APOTIN NUPINPLỌN TỌN 16B
Lewuwu, Hunwinwẹn, Hiadogonamẹ po Mẹhusudo po—Whetẹnu Podọ Gbọnna?
Numimọ he yin kinkandai to Ezekiẹli weta 9 mẹ tindo hẹndi egbezangbe tọn de. Eyin mí mọnukunnujẹ lehe nujijọ lọ lẹ na wá aimẹ do mẹ, enẹ gán gọalọna mí nado pannukọn vivọnu titonu ehe tọn po jidide po.
“Lewuwu, hunwinwẹn”
WHETẸNU: To azán godo tọn lẹ mẹ, jẹnukọnna nukunbibia daho lọ
GBỌNNA: Ahunjijlọnọ lẹ nọ dohia to ohó po walọ po mẹ dọ yé gbẹwanna kanyinylan aihọn ehe tọn. Omẹ enẹlẹ nọ kẹalọyi yẹwheho he to yinyin didọ, nọ zindonukọn nado to gbẹtọ-yinyin Klisti tọn nkọ ze dogo, yí baptẹm nado do klandowiwe yetọn hlan Jehovah hia bosọ nọ nọgodona mẹmẹsunnu Klisti tọn lẹ po nugbonọ-yinyin po
“Hiadogonamẹ”
WHETẸNU: To nukunbibia daho lọ whenu
GBỌNNA: Dawe he hẹn wesinzo wekantọ tọn lọ nọtena Jesu Klisti to whenue ewọ na wá taidi Whẹdatọ akọta lẹpo tọn. Gbẹtọ susugege lọ na yin whẹdana kavi yin hiadogona taidi lẹngbọ, bọ ehe na dohia dọ yé na lùn Amagẹdọni tọ́n
“Mẹhusudo”
WHETẸNU: To Amagẹdọni
GBỌNNA: Jesu Klisti po awhànpa olọn mẹ tọn etọn lẹ po, ehe bẹ angẹli lẹ po gandutọgbẹ́ 144 000 etọn lẹ po hẹn, na và aihọn ylankan ehe sudo mlẹnmlẹn bo deanana sinsẹ̀n-basitọ nugbo lẹ biọ aihọn yọyọ dodowiwa tọn de mẹ