Hanna Biọ Visunnu de to Odẹ̀ Mẹ

Islaelivi de he nọ yin Ẹlkana tindo asi awe, yèdọ Hanna po Pẹnina po, ṣigba Hanna wẹ e yiwanna hugan. Pẹnina nọ to Hanna ṣanko whelẹponu na ewọ tindo ovi susu bọ Hanna ma tindo ovi depope wutu. To whemẹwhemẹ, Ẹlkana nọ plan whẹndo etọn yì Ṣilo nado basi sinsẹ̀n to gòhọtúntún mẹ. To gbèdopo he yé yì dọ́n, e doayi e go dọ mẹyiwanna etọn Hanna tin to awubla sinsinyẹn mẹ. E sọ dọmọ: ‘Hanna, Jaale ma viavi blo. N’tofi na we be. N’yiwanna we.’

To ojlẹ de godo, Hanna sẹ̀ jẹla nado hodẹ̀ edeṣo. E to avivi mapote dile e to vivẹ̀ Jehovah nado gọalọna ẹn. E dopà dọmọ: ‘Jehovah E, eyin hiẹ na mi visunnu de, yẹn na ze e jo na we, na ewọ nido nọ sẹ̀n we to gbẹzan etọn lẹpo mẹ.’

Yẹwhenọ Daho Eli mọdọ Hanna to sisó bo lẹndọ ahàn wẹ e nùmú. Hanna dọna ẹn dọmọ: ‘Lala, oklunọ ṣie, n’ma nùahànmú. Nuhahun sinsinyẹn de mẹ wẹ n’te bọ n’to hodọna Jehovah gandego.’ Eli wá mọdọ linlẹn emitọn ma sọgbe bọ e dọna ẹn dọ: ‘Jiwheyẹwhe ni na we nuhe biọ ẹ a te.’ Hanna mọ ede mẹ bo dedo. To osun delẹ godo, e ji visunnu de bo ylọ ẹ dọ Samuẹli. Be a gán mọ lehe homẹ Hanna tọn na ko hùn do ya?

Hanna ma wọn opà he e do na Jehovah. Tlolo he e deanọ́na Samuẹli, e plan ẹn wá gòhọtúntún mẹ, na e nido nọ wadevizọn to finẹ. E dọna Eli dọmọ: ‘Visunnu he n’biọ to odẹ̀ mẹ lọ die. N’jlo na whé e na Jehovah to gbẹzan etọn lẹpo mẹ.’ Ẹlkana po Hanna po nọ dla Samuẹli pọ́n to whemẹwhemẹ bo nọ hẹn awù pẹvi yọyọ he ma tindo awà de wá na ẹn. Jehovah sọ na visunnu atọ̀n po viyọnnu awe devo lẹ po Hanna.