Angẹli Jehovah Tọn Basi Hihọ́na Hẹzekia

Ahọluigba Asilia tọn ko hò ahọluduta hẹnnu ao tọn Islaeli tọn yí. Todin, Sẹnnakelibi ahọlu Asilia tọn sọ jlo na hò ahọluduta hẹnnu awe tọn Juda tọn yí. E jẹ tòdaho Juda tọn lẹ yí ji debọdo-dego. Amọ́, tòdaho he dín e te taun lọ wẹ Jelusalẹm. Nuhe Sẹnnakelibi ma yọnẹn wẹ yindọ Jehovah wẹ to hihọ́-basina Jelusalẹm.

Hẹzekia, ahọlu Juda tọn, sú akuẹ susu Sẹnnakelibi, na ewọ nido jo Jelusalẹm do. Dile etlẹ yindọ Sẹnnakelibi yí akuẹ lọ, e gbẹsọ do awhànpa huhlọnnọ etọn hlan nado tọ́nawhàn Jelusalẹm. Mẹhe to tòdaho lọ mẹ lẹpo wẹ to budi, na Asilianu lẹ fọ́n bo to dindọnsẹpọ wutu. To whenẹnu, Hẹzekia dọna yé dọmọ: ‘Mì dibu blo. Asilianu lẹ dohuhlọn nugbo, amọ́ Jehovah na hẹn mí tindo huhlọn hugan yé.’

Sẹnnakelibi do wẹnsagun etọn, enẹ wẹ Labṣake lọ, hlan Jelusalẹm nado ṣàn yé kò. Labṣake lọ nọte to gbonu tòdaho lọ tọn bo dawhá dọmọ: ‘Jehovah ma gán gọalọna mì. Mì dike Hẹzekia klọ mì blo. Yẹwhe de ma tin he gán whlẹn mì sọn mí si.’

Hẹzekia kàn nuhe e dona wà sè Jehovah. Jehovah gblọnna ẹn dọmọ: ‘A dibu na nuhe Labṣake lọ dọ lẹ wutu blo. Sẹnnakelibi ma na hò Jelusalẹm yí.’ Enẹgodo, Hẹzekia mọ wekanhlanmẹ delẹ yí sọn Sẹnnakelibi si. Wekanhlanmẹ lọ lẹ dọmọ: ‘Saa jogbe poun. Jehovah ma gán whlẹn we.’ Hẹzekia hodẹ̀ dọmọ: ‘Jehovah, jaale bo whlẹn mí, na mẹlẹpo nido yọnẹn dọ hiẹ dopo kẹdẹ wẹ Jiwheyẹwhe nugbo lọ.’ Jehovah sọ dọna ẹn dọmọ: ‘Ahọlu Asilia tọn ma na biọ Jelusalẹm. Yẹn na basi hihọ́na tòdaho ṣie.’

Sẹnnakelibi kudeji dọ to madẹnmẹ Jelusalẹm na yin emitọn. Ṣigba to zánmẹ gbèdopo, Jehovah do angẹli de hlan lẹdo he mẹ awhànfuntọ lọ lẹ dosla do, to gbonu tòdaho lọ tọn. Angẹli lọ sọ hù awhànfuntọ 185 000! Ahọlu Sẹnnakelibi hẹn awhànfuntọ huhlọnnọ etọn lẹ bu. Nude masọ pò na ẹn ba, adavo nado lẹkọyi whé po winyan po. Jehovah basi hihọ́na Hẹzekia po Jelusalẹm po, kẹdẹdile e ko dopà etọn do. Eyin a tin to Jelusalẹm to ojlẹ enẹ mẹ wẹ, be a na ko dejido Jehovah go ya?