Jehovah Nọ Jonamẹ to Aliho Susugege Mẹ
“Omẹ ylankan ni gbẹ́ aliho etọn dai, mawadodonọ linlẹn etọn: bo gbọ̀ e ni gọ̀ do Oklunọ de, ... e na sọ jona susugege.”—ISAIA 55:7.
1. Po etẹ po wẹ mẹhe nọ mọ jona Jehovah tọn yí lẹ nọ yin didona todin?
JEHOVAH nọ jona ylanwatọ he lẹnvọjọ lẹ bo nọ hẹn yé penugo todin nado duvivi jijọho ayiha tọn to paladisi gbigbọ tọn de mẹ. Ehe yinmọ na yé jẹ nubiọtomẹsi ehelẹ kọ̀n wutu: “Mì din Oklunọ, whenu yè sọgan mọ ẹn do, mí ylọ ẹ, whenuena e tin to yakẹ. Omẹ ylankan ni gbẹ́ aliho etọn dai, mawadodonọ linlẹn etọn: bo gbọ̀ e ni gọ̀ do Oklunọ de, ewọ nasọ walẹblanu na ẹn, podọ do Jiwheyẹwhe mítọn de, e na sọ jona susugege.”—Isaia 55:6, 7.
2. (a) Etẹwẹ ‘dindin Jehovah’ po ‘lilẹkọwá ede’ po zẹẹmẹdo dile eyin nùdego do to Isaia 55:6, 7 mẹ? (b) Etẹwutu wẹ Ju he tin to kanlinmọgbenu to Babiloni lẹ tindo nuhudo nado lẹkọwá Jehovah dè, podọ etẹwẹ jọ do mẹdelẹ go to yé mẹ?
2 Nado “din Oklunọ” bo ylọ ẹ po alọkẹyi po, omẹ ylankan dona gbẹ́ aliho ylankan etọn po linlẹn awugblena mẹdevo lẹ tọn depope po dai. Nuhudo lọ nado “gọ̀ do Oklunọ de” dohia dọ ylanwatọ lọ jó Jiwheyẹwhe, mẹhe ewọ ko tindo haṣinṣan pẹkipẹki hẹ dai do. Enẹ wẹ yin whẹho lọ po tomẹnu Juda tọn lẹ po, he nugbonọ mayin yetọn hlan Jiwheyẹwhe plan yé sọyì kanlinmọgbenu to Babiloni to agọgbọnẹnmẹ. Ju he tin to kanlinmọgbenu lẹ tindo nuhudo nado lẹkọ hlan Jehovah dè gbọn linlẹnvọjọ sọn walọylankan he dekọtọn do kanlinmọgbenu ninọ Babiloni yétọn tọn mẹ po dọdai ovọ́ jijẹ aigba yétọn tọn na owhè 70 po dali. To 537 J.W.M., aigba enẹ sọ yin hinhẹngọ́ gbọn pipotọ Ju budisi Jiwheyẹwhe tọ́ lẹ he yin túntúndote sọn Babiloni gbọn gbedide gandudu tọn dali. (Ẹzla 1:1-8; Daniẹli 9:1-4) Nuyiwadomẹji hinhẹn gọwa enẹ tọn klo sọmọ bọ aigba Juda tọn yin jijlẹdo Paladisi Edẹni tọn go.—Ezekiẹli 36:33-36.
3. Nawẹ pipotọ Islaeli gbigbọmẹ tọn lẹ tindo numimọ taidi enẹ heyin kanlinmọgbenunọtọ budisi Jiwheyẹwhe tọ́ he lẹkọwá Juda lẹ gbọn?
3 Islaelivi gbigbọmẹ tọn lẹ ko tindo numimọ de taidi enẹ heyin Ju budisi Jiwheyẹwhe tọ́ he lẹkọyì Juda to kanlinmọgbenu-ninọ Babiloni tọn godo lẹ. (Galatianu lẹ 6:16) Pipotọ Islaeli gbigbọmẹ tọn lẹ basi diọdo aliho po linlẹn yetọn tọn po delẹ to Wẹkẹ Whan I godo tololo. Owhè 1919 dohiagona vivọnu kanlinmọgbenu-ninọ yetọn sọn nukundagbe gigọ́ Jiwheyẹwhe tọn mẹ to lẹdo Babiloni Daho tọn mẹ, yedọ ahọluigba sinsẹ̀n lalo tọn. Na yé lẹnvọjọ sọn ylando he bẹ obú gbẹtọ tọn hẹn po ninọmẹ nude ma yiwa to sinsẹnzọn Jehovah tọn mẹ po wutu, e hẹn yé jẹ mẹdekannu sọn Babiloni Daho mẹ, bo hẹn yé gọwá ninọmẹ jijlọ gbigbọmẹ yetọn tọn mẹ, bo sọ jẹ yé yizan ji whladopo dogọ nado dọyẹwheho wẹndagbe Ahọluduta lọ tọn. Paladisi gbigbọmẹ tọn ko vùn lẹdopé to omẹ Jiwheyẹwhe tọn lẹ ṣẹnṣẹn sọn whenẹnu, hlan yẹyi oyín wiwe etọn tọn. (Isaia 55:8-13) To whelọnu lò, to apajlẹ tintan hohowhenu tọn po egbezangbe tọn po mẹ, mí tindo whẹjijọ he họnwun de dọ dona lẹ nọ jẹgodona jona sọn olọn mẹ wá podọ Jehovah na nugbo tọn nọ jona omẹ he lẹnvọjọ lẹ to aliho susugege mẹ.
4. Obú tẹwẹ devizọnwatọ Jehovah tọn delẹ nọ tindo?
4 Enẹwutu devizọnwatọ Jehovah tọn egbezangbe tọn lẹ sọgan dotudo jona etọn go. Ṣogan, delẹ to yé mẹ tindo numọtolanmẹ todido matindo tọn na nuṣiwa dai tọn lẹ wutu, podọ numọtolanmẹ whẹhùhù tọn ko dibla hẹn yé gbọjọ. Yé ma pọ́n yedelẹ hlan di mẹhe jẹ nado nọ paladisi gbigbọmẹ tọn lọ mẹ gba. Na nugbo tọn, mẹdelẹ dibu dọ yé ko waylando he matindo jona bo ma na mọ jona Jehovah tọn yí gbede. Be nugbo wẹ ya?
Ylando Delẹ Matindo Jona
5. Naegbọn e do sọgan yin didọ dọ ylando delẹ ma tindo jona?
5 Ylando delẹ matindo jona. Jesu Klisti dọmọ: “Ylando depope po nùzinzan lẹpo po wẹ yè na jona gbẹtọ: ṣigba nùzinzan do gbigbọ wiwe go, yé ma to na jona gba.” (Matiu 12:31) Enẹwutu, to whelọnu lò, nùzinzan sọta gbigbọ wiwe Jiwheyẹwhe tọn, kavi huhlọn-yido-wazọ́n etọn, ma na yin jijonamẹ gba. Apọsteli Paulu dlẹnalọ hlan ylando mọnkọtọn lẹ to whenuena e wlan dọmọ: “Na yé he yè ko hùn nukun na dai lẹ, ... eyin yé diọkọ, e glo nado vọ́ yé lẹ́ yọyọ do lẹnvọjọ mẹ; na yé to ovi Jiwheyẹwhe tọn whè do satin go yọyọ hlan yede, bo sọ to winyando e gbangba.”—Heblu lẹ 6:4-6.
6. Etẹwẹ nọ dohia eyin ylando de jẹ na jona kavi lala?
6 Kiki Jiwheyẹwhe kẹdẹ wẹ nọ yọnẹn eyin mẹde waylando he matindo jona. Nalete, Paulu tá hinhọn do whẹho ehe ji to whenuena e wlan dọmọ: “Na eyin míwlẹ yọnẹn gan bo wà oylan whenuena míwlẹ ko mọ yọnẹn nugbo tọn yí godo, avọ́ na ylando ma tin ba gba, ṣigba nukundido he dobu owhẹdida tọn de.” (Heblu lẹ 10:26, 27) Omẹ ojlonọ de nọ yinuwa po ojlo po, kavi yin tasinyẹntọ bo nọ saba wà nuhe yin ojlo etọn. Mẹdepope he yí ojlo po tasinsinyẹn po do zindonukọn nado to oylanwa to whenuena e ko yọ́n nugbo lọ godo ma na yin jijona gba. Gbọnmọ dali, e ma yin lehe ylando lọ sù sọ gba ṣigba ninọmẹ ahun tọn wẹ yin onu titengbe lọ, yedọ ninọmẹ ojlo he e bẹhẹn, he gandego eyin vlavo ylando lọ yin dehe jẹ na jona kavi lala. To alọ devo mẹ, etẹ na vlavo tọn wẹ yin whẹho lọ to whenuena Klistiani he ṣinuwa de tindo ayihamajai sisosiso dogbọn ylanwiwa etọn dali? Na nugbo tọn, tintin to lẹnpọn mẹ daho etọn dohia dọ ewọ ma ko, waylando he ma tindo jona de gba.
Ylando Yetọn lẹ Ma Tindo Jona
7. Naegbọn mí sọgan dọ dọ delẹ to nukundiọsọmẹtọ sinsẹ̀n tọn Jesu tọn lẹ mẹ wàylando he matindo jona?
7 Delẹ to nukọntọ sinsẹ̀n Ju tọn he diọnukunsọ Jesu lẹ mẹ wàylando sọn ojlo mẹ wá, bo gbọnmọ dali ma tindo jona. Dile e tlẹ yindọ yé mọ gbigbọ Jiwheyẹwhe tọn he to azọ́nji gbọn Jesu dali dile e wàdagbe bo wazọ́n jiawu lẹ, sinsẹngan enẹlẹ dọ dọ huhlọn etọn yin Beelzebub, kavi Satani Lẹgba tọn. Yé waylando po oyọnẹn gigọ gbigbọ Jiwheyẹwhe tọn he tin to azọ́nji tọn po. Gbọnmọ dali, yé wàylando he matindo jona, na Jesu dọmọ: “mẹdepope he dọho do gbigbọ wiwe go, yè ma na jona ẹn to aihọn he mẹ, podọ to aihọn he ja mẹ.”—Matiu 12:22-32.
8. Naegbọn ylando Juda Iskaliọti tọn do yin dehe matindo jona?
8 Ylando Juda Iskaliọti tọn lọsu matindo jona ga. Jesu didehia etọn yin sọn ojlo mẹ wá, yedọ afọdide nuhe yè yọnẹn taun do basi yẹnuwiwa po nugbomadọ po tọn. Di dohia, to whenuena Juda mọ Malia to whenuena e sa amisisa akuẹgegenu na Jesu, e kanse dọmọ: “Etẹwutu wẹ yè ma sà nusisa he yin fatakakuẹ́ fọdekanweko, bo yin nina hlan wamọnọ lẹ?” Apọsteli Johanu yidogọ dọmọ: “[Juda] dọ ehe dinvie, e ma yin dọ é hò wamọnọ lẹ pọ́n wutu gba; ṣigba dọ ewọ yin ajotọ de wutu, podọ tintindo apo lọ, nọ bẹ́ onu yè bẹ do e mẹ lẹ yì.” Afọdopolọji to enẹgodo, Juda dè Jesu hia na fatakakuẹ ogban. (Johanu 12:1-6; Matiu 26:6-16) Nugbo, e vẹ na Juda bọ e hù ede. (Matiu 27:1-5) Ṣigba yè ma jona ẹn gba, to whenuena e yindọ nuyiwa ṣejannabi he yin sọn ojlo mẹ wá, gbọzangbọzan etọn tọn po nuyiwa oklenọ etọn po do ylanwiwa etọn jẹagọdo gbigbọ wiwe hia. Lehe e sọgbe do sọ dọ Jesu ylọ Juda dọ “visunnu viva tọn”!—Johanu 17:12; Malku 3:29; 14:21.
Yè Jó Ylando Yetọn lẹ na Yé
9. Etẹwutu wẹ Jiwheyẹwhe jó ylando Davidi tọn do na ẹn to kọndopọmẹ hẹ Bati-ṣeba?
9 Ylando sọn ojlo mẹ wá lẹ nọte to vogbingbọn pete mẹ po nuṣiwa mẹhe tọn Jiwheyẹwhe jona lẹ tọn po. Lẹnnupọn do ahọlu Davidi Islaeli tọn ji taidi apajlẹ de. E lọga hẹ Bati-ṣeba, asi Ulia tọn, podọ to enẹgodo basi tito hẹ Joabi nado gbọ Ulia ni yin hùhù to awhàn nukọn. (2 Samuẹli 11:1-27) Naegbọn Jiwheyẹwhe do walẹblanu na Davidi? Na taun tọn na alẹnu Ahọluduta lọ tọn wutu ṣigba na lẹblanu Davidi lọsu tọn po lẹnvọjọ sọn ahun mẹ wá etọn po wutu ga.—1 Samuẹli 24:4-7; 2 Samuẹli 7:12; 12:13.
10. Dile e tlẹ yindọ Pita wàylando sinsinyẹn, naegbọn Jiwheyẹwhe do jona ẹn?
10 Lẹnnupọn do apọsteli Pita ji ga. E wàylando sinsinyẹn gbọn mimọ́n Jesu pludopludo dali. Naegbọn Jiwheyẹwhe jona Pita? Gbọnvona Juda Iskaliọti, Pita ko yin nugbonọ to sinsẹnzọn Jiwheyẹwhe po Klisti tọn po mẹ. Ylando apọsteli ehe tọn yin na whẹwhinwhẹn agbasa madogannọ tọn wutu, podọ ewọ do lẹnvọjọ nujọnu tọn hia “bo viavi badabada.”—Matiu 26:69-75.
11. Nawẹ hiẹ na basi zẹẹmẹ “lẹnvọjọ” tọn gbọn, podọ etẹwẹ mẹde dona wà eyin ewọ yin mẹhe lẹnvọjọ nugbo?
11 Apajlẹ he to yinyin zẹẹmẹ basi deji helẹ dohia dọ mẹhe tlẹ wàylando sinsinyẹn sọgan mọ jona Jehovah Jiwheyẹwhe tọn yí. Ṣigba walọyizan tẹwẹ yin bibiọtomẹsi nado sọgan yin jijona? Lẹnvọjọ nugbo yin onu tangan eyin Klistiani he ṣinuwa de na yin jijona gbọn Jiwheyẹwhe dali. Nado lẹnvọjọ zẹẹmẹdo “nado dealọ sọn ylando mẹ po nuvẹnamẹ po na ylanwiwa he ko wayì lẹ” kavi “tindo numọtolanmẹ nubiọlanmẹnamẹ kavi lẹnvọjọ tọn na nuhe mẹde ko wà kavi gboawupo nado wà.” (Le Robert, Dictionnaire alphabétique et analogique de la langue française) Mẹhe lẹnvọjọ nugbo na do nubiọlanmẹnamẹ hia na masìn, awubla, kavi nuhahun lẹ he ylando etọn ko hẹnwá oyín Jehovah tọn po titobasinanu etọn po ji. Ylanwatọ he lẹnvọjọ lọ na sọ wleawuna sinsẹ́n mọnkọtọn, bo na wàzọ́n he sọgbe hẹ lẹnvọjọ lẹ. (Matiu 3:8; Owalọ lẹ 26:20) Di dohia, eyin ewọ ko hò mẹde dù, ewọ na de afọdide he sọgbe hẹ lẹnpọn dagbe lẹ nado suahọ nuhe yin hinhẹnbú lọ tọn. (Luku 19:8) Klistiani he lẹnvọjọ mọnkọtọn tindo whẹwhinwhẹn Owe wiwe lẹ tọn he diun lẹ nado tindo jide dọ Jehovah na jonamẹ to aliho susugege tọn de mẹ. Etẹwẹ whẹwhinwhẹn ehelẹ?
Whẹwhinwhẹn lẹ na Jide to Jona Jiwheyẹwhe Tọn Mẹ
12. To dodonu etẹ tọn ji wẹ Psalm 25:11 dohia dọ mẹhe lẹnvọjọ de sọgan hodẹ̀ na jona?
12 Ylanwatọ he lẹnvọjọ de sọgan yí jide do hodẹ̀ na jona to dodonu oyín Jehovah tọn ji. Davidi vẹvẹ dọmọ: “Na oyín towe wutu, Oklunọ e, jo oylanwiwa; ṣie na mi, na e klo wutu.” (Psalm 25:11) Odẹ̀ mọnkọtọn, to kọndopọmẹ hẹ lẹnvọjọ na masìn depope he ylanwatọ lọ ko kọ̀n do oyín Jiwheyẹwhe tọn go, dona sọ yinuwa taidi alọhẹndotena ylanwà sinsinyẹn to sọgodo ga.
13. Nuyiwa tẹwẹ odẹ̀ tindo to jona sọn olọn mẹ wá mẹ?
13 Jehovah Jiwheyẹwhe nọ na gblọndo odẹ̀ sọn ahun mẹ wá devizọnwatọ ylandonọ he lẹnvọjọ etọn lẹ tọn. Di dohia, Jehovah ma gbẹkọ Davidi go gba, yedọ he hodẹ̀ sọn ahun mẹ wá to whenuena e doayi susugege ylando etọn lẹ go to kọndopọmẹ hẹ Bati-ṣeba. Na nugbo tọn, hogbe Davidi tọn lẹ to Psalm 51 mẹ do numọtolanmẹ ovẹvivẹ tọn lẹ hia. E vẹvẹ dọmọ: “Jiwheyẹwhe e, walẹblanuna mi, kẹdẹdi dagbewanyi towe: kẹdẹdi lẹblanu bibọ towe susu tọn, gbidi tasinyẹn ṣe sẹ̀. Klọ́ mi sọn oylanwiwa ṣie mẹ patapata; bo sọ lẹ̀ mi wé sọn ylando ṣie mẹ. Avọ́ Jiwheyẹwhe tọn wẹ otù gbigbà; ayiha gbigbà finfinọn, Jiwheyẹwhe e, hiẹ ma to na vlẹ gba.”—Psalm 51:1, 2, 17.
14. Nawẹ Owe wiwe lẹ na mí jide dogọ dọ Jiwheyẹwhe nọ jona mẹhe do yise hia to avọsinsan ofligọ Jesu tọn mẹ gbọn?
14 Jiwheyẹwhe nọ jona mẹhe nọ do yise hia to avọsinsan ofligọ Jesu tọn mẹ lẹ. Paulu wlan dọmọ: “Mẹhe mẹ míwlẹ ko mọ ofligọ yi te gbọn ohùn etọn mẹ, ojona ylando tọn, kẹdẹdi adọkun susu ojọmiọn etọn tọn.” (Efesunu lẹ 1:7) Po linlẹn dopolọ po, apọsteli Johanu wlan dọmọ: “Mì yọpọ ṣie lẹ emi, owe onu helẹ tọn wẹ yẹn wlan hlan mì, na mì ma na do wàylan. Eyin mẹdepope wàylan, mí tindo whẹyidọtọ de to Otọ́ de, Jesu Klisti dodonọ lọ: Ewọ sọ wẹ oyẹsu na ylando mítọn: e ma yin mítọn kẹdẹ, ṣigba na ylando aihọn lẹpo tọn ga.”—1 Johanu 2:1, 2.
15. Nado zindonukọn to vivi lẹblanu Jiwheyẹwhe tọn dudu mẹ, etẹwẹ ylandonọ he lẹnvọjọ de dona wà?
15 Lẹblanu Jehovah tọn nọ na ylanwatọ he lẹnvọjọ lọ dodonu de na jide dọ ewọ sọgan yin jijona. Nẹhemia dọmọ: “Ṣigba Jiwheyẹwhe awuwlenọ de wẹ hiẹ nado jona, dagbenọ bo sọ gọ́ na awuvẹmẹ, whleawu nado sadi, podọ susunọ to lẹblanu mẹ.” (Nẹhemia 9:17; yijlẹdo Eksọdusi 34:6, 7 go.) Na nugbo tọn, nado zindonukọn to vivi lẹblanu sọn olọn mẹ wá tọn dudu mẹ, ylanwatọ lọ dona dovivẹnu nado yìn osẹ́n Jiwheyẹwhe tọn. Dile psalmkantọ lọ dọ do, “gbọ lẹblanu bibọ towe lẹ ni wá dee, na yẹn nido nọgbẹ̀: na osẹ́n towe wẹ homẹhunhun ṣie. Oklunọ e, daho wẹ lẹblanu bibọ towe lẹ: nagbẹ̀ mi kẹdẹdi whẹdida towe lẹ.”—Psalm 119:77, 156.
16. Kọfanamẹ tẹwẹ tin to finẹ na nugbo lọ dọ Jehovah nọ zé ninọmẹ ylandonọ-yinyin mítọn do lẹnpọn mẹ?
16 Nugbo lọ dọ Jehovah nọ lẹ̀n ninọmẹ ylando mítọn tọn pọ́n sọ nọ na ylanwatọ he lẹnvọjọ vivo po whẹjijọ po nado hodẹ̀ po jide po dọ Jiwheyẹwhe na jona ẹn. (Psalm 51:5; Lomunu lẹ 5:12) Psalmkantọ lọ Davidi na jide kọfanamẹ tọn to whenuena e dọmọ: “E [Jehovah Jiwheyẹwhe] ma wà hẹ mí kẹdẹdile ylando mítọn te gba; mọ e ma sọ na ale mí kẹdẹdi oylanwiwa mítọn. Na le olọn yiaga hú aigba do, sọmọ wẹ dagbewanyi etọn hlan omẹ he dibusi i lẹ dali. Dile whezẹtẹn dẹ̀n do wheyihọ do, dẹ̀n sọmọ wẹ ewọ do zé sẹnmẹjẹ mítọn yì dẹ̀n sọn mí de. Taidile otọ́ de nọ blawuna ovi etọn lẹ do, mọwẹ Oklunọ nọ blawuna yé he dibusi i lẹ do. Na ewọ yọn dida mítọn; e sọ flin dọ okọ́gudu wẹ mí.” (Psalm 103:10-14) Nugbo, Otọ́ mítọn olọn mẹ tọn tlẹ sọ yin lẹblanunọ po awuvẹmẹtọ po talala hugan mẹjitọ gbẹtọvi de.
17. Kọndopọ tẹwẹ kandai devizọnwiwa nugbonọ mẹde tọn he ko wayì hlan Jiwheyẹwhe tindo gando jonamẹ go?
17 Ylandonọ he lẹnvọjọ de sọgan hodẹ̀ na jona po jide po dọ Jehovah ma na gbẹkọ kandai devizọnwiwa nugbonọ etọn he wayi tọn go gba. Nẹhemia ma to vẹvẹ na jona ylando etọn tọn gba, ṣigba e dọmọ: “Jiwheyẹwhe ṣie e, flin mi, na dagbe.” (Nẹhemia 13:31) Klistiani he lẹnvọjọ de sọgan din kọfanamẹ to hogbe lọ lẹ mẹ he dọmọ: “Na Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.”—Heblu lẹ 6:10.
Alọgọ sọn Sunnu Mẹho lẹ Dè
18. Etẹwẹ dona yin wiwà eyin ylando Klistiani de tọn hẹn ẹn zun awutunọ to gbigbọmẹ?
18 Etẹwẹ dogbọn eyin Klistiani de tindo numọtolanmẹ mẹhe ma jẹ tọn nado gbọṣi paladisi gbigbọmẹ tọn lọ mẹ kavi ma penugo nado hodẹ̀ na ylando etọn ko hẹn ẹn lẹzun awutunọ to gbigbọmẹ ka lo? “Mì gbọ ni ylọ mẹho agun tọn lẹ, na yé ni hodẹ̀ do e ji, bo kọn amisisa do ota nẹẹ to oyín Oklunọ tọn mẹ,” wẹ devi Jakobu wlan. “Podọ odẹ̀ yise tọn na whlẹn azọ̀ntọ gán, Oklunọ nasọ ze e tite; eyin e ko sọ wàylan de, yè na jo nẹẹ.” Mọwẹ, mẹho agun tọn lẹ sọgan hodẹ̀ po kọdetọn dagbe po hẹ kavi na yisenọ hatọ he lẹnvọjọ de po todido lọ po nado hẹn ẹn gọwa agbasalilo gbigbọmẹ tọn dagbe mẹ.—Jakobu 5:14-16.
19. Eyin mẹde yin didesẹ sọn agun mẹ, etẹwẹ e dona wà nado yin jijona bo yin gigọyí?
19 Eyin wedegbẹ whẹdida tọn de tlẹ dè ylandonọ he ma lẹnvọjọ de sẹ̀ sọn agun mẹ, e ma zẹẹmẹdo dọ ewọ ko wà ylando he ma tindo jona de gba. Nalete, nado sọgan yin jijona bo yin gigọyí, ewọ dona yí whiwhẹ do setonuna osẹ́n Jiwheyẹwhe tọn lẹ, bo wleawuna sinsẹ́n he jẹ hẹ lẹnvọjọ lẹ, bo kanwe hlan mẹho lẹ na mẹgigọyí. To whenuena ayọdetọ de yin didesẹ sọn agun mẹ to Kọlinti hohowhenu tọn mẹ godo, Paulu wlan dọmọ: “Oya he mẹsusu sahẹ omẹ mọtọnnkọ he ko sù nẹẹ. Mọ dọ ehe jẹagọ é jẹ mì ni jona ẹn, bo miọnhomẹ nẹẹ, na ayiha omẹ mọtọnnkọ tọn nikaa tlọ gbọn awubla glanglan dali. Enẹwutu yẹn vẹ mì dọ mì ni hẹn owanyi mìtọn lodo hlan e dali.”—2 Kọlintinu lẹ 2:6-8; 1 Kọlintinu lẹ 5:1-13.
Jiwheyẹwhe nọ Na Huhlọn
20, 21. Etẹwẹ sọgan gọalọna mẹde he to numimọ ayimajai tọn tindo dogbọn vlavo yinyin mẹhe ko wàylando he matindo jona dali?
20 Eyin ninọmẹ mọnkọtọn lẹ taidi agbasalilo dagbe matindo kavi flumẹjijẹ to ayimajai hẹnwá na wiwà ylando he ma tindo jona dali, tintindo gbọjẹ po amlọn he pémẹ po sọgan yin alọgọnu. Nalete, na taun tọn, hiẹ dona flin hogbe Pita tọn he dọmọ: “Mì bẹ́ magbọjẹ mìtọn lẹpo do alọ etọn mẹ; na ewọ to tukla mítọn jẹ wutu.” Podọ a dike Satani hẹn we gbọjọ gbede blo, na Pita yidogọ dọmọ: “Mì yin hùwhẹnọ bo sọ nọ họ́ mìde: na lẹgba, mẹglatọ mìtọn, di kinnikinni he to lìlì, e to zọnlinzin pé, bo to mẹhe e na tlẹndù din. Mẹhe mì ni diọnukunsọ gligli to yise mẹ, na mì ni sọ yọnẹn dọ nukunbibia dopolọ ko ṣẹ̀ sọn mẹmẹsunnu mítọn he ko tin to aihọn mẹ lẹ ji. Ṣigba Jiwheyẹwhe ojọmiọn lẹpo tọn, ... ni basi mì sọgbe, ni hẹn mì lodo, bo na huhlọn mì, bo sọ dintẹnna mì.”—1 Pita 5:6-10.
21 Enẹwutu eyin hiẹ lẹnvọjọ ṣigba bo to budi dọ a ko wà ylando he ma tindo jona, flin dọ aliho Jiwheyẹwhe tọn yin nuyọnẹn tọn, jijlọ, po owanyi tọn po. Enẹwutu, hodẹ̀ hlan ẹn to yise mẹ. Bo to yíyí nududu gbigbọmẹ tọn lọ he ewọ nọ wleawuna gbọn “afanumẹ nugbonọ nuyọnẹntọ lọ dali” zọnmii. (Matiu 24:45-47) Dogbẹ́ hẹ yisenọ hatọ towe lẹ bo nọ tindo mahẹ to lizọnyizọn Klistiani tọn lọ mẹ to gbesisọmẹ. Ehe na hẹn yise towe lodo bo na tún we dote sọn obú depope dọ Jiwheyẹwhe sọgan nọ ma ko jó ylando towe mẹ.
22. Etẹwẹ mí na gbadopọnna bọdego?
22 Mẹhe tin to paladisi gbigbọ tọn mẹ lẹ sọgan yí homẹfa to oyọnẹn lọ mẹ dọ Jehovah nọ jonamẹ to aliho susugege de mẹ. Ṣogan, ogbẹ̀ yetọn ma yin dehe ma nọ ma tin to whlepọn mẹ to egbehe gba. Vlavo yé sọgan blawu na omẹ yiwanna de kú kavi họntọn vivẹ de to azọ́n sinsinyẹn jẹ. Dile mí na mọ do, to ninọmẹ ehe po devo lẹ po mẹ, Jehovah nọ gọalọ bo nọ deanana omẹ etọn lẹ gbọn yizan gbigbọ wiwe etọn tọn dali. (Pọ́n w-F 15/9/92, weda 8.)
Etẹwẹ yin Gblọndo Towe Lẹ?
◻Whẹwhinwhẹn tẹwẹ tin to finẹ dọ Jehovah nọ ‘jonamẹ susugege’?
◻Ylando tẹwẹ jona matin na?
◻To ninọmẹ tẹlẹ glọ wẹ ylando mẹde tọn nọ yin jijona te?
◻Naegbọn ylanwatọ he lẹnvọjọ lẹ sọgan tindo jide to jona Jiwheyẹwhe tọn mẹ?
◻Alọgọ tẹwẹ tin to aimẹ na ylanwatọ he lẹnvọjọ lẹ?
[Yẹdide to weda 10]
Be hiẹ yọ́n nuhewutu Davidi po Pita po yin jijona ṣigba bọ Juda Iskaliọti ma yin jijona ya?
[Yẹdide to weda 12]
Alọgọ gbọn mẹho agun tọn lẹ dali sọgan basi onu susu nado gọalọna Klistiani de to gbigbọmẹ