Lehe Mì Sọgan Plọn Ovi Mìtọn Do

To whenue Jehovah ze tito whẹndo tọn dai, e de mẹjitọ lẹ nado nọ penukundo ovi yetọn lẹ go. (Kọlọsinu lẹ 3:20) Azọngban mìtọn wẹ e yin taidi mẹjitọ lẹ nado plọn ovi mìtọn lẹ nado yiwanna Jehovah podọ nado lẹzun mẹho he whèwhín. (2 Timoti 1:5; 3:15) Mì sọ dona nọ yọ́n nuhe tin to ahun mẹ na visunnu po viyọnnu mìtọn lẹ po. Na nugbo tọn, apajlẹ mìlọsu tọn yin nujọnu taun. Mì na penugo nado plọn Ohó Jehovah tọn ovi mìtọn po kọdetọn dagbe po, eyin mìlọsu whẹ́ nọ plọn Ohó lọ bọ e nọ tin to ahun mìtọn titi mẹ.—Psalm 40:8.

1 MÌ DIKE OVI MÌTỌN LẸ NI MỌDỌ MÌ YỌ́N DỌNSẸPỌ

NUHE BIBLU DỌ: “Nọ yawu nado sè, whleawu nado dọho.” (Jakọbu 1:19) Ojlo mìtọn wẹ na ko yindọ ovi mìtọn lẹ ni nọ mọdọ emi sọgan dọhona mì po awuvivo po. Yé dona mọdọ mì to gbesisọ mẹ nado dotoaina yé eyin yé jlo na dọhona mì. Mì nọ hẹn owhé mìtọn zun lẹdo jijọho tọn de, na ovi lẹ nido mọdọ emi sọgan voawu do dọhona mì. (Jakọbu 3:18) Eyin yé nọ lẹndọ mì na fiẹ do emi go kavi gblewhẹdo emi, yé ma na dọ homẹ na mì. Mì nọ fahomẹ hẹ ovi mìtọn lẹ bo nọ hẹn yé deji whẹwhẹ dọ mì yiwanna yé.—Matiu 3:17; 1 Kọlintinu lẹ 8:1.

NUHE A SỌGAN WÀ:

• Mì nọ tin to gbesisọ mẹ nado dotoaina ovi mìtọn to whenue e jlo na dọhona mì

• Mì nọ dọhodopọ hẹ ovi mìtọn lẹ whẹwhẹ, ni ma nọ yin to whenue nuhahun lẹ fọ́n kẹdẹ blo

2 MÌ NỌ TẸNPỌN NADO MỌNUKUNNUJẸ NUHE DỌ GBÉ YÉ JA TAUN MẸ

NUHE BIBLU DỌ: “Ewọ he yí zinzin do basi owhẹ̀ na mọ dagbe.” (Howhinwhẹn lẹ 16:20) To whedelẹnu, nado sọgan mọnukunnujẹ numọtolanmẹ ovi mìtọn lẹ tọn mẹ ganji, e na biọ dọ mì ni nọ mọnú zẹ̀ hogbe he yé yizan lẹ go. Jọja lẹ nọ saba do wazẹjlẹgo hia to hodidọ yetọn lẹ mẹ, podọ to whedelẹnu nuhe nọ tọ́n sọn nùmẹ na yé lẹ ma nọ yin nuhe dọ gbé yé ja taun. “Eyin mẹde gblọnho jẹnukọnna sisè, nululu . . . wẹ na ẹn.” (Howhinwhẹn lẹ 18:13) Enẹwutu, mì ma nọ yawu gblehomẹ blo.—Howhinwhẹn lẹ 19:11.

NUHE A SỌGAN WÀ:

• Mahopọnna nudepope he ovi mìtọn lẹ na dọna mì, mì magbe ma nado nọ gbòhódonù na yé kavi yinuwa hẹ yé po homẹgble po

• Mì tẹnpọn nado nọ flin lehe mìlọsu nọ yinuwa do po nuhe nọ yin nujọnu na mì to whenue mì tindo owhe yetọn po

3 MÌ NỌ DO GBEKỌNDOPỌ HIA

NUHE BIBLU DỌ: “Ovi ṣie, sè mẹplọngbe otọ́ towe tọn, a gbẹ́ osẹ́n onọ̀ towe tọn dai blo.” (Howhinwhẹn lẹ 1:8) Jehovah na jlọjẹ otọ́ po onọ̀ po nado paṣẹ do ovi yetọn lẹ ji. Mì dona plọn ovi mìtọn lẹ nado nọ na mì sisi bosọ nọ setonuna mì. (Efesunu lẹ 6:1-3) Eyin mẹjitọ lẹ ma “gbọn gbesisọ dali tin to kọndopọ mẹ to ayiha dopolọ mẹ,” ovi lẹ nọ doayi e go. (1 Kọlintinu lẹ 1:10) Enẹwutu, eyin mì ma tlẹ kọngbedopọ do whẹho he gando ovi lẹ go de ji, mì ma nọ dọnnu to nukun yetọn mẹ blo, na enẹ sọgan zọ́n bọ sisi he yé tindo na mì taidi mẹjitọ na depò.

NUHE A SỌGAN WÀ:

• Mì nọ dọhodopọ bosọ nọ kọngbedopọ do lehe mì na plọn ovi mìtọn lẹ do ji

• Eyin pọndohlan hiẹ po alọwlemẹ towe po tọn gbọnvo gando lehe mì na plọn ovi mìtọn lẹ do go, tẹnpọn nado nọ mọnukunnujẹ pọndohlan etọn mẹ

4 MÌ TINDO TITO DE

NUHE BIBLU DỌ: “Plọn ovi do aliho he e na gbọn ji.” (Howhinwhẹn lẹ 22:6) Ovi mìtọn lẹ pinplọn po kọdetọn dagbe po ma na wá gbọn kosọ dali. Mì dona tindo tito mẹpinplọn tọn de, ehe na bẹ mẹplọnlọ dido ovi mìtọn lẹ go hẹn. (Psalm 127:4; Howhinwhẹn lẹ 29:17) Mẹplọnlọdidomẹgo ma zẹẹmẹdo yasanamẹ kẹdẹ gba, ṣigba e sọ nọ biọ dọ yè ni gọalọna ovi lẹ nado yọ́n nuhewutu yè do ze osẹ́n delẹ dai na yé. (Howhinwhẹn lẹ 28:7) Humọ, mì plọn yé nado nọ yiwanna Ohó Jehovah tọn podọ nado nọ tunwun nunọwhinnusẹ́n etọn lẹ go. (Psalm 1:2) Ehe na gọalọna yé nado wleawuna ayihadawhẹnamẹnu dagbe de.—Heblu lẹ 5:14.

NUHE A SỌGAN WÀ:

• Mì hẹn ẹn diun dọ ovi mìtọn lẹ nọ mọ Jiwheyẹwhe hlan taidi Omẹ nujọnu tọn de he go yé sọgan dejido

• Mì gọalọna yé nado yọ́n nuhe sọgan bẹpla walọ dagbe yetọn lẹ bo nọ dapana yé, taidi nuzedonukọnnamẹ po họntọnjiji Intẹnẹt ji tọn lẹ po. Mì plọn yé lehe yé sọgan dapana mẹhe nọ zanhẹ ovivu lẹ do