Ogbé He to Miyọ́n Ji Lọ

Mose nọ Midiani na owhe 40. E wlealọ bo ji ovi lẹ. To gbèdopo he e to nukunpedo lẹngbọ etọn lẹ go sẹpọ Osó Sinai, e mọ nujiawu de. Wùnkan de to miyọ́n ji, ganṣo e ma fiọ! Whenue Mose dọnsẹpọ nado pọ́n nuhewutu wẹ, e sè ogbè de sọn wùnkan lọ mẹ he dọmọ: ‘Mose! A sọ sẹwá humọ blo. De afọpa towe lẹ, na aigba wiwe de ji wẹ a ṣite te.’ Jehovah wẹ to hodọ gbọn angẹli de gblamẹ.

Budi Mose, enẹwutu e sú nukunmẹ etọn. Ogbè lọ dọmọ: ‘Yẹn ko mọ yajiji Islaelivi lẹ tọn. Yẹn na whlẹn yé sọn alọ Egiptinu lẹ tọn mẹ bo nasọ plan yé yì aigba dagbe de ji. Hiẹ wẹ na plan omẹ ṣie lẹ tọ́n sọn Egipti.’ Be a ma mọdọ enẹ na ko paṣa Mose ya?

Mose kanse dọmọ: ‘Etẹwẹ n’na dọ eyin gbẹtọ lọ lẹ kanse mi dọ mẹnu wẹ do mi hlan?’ Jiwheyẹwhe gblọn dọ: ‘Dọna yé dọ Jehovah, yèdọ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn wẹ do we hlan.’ To whenẹnu, Mose dọmọ: ‘Eyin yé ma ka dotoaina mi lo?’ Jehovah na kunnudenu Mose nado dohia ẹ dọ Emi na gọalọna ẹn. E dọna Mose dọ ni ze opò etọn dlan kọmẹ. Opò lọ sọ lẹzun odàn! Whenue Mose hẹn osi odàn lọ tọn go, e lẹzun opò whladopo dogọ. Jehovah dọmọ: ‘Eyin a basi ohia ehe, yé na yọnẹn dọ yẹn wẹ do we hlan.’

Mose dọmọ: ‘N’ma ka yọ́n hodọ ganji nẹ.’ Jehovah dopagbe na ẹn dọ: ‘Yẹn na plọn we nuhe a na dọ, podọ n’na do nọvisunnu towe Aalọn hlan nado gọalọna we.’ Na Mose yọnẹn dọ Jehovah tin hẹ emi wutu, e plan asi etọn po visunnu etọn lẹ po bo dedo Egipti.