WETA 11
Nọtẹn Sinsẹ̀n-Bibasi Tọn Mítọn Lẹ
SINSẸ̀N-BASITỌ nugbonọ Jehovah tọn lẹ yin gbedena nado nọ pli dopọ nado mọ nudọnamẹ lẹ yí podọ nado nọ na tuli ode awetọ. (Heb. 10:23-25) Nọtẹn sinsẹ̀n-bibasi tọn tintan na mẹdide Jiwheyẹwhe tọn lẹ, yèdọ Islaelivi lẹ, nọ yin yiylọdọ “gòhọtúntún,” kavi “gòhọ opli tọn.” (Eks. 39:32, 40) To godo mẹ, visunnu Davidi tọn, Sọlomọni gbá ohọ̀ de, yèdọ tẹmpli de, na gigo Jiwheyẹwhe tọn. (1 Ahọ. 9:3) To whenue tẹmpli lọ yin gbigbakija to 607 J.W.M., Ju lẹ basi tito nado nọ pli do ohọ̀ he nọ yin yiylọdọ sinagọgu lẹ mẹ nado sẹ̀n Jiwheyẹwhe. To nukọn mẹ, tẹmpli lọ yin vivọgbá, bọ whladopo dogọ, e nọ yin yiyizan taidi ahọnkan sinsẹ̀n-bibasi nugbo tọn. Jesu plọnmẹ to sinagọgu lẹ mẹ podọ to tẹmpli mẹ. (Luku 4:16; Joh. 18:20) Jesu tlẹ sọ basi opli de to osó de ji.—Mat. 5:1–7:29.
2 To okú Jesu tọn godo, Klistiani lẹ nọ pli to nọtẹn gbangba tọn lẹ po owhé mẹdetiti tọn lẹ po gbè nado plọnmẹ Owe-wiwe lẹ podọ nado duvivi gbẹdido tọn hẹ yisenọ hatọ lẹ. (Owalọ 19:8, 9; Lom. 16:3, 5; Kol. 4:15; File. 2) To whedelẹnu, e nọ lẹzun dandan na Klistiani hohowhenu tọn lẹ nado nọ pli do fie to olá lẹ, na homẹkẹndomẹtọ lẹ nikaa mọ yé. Na nugbo tọn, devizọnwatọ nugbonọ Jiwheyẹwhe tọn hohowhenu tọn lẹ nọ tindo ojlo vẹkuvẹku nado pli do nọtẹn sinsẹ̀n-bibasi tọn lẹ nado sọgan yin “pinplọn gbọn Jehovah dali.”—Isa. 54:13.
3 To egbehe ga, Klistiani lẹ nọ basi opli lẹ to owhé mẹdetiti tọn lẹ gbè podọ to nọtẹn gbangba tọn lẹ. Owhé mẹdetiti tọn lẹ nọ saba yin yiyizan na opli sinsẹ̀nzọn kunnudegbe tọn lẹ. Mẹhe ze owhé yetọn jo na opli mọnkọtọn lẹ nọ pọ́n ẹn hlan taidi lẹblanulọkẹyi de. Mẹsusu nọ mọdọ owhé yetọn zizejo to aliho ehe mẹ ko hẹn ale susu wá na yé to gbigbọ-liho.
PLITẸNHỌ AHỌLUDUTA TỌN
4 Plitẹnhọ Ahọluduta tọn wẹ yin nọtẹn opli tọn tangan lọ na Kunnudetọ Jehovah tọn lẹ. To paa mẹ, aigba de nọ yin hihọ̀ bọ Plitẹnhọ Ahọluduta tọn yọyọ de nọ yin gbigbá do e ji kavi ohọ̀ he ko yin gbigbá dote de nọ yin vivọjlado. Nado sọgan de akuẹzinzan lẹ pò podọ nado sọgan yí ohọ̀ mítọn lẹ zan ganji, agun susu sọgan yí Plitẹnhọ Ahọluduta tọn dopo zan, eyin e biọ domọ. To lẹdo delẹ mẹ, e nọ lẹzun dandannu nado haya plitẹnhọ de. Eyin Plitẹnhọ Ahọluduta tọn yọyọ lẹ yin gbigbá kavi eyin vọjlado tangan lẹ yin bibasi to e go, e na yọ́n dọ klandowiwe etọn ni yin bibasi. Ṣigba, eyin vọjlado flinflin lẹ poun wẹ yin bibasi na Plitẹnhọ Ahọluduta tọn he ko nọ yin yiyizan dai de, nuhudo de ma nọ tin nado vọ́ ẹ klandowiwe.
5 Plitẹnhọ Ahọluduta tọn ma dona yin ohọ̀ gẹẹ de he yin gbigbá nado dọ̀n ayidonugo mẹdevo lẹ tọn gba. Dile etlẹ yindọ awusọhia etọn to awà de ji sọgan gbọnvona awà devo ji tọn, awusọhia lọ dona do lẹndai etọn hia. (Owalọ 17:24) Sọgbe hẹ ninọmẹ lẹdo lọ tọn lẹ, e dona yin nọtẹn de he mẹ yè dona voawu te bosọ bọawuna opli Klistiani tọn lẹ bibasi.
6 Agun Kunnudetọ Jehovah tọn lẹ tọn lẹpo wẹ nọ basi nunina lẹ nado nọgodona Plitẹnhọ Ahọluduta tọn agun yetọn tọn yiyizan, vivọjlado po nukunpipedego po. Akuẹjijọ depope ma nọ yin bibasi; mọjanwẹ akuẹ ma nọ yin gbigbò namẹ do niyẹn. Apotin nunina tọn de nọ tin to finẹ, bọ mẹhe nọ wá opli lẹ sọgan basi nunina lẹ nado penukundo akuẹzinzan dandan tọn he plitẹnhọ lọ yiyizan nọ biọ lẹ go. Yé nọ wàmọ sọn ojlo mẹ wá podọ sọn ahun mẹ wá.—2 Kọl. 9:7.
7 Mẹhe to agun lọ mẹ lẹpo wẹ nọ mọdọ lẹblanulọkẹyi de wẹ e yin nado nọgodona Plitẹnhọ Ahọluduta tọn lọ to akuẹzinzan-liho, podọ nado nọ ze yede jo nado hẹn ẹn do wiweji podọ do ninọmẹ dagbe mẹ. Mẹho agun tọn kavi devizọnwatọ lizọnyizọnwiwa tọn de wẹ nọ saba yin azọ́ndena nado wleawuna todohukanji azọ́n ehelẹ tọn. To paa mẹ, pipli sinsẹ̀nzọn kunnudegbe tọn lẹ wẹ nọ penukundo wiwejininọ lọ go, bọ nugopọntọ pipli lọ tọn kavi alọgọtọ etọn nọ deanana tito lọ. Awusọhia Plitẹnhọ Ahọluduta tọn to homẹ podọ to gbonu dona nọ doyẹyigona Jehovah po titobasinanu etọn po.
Mẹhe to agun lọ mẹ lẹpo wẹ nọ mọdọ lẹblanulọkẹyi de wẹ e yin nado nọgodona Plitẹnhọ Ahọluduta tọn lọ to akuẹzinzan-liho, podọ nado nọ ze yede jo nado hẹn ẹn do wiweji podọ do ninọmẹ dagbe mẹ
8 Eyin agun hugan dopo wẹ nọ yí plitẹnhọ de zan, mẹho agun lọ lẹ tọn lẹ nọ de Wedegbẹ́ Nukunpedonugo Plitẹnhọ Ahọluduta tọn de, he na nọ na ayidonugo whẹho he gando ohọ̀ lọ po aigba etọn po go lẹ. Pipli mẹho lẹ tọn lẹ wẹ nọ de mẹmẹsunnu he na yin anadenanutọ to wedegbẹ́ nukunpedonugo tọn lọ mẹ. Wedegbẹ́ ehe na nọ wazọ́n to anademẹ pipli mẹho lẹ tọn lẹ glọ, bo na nọ deanana plitẹnhọ lọ hinhẹn do wiweji, bo nasọ nọ hẹn ẹn diun dọ plitẹnhọ lọ yin hinhẹn do ninọmẹ dagbe mẹ bọ nuyizan wiwejininọ tọn he pé lẹ tin-to-aimẹ. Ehe nọ biọ gbekọndopọ pẹkipẹki to agun he go e gando lẹpo si.
9 Eyin agun susu nọ yí Plitẹnhọ Ahọluduta tọn dopolọ zan, gànmẹ opli tọn lẹ sọgan nọ yin didiọ sọn agun de ji jẹ devo ji. Mẹho agun tọn lẹ na nọ wà ehe gbọn ode awetọ tọn hihopọn po owanyi mẹmẹsunnu tọn po dali. (Flp. 2:2-4; 1 Pita 3:8) Agun dopo de ma na nọ basi nudide mọnkọtọn do ota agun he pò lẹ tọn mẹ gba. Eyin nugopọntọ lẹdo tọn to dopo to agun he nọ zan Plitẹnhọ Ahọluduta tọn lọ lẹ mẹ dlapọn, agun he pò lẹ na diọ gànmẹ opli yetọn lẹ tọn to osẹ lọ gblamẹ eyin e biọ domọ.
10 Plitẹnhọ Ahọluduta tọn lọ sọgan yin yiyizan na hùnwhẹ alọwle tọn lẹ po ṣiọdidi tọn lẹ po eyin Wedegbẹ́ Sinsẹ̀nzọn tọn kẹalọyi. Mẹho agun tọn ehelẹ nọ yí sọwhiwhe do gbadopọnna obiọ dopodopo bo nọ ze nudide yetọn sinai do anademẹ he wekantẹn alahọ tọn ko na lẹ ji.
11 Mẹhe yin alọkẹyi nado yí Plitẹnhọ Ahọluduta tọn zan na lẹndai mọnkọtọn lẹ dona yinuwa to aliho he jẹna Klistiani nugbo lẹ mẹ. Nudepope ma dona yin wiwà to Plitẹnhọ Ahọluduta tọn lọ mẹ he na hẹn homẹgble agun lọ kavi hẹn vlẹko wá oyín Jehovah tọn ji bo kọnmasin do yinkọ dagbe agun lọ tọn go. (Flp. 2:14, 15) To anademẹ wekantẹn alahọ tọn glọ, Plitẹnhọ Ahọluduta tọn sọgan yin yiyizan na nuwiwa gbigbọmẹ tọn devo lẹ, taidi Wehọmẹ Lizọnyizọn Ahọluduta tọn po Wehọmẹ Sinsẹ̀nzọn Gbehosọnalitọ tọn po.
12 Agun lẹ dona nọ pọ́n nọtẹn opli tọn yetọn hlan po sisi po to whepoponu. Aṣọ́dido, nusisọ́ po walọ mítọn lẹ po dona nọ do yẹyi he sinsẹ̀n-bibasi Jehovah tọn jẹna hia. (Yẹwh. 5:1; 1 Tim. 2:9, 10) Ayinamẹ ehelẹ yíyí-do-yizan mẹ nọ do pinpẹn-nutọn hia na opli Klistiani tọn mítọn lẹ.
13 Titojininọ to opli lẹ whenu yin nujọnu taun. E na yọ́n dọ ovi lẹ ni nọ sinai hẹ mẹjitọ yetọn lẹ. Mẹjitọ he tindo ovi flinflin lẹ sọgan yin tulina nado nọ sinai do fie yé ma na fẹayihasẹnamẹ sọmọ te eyin e wá biọ dọ yé dona ze ovi lẹ tọ́njẹgbonu nado domẹplọnlọ yé go kavi nado penukundo nuhudo devo lẹ go.
14 Mẹmẹsunnu he pegan lẹ nọ yin azọ́ndena taidi aisinnunamẹtọ lẹ to opli lẹ ji to Plitẹnhọ Ahọluduta tọn mẹ. Yé dona nọ to aṣeji, bo yin họntọnjihẹmẹtọ, bosọ nọ yí wuntuntun zan. Azọngban yetọn wẹ nado dokuavọna mẹyọyọ lẹ bo hẹn yé voawu, podọ nado gọalọna mẹhe gbọwhenu lẹ nado mọ aisinnu lẹ, bosọ kàn sọha pliwatọ lẹ tọn dai, podọ nado na ayidonugo he jẹ hlan yozò po jẹhọn po to plitẹnhọ lọ mẹ. Eyin e biọ domọ, aisinnunamẹtọ lẹ na nọ flinnu mẹjitọ lẹ nado penukundo ovi yetọn lẹ go ganji, bọ ovi lẹ ma na nọ to wezunhọ̀n pé jẹnukọnna opli lẹ kavi to opli lẹ godo kavi to aihunda to oplò ji. Eyin ovi de ma nọ whii, aisinnunamẹtọ de sọgan dọna mẹjitọ lọ to aliho he jọmẹ de mẹ nado ze ovi lọ tọ́njẹgbonu, bọ mẹplidopọ lẹ ma nado yin ayihafẹsẹna zẹjlẹgo. Azọ́n aisinnunamẹtọ lẹ tọn nọ gọalọna mẹlẹpo nado duvivi opli lẹ tọn. E na yọ́n hugan dọ mẹho lẹ po devizọnwatọ lizọnyizọnwiwa tọn lẹ po ni nọ yin yiyizan taidi aisinnunamẹtọ lẹ.
PLITẸNHỌ AHỌLUDUTA TỌN GBIGBÁ
15 To owhe kanweko tintan whenu, nulẹ pọnte na Klistiani delẹ to akuẹzinzan-liho hú devo lẹ, enẹwutu apọsteli Paulu wlan dọmọ: “Gbọn hinhẹn sọzẹn dali, lánkan he mì tindo todin nido sọgan súdo nuhudo yetọn tọn, na lánkan yetọn nido sọgan súdo nuhe whèdo mìwlẹ tọn ga, na zẹ́nsisọ nido sọgan tin.” (2 Kọl. 8:14) “Zẹ́nsisọ” mọnkọtọn de wẹ tin to egbehe ga. Nunina he agun lẹ basi lẹdo aihọn pé wẹ nọ yin bibẹpli nado yí do gọalọ bo gbá kavi vọ́ Plitẹnhọ Ahọluduta tọn lẹ jlado. Titobasinanu lọ po agun he ko mọaleyi tlọlọ sọn nunina ehe mẹ lẹ po nọ yọ́n pinpẹn alọgọ alọtútlú tọn he mẹmẹsunnu lẹ nọ basi lẹdo aihọn pé tọn tlala.
16 Sọgbe hẹ ninọmẹ lẹdo de tọn blebu, wekantẹn alahọ tọn nọ de Plitẹnhọ Ahọluduta tọn he agun dopodopo na yizan na ẹn. Wekantẹn alahọ tọn wẹ sọ nọ magbe whenue podọ fie Plitẹnhọ Ahọluduta tọn yọyọ de na yin gbigbá kavi plitẹnhọ he ko tin de na yin vivọjlado te tọn, to aigba-denamẹ alahọ lọ tọn ji. Eyin nugbajẹmẹji lẹ jọ, tito lẹ nọ yin bibasi nado vọ́ Plitẹnhọ Ahọluduta tọn he yin hinhẹngble lẹ jlado, podọ to whedelẹnu, kakajẹ owhé mẹmẹsunnu lẹ tọn ji.
17 Wekantọ alahọ tọn wẹ nọ deanana lehe mẹdezejotọ lẹ na yin yiyizan do nado gọalọ to aigba hihọ̀, awuwiwlena yẹdide Plitẹnhọ Ahọluduta tọn, gbedewema lẹ mimọyi, họ̀gbigbá po nukunpipedo plitẹnhọ lẹ go po mẹ. Na nuhudo Plitẹnhọ Ahọluduta tọn tin taun to otò susu mẹ wutu, yè do hudo mẹdezejotọ susu tọn. Wẹnlatọ he ko yí baptẹm bo pegan bosọ tindo ojlo nado gọalọ lẹpo wẹ yin tudohomẹna nado kanwe gọ́ alọdowemẹwe lọ mẹ bo ze e jo na Wedegbẹ́ Sinsẹ̀nzọn tọn agun yetọn tọn. Wẹnlatọ he ma ko yí baptẹm lẹ lọsu sọgan gọalọ to azọ́n Plitẹnhọ Ahọluduta tọn agun yetọn titi tọn lẹ gbigbá po vivọjlado po mẹ.
PLITẸNHỌ PLIDOPỌ TỌN LẸ
18 Sọha Klistiani hohowhenu tọn he nọ pli dopọ lẹ tọn ma nọ saba sù sọmọ. Etomọṣo, “gbẹtọgun he yinukunkẹ de” nọ pli dopọ to whedelẹnu. (Owalọ 11:26) Mọdopolọ to egbehe, sọha omẹ Jehovah tọn lẹ tọn he nọ pli dopọ na plidopọ lẹdo tọn lẹ po plidopọ daho lẹ po nọ sù taun. Nọtẹn lẹdo lọ mẹ tọn de nọ saba yin hihaya na nuwiwa ehelẹ, ṣigba to fie nọtẹn mọnkọ lẹ yiyizan ma yọnbasi te kavi ma tin te, nọtẹn sinsẹ̀n-bibasi tọn he nọ yin yiylọdọ Plitẹnhọ Plidopọ tọn de sọgan yin awuwlena.
19 To whedelẹnu, ohọ̀ he ko yin gbigbá dote de nọ yin hihọ̀, bo nọ yin vivọjlado, bosọ nọ yin yiyizan taidi Plitẹnhọ Plidopọ tọn. Ṣigba to paa mẹ, aigba de nọ saba yin hihọ̀ bọ plitẹnhọ yọyọ de nọ yin gbigbá. Kiklo Plitẹnhọ Plidopọ tọn lẹ tọn nọ gbọnvo, sọgbe hẹ nuhudo lẹdo dopodopo tọn. Wekantẹn alahọ tọn nọ basi nudide nado họ̀ kavi gbá ohọ̀ mọnkọtọn, kiki to whenue yè ko yí sọwhiwhe do gbadopọnna akuẹ he e na dù po whla nẹmu he e na nọ yin yiyizan to owhe dopo mẹ po godo.
20 Wekantẹn alahọ tọn nọ de mẹmẹsunnu lẹ nado penukundo Plitẹnhọ Plidopọ tọn lọ po yizan etọn po go. Tito lẹ nọ yin bibasi na lẹdo lọ lẹ nado nọ penukundo wiwejininọ etọn go to gbesisọ mẹ podọ whla awe to whemẹ, gọna nuvọjlado flinflin lẹ. E na yin alenu de na mẹmẹsunnu lẹ nado nọ ze yede jo na azọ́n ehelẹ. Enẹwutu, agun lẹ yin tulina nado nọ yí ahun lẹpo do nọgodona tito ehelẹ.—Salm. 110:3; Mal. 1:10.
21 To whedelẹnu, Plitẹnhọ Plidopọ tọn sọgan sọ yin yiyizan na nuwiwa yẹwhehọluduta tọn devo lẹ, taidi Wehọmẹ Biblu Pinplọn tọn lẹ po opli vonọtaun lẹ na nugopọntọ tomẹyitọ lẹ po. Taidi Plitẹnhọ Ahọluduta tọn, Plitẹnhọ Plidopọ tọn yin nọtẹn he yin klandowiwe de na sinsẹ̀n-bibasi. To whenuena mí yì opli to Plitẹnhọ Plidopọ tọn de mẹ, walọ mítọn, aṣọ́dido po nusisọ́ mítọn po dona do yẹyi he jẹ hia, kẹdẹdile mí nọ basi do to whenue mí yì opli to Plitẹnhọ Ahọluduta tọn mẹ na sinsẹ̀n-bibasi.
22 Mẹyọyọ susugege wẹ to wiwọ̀ wá nado lẹzun apadewhe titobasinanu Jiwheyẹwhe tọn to azán godo tọn ehelẹ mẹ. Ehe yin kunnudenu dona Jehovah tọn. (Isa. 60:8, 10, 11, 22) Enẹwutu, mí dona nọgodona tito he yin bibasi lẹ nado tindo nọtẹn sinsẹ̀n-bibasi tọn he mẹ yè sọgan voawu te de bosọ hẹn ẹn do wiweji. Gbọn mọwiwà dali, mí nọ dohia dọ mí yọ́n pinpẹn dotẹnmẹ he nọtẹn sinsẹ̀n-bibasi tọn enẹlẹ nọ hundote na mí tọn, nado na tuli ode awetọ dile mí mọdọ azán Jehovah tọn to sisẹpọ.