Lehe Vijiji Sọgan Yinuwado Alọwle Ji Do

Gbọnvona dọ viyẹyẹ de jiji sọgan hẹn ayajẹ daho wá, e sọ sọgan hẹn nuhahun wá na asu po asi po lẹ. Taidi mẹjitọ yọyọ lẹ, e sọgan paṣa mì nado mọdọ suhugan whenu po huhlọn mìtọn po tọn wẹ mì na nọ yizan nado penukundo viyẹyẹ mìtọn go. Amlọnmadọ́ po diọdo he na wá aimẹ to numọtolanmẹ-liho lẹ po sọgan hẹn nuhahun wá haṣinṣan mìtọn mẹ. E na biọ dọ mì omẹ awe lẹ ni basi vọjlado lẹ nado sọgan penukundo viyẹyẹ mìtọn go, podọ nado basi hihọ́na alọwle mìtọn. Nawẹ ayinamẹ Biblu tọn lẹ sọgan gọalọna mì nado pehẹ avùnnukundiọsọmẹnu enẹlẹ gbọn?

1 MỌNUKUNNUJẸ LEHE VIYẸYẸ DE JIJI SỌGAN DIỌ GBẸZAN MÌTỌN DO MẸ

NUHE BIBLU DỌ: “Owanyi nọ sinyẹnlin bo yin homẹdagbenọ.” Humọ, owanyi “ma nọ dín ale edetiti tọn lẹ, ma nọ gblehomẹ aplà.” (1 Kọlintinu lẹ 13:4, 5) Taidi onọ̀ yọyọ de, jọwamọnu wẹ e yin nado nọ na ayidonugo viyẹyẹ towe. Etomọṣo, asu towe sọgan wá jẹ mimọ ji dọ a to vọdona emi, enẹwutu ma wọn gbede blo dọ a dona nọ na ayidonugo ewọ lọsu. Gbọn homẹfa po homẹdagbe po didohia dali, a sọgan gọalọna ẹn nado mọdọ a tindo nuhudo etọn, podọ ewọ lọsu to mahẹ tindo to nukunpipedo ovi mìtọn go mẹ.

“Mì asu lẹ emi, mì zindonukọn nado nọ yí oyọnẹn do nọhẹ yé.” (1 Pita 3:7) Nọ yọnẹn dọ asi towe dona yí whenu po huhlọn etọn susu po zan do ovi mìtọn tamẹ. Azọngban yọyọ lẹ wẹ jẹ e si todin, podọ yé sọgan nọ hẹn flumẹjijẹ, nuṣikọ kavi etlẹ yin apọṣimẹ sinsinyẹn wá na ẹn. To whedelẹnu, e tlẹ sọgan nọ gblehomẹ do gowe, etomọṣo tẹnpọn nado nọ fahomẹ, na “ewọ he whleawu nado gblehomẹ, pọnte hú huhlọntọ.” (Howhinwhẹn lẹ 16:32) Nọ do wuntuntun hia bo nọ na ẹn godonọnamẹ he sin hudo e tindo.—Howhinwhẹn lẹ 14:29.

NUHE A SỌGAN WÀ:

• Otọ́ Lẹ: Nọ gọalọna asi towe nado penukundo viyẹyẹ lọ go, etlẹ yin to zánmẹ. Nọ de whenu he a nọ yizan na nuwiwa devo lẹ pò nado sọgan yí whenu susu zan hẹ asi towe po viyẹyẹ mìtọn po

• Onọ̀ Lẹ: Eyin asu towe jlo na gọalọna we nado penukundo viyẹyẹ lọ go, ma nọ gbẹ́ blo. Eyin ewọ ma wà azọ́n lọ do lehe e jẹ do, ma gblewhẹdo e blo, kakatimọ yí homẹfa do dó lehe e sọgan wà ẹ do hia ẹ

2 MÌ HẸN HAṢINṢAN MÌTỌN LODO

NUHE BIBLU DỌ: “Yé nasọ lẹzun [agbasalan] dopo.” (Gẹnẹsisi 2:24) Dile etlẹ yindọ hagbẹ yọyọ de biọ whẹndo mìtọn mẹ todin, mì nọ flindọ “agbasalan dopo” wẹ mì omẹ awe lẹ gbẹ́ yin. Mì wà nuhe go mì pé lẹpo nado hẹn haṣinṣan mìtọn lodo.

Asi lẹ emi, mì nọ yọ́n pinpẹn alọgọ po godonọnamẹ he mì nọ mọyi sọn asu mìtọn lẹ dè po tọn. Hogbe pinpẹn-nutọn-yinyọnẹn tọn mìtọn lẹ sọgan hẹn yé ‘jẹgangan.’ (Howhinwhẹn lẹ 12:18) Asu lẹ emi, mì nọ dọ obá he mẹ mì yiwanna asi mìtọn bosọ yọ́n pinpẹn etọn jẹ na ẹn. Mì nọ pà asi mìtọn na lehe e to nukunpedo whẹndo lọ go do. —Howhinwhẹn lẹ 31:10, 28.

“Mì gbọ omẹ dopodopo ni nọ dín, e ma yin ale edetiti tọn gba, ṣigba dehe yin mẹdevo tọn.” (1 Kọlintinu lẹ 10:24) Nọ wà nuhe alọwlemẹ towe nọ yiwanna hugan lẹ na ẹn to whepoponu. Taidi asu po asi po, mì nọ yí whenu zan nado dọhodopọ, pà ode awetọ, podọ nado nọ dotoaina mìde. Mì ma nọ yin ṣejannabinọ na nuhe dù whẹho zanhẹmẹ tọn blo. Nọ hò nuhudo alọwlemẹ towe tọn pọ́n. Biblu dọmọ: “Mì nọ tẹ̀ ode awetọ mìtọn blo, adavo gbọn gbekọndopọ omẹ awe lẹ tọn dali.” (1 Kọlintinu lẹ 7:3-5) Enẹwutu, mì nọ tindo hodọdopọ ahundopo tọn do whẹho enẹ ji. Homẹfa po nukunnumọjẹnumẹ po na gọalọna mì nado hẹn haṣinṣan mìtọn lodo.

NUHE A SỌGAN WÀ:

• Mì nọ tẹnpọn nado de whenu dovo, na mì omẹ awe lẹ kẹdẹ nido nọ nọpọ́

• Nọ wà onú kleunkleun delẹ he na dohia alọwlemẹ towe dọ a yiwanna ẹn, taidi wekanhlanmẹ alokan ji tọn de didohlan ẹn kavi nunina kleun de bibasina ẹn

3 MÌ PLỌN VIYẸYẸ MÌTỌN WHẸ́N

NUHE BIBLU DỌ: “Sọn ovu whenu gbọ́n wẹ hiẹ ko yọ́n kandai wiwe lẹ, ehe penugo nado hẹn we yin nuyọnẹntọ na whlẹngán.” (2 Timoti 3:15) Mì basi tito nuhe mì na wà nado plọn viyẹyẹ mìtọn tọn. E tindo nugopipe jiawu de nado plọnnu, etlẹ yin jẹnukọnna jiji etọn. To whenue viyẹyẹ mìtọn gbẹ́ pò to homẹ, e sọgan yọ́n ogbè mìtọn bo nọ yinuwa sọgbe hẹ numọtolanmẹ mìtọn lẹ. Mì nọ hiawe na ẹn, etlẹ yin to whenue e pò to ovu. Dile etlẹ yindọ e sọgan nọma mọnukunnujẹ nuhe hia na ẹn mì te mẹ, enẹ na gọalọna ẹn nado yiwanna wehihia to whenue e na whẹ́n.

Mì ma lẹn gbede dọ viyẹyẹ mìtọn whè gbau nado plọnnu gando Jiwheyẹwhe go blo. Mì dike ni nọ sè odẹ̀ he mì nọ hò hlan Jehovah lẹ. (Deutelonomi 11:19) Mì nọ dọhona ẹn gando nudida Jiwheyẹwhe tọn lẹ go, etlẹ yin to whenue mì to aihunda hẹ ẹ. (Psalm 78:3, 4) Dile ovi mìtọn na to whinwhẹ́n, e na doayi lehe mì yiwanna Jehovah do go podọ ewọ lọsu na plọn nado yiwanna ẹn.

NUHE A SỌGAN WÀ:

• Mì nọ hodẹ̀, titengbe nado biọ nuyọnẹn he mì nado plọn viyẹyẹ mìtọn whẹ́n

• Mì nọ vọ́ hogbe po linlẹn tangan lẹ po dọna viyẹyẹ mìtọn na ewọ nido yawu jẹ nuplọn ji