Jehovah Na Huhlọn Elija

Jezebẹli sè nuhe jọ do yẹwhegán Baali tọn lẹ go bọ homẹgble e taun. E dowẹn hlan Elija dọmọ: ‘To osọ, hiẹ lọsu na kú taidi yẹwhegán Baali tọn lẹ.’ Elija dibu taun bo họnyi danfafa ji. E hodẹ̀ dọmọ: ‘Jehovah E, e húagbọ́ mi pete. Saa gbọ ma kú.’ Nuṣikọna Elija bọ e bẹ amlọn to atin de sá.

Angẹli de fọ́n ẹn bo yí ogbè fifá do dọmọ: ‘Fọ́n bo dùnú.’ Elija mọ akla plẹ́bẹ́ de to zannu miyọ́nawu lẹ ji po osingo de po. E dù bo nù bosọ gọ̀ aimlọn. Angẹli lọ sọ fọ́n ẹn whladopo dogọ bo dọmọ: ‘Dùnú. A na tindo nuhudo huhlọn tọn nado zingbejizọnlin towe.’ Enẹwutu, Elija fọ́n bo dùnú dogọ. Enẹgodo, e zingbejizọnlin na okle 40 ozán 40 kakajẹ whenue e jẹ Osó Holẹbi kọ̀n. To finẹ, Elija biọ oslò de mẹ bo mlọnai. Ṣigba, Jehovah dọna ẹn dọmọ: ‘Elija, etẹ wà a te tofi?’ Elija sọ gblọn dọ: ‘Islaelivi lẹ ma de opà he yé do na we. Yé họ́ agbà towe lẹ liai bosọ hù yẹwhegán towe lẹ. Todin, yé sọ to tintẹnpọn nado hù yẹnlọsu.’

Jehovah dọna ẹn dọmọ: ‘Yì ṣite to osó lọ ji.’ Jẹnukọn whẹ́, jẹhọn sinsinyẹn de yìn gbọn oslò lọ nù. Enẹgodo, aigba sisọsisọ de wá aimẹ bọ miyọ́n de jẹ jiji ji. To godo mẹ, Elija sè bọ ogbè fifá de dọho do odò. E yí awù etọn do ṣinyọ́n nukunmẹ bo nọte to oslò lọ nukọn. Jehovah sọ kàn nuhewutu e do họ̀n sè e. Elija dọmọ: ‘Yẹn kẹdẹ wẹ pò.’ Ṣigba, Jehovah dọna ẹn dọmọ: ‘E ma yin hiẹ kẹdẹ wẹ pò. Omẹ 7 000 gbẹ́ pò to Islaeli bo to sinsẹ̀n mi. Yì bo yiamisisadode Eliṣa taidi yẹwhegán do otẹn towe mẹ.’ To afọdopolọji, Elija dedo nado yì wà nuhe Jehovah dọna ẹn. Be a lẹndọ Jehovah na gọalọna hiẹ lọsu eyin a nọ wà nuhe e jlo dọ a ni nọ wà lẹ ya? Mọwẹ, e na wàmọ. Gbọ mí ni gbadopọnna nujijọ de he wá aimẹ to akúdido lọ whenu.