Homẹfa

Nuhe Jesu Wà

VIDEO: Jesu Yí Homẹfa Do Gọalọna Nọvisunnu Etọn

1. Pọ́n VIDEO lọ, kavi hia Johanu 7:3-5 gọna 1 Kọlintinu lẹ 15:3, 4, 7. Enẹgodo, lẹnnupọndo kanbiọ he bọdego lẹ ji:

1. Nawẹ nọvisunnu Jesu tọn lẹ yinuwa gando owẹ̀n etọn go to bẹjẹeji gbọn?

2. Etẹwẹ dohia dọ agbọ́ ma pé Jesu gando nọvisunnu etọn Jakọbu go?

Etẹwẹ Nuyiwa Jesu Tọn Ehe Plọn Mí?

2. Mí dona nọ do homẹfa hia, na e nọ yí whenu susu to mẹdelẹ si nado kẹalọyi wẹndagbe lọ hú mẹdevo lẹ.

Hodo Apajlẹ Jesu Tọn

3. Nọ tẹ́n aliho devo pọ́n. Eyin mẹlọ ma yigbena tito Biblu pinplọn tọn de to afọdopolọji, ma hẹn ẹn gánnugánnu blo. Whenue e sọgbe nado wàmọ, a gán yí video kavi hosọ he na gọalọna ẹn nado mọnukunnujẹ lehe tito Biblu pinplọn tọn de nọ yì do mẹ lẹ zan gọna lehe e gán mọaleyi sọn e mẹ do.

4. Ma nọ yí i jlẹdo mẹdevo go blo. Mẹlẹpo ma yin dopolọ. Eyin hẹnnumẹ kavi gọyìpọn de to awuwhle nado plọn Biblu kavi kẹalọyi nuplọnmẹ Biblu tọn de, lẹnnupọndo nuhewutu e gán ko to nuyiwa domọ ji. Be nuyise sinsẹ̀n etọn tọn tangan de tin he e yiwanna taun wẹ ya? Be hẹnnumẹ lẹ kavi kọmẹnu lẹ wẹ to kọgbidina ẹn ya? Na ẹn whenu nado lẹnnupọndo nuhe a ko dọ lẹ ji, podọ nado mọ nujọnu-yinyin nuhe Biblu dọ tọn.

5. Nọ hodẹ̀ do jlodotọ lọ tamẹ. Biọ dọ Jehovah ni gọalọna we nado nọ tindo pọndohlan dagbe bosọ nọ yí zinzin zan. Biọ wuntuntun to odẹ̀ mẹ nado yọ́n whenue a na doalọtena mẹhe ma to ojlo dohia sọmọ de dè yìyì.—1 Kọl. 9:26.