Kẹalọyi Opagbe Jiwheyẹwhe Tọn lẹ Gbọn Yise Tintindo Dali

“[ewọ jehovah jiwheyẹwhe, nw] yí opagbe daho tlala akuẹgegenu na mí.”—2 PITA 1:4.

1. Etẹwẹ nọ hẹn mí penugo nado tindo yise nugbo?

JEHOVAH jlo dọ mí ni tindo yise to opagbe etọn lẹ mẹ. Ṣogan, “omẹ pó ma tindo yise gba.” (2 Tẹsalonikanu lẹ 3:2) Jẹhẹnu ehe yin sinsẹ́n gbigbọ wiwe Jiwheyẹwhe tọn, kavi huhlọn yido wazọ́n. (Galatianu lẹ 5:22, 23) Gbọnmọ dali, mẹhe yin anadena gbọn gbigbọ Jehovah tọn dali lẹ kẹdẹ wẹ sọgan tindo yise.

2. Nawẹ apọsteli Paulu basi zẹẹmẹ “yise” tọn do?

² Ṣigba etẹwẹ yise yin? Apọsteli Paulu ylọ ẹ dọ “okunnu onu he mí ma mọ tọn.” Kunnudenu nujọnu he yè ma mọ ehelẹ tọn yin nuhe lodo sọmọ bọ yise sọzẹn po e po. Yise sọ yin didọ nado yin “dòdó onu yè to tódo tọn” na mẹhe tindo jẹhẹnu ehelẹ tindo nujikudo lọ dọ nuhe Jehovah Jiwheyẹwhe dopagbe etọn lẹpo yin nujikudo sọmọ bọ e yin nuhe yè sọgan pọnhlan taidi nuhe ko mọ hẹndi etọn.—Heblu lẹ 11:1.

Yise po Opagbe Jehovah tọn lẹ Po

3. Numimọ etẹ tọn wẹ Klistiani mẹyiamisisadode lẹ na tindo eyin yé tindo yise?

³ Nado hẹn hòmẹ Jehovah tọn hun, mí dona tindo yise to opagbe etọn lẹ mẹ. Apọsteli Pita do ehe hia to wekanhlanmẹ gbọdo awetọ etọn mẹ, heyin kinkan to nudi owhe 64 W.M. tọn mẹ. E zinnudeji dọ eyin mẹyiamisisadode hatọ etọn lẹ tindo yise, ye na mọ hẹndi “opagbe daho tlala akuẹgegenu” Jiwheyẹwhe tọn lẹ. Taidi kọdetọn de, yé na lẹzun “máhẹtọ jọwamọ yẹwhe” tọn lẹ taidi whédutọgbẹ́ Jesu Klisti tọn lẹ to Ahọluduta olọn mẹ tọn mẹ. Gbọn yise po alọgọ Jehovah Jiwheyẹwhe tọn po dali, yé ko họngan sọn kanlinmọgbenu ninọ hlan walọ ylankan po nuyiwa aihọn he gblezọn ehe tọn lẹ po mẹ. (2 Pita 1:2-4) Saa lẹnnupọn do enẹ ji! Mẹhe tindo yise nugbo lẹ nọ duvivi mẹdekannujẹ he ma yọnjlẹ dopolọ to egbehe.

4. Jẹhẹnu tẹlẹ wẹ mí dona yí dogọ́ yise mítọn?

⁴ Yise to opagbe Jehovah tọn lẹ mẹ po pẹdido po na mẹdekannujẹ heyin ninamẹ gbọn Jiwheyẹwhe dali mítọn tọn po dona whàn mí nado wà nuhe go mí pe lẹpo nado lẹzun Klistiani apajlẹ dagbenọ lẹ. Pita dọmọ: “Le mí nọ dovivẹnu to onu popo mẹ, mì yí jijọdagbe dogọ́ yise mìtọn; bo yí oyọnẹn dogọ jijọdagbe; owùnza dogọ́ oyọnẹn; homẹfa dogọ́ owùnza; jijọ-di-Jiwheyẹwhe tọn dogọ́ homẹfa; owanyi na mẹmẹsunnu dogọ́ Jijọ-di-Jiwheyẹwhe tọn; podọ owanyi dogọ́ owanyi na mẹmẹsunnu.” (2 Pita 1:5-7) Pita gbọnmọ dali do na mí todohukanji he e na yin nuyọnẹnnu na mí nado hẹn do apọnmẹ tọn. Mì gbọna mí ni gbadopọnna jẹhẹnu ehelẹ ganji.

Nugonu Tangan Yise tọn Lẹ

5, 6. Etẹwẹ jijọdagbe, podọ nawẹ mí sọgan yí i dogọ́ yise mítọn gbọn?

⁵ Pita dọ dọ jijọdagbe, oyọnẹn, owùnza, homẹfa, jijọ-di-Jiwheyẹwhe, owanyi mẹmẹsunnu tọn, po owanyi po dona yin nina hlan ode awetọ mítọn podọ dogọ́ yise mítọn. Mí dona wazọ́n sinsinyẹn nado hẹn jẹhẹnu ehelẹ zun nugonu tangan yise mítọn tọn lẹ. Di dohia, jijọdagbe mayin jẹhẹnu de he mí nọ dohia dovo na yise gba. Wezẹhomẹkantọ W.E. Vine zinnudeji dọ to 2 Pita 1:5 mẹ, “vivi jijọdagbe tọn nọ yin dudu taidi jẹhẹnu tangan de to yise tintindo mẹ.” Dopodopo jẹhẹnu he po lẹ tọn he go Pita donù sọ dona yin nugonu yise mítọn tọn ga.

⁶ Tintan, mí dona yí jijọdagbe dogọ́ yise mítọn. Yinyin jijọdagbenọ zẹẹmẹdo wiwà nuhe yọn to nukun Jiwheyẹwhe tọn mẹ. Na hogbe Glẹki tọn heyin zẹẹmẹ basina taidi “jijọdagbe” tofi, wẹ zẹẹmẹ delẹ yi “dagbewiwa” zan na. (Français courant) Jijọdagbe nọ whàn mí nado dapana oylan wiwà kavi awugble hẹnwana gbẹtọvi hatọ mítọn lẹ. (Psalm 97:10) E sọ nọ whàn nuyiwa tuli tọn to dagbewiwa mẹ na alemọyi gbigbọmẹ tọn, agbasamẹ tọn, po numọtolanmẹ mẹdevo lẹ tọn po.

7. Naegbọn mí dona yí oyọnẹn dogọ́ yise po jijọdagbe mítọn po?

⁷ Naegbọn Pita do dotuhomẹna mí nado yí oyọnẹn dogọ́ yise po jijọdagbe mítọn po? Eyọn, dile mí pannukọn avùnnukundiọsọmẹnu yọyọ lẹ hlan yise mítọn, mí tindo nuhudo oyọnẹn tọn eyin mí na yọn dagbe dovo na oylan. (Heblu lẹ 5:14) Gbọn oplọn Biblu tọn po numimọ to Ohó Jiwheyẹwhe tọn yiyizan po mẹ gọna nuyọnẹn yọn-na-yizan tintindo po to gbẹ̀zan egbesọegbesọ tọn mẹ, mí nọ hẹn oyọnẹn mítọn yiaga. Taidi kọdetọn de, ehe nọ hẹn mí penugo nado hẹn yise mítọn go bo zindonukọn nado to nuhe gọna jijọdagbe wà to whenuena mí tin to whlepọn glọ.—Howhinwhẹn lẹ 2:6-8; Jakobu 1:5-8.

8. Etẹwẹ owùnza, podọ nawẹ e tindo kanṣiṣa hẹ homẹfa gbọn?

⁸ Nado gọalọna mí nado hẹn whlepọn lẹ sọgbe hẹ yise, mí tindo nuhudo nado yí owùnza dogọ́ oyọnẹn mítọn. Hogbe Glẹki tọn na “owùnza” zẹẹmẹdo nugopipe lọ nado gọkọna míde. Sinsẹ́n gbigbọ Jiwheyẹwhe tọn ehe nọ gọalọna mí nado do alọhẹndotenamẹ de hia to lẹnpọn, hogbe, po walọyizan po mẹ. Gbọn gbigbọṣi owùnza tintindo mẹ, mí nọ yí homẹfa dogọ́ ẹ. Hogbe Glẹki tọn lọ na “homẹfa” zẹẹmẹdo tenọgligli tugbigbo tọn, e mayin nukunmẹ yinylan gbejijo tọn to awusinyẹn he yè ma sọgan dapana nukọn gba. Na ayajẹ he yè ze donukọn etọn wutu wẹ Jesu doakọnna yatin lọ. (Heblu lẹ 12:2) Huhlọn heyin ninamẹ gbọn Jiwheyẹwhe dali to pọmẹ po homẹfa po nọ hẹn yise mítọn lodo bo nọ gọalọna mí nado jaya to nukunbibia mẹ, bo du to whlepọn ji, bosọ dapana gbejijo to whenuena mì yin homẹkẹndo.—Filippinu lẹ 4:13.

9. (a) Etẹwẹ jijọ-di-Jiwheyẹwhe? (b) Naegbọn mí dona yí owanyi mẹmẹsunnu tọn dogọ́ jijọ-di-Jiwheyẹwhe mítọn? (c) Nawẹ mí sọgan yí owanyi dogọ́ owanyi mẹmẹsunnu tọn mítọn gbọn?

⁹ Hlan homẹfa mítọn mí dona yi mẹdezejo jijọ-di-Jiwheyẹwhe tọn dogọ́—yèdọ mẹdezejo, sinsẹ̀n-bibasi, po sinsẹnzọnwiwa hlan Jehovah po. Yise mítọn nọ whẹ́ndeji to whenuena mí zan jijọ-di-Jiwheyẹwhe bo mọ lehe Jehovah nọ yinuwa hẹ omẹ etọn lẹ do. Ṣogan, nado do jijọ-di-Jiwheyẹwhe hia, mí tindo nuhudo owanyi mẹmẹsunnu tọn. To popolẹpo mẹ, “ewọ he ma yiwanna mẹmẹsunnu etọn he é mọ, nawẹ e na yiwanna Jiwheyẹwhe mẹhe é ma mọ do?” (1 Johanu 4:20) Ahun mítọn dona whàn mí nado do owanyi nugbo hia hlan devizọnwatọ Jehovah tọn devo lẹ podọ nado din dagbemẹninọ yetọn to ojlẹ lẹpo mẹ. (Jakobu 2:14- 17) Ṣigba naegbọn mí do yin didọna nado yí owanyi dogọ́ owanyi na mẹmẹsunnu mítọn tọn? E họnwun dọ nuhe dọ wẹ Paulu te wẹ yindọ mí dona do owanyi hia gbẹtọvi lẹpo, e mayin hlan mẹmẹsunnu mítọn lẹ kẹdẹ gba. Owanyi ehe nọ yin didohia titengbe gbọn yẹwheho wẹndagbe lọ tọn didọ po alọgọna gbẹtọ lẹ po to gbigbọmẹ dali.—Matiu 24:14; 28:19, 20.

Vogbingbọn Nugandomẹgo tọn Lẹ

10. (a) Nawẹ mí na yinuwa gbọn eyin jijọdagbe, oyọnẹn, owùnza, homẹfa, jijọ-di-Jiwheyẹwhe, owanyi mẹmẹsunnu tọn, po owanyi po yin yíyídogọ́ yise mítọn? (b) Etẹwẹ nọ jọ eyin mẹhe ylọ ede dọ Klistiani de tindo nuhudo jẹhẹnu ehelẹ tọn?

¹⁰ Eyin mí yí jijọdagbe, oyọnẹn, owùnza, homẹfa, jijọ-di-Jiwheyẹwhe, owanyi mẹmẹsunnu tọn, po owanyi po dogọ́ yise mítọn, mí na lẹnnupọn, dọhó, bosọ yinuwa to aliho he Jiwheyẹwhe kẹalọyi lẹ mẹ. To adà awetọ mẹ, eyin mẹhe ylọ ede dọ Klistiani de gboawupo nado do jẹhẹnu ehelẹ hia, e lẹzun nukuntọ́nnọ to gbigbọmẹ. E ‘miọn nukun etọn lẹ hlan hinhọn’ he nọ wá sọn Jiwheyẹwhe de bo wọnji e go dọ emi ko yin kiklọwé sọn ylando he e ko basi wayi lẹ mẹ. (2 Pita 1:8-10; 2:20-22) Mì gbọna mí ni ma gboawupo to aliho enẹ mẹ pọn gbede bo gbọnmọ dali do hẹn yise tintindo to opagbe Jiwheyẹwhe tọn lẹ mẹ bu blo.

11. Etẹwẹ mí sọgan donukun sọn mẹyiamisisadode nugbonọ lẹ si po whẹwhinwhẹn po?

¹¹ Klistiani mẹyiamisisadode nugbonọ lẹ tindo yise to opagbe Jehovah tọn lẹ mẹ bo nọ sinyẹnlin nado hẹn oylọ po mẹdide etọn po heyin yetọn tindo jide. Mahopọnna zannu ahlida tọn depope to omọ́liho yetọn ji, mí sọgan donukun yé nado do jẹhẹnu jijọ-di-Jiwheyẹwhe tọn lẹ hia. Na mẹyiamisisadode nugbonọ mítọn lẹ tọn ‘họntonu he yè na gbọn biọ ahọluduta madopodo Jesu Klisti tọn mẹ yin hinhẹn nado tin to aimẹ to aliho nuhọakuẹ tọn de mẹ’ gbọn fọnsọnkú yetọn hlan ogbẹ̀ gbigbọmẹ tọn mẹ to olọn mẹ gblamẹ.—2 Pita 1:11.

12. Nawẹ mí sọgan mọnukunnujẹ hogbe 2 Pita 1:12-15 tọn mẹ gbọn?

¹² Pita doayi e go dọ emi na kú to madẹnmẹ, podọ e tindo nukundido nado mọ fọnsọnkú de yí to godomẹ hlan ogbẹ̀ olọn mẹ tọn. Ṣigba dẹn sọ lehe e gbẹsọ tin to ogbẹ̀ to “gohọtúntún ehe” mẹ sọ—agbasa gbẹtọvi tọn etọn—e tẹnpọn nado gla yise dote to yisenọ hatọ etọn lẹ mẹ bo fọn yé dote gbọn finflin yé dogbọn nuhe nuhudo tin na lẹ nado mọ nukun dagbe sọn olọn mẹ wá yí dali. To yìyì etọn yèdọ to okú etọn godo, mẹmẹsunnu po mẹmẹyọnnu gbigbọmẹ tọn Pita tọn lẹ po sọgan hẹn yise yetọn lodo gbọn hogbe etọn lẹ finflin dali.—2 Pita 1:12-15.

Yise to Hogbe Dọdai lọ tọn Mẹ

13. Nawẹ Jiwheyẹwhe wleawuna kunnudenu yise hẹn lodo tọn dogbọn wiwá Klisti tọn dali gbọn?

¹³ Jiwheyẹwhe lọsu dekunnu yise-hẹnlodo tọn dogbọn nujikudo wiwá Jesu tọn “po huhlọn po, po gigo daho po” dali (Matiu 24:30; 2 Pita 1:16-18) Na kunnudenu matindo tọn wutu, yẹwhenọ kosi lẹ dọ otan lalo tọn lẹ dogbọn yẹwhe yetọn lẹ dali, ṣigba Pita, Jakobu, po Johanu po yin kunnudetọ po nukun yetọn lẹ po hlan didiọwunmẹ gigonọ Klisti tọn. (Matiu 17:1-5) Yé mọ whenuena e yin gigopana bosọ sè wanyinyẹn ogbè Jiwheyẹwhe lọsu titi tọn bo to alọkẹyi Jesu taidi Visunnu yiwanna Etọn titi. Alọkẹyi enẹ po awusọhia sisẹ-mlanmlan heyin nina Klisti to whenẹnu po yin kinkọndomẹji yẹyi po gigo po tọn de do e ji. Na osọhia olọn mẹ tọn ehe wutu, Pita ylọ filọ, e sọgan yin to poplo osó Helmoni tọn ji, dọ “osó wiwe.”—Yijlẹdo Eksọdusi 3:4, 5 go.

14. Nawẹ wunmẹdidiọ Jesu tọn dona yinuwa do yise mítọn ji gbọn?

¹⁴ Nawẹ wunmẹdidiọ Jesu tọn sọgan yinuwa do yise mítọn ji gbọn? Pita dọmọ: “Míwlẹ sọ tindo ohó dọdai tọn he diun hú enẹ ga; hlan ehetọn mì wà dagbe bọ mì do payi e go, di hlan miyọngbán de he họ́n to ofi dozín de, kaka owun do kẹ̀n, bọ sunwhlẹvu afọnnu tọn lọ do zẹ̀ to ayiha mìtọn lẹ mẹ.” (2 Pita 1:19) E họnwun hezeheze dọ “Ohó dọdai tọn he” bẹ́ e mayin dọdai Owe wiwe Heblu tọn lẹ dogbọn Messia dali kẹdẹ gba ṣigba hogbe Jesu tọn lẹ ga dọ emi na wá “po huhlọn po, po gigo daho po.” Nawẹ hogbe lọ “diun hú enẹ” gbọn wunmẹdidiọ lọ dali gbọn? Nujijọ enẹ dekunnuna hogbe dọdai tọn lọ dogbọn wiwá gigonọ Klisti tọn dali to huhlọn Ahọluduta tọn mẹ.

15. Etẹwẹ pipayi ohó dọdai tọn lọ go bẹhẹn?

¹⁵ Nado hẹn yise mítọn lodo, mí dona payi hogbe dọdai tọn lọ go. Ehe bẹ́ oho enẹ pinplọn, hodọdopọ do e ji to opli Klistiani tọn lẹ tẹnmẹ, po ayinamẹ etọn lẹ yiyizan po hẹn. (Jakobu 1:22-27) Mí dona gbọ e ni yin “miyọngbán de he họ́n to ofi dozín,” he to ahun mítọn lẹ hẹn họnwun. (Efesunu lẹ 1:18) To whenẹnu kẹdẹ wẹ e na deanana mí kaka jẹ whenuena “sunwhlẹvu afọnnu tọn,” kavi, “sunwhlẹvu hinhọn afọnnu lọ tọn,” Jesu Klisti, na do ede hia to gigo mẹ. (Osọhia 22:16) Osọhia enẹ na zẹẹmẹdo vasudo na mẹhe ma tindo yise lẹ podọ dona lẹ na mẹhe tindo yise lẹ.—2 Tẹsalonikanu lẹ 1:6-10.

16. Naegbọn mí sọgan tindo yise dọ opagbe dọdai tọn he tin to Ohó Jiwheyẹwhe tọn mẹ lẹpo na yin hinhẹndi?

¹⁶ Yẹwhegan Jiwheyẹwhe tọn lẹ mayin gbẹtọ nuyọnẹntọ poun lẹ he nọ dọ dọdai nuyọnẹn tọn lẹ gba, na Pita dọmọ: “Dọdai Owe wiwe tọn de ma yin otadena di ojlo tọn de gba. Na dọdai ma gbọn ojlo gbẹtọ tọn dali wá to hohowhenu gba: ṣigba gbẹtọ lẹ dọho sọn Jiwheyẹwhe de dile yè dọ̀n yé yì do gbọn gbigbọ wiwe dali.” (2 Pita 1:20, 21) Di dohia, Davidi dọmọ: “Gbigbọ Oklunọ tọn dọhó gbọn dali ṣie.” (2 Samuẹli 23:1, 2) Podọ Paulu wlan dọmọ: “Owe wiwe lẹpo [yin] gbingbọ́n sọn Jiwheyẹwhe mẹ.” (2 Timoti 3:16) To whenuena e yindọ yẹwhegan Jiwheyẹwhe tọn lẹ yin gbigbọdo gbọn gbigbọ etọn dali, mí sọgan tindo yise dọ opagbe he tin to Ohó etọn mẹ lẹpo na yin hinhẹndi.

Yé Tindo Yise to Opagbe Jiwheyẹwhe tọn lẹ Mẹ

17. Opagbe tẹwẹ yin dodonu yise Abẹli tọn?

¹⁷ Opagbe Jehovah tọn lẹ yin dodonu de na yise ‘gbẹtọ susugege’ lẹ tọn heyin Klistiani kunnudetọ fliflimẹ tọn lẹ. (Heblu lẹ 11:1–12:1) Taidi apajlẹ, Abẹli tindo yise to opagbe Jiwheyẹwhe tọn mẹ dogbọn “okún” he na só otà “odan lọ” tọn dali. Kunnudenu hẹndi hogbe whẹdida Jiwheyẹwhe tọn do mẹjitọ Abẹli tọn lẹ ji tọn tin. To gbonu Edẹni tọn, Adam po whẹndo etọn po dù akla to odẹ́n nukunmẹ yetọn tọn mẹ na aigba heyin dẹ̀hodo hẹn owun po tẹnwùn lẹ po nado wú jẹgbonu. E sọgan yọnbasi bọ Abẹli doayi ojlo sinsinyẹn Evi tọn na asu etọn go bo sọ mọ dọ Adam dugan do e ji. Na jide tọn yọnnu lọ ko dọho dogbọn awufiẹsa hòmimọ etọn tọn dali. Podọ họntonu jipa Edẹni tọn yin hihọ basina gbọn Kelubimi lẹ po juju ohi miyọn tọn de po dali. (Gẹnẹsisi 3:14-19, 24) Ehe lẹpo wleawuna ‘dohia kunnudenu’ tọn de he hẹn Abẹli tindo jide dọ tundote na wá gbọn Okún opagbe tọn lọ gblamẹ. To nuyiwa to yise mẹ, Abẹli sanvọ hlan Jiwheyẹwhe he dohia nado tindo nuhọakuẹ susu hugan Kaini tọn tlala.—Heblu lẹ 11:1, 4.

18, 19. Aliho tẹlẹ mẹ wẹ Ablaham po Sala po do yise hia te?

¹⁸ Tọgbo Ablaham, Isaki, po Jakobu po tindo yise to opagbe Jehovah tọn lẹ mẹ ga. Ablaham tindo yise to opagbe Jiwheyẹwhe tọn mẹ dọ whẹndo he tin to aigba ji lẹpo na dona yede gbọn ewọ gblamẹ podọ dọ okun etọn na yin nina aigba de. (Gẹnẹsisi 12:1-9; 15:18-21) Visunnu etọn Isaki po ovivi etọn Jakobu po yin “gúdutọ opagbe dopolọ tọn hẹ ẹ.” Gbọn yise dali Ablaham “wáwáṣi to aigba opagbe tọn lọ ji” bosọ nọtepọn “otò daho de he tindo dodo,” Ahọluduta olọn mẹ tọn Jiwheyẹwhe tọn to ehe glọ e na yin finfọnsọnku do ogbẹ̀ do aigba ji te. (Heblu lẹ 11: 8- 10) Be hiẹ tindo yise dopolọ ya?

¹⁹ Asi Ablaham tọn, Sala, yin owhe 90 mẹho bo ko zẹ owhe ovijiji tọn go tlala to whenuena ewọ tindo yise to opagbe Jiwheyẹwhe tọn mẹ bosọ mọ huhlọn yí “nado mọhò okún lọ tọn” bo ji Isaki. Gbọnmọ dali, sọn owhe 100 mẹhodido Ablaham tọn whenu, “ewọ he di oṣiọ” gando ovijiji go, to godo mẹ “mẹsusu gege di sunwhlẹvu he to aga lẹ.”—Heblu lẹ 11:11, 12; Gẹnẹsisi 17:15-17; 18:11; 21:1-7.

20. Dile etlẹ yindọ tọgbo hoho whenu tọn lẹ ma mọ hẹndi opagbe Jiwheyẹwhe tọn lẹ hlan yé to gigọmẹ, etẹwẹ yé wà?

²⁰ Tọgbo nugbonọ lẹ kú ma mọ hẹndi gigọ opagbe Jiwheyẹwhe tọn lẹ na yé gba. Ṣogan, “yé ko mọ [opagbe nuhe tọn yè do lẹ tọn] to aganu boboe, bo yọnẹn to yéde mẹ, bo sọ jlẹgbèna yé, bo sọ yigbe dọ jonọ, [waṣinu, NW] wẹ yé to aihọn mẹ.” Whẹndo susu lẹ juwayi whẹpo Aigba Opagbe tọn lọ do lẹzun nutindo ovi Ablaham tọn lẹ tọn. Etomọṣo, to gbẹ̀zan yetọn lẹpo mẹ, tọgbo he tindo osi Jiwheyẹwhe tọn lẹ tindo yise to opagbe Jehovah tọn lẹ mẹ. Na yé ma hẹn yise bú pọn gbede wutu, yé na yin finfọnsọnku do ogbẹ̀ to madẹnmẹ to nọtẹn aigba tọn ji heyin “otò daho” he Jiwheyẹwhe wleawu etọn dai na yé, yèdọ Ahọluduta Messia tọn. (Heblu lẹ 11:13-16) To aliho dopolọ mẹ, yise sọgan gọalọna mí nado yin nugbonọ hlan Jehovah yèdọ eyin mí ma tlẹ mọ hẹndi afọdopolọji tọn heyin opagbe jiawu etọn lẹ tọn. Yise mítọn nasọ whàn mí nado setonuna Jiwheyẹwhe, yèdọ dile Ablaham basi do. Podọ dile é jo ogú gbigbọmẹ tọn de dai na ovi etọn lẹ, mọdopolọ mí sọgan gọalọna ovi mítọn lẹ nado tindo yise to opagbe họakuẹ Jehovah tọn lẹ mẹ.—Heblu lẹ 11:17-21.

Yise Yin Onu Tangan de na Klistiani Lẹ

21. Nado yin alọkẹyi hlan Jiwheyẹwhe to egbehe, etẹwẹ dona yin yiyidogọ́ yise tintindo mítọn?

²¹ Nugbo wẹ dọ, yise bẹ́ onu susu hẹn hugan jide tintindo to hẹndi opagbe Jehovah tọn lẹ mẹ. To whenuho gbẹtọvi tọn lẹpo gblamẹ, e ko yin dandannu nado tindo yise to Jiwheyẹwhe mẹ to aliho voovo lẹ mẹ eyin mí na duvivi alọkẹyi etọn tọn. Paulu zinnudeji dọ “matin yise, é glo nado hẹn homẹ [Jehovah Jiwheyẹwhe tọn] hùn: na ewọ he ja Jiwheyẹwhe de, ma sọgan nọma yise dọ é tin, podọ ewọ wẹ ahọsutọ yé he whèsọ do din in lẹ tọn.” (Heblu lẹ 11:6) Nado yin alọkẹyi hlan Jehovah to egbehe, mẹde dona do yise hia to Jesu Klisti mẹ podọ to avọsinsan ofligọ tọn he Jiwheyẹwhe ko wleawuna gbọn ewọ gblamẹ mẹ. (Lomunu lẹ 5:8; Galatianu lẹ 2:15, 16) E tin dile Jesu lọsu dọ do dọmọ: “Jiwheyẹwhe yiwanna aihọn [gbẹtọvi lẹ tọn] sọmọ bọ ẹ yí Ovi dètọ́n etọn dopo akàn namẹ, na mẹdepope he yí i sè ma nado dọ̀n, ṣigba é nido tindo ogbẹ̀ madopodo. Mẹhe yise to Ovi mẹ tindo ogbẹ̀ madopodo: mẹhe ma yise to Ovi mẹ ma to na mọ ogbẹ̀; ṣigba homẹgble Jiwheyẹwhe tọn nọte to é ji.”—Johanu 3:16, 36.

22. Hẹndi opagbe tẹ tọn wẹ Ahọluduta Messia tọn na hẹnwá?

²² Jesu yí azọ́ngbàn tangan de wà to hẹndi opagbe Jiwheyẹwhe tọn lẹ mẹ dogbọn Ahọluduta lọ dali ehe Klistiani lẹ nọ hodẹ̀ na. (Isaia 9:6, 7; Daniẹli 7:13, 14; Matiu 6:9, 10) Dile Pita dohia do, wunmẹdidiọ lọ dekunnuna hogbe dọdai tọn lọ dogbọn wiwá Jesu tọn to huhlọn po gigo Ahọluduta tọn po mẹ. Ahọluduta Messia tọn lọ na hẹn hẹndi opagbe Jiwheyẹwhe tọn devo wá, na Pita wlan dọmọ: “Di opagbe etọn, míwlẹ to nukundo olọn yọyọ lẹ, po aigba yọyọ de po, ofi he dodo nọnọ.” (2 Pita 3:13) Dọdai mọnkọtọn de mọ hẹndi etọn yi to whenuena Ju he yin kanlinmọ to Babilọni lẹ yin hinhẹn gọwá aigba yetọn ji to 537 J.W.M. to gandudu de glọ he tindo Zelubabẹli taidi togan podọ Joṣua taidi yẹwhenọ daho lọ. (Isaia 65:17) Ṣigba Pita dlẹnalọdo ojlẹ sọgodo tọn de whenuena “olọn yọyọ lẹ”—yèdọ Ahọluduta Messia tọn heyin olọn mẹ tọn—na dugan do “aigba yọyọ” de ji, yèdọ ogbẹ́ gbẹtọvi dodonọ lẹ tọn he to gbẹ̀nọ to globu ehe ji.—Yijlẹdo Psalm 96:1 go.

23. Kanbiọ tẹlẹ dogbọn jijọdagbe dali wẹ na yin hodọdeji to nukọn mẹ?

²³ Taidi devizọnwatọ nugbonọ Jehovah tọn lẹ po hodotọ́ Visunnu yiwanna etọn, Jesu Klisti po, mí tindo ojlo vẹkuvẹku na aihọn yọyọ he Jiwheyẹwhe dopagbe etọn lọ. Mí yọnẹn dọ e ko sẹpọ, podọ mí tindo yise dọ pagbe họakuẹ Jehovah tọn lẹpo na yin hinhẹndi. Nado zinzọnlin po alọkẹyi po to Jiwheyẹwhe mítọn nukọn, mí dona hẹn yise mítọn lodo gbọn yíyí jijọdagbe, oyọnẹn, owùnza, homẹfa, jijọ-di-Jiwheyẹwhe, owanyi mẹmẹsunnu tọn, po owanyi po dogọ yise mítọn.a To fie mí jẹ todin, e sọgan yin kinkanse dọ, nawẹ mí sọgan do jijọdagbe hia gbọn? Podọ nawẹ yinyin jijọdagbenọ mítọn sọgan hẹn alè wá na mí po mẹdevo lẹ po, titengbe hagbẹ́ Klistiani mítọn lẹ, he ko yigbe na opagbe Jiwheyẹwhe tọn lẹ gbọn yise didohia dali gbọn? (Pọ́n w-F 15/7/93, weda 13.)

[Nudọnamẹ odò tọn]

Etẹwẹ Yin Gblọndo Towe Lẹ?

◻ Nawẹ “yise” sọgan yin zẹẹmẹ basi na gbọn?

◻ Sọgbe hẹ 2 Pita 1:5-7, jẹhẹnu tẹlẹ wẹ dona yin yíyídogọ́ yise mítọn?

◻ Nugandomẹgo tẹwẹ wunmẹdidiọ Jesu tọn dona tindo do yise mítọn ji?

◻ Apajlẹ yise tọn tẹwẹ yin nina gbọn Abẹli, Ablaham, Sala, po omẹ fliflimẹ tọn devo lẹ po dali?

[Yẹdide to weda 21]

Be hiẹ yọn lehe wunmẹdidiọ Jesu tọn sọgan yinuwa do yise mẹde tọn ji do?