HODỌDOPỌ DE BIBẸJẸEJI
NUPINPLỌN 2
Hodidọ to Jọwamọ-Liho
Nunọwhinnusẹ́n: “Ohó he yin didọ to ojlẹ he sọgbe mẹ—lehe e nọ yọ́n sọ!”—Howh. 15:23.
Nuhe Filipi Wà
1. Pọ́n VIDEO lọ, kavi hia Owalọ lẹ 8:30, 31. Enẹgodo, lẹnnupọndo kanbiọ he bọdego lẹ ji:
Nawẹ Filipi bẹ hodọdopọ lọ jẹeji gbọn?
Naegbọn ehe do yin aliho dagbe de nado bẹ hodọdopọ jẹeji to jọwamọ-liho bosọ plọn nugbo yọyọ de dawe lọ?
Etẹwẹ Nuyiwa Filipi Tọn Ehe Plọn Mí?
2. Eyin mí bẹ hodọdopọ de jẹeji to jọwamọ-liho, e yọnbasi dọ mí ni hẹn mẹlọ voawu bọ e na dotoaina owẹ̀n mítọn.
Hodo Apajlẹ Filipi Tọn
3. Nọ doayinugo. Nukunmẹ mẹde tọn po aliho he mẹ e to nuyiwa te po gán de nususu hia gando e go. Be a doayi nude go he dohia dọ mẹlọ jlo na dọho hẹ we ya? Nado bẹjẹeji, a gán dọhodo nugbo Biblu tọn de ji bo kanse e poun dọ, “Be a yọnẹn dọ . . . ?” Eyin mẹde ma jlo na dọho, ma hẹn ẹn po huhlọn po blo.
4. Nọ fahomẹ. Ma nọ mọdọ emi dona dọhodo nugbo Biblu tọn de ji to afọdopolọji blo. Nọ nọte jẹ whenue e sọgbe nado wàmọ, na a nido bẹ hodọdopọ lọ jẹeji to jọwamọ-liho. Whedelẹnu, e gán biọ dọ a ni nọte jẹ whenue a na dọhodopọ hẹ mẹlọ to whedevonu.
5. Nọ diọalọ. Mẹhe a to hodọ hẹ sọgan fọ́n whẹho he a ma donukun de dote. Enẹwutu, nọ wleawufo nado má linlẹn de hẹ mẹlọ sọgbe hẹ ninọmẹ etọn, eyin e tlẹ biọ dọ a ni dọhodo nugbo Biblu tọn devo ji he gbọnvona nuhe a wleawuna.