APÁ ATỌ́N

Lẹkọ Do ‘Lẹngbọhọtọ po Nugopọntọ Alindọn Towe Tọn po’ Dè

Be a to pipehẹ dopo kavi susu to avùnnukundiọsọmẹnu he ji alọnuwe ehe dọhodo lẹ mẹ wẹ ya? Eyin mọ wẹ, yọnẹn dọ e ma yin hiẹ kẹdẹ. Devizọnwatọ nugbonọ Jiwheyẹwhe tọn susu wẹ ko pehẹ avùnnukundiọsọmẹnu mọnkọtọn lẹ, to ojlẹ Biblu tọn mẹ podọ to azán mítọn gbé. Jehovah wẹ gọalọna yé nado duto avùnnukundiọsọmẹnu enẹlẹ ji, podọ e sọgan wà nudopolọ na hiẹ lọsu.

Jehovah na kẹalọyi we to whenue a na lẹkọwa ewọ dè

DEJI dọ Jehovah na kẹalọyi we to whenue a na lẹkọwa ewọ dè. E na gọalọna we nado pehẹ magbọjẹ lẹ po kọdetọn dagbe po, nado duto homẹgble lẹ ji, podọ nado duvivi jijọho ayiha mẹ po ahun mẹ po tọn he ayihadawhẹnamẹnu wiwe de tintindo nọ hẹnwa. Enẹgodo, e yọnbasi dọ hiẹ na yin whinwhàn nado sẹ̀n Jehovah whladopo dogọ to pọmẹ hẹ sinsẹ̀n-basitọ hatọ towe lẹ. Ninọmẹ towe na taidi Klistiani owhe kanweko tintan whenu tọn lẹ tọn, mẹhe go apọsteli Pita kanwe gando dọmọ: “Na mì ko taidi lẹngbọ he to dindanbu lẹ dai; ṣigba todin mì ko lẹkọ do lẹngbọhọtọ po nugopọntọ alindọn mìtọn lẹ tọn po dè.”—1 Pita 2:25.

Matin ayihaawe, onú dagbe hugan he a sọgan wà wẹ nado lẹkọwa Jehovah dè. Etẹwutu? Na gbọnmọ dali a na hẹn homẹ Jehovah tọn hùn. (Howhinwhẹn lẹ 27:11) Dile hiẹ lọsu yọnẹn do, Jehovah nọ tindo numọtolanmẹ, enẹwutu nuhe mí nọ wà lẹ nọ yinuwado ewọ ji. Etomọṣo, Jehovah ma nọ hẹn mí po huhlọn po nado yiwanna ẹn kavi sẹ̀n ẹn. (Deutelonomi 30:19, 20) Weyọnẹntọ he nọ basi zẹẹmẹ do Biblu ji de dọmọ: “Mẹde ma sọgan hùn ahun towe na we. Hiẹ lọsu wẹ dona hùn in.” Mí sọgan basi nudide nado hùn ahun mítọn gbọn Jehovah sinsẹ̀n po ahun he gọ́ na owanyi po dali. To whenue mí wàmọ, mí nọ na ẹn nunina họakuẹ de, enẹ wẹ mẹdezejo mlẹnmlẹn mítọn, podọ mí nọ hẹn ayajẹ daho wá na ẹn. Na nugbo tọn, nudepope ma sọgan yin yiyijlẹdo ayajẹ he Jehovah sinsẹ̀n to aliho he jẹ mẹ nọ hẹnwa go.—Owalọ lẹ 20:35; Osọhia 4:11.

Mẹmẹyọnnu he ko gbọjọ de yin alọkẹyi po zohunhun po to whenue e lẹkọwa agun lọ mẹ

Humọ, to whenue a vọ́ sinsẹ̀n-bibasi towe bẹjẹeji taidi Klistiani de, a na hẹn pekọ wá na nuhudo gbigbọmẹ tọn towe. (Matiu 5:3) To aliho tẹ mẹ? Gbẹtọ lẹ lẹdo aihọn pé nọ kanse dọ, ‘Naegbọn mí do tin to aigba ji?’ Yé tindo nuhudo nado mọ gblọndo na kanbiọ he gando lẹndai ogbẹ̀ tọn go lẹ. Gbẹtọvi lẹ tindo nuhudo enẹ, na Jehovah dá yé domọ wutu. E dá mí to aliho de mẹ bọ mí dona nọ sẹ̀n ẹn nado tindo ayajẹ. Ayajẹ de ma tin he klo hugan ayajẹ he mí nọ tindo to whenue mí yọnẹn dọ mí to Jehovah sẹ̀n, na mí yiwanna ẹn wutu.—Psalm 63:1-5.

Jaale, yọnẹn dọ Jehovah jlo dọ a ni lẹkọwa emi dè. Nawẹ a sọgan wagbọn do yọnẹn dọ ojlo etọn niyẹn nugbo? Lẹnnupọndo ehe ji: To odẹ̀ susu hihò godo wẹ alọnuwe ehe yin awuwlena po sọwhiwhe po. Enẹgodo mẹde yí i na we, vlavo mẹho agun tọn de kavi yisenọ hatọ de. Todin, a tindo ojlo nado hia ẹ bo yinuwa sọgbe hẹ nudọnamẹ he e bẹhẹn. Ehe lẹpo yin kunnudenu dọ Jehovah ma wọnji gowe. Kakatimọ, e to dindọn we dẹẹdẹ nado lẹkọwa ewọ dè.—Johanu 6:44.

To whenue mí yọnẹn dọ Jehovah ma nọ wọn devizọnwatọ etọn he danbú lẹ gbede, enẹ sọgan miọnhomẹna mí. Nugbo he mẹmẹyọnnu Donna wá yọ́n pinpẹn etọn niyẹn. E dọmọ: “Vudevude wẹ n’danbú sọn nugbo lọ mẹ, ṣigba sọn ojlẹ de mẹ jẹ devo mẹ, n’nọ to nulẹnpọn do Psalm 139:23, 24 ji, he dọmọ: ‘Dindona mi, Jiwheyẹwhe E, bo yọ́n ahun ṣie. Gbeje mi pọ́n bo yọ́n magbọjẹ ṣie lẹ. Pọ́n eyin aliho ylankan de ma to ohò ṣie mẹ, bosọ plan mi gbọn aliho madopodo lọ ji.’ N’yọnẹn dọ n’ma yin apadewhe aihọn tọn, n’ma tlẹ vò depope to whenue n’to dọ́n, podọ n’yọnẹn dọ titobasinanu Jehovah tọn mẹ wẹ n’dona nọ. N’jẹ ayidego ji dọ Jehovah ma jo mi do; nuhe pò na mi poun wẹ nado tẹnpọn bo lẹkọwa ewọ dè. Podọ homẹ ṣie hùn dọ n’wàmọ!”

“N’jẹ ayidego ji dọ Jehovah ma jo mi do; nuhe pò na mi poun wẹ nado tẹnpọn bo lẹkọwa ewọ dè”

Odẹ̀ ahundopo tọn mítọn wẹ yindọ hiẹ lọsu ni duvivi “ayajẹ Jehovah tọn” whladopo dogọ. (Nẹhemia 8:10) E ma na vẹna we gbede dọ a lẹkọwa Jehovah dè.

Gblọndo Kanbiọ He Gando Kọlilẹwa Jehovah Dè Go lẹ Tọn

FITẸ N’NA BẸSỌN?

Vudevude wẹ mẹhe jẹazọ̀n wayi de sọgan vọ́ nuwiwa etọn lẹ bẹjẹeji. To aliho dopolọ mẹ, hiẹ lọsu sọgan vọ́ huhlọn towe mọyi taidi Klistiani de eyin a nọ dovivẹnu nado dù núdùdù gbigbọmẹ tọn etlẹ yin vude to azán dopodopo ji. Ma lẹndọ a dona wà nulẹpo to ojlẹ dopolọ mẹ blo. Vlavo a sọgan nọ yí whenu vude zan nado hia Biblu kavi dotoaina hoyidokanji Biblu tọn de, nado plọn dopo to owe mítọn lẹ mẹ, nado yì nọtẹn Intẹnẹt tọn jw.org ji, kavi pọ́n dopo to tito-to-whinnu he nọ yin didohia to televiziọn Intẹnẹt ji tọn tv.jw.org ji lẹ mẹ. Podọ, dovivẹnu nado yì opli agun tọn dile e sọgan yawu yọnbasi do. Hú popolẹpo, hodẹ̀ hlan Jehovah bo biọ dọ ni gọalọna we. ‘Bẹ magbọjẹ towe lẹpo dlan ewọ ji, na e to towe hòpọn wutu.’—1 Pita 5:7.

“To ojlẹ de mẹ wayi he n’gbọjọ to gbigbọ-liho, winyan nọ hù mi sọmọ bọ n’ma tlẹ sọgan nọ hodẹ̀. Ṣigba, to whenue n’wleawuna adọgbigbo bo hodẹ̀, mẹho agun tọn de basi dlapọn na mi. E gọalọna mi nado mọnukunnujẹemẹ dọ Jehovah ma gbẹkọ go e. Mẹho lọ na mi ayinamẹ dọ onú tintan he n’na wà wẹ nado bẹ Biblu hihia egbesọegbesọ tọn jẹeji. To whenue n’wàmọ, n’mọ huhlọn yí nado gọjẹ opli lẹ yì ji. To ojlẹ de godo, n’jẹ mahẹ tindo ji to lizọnyizọn lọ mẹ whladopo dogọ. Homẹ ṣie hùn taun dọ Jehovah ma gbẹkọ go e.”—Eeva.

NAWẸ AGUN LỌ NA YINUWA HẸ MI GBỌN?

A sọgan deji dọ hagbẹ agun lọ tọn lẹ na kẹalọyi we po zohunhun po. Kakati nado mọhodọdo gowe kavi dawhẹna we, yé na do owanyi yetọn hia we bo na wà nuhe go yé pé lẹpo nado na tuli we.—Heblu lẹ 10:24, 25.

“Winyan hù mi taun to whenue n’jlo na gọjẹ opli yì ji to Plitẹnhọ Ahọluduta tọn mẹ. N’to nuhà gando lehe họntọn lẹ na yinuwa hẹ mi do go. Dopo to mẹmẹyọnnu mẹhomẹ mítọn lẹ mẹ he n’ko yọnẹn to agun lọ mẹ sọn owhe 30 die dọna mi dọ, ‘Ovi ṣie, kuavọ!’ Enẹ yinuwado ji e taun. N’mọdọ n’lẹkọwa omẹ ṣie lẹ mẹ nugbonugbo.”—Javier.

“N’yì Plitẹnhọ Ahọluduta tọn mẹ bo sinai do oján godo tọn ji na mẹdepope nikaa doayi go e. Etomọṣo, mẹsusu wẹ flin mi bo yọnẹn dọ n’nọ wá opli lẹ to whenue n’tin to ovu. Yé yí mi bo yawu do mi po zohunhun po sọmọ bọ n’tindo numọtolanmẹ jijọho mayọnjlẹ de tọn. E taidi dọ n’lẹkọwa whégbè wẹ nkọ.”—Marco.

NAWẸ MẸHO LẸ NA GỌALỌNA MI GBỌN?

Mẹho agun tọn lẹ na yinuwa hẹ we po homẹdagbe po. Yé na pà we na ojlo he a tindo nado hẹn “owanyi he a tindo to tintan whenu” jẹ yọyọ. (Osọhia 2:4) Yé na gbọn homẹdagbe dali gọalọna we nado vọ́ nuṣiwa towe lẹ jlado, bo nasọ wàmọ “to gbigbọ walọmimiọn tọn mẹ.” (Galatianu lẹ 6:1; Howhinwhẹn lẹ 28:13) Mẹho lẹ sọgan basi tito na mẹde nido plọnnu hẹ we, vlavo to owe Dọnsẹpọ Jehovah kavi “Mì Gbọṣi Owanyi Jiwheyẹwhe Tọn Mẹ.” Deji dọ mẹho lẹ na miọnhomẹna we bo nọgodona we dile a to afọdide lẹ ze nado lẹkọwa.—Isaia 32:1, 2.

“To owhe ṣinatọ̀n he mẹ n’gbọjọ te lẹ gblamẹ, mẹho lẹ nọ to vivẹnudo nado gọalọna mi. To gbèdopo, mẹho de do fọto he e de na mi wayi delẹ hia mi. Fọto ehelẹ pinpọn zọ́n bọ n’flin ojlẹ ayajẹ tọn susu he n’duvivi etọn wayi lẹ sọmọ bọ ayajẹ he n’tindo to whenue n’to Jehovah sẹ̀n jẹ jijlo mi ji. Mẹho lẹ yí owanyi do gọalọna mi nado vọ́ nuwiwa gbigbọmẹ tọn ṣie lẹ bẹjẹeji.”—Victor.

“E Na Hẹn Mì Yin Huhlọnnọ”

Ohanwe mítọn, Mì Jihàn Hlan Jehovah, bẹ ohàn ojlofọndotenamẹ tọn susu hẹn, ehe sọgan miọnhomẹna we bo na tuli we dile a gọ̀ nuwiwa gbigbọmẹ tọn towe lẹ bẹjẹeji. Di apajlẹ, lẹnnupọndo hogbe ohàn sọha 60tọ tọn lẹ ji. Hosọ ohàn lọ tọn wẹ “E Na Hẹn Mì Yin Huhlọnnọ,” ehe sinai do hogbe he tin to 1 Pita 5:10 mẹ lẹ ji.

Nude wutu wẹ Jah do nugbo lọ hia we

Bosọ ylọ we wá hinhọ́n etọn nù.

T’ahun t’we mẹ, e mọ ojlo he hiẹ tindo

Nado dín ewọ mọ bo wà dodo.

Hiẹ dopà n’ẹn nado wà ’jlo etọn;

Egbesọ e na to godona we.
Jah ze Ovi vivẹ́ ’tọn jo do ’ta t’we mẹ;

Enẹwutu, E jlo dọ ni pà we.

Yin E ma tẹ̀ Ovi vivẹ́ Etọn míwlẹ,

Bo deji dọ E na na we huhlọn.

E ma na wọn yise he hiẹ dohia;

E na nọ wlebòna ’mẹ etọn lẹ.

(HÀNGBEPLI)

Ohùn Klist’ tọn wẹ họ̀ we, hiẹ ko lẹzun Jah tọn.

E na hẹn we lodo bo na na we huhlọn.

E na deanana we dile e ko nọ wà do.

E na hẹn we lodo bo na na we huhlọn.

Nado sè nuhiho ohàn ehe po ohàn Ahọluduta tọn devo lẹ po tọn, zín OWE LẸ, enẹgodo OHÀN.