Mì to Ahọluduta lọ Lá Zọnmii!

1. Mì to Họl’duta lọ lá zọnmii

Na gbẹtọ wunmẹ lẹpo.

’Wanyi kọmẹnu tọn ni whàn we

Nado plọnnu whiwhẹnọ.

Dona de wẹ sinsẹ̀nzọn mítọn;

Mí nọ jaya do lá ’wẹ̀n lọ.

Gbọ mí ni tọ́nyi kunnudegbe;

Mí ni lá oyín Jẹwhe tọn.

2. Mẹdide lẹ, lẹngbọ devo lẹ,

Mí ni t’azọ́nwa dopọ.

Mẹho, yọpọvu, sunnu, yọnnu,

Mí ni hẹn nugbo lọ go.

Mí ni tẹnpọn na mẹpo ni sè

Dọ Họl’duta Jah tọn sẹpọ.

Jehovah sọ to godo na mí;

Obu depope ma demẹ!