Numọtolanmẹ Whẹhuhu Tọn​—“Lẹ̀ Mi Wé sọn Ylando Ṣie Mẹ”

NUMỌTOLANMẸ whẹhuhu tọn sọgan yin agbàn he pẹ̀n taun de. Ahọlu Davidi wlan dọmọ: “Nuṣiwa ṣie lẹ ko ṣinyọ́n ota na mi pete; yé húagbọ́ mi taidi agbàn pinpẹn tlala de.” (Psalm 38:4) Na Klistiani delẹ kudeji dọ Jehovah ma sọgan jona emi gbede wutu, yé nọ blawu zẹjlẹgo bo nọ jẹflumẹ. (2 Kọlintinu lẹ 2:7) Be tadona he kọ̀n yé wá enẹ sọgbe ya? Eyin hiẹ tlẹ ko waylando sinsinyẹn lẹ, be a ko jẹla sọn Jehovah dè sọmọ bọ ewọ ma sọgan jona we gbede wẹ ya? Paali, ma lẹnmọ blo!

“Mí Ni Dọwhẹgbọ to Míde Ṣẹnṣẹn”

Jehovah ma nọ gbẹ́ mẹhe waylando bo lẹnvọjọ lẹ dai. Na nugbo tọn, ewọ nọ dín yé mọ! To apajlẹ visunnu duvanọ lọ tọn mẹ, Jesu yí Jehovah jlẹdo otọ́ owanyinọ de go, mẹhe visunnu etọn tọ́n sọn whẹndo etọn mẹ bo yì zan gbẹzan he gblezọn de. To nukọn mẹ, visunnu lọ basi nudide nado lẹkọwa whégbè. “Dile [visunnu lọ] gbẹ́ pò to olá, otọ́ etọn mọ ẹn bọ lẹblanu whàn ẹn, e sọ họ̀nwezun bo gbò e fán bosọ donùnùgo na ẹn.” (Luku 15:11-20) Be hiẹ lọsu nọ jlo na dọnsẹpọ Jehovah ṣigba bo nọ mọdọ a “gbẹ́ pò to olá” na ẹn wẹ ya? Taidi otọ́ lọ to apajlẹ he Jesu na mẹ, Jehovah tindo awuvẹmẹ sisosiso na we. E tin to jejeji nado kẹalọyi we.

Ṣigba etẹwẹ lo, eyin a nọ mọdọ ylando towe lẹ ko sinyẹn gbau kavi sù sọmọ bọ Jehovah ma sọgan jona we? Jaale lẹnnupọndo oylọ-basinamẹ Jehovah tọn he yin kinkandai to Isaia 1:18 mẹ ji, he dọmọ: “‘Todin, mì wá na mí ni dọwhẹgbọ to míde ṣẹnṣẹn,’ wẹ Jehovah dọ. ‘Dile etlẹ yindọ ylando mìtọn lẹ divẹẹ ṣẹ́ṣẹ́, yé na yin hinhẹn zun wewe di osin-agó.’” Na nugbo tọn, Jehovah penugo nado jo ylando mítọn lẹ na mí, eyin yé tlẹ taidi sinmẹ vẹẹ ṣẹ́ṣẹ́ he kọ̀n do avọ̀ wewe mẹ bo ma sọgan súnsún sẹ̀.

Jehovah ma jlo dọ ayihadawhẹnamẹnu towe ni to whẹgbledo we zọnmii. Enẹwutu, nawẹ a sọgan mọ kọgbọ he jonamẹ Jiwheyẹwhe tọn po ayihadawhẹnamẹnu wiwe de tintindo po nọ hẹnwa gbọn? Lẹnnupọndo afọdide awe he Ahọlu Davidi ze lẹ ji. Tintan, e dọmọ: “N’na yigbe sẹ́nhẹngba ṣie lẹ tọn na Jehovah.” (Psalm 32:5) Flindọ, Jehovah ko basi oylọna we nado dọnsẹpọ ewọ to odẹ̀ mẹ, podọ nado wá “dọwhẹgbọ” hẹ ẹ. Ma gbẹ́ oylọ-basinamẹ enẹ dai blo. Yigbe ylando towe lẹ tọn na Jehovah, bo dọ numọtolanmẹ towe lẹ na ẹn. Na numimọ he Davidi tindo lẹ wutu, ewọ sọgan yí jidide do hodẹ̀ dọmọ: “Lẹ̀ mi wé sọn ylando ṣie mẹ. . . . Jiwheyẹwhe E, hiẹ ma na gbẹ́ ahun he jẹflumẹ bo to awubla dai.”—Psalm 51:2, 17.

Awetọ, Davidi mọ alọgọ yí sọn afọzedaitọ dide Jiwheyẹwhe tọn dè, enẹ wẹ yẹwhegán Natani. (2 Samuẹli 12:13) To egbehe, Jehovah ko wleawuna mẹho agun tọn he ko mọ azọ́nplọnmẹ yí lẹ nado gọalọna mẹhe waylando bo lẹnvọjọ lẹ, na yé nido vọ́ haṣinṣan yetọn hẹ Jehovah jlado. Eyin a dọnsẹpọ mẹho lẹ, yé na yí Owe-wiwe lẹ zan bosọ hodẹ̀ ahundopo tọn hẹ we nado miọnhomẹna we, nado de numọtolanmẹ agọ̀ he a tindo lẹ pò kavi nado de yé sẹ̀, bo gọalọna we nado jẹgangan to gbigbọ-liho.—Jakọbu 5:14-16.

“Ayajẹnọ Wẹ Mẹlọ He Sẹ́nhẹngba Etọn Yin Jijona Ẹn”

Na nugbo tọn, hiẹ sọgan nọ mọdọ dopo to nuhe vẹawuna we hugan nado wà lẹ mẹ wẹ, nado yigbe ylando towe lẹ tọn na Jehovah Jiwheyẹwhe podọ nado dọnsẹpọ mẹho agun tọn lẹ. Ayihaawe ma tin dọ numọtolanmẹ dopolọ wẹ Davidi tindo. E “nabọẹ” bo ma dọ ylando etọn tọ́n na ojlẹ de. (Psalm 32:3) Ṣigba to godo mẹ, homẹ etọn hùn dọ e mọaleyi to whenue e yigbe ylando etọn lẹ tọn bo basi vọjlado.

Ale daho he Davidi mọyi wẹ yindọ, e gọ̀ ayajẹ etọn mọyi. E wlan dọmọ: “Ayajẹnọ wẹ mẹlọ he sẹ́nhẹngba etọn yin jijona ẹn, mẹhe ylando etọn yin jijona.” (Psalm 32:1, nudọnamẹ odò tọn.) E sọ hodẹ̀ dọmọ: “Jehovah E, hùn nùflo ṣie lẹ, na onù ṣie nido nọ lá pipà towe.” (Psalm 51:15) To whenue Davidi mọ kọgbọ sọn numọtolanmẹ whẹhuhu tọn etọn si bosọ dopẹ́ dọ Jiwheyẹwhe jona emi, enẹ whàn ẹn nado dọhona mẹdevo lẹ gando Jehovah go.

Jehovah jlo dọ hiẹ lọsu ni duvivi kọgbọ he ayihadawhẹnamẹnu wiwe de tintindo nọ hẹnwa tọn. Podọ e jlo dọ hiẹ ni nọ yí ahundopo po ayajẹ nujọnu tọn po do dọhona mẹdevo lẹ gando emi po lẹndai emitọn lẹ po go, e ma yin po numọtolanmẹ whẹhuhu tọn po gba. (Psalm 65:1-4) Flindọ ewọ basi oylọna we nado “súnsún ylando [towe] lẹ sẹ̀, na ojlẹ kọfanamẹ tọn nido wá sọn Jehovah lọsu titi dè.”—Owalọ lẹ 3:19.

Nuhe jọ to whẹho Martha tọn mẹ niyẹn. E dọmọ: “Visunnu ṣie nọ to Atọ̀họ̀-Nuhihọ́ lọ Tọn po Réveillez-vous! po dohlan mi sọn ojlẹ de mẹ jẹ devo mẹ. N’vọ́ haṣinṣan ṣie hẹ Jehovah jlado vudevude. To afọdide he n’ze nado lẹkọwa lẹ mẹ, dehe vẹawuna mi hugan wẹ nado biọ jona ylando he n’ko wà wayi lẹpo tọn. Ṣigba to godo mẹ, n’dọnsẹpọ Jiwheyẹwhe to odẹ̀ mẹ bosọ biọ ẹ nado jona mi. N’ma gán yise dọ owhe 40 plipli ko juwayi whẹpo n’do lẹkọwa Jehovah dè. Numimọ he n’tindo lẹ yin kunnudenu dọ, etlẹ yin to owhe susu lẹ godo, mẹde sọgan gbẹ́ tindo lẹblanulọkẹyi nado sẹ̀n Jiwheyẹwhe bo duvivi owanyi etọn tọn whladopo dogọ.”