Wekanhlanmẹ de sọn Hagbẹ Anademẹtọ Dè

Yisenọ Hatọ Vivẹ́ lẹ Emi:

Taidi sinsẹ̀n-basitọ Jehovah tọn, mí yiwanna Ohó etọn, yèdọ Biblu. Mí kudeji dọ e bẹ otàn he sọgbe, anademẹ dejidego na gbẹninọ po kunnudenu he whànmẹ lẹ po hẹn gando owanyi Jehovah tọn na gbẹtọvi lẹ go. (Salmu lẹ 119:105; Luku 1:3; 1 Johanu 4:19) Ojlo vẹkuvẹku mítọn wẹ nado gọalọna mẹdevo lẹ nado plọn nugbo họakuẹ he to Ohó Jiwheyẹwhe tọn mẹ lẹ. Enẹwutu, homẹ mítọn hùn nado wleawuna owe ehe, he hosọ etọn yin, “Nuplọnmẹ Delẹ sọn Biblu Mẹ.” Mì gbọ mí ni na mì nudọnamẹ delẹ gando owe ehe go.

Suhugan adà he owe ehe bẹhẹn lẹ tọn wẹ yin awuwlena do yọpọvu lẹ tamẹ. Etomọṣo, e sọgan yin yiyizan nado gọalọna mẹho he jlo na plọnnu dogọ gando Biblu go lẹ. Podọ na mẹlẹpo wẹ Biblu tin na wutu, ayihaawe ma tin dọ mímẹpo wẹ na mọaleyi sọn nuplọnmẹ he owe ehe bẹhẹn lẹ mẹ, bọ ehe gán gọalọna mí nado tindo ayajẹ nujọnu tọn.

Owe ehe yí kandai Biblu tọn lẹ zan nado pìntàn whenuho gbẹtọvi tọn sọn ojlẹ nudida tọn whenu sọyi. Vivẹnu ko yin dido nado hẹn otàn Biblu tọn lọ lẹ họnwun bo hẹn yé bọawu, podọ jẹ obá he mẹ e yọnbasi te, mí to yé debọdo-dego sọgbe hẹ ojlẹ he mẹ yé wá aimẹ te.

Ṣigba, owe ehe ma bẹ otàn Biblu tọn lẹ hẹn poun gba. Nuplọnmẹ lọ lẹ po yẹdide he to e mẹ lẹ po ko yin awuwlena to aliho de mẹ nado hẹn kandai Biblu tọn lẹ họnwun bo de numọtolanmẹ mẹhe ji yé dọhodo lẹ tọn tọ́n.

Owe ehe na gọalọna mí nado mọdọ gbẹtọ lẹ ji wẹ Biblu dọhodo hugan, yèdọ mẹhe setonuna Jehovah lẹ po mẹhe ma wàmọ lẹ po. Podọ e na whàn mí nado plọnnu sọn apajlẹ yetọn lẹ mẹ. (Lomunu lẹ 15:4; 1 Kọlintinu lẹ 10:6) Adà 14 wẹ owe lọ bẹhẹn. To bẹjẹeji adà dopodopo tọn, a na mọ bladopọ nuplọnmẹ tangan he mí gán mọyi sọn adà lọ mẹ lẹ tọn.

Eyin mẹjitọ de wẹ a yin, a sọgan nọ hia nupinplọn dopodopo hẹ ovi towe bo nọ dọhodo yẹdide he zọnpọ hẹ ẹ lẹ ji. Enẹgodo, mì omẹ awe lẹ gán hia wefọ Biblu tọn he ji nupinplọn lọ sinai do lẹ. Gọalọna ovi towe nado mọ kanṣiṣa he tin to nuhe e hia to Biblu mẹ po nupinplọn lọ po ṣẹnṣẹn. Afọdide ehelẹ dopolọ sọgan sọ yin hihodo nado gọalọna mẹho de nado yọ́n owẹ̀n he Biblu bẹhẹn to bladopọ mẹ.

Todido mítọn wẹ yindọ owe ehe na gọalọna ahunjijlọnọ lẹpo—yèdọ yọpọ po mẹho po—nado plọnnu sọn Ohó Jiwheyẹwhe tọn mẹ bo nọ yí nuhe yé plọn lẹ do yizan mẹ to gbẹzan yetọn mẹ. Gbọnmọ dali, yelọsu gán sẹ̀n Jiwheyẹwhe taidi hagbẹ whẹndo yiwanna etọn tọn lẹ.