Jehovah Yiavùnlọna Jehoṣafati

Jehoṣafati, ahọlu Juda tọn, gídí agbà Baali tọn lẹ po boṣiọ he to aigba lọ ji lẹ po sẹ̀. E jlo dọ mẹlẹ ni yọ́n osẹ́n Jehovah tọn lẹ. Enẹwutu, e do ahọvi lẹ po Levinu lẹ po hlan omẹ Juda tọn lẹpo dè nado plọn yé osẹ́n Jehovah tọn lẹ.

Akọta he sẹpọ yé lẹ to budi nado tọ́nawhàn Juda, na yé yọnẹn dọ Jehovah tin hẹ omẹ etọn lẹ wutu. Yé tlẹ hẹn nunina lẹ wá na Ahọlu Jehoṣafati. Ṣigba, Moabinu lẹ, Amọninu lẹ po mẹhe wá sọn lẹdo Seili tọn mẹ lẹ po wá nado funawhàn sọta Juda. Jehoṣafati yọnẹn dọ emi tindo nuhudo alọgọ Jehovah tọn. E biọ dọ sunnu, yọnnu po ovi lẹpo po ni bẹ yede pli do Jelusalẹm. E sọ hodẹ̀ to yemẹpo nukọn dọmọ: ‘Jehovah, matin hiẹ, mí ma gán duto yé ji. Jaale dọ nuhe mí dona wà na mí.’

Jehovah na gblọndo odẹ̀ etọn dọmọ: ‘Mì dibu blo. Yẹn na gọalọna mì. Mì nọ otẹn mìtọn lẹ mẹ bo nọte guun bosọ pọ́n lehe yẹn na whlẹn mì do.’ Nawẹ Jehovah whlẹn yé gbọn?

To wunkẹngbe, Jehoṣafati de hànjitọ lẹ bo biọ to yé si nado to yìyì to awhànpa lọ nukọn. Yé deawhànfọ sọn Jelusalẹm wá awhànfuntẹn lọ to lẹdo de he nọ yin yiylọdọ Tekoa mẹ.

Dile hànjitọ lọ lẹ yí ayajẹ po ogbè lélé po do to gigopana Jehovah, ewọ hoavùn do ota omẹ etọn lẹ tọn mẹ. E hẹn bẹwlu biọ Amọninu lẹ po Moabinu lẹ po ṣẹnṣẹn sọmọ bọ yé jẹ awhànfun sọta ode awetọ ji, mẹde masọ gán to yé mẹ. Ṣigba, Jehovah basi hihọ́na omẹ Juda tọn lẹ gọna awhànfuntọ lẹ po yẹwhenọ lẹ po. Mẹhe tin to otò he sẹpọ yé mẹ lẹpo sè nuhe Jehovah ko wà lọ, bo mọdọ Jehovah gbẹ́ to avùnlọyina omẹ etọn lẹ. Nawẹ Jehovah nọ whlẹn omẹ etọn lẹ gbọn? Aliho susu mẹ wẹ. E ma nọ tindo nuhudo alọgọ gbẹtọ lẹ tọn nado wàmọ.