“Mì Fọ́n Dagbe Ya! Be Mì Yọ́n Nuhe Yinkọ Jiwheyẹwhe Tọn Yin Ya?”
TO WEKANTẸN alahọ Kunnudetọ Jehovah tọn lẹ tọn mẹ to Brésil, wekanhlanmẹ he bọdego ehe yin mimọyi sọn mẹmẹyọnnu ahoho owhe 12 mẹvi de si to todaho Fortaleza tọn mẹ he dọmọ:
“To whelọnu dọ̀n to 1990 to whenuena mí tin to ohọ̀ atọ́n wepinplọn tọn mẹ, wehọmẹ mítọn basi tito nado basi nudohia nujijla lẹnunnuyọnẹn, alọnuzọ́n lẹ, po nuyiwa aṣa tọn po. Mí basi zẹẹmẹ na mẹplọntọ lọ dọ mí jlo dọ nudohia nujijla mítọn ni gbọnvo na nuhe wehọmẹvi devo lẹ to tito basi nado dohia. To whenuena e ko nọ sè bọ mí nọ dọho dogbọn Jehovah po Biblu po dali dai, e na ayinamẹ dọmọ: ‘Eyin mọwẹ mí sọgan kanwe dogbọn Jiwheyẹwhe mìtọn dali!’
“Mí mọ ehe taidi dotẹnmẹ hundote de nado dekunnu bo basi dide nado bẹ kunnudenu de po owe Biblu tọn lẹ po he basi zẹẹmẹ do yinkọ Jehovah tọn ji dopọ. Mí basi awuwle vọkan wekun daho hogbe lọ he tin to Psalm 83:18 mẹ tọn bo tlẹ ẹ dopọ po yẹdide Biblu he yin hùnhùndonuvo tọn de po. Humọ, mí bẹ lẹdogbedevomẹ Biblu voovo tọn lẹ he bẹ yinkọ Jehovah tọn hẹn do tafo dopo ji. To tafo dopolọ ji, mí basi nutito owe he sinai do Biblu ji voovo lẹ tọn. To vivọnu tafo lọ tọn, mí wleawuna zomọ vidéo po télévision tọn de po nado do apajlẹ dopo fie yinkọ lọ Jehovah yin yiyizan te to sinemoto nukundeji taun de mẹ hia dlapọn basitọ lẹ.
“To nudohia lọ whenu, to whenuena mẹde wá tafo mítọn kọ̀n, mí nọ dọ: ‘Mì fọ́n dagbe ya! Be mì yọ́n nuhe yínkọ Jiwheyẹwhe tọn yin ya?’ To nina dotẹnmẹ dlapọn basitọ lọ nado gblọn godo, mí nọ zindonukọn dọmọ: ‘Pọ́n file! Lẹdogbedevo Biblu tọn voovo lẹ dohia dọ yínkọ etọn nọ yin Jehovah,’ bo nọ dlẹnalọ hlan yinkọ lọ to Biblu voovo lẹ mẹ, taidi enẹ he yin João Ferreira de Almeida, La Bible de Jérusalem, po Traduction du monde nouveau po. Enẹgodo mí nọ hò nudohia lọ fie wadohia basitọ titengbe sinemoto lọ tọn zinnudo Jehovah ji taidi yínkọ Jiwheyẹwhe tọn te. To whenuena gbẹtọ lẹ do ojlo hia, mí nọ na yé linlinnamẹwe de kavi alọnuwe pẹvi de po nudọnamẹ susu po.
“Dopo to jọja lọ lẹ mẹ he wá tafo mítọn kọ̀n biọ owe lọ heyin Les jeunes s’interrogent—Réponses pratiques. Mẹplọntọ mítọn gbadopọnna owe lọ Comment s’assurer une vie de famille heureuse bo dawha dọmọ: ‘Etẹ! Owe ojlofọndotenamẹ nankọ die!’ To vivọnu nudohia nujijla lọ tọn, mí do owe daho 7, alọnuwe pẹvi 18, po linlinnamẹwe 67 po gbonu. Mí mọ otẹ̀n atọ̀ntọ yí to nudohia nujijla lọ tọn mẹ. Ṣigba to popo ji, homẹ mítọn hùn na lẹblanulọkẹyi hinhẹn zun yinyọnẹn oyín sọn olọn mẹ wá lọ tọn, yedọ Jehovah.” (Pọ́n w-F 1/2/93, weda 29.)