NUPINPLỌN 30
Lahabi Whlá Amẹ́ Lẹ
Whenue amẹ́ Islaelivi lọ lẹ yì tòdaho Jẹliko tọn mẹ, yé nọ owhé yọnnu de he nọ yin Lahabi tọn gbè. Ahọlu Jẹliko tọn doayi e go bo do awhànfuntọ lẹ hlan owhé Lahabi tọn gbè. Yọnnu lọ whlá amẹ́ awe lọ lẹ do họta bo deanana awhànfuntọ lọ lẹ hlan aliho devo ji. E dọna amẹ́ lọ lẹ dọ: ‘N’na gọalọna mì na n’yọnẹn dọ Jehovah tin hẹ mì, podọ mì na gbawhàn aigba lọ tọn. Mì jaale bo dopà na mi dọ mì na whlẹn whẹndo ṣie gán.’
Amẹ́ lọ lẹ dọna Lahabi dọ: ‘Mí dopà na we dọ nude ma na wà mẹdepope he tin to ohọ̀ towe mẹ.’ Yé sọ dọmọ: ‘Sìn okàn vẹẹ ṣẹ́ṣẹ́ de do fleṣe towe nù, podọ whẹndo towe na yin whinwhlẹngán.’
Lahabi yí okàn de do hẹn amẹ́ lọ lẹ jẹte gbọn fleṣe etọn nù. Yé yì lẹdo osó tọn mẹ bo whlá yede do finẹ na azán atọ̀n whẹpo do lẹkọyi Jọṣua dè. Enẹgodo, Islaelivi lẹ dasá Tọ̀sisa Jọdani bo wleawufo nado yí aigba lọ. Jẹliko wẹ yin tòdaho tintan he yé gbawhàn etọn. Jehovah dọna yé dọ yé ni zinzọnlin lẹdo tòdaho lọ whladopo to gbèdopo na azán ṣidopo. To azán ṣinawetọ gbè, yé zinzọnlin lẹdo tòdaho lọ whla ṣinawe. Enẹgodo, yẹwhenọ lẹ kún opẹ̀n yetọn lẹ bọ awhànfuntọ lẹ yí ogbè lélé do dawhá. Adó tòdaho lọ tọn lẹ sọ họ́jai! Amọ́, ohọ̀ Lahabi tọn ma họ́ dile e tlẹ to adó lọ ji. Lahabi po whẹndo etọn po yin whinwhlẹngán, na e dejido Jehovah go wutu.
“To aliho dopolọ mẹ, be e ma yin gbọn azọ́n lẹ dali wẹ Lahabi . . . lọsu yin lilá di dodonọ to whenuena e ko yí wẹnsagun lẹ bo do gbigbọ johẹmẹ tọn hia yé bosọ do yé hlan gbonu gbọn aliho devo ji godo ya?”—Jakọbu 2:25