de. Dile etlẹ yindọ a na gbẹ́ nọ do owanyi po sisi po hia mẹjitọ towe lẹ to whepoponu, alọwlemẹ towe wẹ dona họakuẹ na we hugan to aigba ji. E sọgan vẹawuna hẹnnumẹ towe delẹ nado kẹalọyi enẹ. Ṣigba, nunọwhinnusẹ́n Biblu tọn lẹ sọgan gọalọna mì nado nọ jlẹkaji bo gbọnmọ dali tin to jijọho mẹ hẹ hẹnnumẹ mìtọn lẹ, dile mì to vivẹnudo nado hẹn haṣinṣan whẹndo yọyọ mìtọn tọn lodo.

1 MÌ HẸN PỌNDOHLAN HE SỌGBE GO GANDO HẸNNUMẸ MÌTỌN LẸ GO

NUHE BIBLU DỌ: “Gbògbéna otọ́ towe po onọ̀ towe po.” (Efesunu lẹ 6:2) Mahopọnna lehe a whẹ́n sọ, a dona nọ gbògbéna mẹjitọ towe lẹ bo nọ na yé sisi. Yọnẹn dọ ovi wẹ alọwlemẹ towe lọsu yin bo dona nọ na ayidonugo mẹjitọ etọn lẹ. “Owanyi ma nọ whànwu,” enẹwutu ma dike haṣinṣan he alọwlemẹ towe tindo hẹ mẹjitọ etọn lẹ ni hẹn homẹgble we gbede blo.—1 Kọlintinu lẹ 13:4; Galatianu lẹ 5:26.

NUHE A SỌGAN WÀ:

• Dapana ohó he zẹ̀pá lẹ didọ, taidi “Whelẹponu wẹ hẹnnumẹ towe lẹ nọ to dide mi pò” kavi “Nuhe n’nọ wà lẹ ma nọ jẹ onọ̀ towe tọn ji gbede”

• Tẹnpọn nado nọ pọ́n nulẹ hlan dile alọwlemẹ towe nọ wà do

2 NỌ YIN NUJIKUDONỌ EYIN E BIỌ DOMỌ

NUHE BIBLU DỌ: “Sunnu na jo otọ́ po onọ̀ po do, bo na sẹbọdo asi etọn go: yé nasọ lẹzun [agbasalan] dopo.” (Gẹnẹsisi 2:24) To whenue a wlealọ, mẹjitọ towe lẹ sọgan nọ lẹndọ emi gbẹ́ dona to nukunpedo gowe, bo na nọ jlo na dádo alọwle towe mẹ zẹjlẹgo.

Hiẹ po alọwlemẹ towe po wẹ dona ze dogbó lẹ dai, bo hẹn ẹn zun yinyọnẹn na yé po sisi po. Mì sọgan dọ numọtolanmẹ mìtọn lẹ na yé tlọlọ, ṣigba ni ma yin po adi po blo. (Howhinwhẹn lẹ 15:1) Mẹdezewhè, walọmimiọn, po linsinsinyẹn po na gọalọna mì nado wleawuna haṣinṣan dagbe de hẹ hẹnnumẹ mìtọn lẹ bo zindonukọn nado “nọ sinyẹnlin hẹ ode awetọ to owanyi mẹ.”—Efesunu lẹ 4:2.

NUHE A SỌGAN WÀ:

• Eyin a mọdọ hẹnnumẹ alọwlemẹ towe tọn lẹ nọ dádo alọwle mìtọn mẹ zẹjlẹgo, dín ojlẹ he sọgbe nado dọhodeji hẹ alọwlemẹ towe

• Mì wá gbèta dopo kọ̀n gando lehe mì na nọ didẹ nuhahun enẹlẹ do go