Din Fibẹtado to Jehovah Dè
“Jehovah E, hiẹ mẹ wẹ yẹn din fibẹtado te.”—PSALM 31:1, NW.
1. Nawẹ Psalm 31 do jide hia to nugopipe Jehovah tọn mẹ nado namẹ fibẹtado gbọn?
HANGBE vivi de jihàn dogbọn dawe de, mẹhe, dile e tlẹ yindọ agbọpe e to ahun po agbasa po mẹ, ganjẹ Jehovah go. Yise gbawhàn, wẹ hogbe ohàn wiwe enẹ tọn dọ. To awa Ganhunupotọ lọ tọn mẹ, dawe ehe mọ hihọ́ yí sọn homẹkẹndomẹtọ sinsinyẹn lẹ si. “Jehovah E, hiẹ mẹ wẹ yẹn din fibẹtado te,” wẹ yin nuhe psalm etọn dọ. “A dike winyan hù mi gbede blo: whlẹn mi dodo towe mẹ.”—Psalm 31:1.
2. (a) Mí sọgan dotudo Jehovah go taidi figangan mítọn sinai do dotin awe tẹlẹ ji? (b) Jiwheyẹwhe alọpa tẹwẹ Jehovah yin?
2 Psalmkantọ lọ tindo fibẹtado dopo—yedọ omẹ he yọ́n hugan lọ! Mì gbọ onu devo lẹ ni tin to ayihaawe mẹ, ṣogan na nugbo ehe ni gbọṣi aimẹ dọ: Jehovah wẹ yin figangan etọn, po osé gangan etọn po. Jide etọn sinai do dotin he diun awe ji. Tintan, yise etọn, he Jehovah ma na dowinyan, podọ awetọ, dodowiwa Jehovah tọn, he zẹẹmẹdo dọ E ma na gbẹ omẹ Etọn lẹ dai kakadoi gba. Jehovah ma yin Jiwheyẹwhe de he nọ dowinyan devizọnwatọ nugbonọ etọn lẹ gba; ewọ ma yin pagbe hẹngbatọ gba. Kakatimọ, yin Jiwheyẹwhe nugbo tọn podọ ahọsutọ mẹhe nọ dotudo e go vẹkuvẹku lẹ tọn. To vivọnu, yise na yin ahọsuna! Hinhọngan na wá!—Psalm 31:5,6.
3. Nawẹ psalmkantọ lọ pagigo na Jehovah gbọn?
3 Na awuwle na ohàn etọn po hanjinu hunkọ hunkọ po he nọ wá sọn hogbe awubla sisosiso tọn mẹ jẹ jide he yiaga mẹ wutu, psalmkantọ lọ mọ huhlọn homẹ tọn yí. E pagigona Jehovah na owanyi nugbo etọn. E jihàn dọmọ: “Donanọ wẹ Oklunọ, na e ko yí dagbewanyi etọn he jawu hia mi to otòdaho dokọnọ mẹ.”—Psalm 31:21.
Hànjiji Huhlọnnọ Lilatọ Ahọluduta lọ Lẹ Tọn
4, 5. (a) Hanjigbẹ́ huhlọnnọ tẹlẹ wẹ to gigopana Jehovah to egbehe, podọ nawẹ yé basi enẹ to owhe sinsẹnzọn tọn he wayi ehe mẹ gbọn? (Pọ́n todohukanji he tin to weda 12 jẹ 15.) (b) To aliho tẹ mẹ wẹ mẹhe wá Oflin tenu-nududu tọn tẹnmẹ lẹ dohia dọ mẹsusu wẹ tin he tindo ojlo nado kọnawudopọ hẹ hagbẹ́ lilatọ Ahọluduta lọ tọn lẹ? (Pọ́n todohukanji.) (c) Pipli tẹ to agun towe mẹ wẹ sọgan tin to ninọmẹ lọ mẹ nado kọnawudopọ hẹ hànjigbẹ́ lọ?
4 To egbehe, hogbe psalm enẹ tọn lẹ sọ yin nujọnu tọn hugan. Ohan pipa tọn hlan Jehovah ma sọgan yin miyọn-ṣina gbọn nukundiọsọmẹtọ aovi tọn, gbọn nugbajẹmẹji jọwamọ, kavi gbọn nuhahun akuẹzinzan tọn depope dali gba; na nugbo tọn, dagbewanyi Jehovah tọn ko lẹzun onu jiawu na omẹ etọn lẹ. Lẹdo aihọn pé to owhe sinsẹnzọn he wayi tọn mẹ, hanjigbẹ́ huhlọnnọ, he tindo lẹndopọ agayiyi 4 709 889 to aigba 231 ji, jihan owẹn Ahọluduta Jiwheyẹwhe tọn. Gandudu olọn mẹ Jehovah tọn gbọn Klisti Jesu dali yin fibẹtado de he ma na dowinyan yé. To owhe he wayi mẹ, lilatọ Ahọluduta lọ tọn ehelẹ sọn agun 73 070 lẹ mẹ zan lẹndopọ ganmẹ 1 057 341 972 lẹ tọn to azọ́n yẹwhehodidọ tọn mẹ. Ehe ko dekọtọn do gbẹtọ 296 004 he basi yẹhiadonu klandowiwe yetọn tọn hlan Jiwheyẹwhe gbọn baptẹm osìn tọn dali. Podọ nupaṣamẹ jiawu nankọ die he yin vivi etọn dù gbọn mẹhe yì Plidopọ Akọjọpli Mẹpinplọn Sọn Olọn Mẹ Wá tọn he yin bibasi to août he wayi ehe mẹ, to Kiev, Ukraine lẹpo dali. Yé mọ nujijọ ayidonugo tọn he sọawuhia, yedọ mimọ kandai he suhugan baptẹm yíyí Klistiani nugbo lẹ tọn he ma ko jọ pọ́n gbede tọn! Dile e yin didọdai to Isaia 54:2,3 mẹ do, omẹ Jiwheyẹwhe tọn lẹ to susu deji hugan gbede pọ́n tọn to sọha mẹ.
5 Nalete, mẹjidugando Ahọluduta Jiwheyẹwhe tọn dogọ he tindo ojlo lẹ to tenọpọn ojlẹ yétọn nado kọnawudopọ to ohàn lọ jiji mẹ. To owhe he wayi mẹ, lẹndopọ jiawu gbẹtọ 11 865 765 wẹ wá Oflin okú Jesu tọn tẹnmẹ. Po todido po, susu omẹ ehelẹ tọn na pegan nado jihan Ahọluduta lọ tọn sọn họndekọn jẹ họndekọn to owhe sinsẹnzọn ehe tọn whenu. Lehe nukundido enẹ dona hẹn kẹntọ nugbo lọ tọn, yedọ Satani Lẹgba, gọna homẹgble do sọ!—Osọhia 12:12,17.
6, 7. Basi zẹẹmẹ lehe dawe todoaitọ de dù to nuyiwadomẹji gbigbọ aovi tọn ji po alọgọ Jehovah tọn po do.
6 Satani na tẹnpọn nado suali na mẹdevo lẹ ma nado yí ogbè yetọn lẹ dogọ hanjiji huhlọnnọ enẹ. Di dohia, wẹnlatọ lẹ to Thaïlande mọ sọha susu gbẹtọ lẹ tọn he yin tuklado gbọn huhlọn aovi tọn lẹ dali. Nalete, susu omẹ ahun jijlọnọ lẹ, ko yin túntúndote po alọgọ Jehovah tọn po. To dlapọn basina bokọnọ de na tlintlindo dindin wutu godo, dawe de nọ huhlọn aovi tọn glọ na owhe ao. E dovivẹnu nado tún ede dote sọn huhlọn yetọn si po alọgọ sinsẹngan de tọn po, ṣigba e ma mọ pọngbọ nujọnu tọn de yí gba. Lizọnyizọnwatọ whenugigọ tọn de heyin Kunnudetọ Jehovah tọn bẹ plọnmẹ Biblu de jẹeji po dawe lọ po bo plọn ẹn kiki aliho lọ nado tindo mẹdekannujẹ sọn huhlọn aovi tọn si sọn Biblu mẹ—heyin nado tindo oyọnẹn he pegan nugbo lọ tọn, tindo yise to Jehovah Jiwheyẹwhe mẹ, bo vẹvẹ na ẹn to odẹ̀ mẹ.—1 Kọlintinu lẹ 2:5; Efesunu lẹ 4:6,7; 1 Timoti 2:3,4.
7 Ozan lọ mẹ to hodidọ ehe godo, dawe lọ kudlọ dọ otọ́ etọn he ko kú dobuna ẹn eyin e ma lẹkọ bo zindonukọn to yinyin gbigbọ kẹnnsinọ de mẹ. Whẹndo etọn jẹ yaji ji. Na ojlo matindo nado yin hinhẹn buali wutu, dawe lọ zindonukọn to nupinplọn Biblu etọn tọn mẹ bo jẹ opli lẹ yì ji. To nupinplọn enẹlẹ dopo whenu, gbehosọnalitọ lọ basi zẹẹmẹ dọ to whedelẹnu onu he nọ yin yiyizan to kọndopọmẹ hẹ gbigbọ aovi tọn lẹ sọgan hùnali na aovi lẹ nado dotukla mẹhe to tintẹnpọn nado tọ́n sọn huhlọn yetọn glọ lẹ. Dawe lọ flin dọ emi tindo ami delẹ he emi ko yizan taidi obó jijlẹ de dai. Dinvie e wa doayi e go dọ emi dona zé e dlan. Sọn whenue e ko yin zizedlan te, e ma sọ yin tuklado gbọn gbigbọ ylankan lẹ dali ba gba. (Yijlẹdo Efesunu lẹ 6:13; Jakobu 4:7,8 go.) Ewọ po asi etọn po to nukọnzindo ganji to nupinplọn yetọn mẹ bo nọ yì opli lẹ na oplọn Biblu tọn to gbesisọmẹ.
8, 9. Aliglọnnamẹnu devo tẹlẹ wẹ lilatọ Ahọluduta lọ tọn delẹ ko dùdeji?
8 Aliglọnnamẹnu devo lẹ sọgan ṣinyọnyẹ̀ ogbè wẹndagbe lọ tọn ji. Na ninọmẹ sinsinyẹn akuẹzinzan tọn to Ghana wutu, azọnwatọ lẹ ko yin yinyan sọn azọ́n mẹ. Onu vẹahi zẹjlẹgo, ehe hẹn ẹn vẹawu nado mọ dandannu he whè hugan ogbẹ̀ tọn. Nawẹ omẹ Jehovah tọn lẹ ko to akọndona gbọn? E ma yin gbọn tudido do yedelẹ go gba, ṣigba do Jehovah go. Di dohia, to gbedopo dawe de jó wepo heyin titlẹ de do to tafo jonọyitẹn alahọ tọn ji. To wepo lọ mẹ dọla 200 [he nọtena 100.000 cedi Ghana tọn], kavi sunzankuẹ osun atọ̀n azọ́nwatọ de tọn wẹ yin mimọ to e mẹ. Wepo lọ wá sọn nunina basitọ he ma yin yinyọnẹn de dè, ṣigba to nuhe yin yiyi do bla akuẹ lọ ji wẹ nukinkan ehe yin mimọ te: “Azọ́n gble do mi, ṣigba Jehovah ko din devo na mi. Yẹn dopẹ na ewọ po Visunnu etọn, Klisti Jesu po. Nado gọalọ to hinhẹn gbayipe wẹndagbe Ahọluduta lọ tọn mẹ whẹpo opodo lọ nido wá, enẹwutu wẹ yẹn do to nunina pẹvi ehe yidohlan.”—Yijlẹdo 2 Kọlintinu lẹ 9:11 go.
9 Opli wiwá nọ gọalọ nado plọn mẹhe kọnawudopọ to hanjiji huhlọnnọ Jehovah pipa tọn mẹ lẹ. (Yijlẹdo Psalm 22:22 go.) Gbọnmọ dali, to huwaji Honduras tọn mẹ, agun pẹvi de tin to finẹ he nọ yin yiylọdọ El Jordán. Etẹwẹ yin onu vonọtaun dogbọn pipli pẹvi ehe dali? Enẹ wẹ yin opli yìyì po nugbonọ yinyin po yetọn tọn. To wẹnlatọ 19 lọ lẹ mẹ, 12 wẹ nọ dasa otọ̀ he gblo de nado sọgan yì opli lẹ to osẹ̀ dopodopo mẹ. Ehe ma yin nuhahun daho gba to alunlun mẹ, to whenue e yindọ yé sọgan dasa gbọn yíyí osé zan taidi afọzedotẹn lẹ dali. Ṣigba, to jikun whenu, ninọmẹ lọ lẹ nọ diọ. Otọ̀ he ma to sisa dai nọ lẹzun agbowhẹn otọ̀sisa huhlọnnọ de he nọ to onu he tin to e mẹ lẹpo sà sọyi po huhlọn po. Nado du to aliglọnnamẹnu ehe ji, mẹmẹsunu lẹ po mẹmẹyọnnu lẹ po dona lẹzun tọ̀lìntọ́ dagbe. Whẹpo yé do nọ dasa, yé nọ bẹ avọ̀ yetọn lẹ do tina (apotin ogannọ) de mẹ bo nọ ṣinyọnnudo e po saki lọbanọ de po. Mẹhe yin tọlìntọ́ huhlọnnọ hugan nọ yí tina lọ zan taidi nuhe nọ hẹnmẹ fòtọ bo nọ deanana pipli lọ nado dasa. To whenuena yé jẹ awa awetọ ji to jijọho mẹ, yé nọ sunsun agbasa yetọn lẹ, bo nọ doaṣọ, bo nọ yì plitẹnhọ Ahọluduta lọ tọn mẹ to ayajẹ podọ to wiwe ṣeke mẹ!—Psalm 40:9.
Gingántẹn de Fie Mí Sọgan Nọ
10. Naegbọn mí sọgan lẹhlan Jehovah to ojlẹ ayimajai tọn lẹ whenu?
10 Vlavo hiẹ tin to mẹgbeyinyan gbigbọ aovi huhlọnnọ tọn glọ wẹo kavi to numọtolanmẹ ayimajai tọn tindo sọn asisa devo mẹ, Jehovah sọgan yin figangan towe. Ylọ ẹ to odẹ̀ mẹ. Ewọ nọ dotoai ganji e tlẹ yin hlan avigbe he yìdo omẹ etọn lẹ tọn. Psalmkantọ lọ mọ enẹ nado yin nugbo bo wlan dọmọ: “Doto towe ai hlan mi; whlẹn mi niyaniya: na a ni sọ yin awinyan huhlọnnọ ṣie tọn, ohọ̀ figangan tọn nado whlẹn mí gán. Na hiẹ wẹ awinyan ṣie, ofigangan ṣie; enẹwutu na oyin towe tọn wutu, whlẹn mi jẹ odo, bo sọ yin alihiamẹtọ ṣie. Dè mi sọn odọ̀ he yé tá do nuglọ na mi mẹ: na hiẹ wẹ gingántẹn ṣie.”—Psalm 31:2-4.
11. Basi zẹẹmẹ nuhewutu gingántẹn Jehovah tọn ma do yin otẹ̀n whenu gli tọn de?
11 Jehovah ma nọ wleawu na fibẹtado whenu gli tọn kẹdẹ poun gba ṣigba nọ wleawu gingántẹn huhlọnnọ de fie mi sọgan nọ to hihọ́ mẹ. Anademẹ po hihọ etọn po ma ko hẹn omẹ etọn lẹ gboawupo gba. Huhlọn sọn olọn mẹ wá na hẹn ayiha wintinwintin po homẹgble Satani tọn lẹ po zun ovọ́. (Efesunu lẹ 6:10,11) Dile mí dotudo Jehovah go po ahun lẹpo po do, ewọ na dọ̀n mí sọn omọ̀ Satani tọn lẹ mẹ. (2 Pita 2:9) To owhe ẹnẹ he wayi lẹ whenu, otò 27 wẹ ko kẹalọyi azọ́n yẹwhehodidọ Kunnudetọ Jehovah tọn lẹ tọn to osẹ́n liho. Humọ, to awa aihọn lọ tọn lẹ ji fie ninọmẹ nuyiwa gbẹtọ lẹ tọn, akuẹzinzan tọn, po tonudidọ tọn lẹ po hẹnalọdotena yẹwhehodidọ wẹndagbe lọ tọn te, omẹ taidi lẹngbọ lẹ ko sẹtẹn jẹ fiẹ yé sọgan yin dlapọn basi te po awubibọ po. Japon yin dopo to otò mọnkọtọn lẹ mẹ.
12. Nawẹ gbehosọnalitọ de to Japon yí Jehovah do basi figangan etọn gbọn?
12 To Japon azọnwatọ jonọ lẹ sọn otò devo lẹ mẹ, podọ agun he nọ dó jonọgbè lẹ ko yin didoai. Numimọ mẹmẹsunnu de tọn to agun Japon tọn de mẹ do lehe aigba jonọgbè ehe yin sinsẹ́nnọ do sọ hia. E jlo nado yì basi sinsẹnzọn to fie nuhudo susu tin te. Nalete, ewọ ko to anadena plọnmẹ Biblu ao to fihe e tin te. Dopo to họntọn etọn lẹ mẹ dọ po nukiko po dọmọ: “Eyin hiẹ yì fihe nuhudo susu tin te, hiẹ na deanana plọnmẹ Biblu 20 to finẹ!” E mọ azọndenamẹ yí bo yì Hiroshima. Ṣigba, to osun ẹnẹ godo, ewọ tindo plọnmẹ Biblu tọn dopo kẹdẹ. To gbedopo e basi dlapọn na dawe de sọn Brésil he nọ dó ogbè Portugal tọn kẹdẹ. To whenuena e yindọ mẹmẹsunnu lọ ma sọgan dọho hẹ dawe lọ, e họ̀ owe de he tin to ogbè Portugal tọn mẹ. To pinplọn hodidọ bọawu hodọdopọ tọn delẹ godo, e sọ vọ basi dlapọn na dawe lọ. To whenuena mẹmẹsunnu lọ dọnudo e to ogbè Portugal tọn mẹ, e paṣa dawe lọ susu podọ, po nukiko po, hùn ohọ̀n bo basi oylọ na ẹn biọ họmẹ. Plọnmẹ Biblu de yin bibẹjẹeji. To ojlẹ vude godo mẹmẹsunnu lọ jẹ anadena lẹndopọ oplọn 22 tọn lẹ ji, 14 to ogbè Portugal tọn mẹ, 6 to ogbè Espagnol tọn mẹ, podọ 2 to ogbè Japon tọn mẹ!
Yẹwhehodidọ Po Jide Po
13. Etẹwutu wẹ mẹdepope ma dona tẹnpọn nado hẹn mí kuwinyan to sinsẹnzọn Jehovah tọn mẹ?
13 Omẹ Jehovah tọn lẹ yí jide do to ohàn Ahọluduta lọ tọn jì po yise gigọ po dọ Jehovah wẹ yin fibẹtado yetọn. (Psalm 31:14) Yé ma na duwinyan gba—Jehovah ma na dowinyan yé gba, na e na hẹn ohó etọn di. (Psalm 31:17) Lẹgba po aovi etọn lẹ po na duwinyan. To whenuena e yindọ omẹ Jehovah tọn lẹ yin azọ́ndena nado dọyẹwheho owẹ̀n de tọn he tin to mẹdekannu sọn winyan mẹ, winyan ma hù yé gbọn mẹdevo lẹ pinplọn yẹwhehodidọ gba. Enẹ ma yin aliho lọ he mẹ Jehovah, kavi Visunnu etọn, nọ whan gbẹtọ lẹ nado sẹ̀n Ẹn te gba. To whenuena ahun gbẹtọ lẹ tọn yin gigọ na yise po pinpẹn nutọn yinyọnẹn po na homẹ dagbe po dagbewanyi Jehovah tọn po, ninọmẹ dagbe ahun yetọn lẹ tọn wẹ nọ whàn onù yetọn lẹ nado dọho. (Luku 6:45) Gbọnmọ dali, ganmẹ depope he mí yizan to osun dopodopo mẹ to sinsẹnzọn lọ mẹ, titengbe eyin ojlẹ enẹ nọtena dehe yọ́n hugan he mí sọgan basi, yin onu dagbe, e ma yin winyan tọn gba. Be nunina he whè hugan asuṣiọsi lọ tọn ma yin yinyọn pinpẹn etọn to gigọmẹ gbọn Jesu po Otọ́ etọn po dali ya?—Luku 21:1-4.
14. Zẹẹmẹ tẹlẹ wẹ hiẹ sọgan basi gando azọ́n gbehosọnalitọ tọn go? (Pọ́n todohukanji lọ ga.)
14 Na sọha he to agayì wẹnlatọ lẹ tọn, he to yede zejo mlẹnmlẹn to sinsẹnzọn lọ mẹ bẹ devizọnwiwa taidi gbehosọnalitọ hẹn—yedọ agayiyi 890 231 to owhe he wayi mẹ! Eyin nukọnyiyi owhe he wayi tọn yin hinhẹn e go, sọ ehe na dibla zẹ 1 000 000 go. Numimọ he bọdego ehe do lehe mẹmẹyọnnu de to Nigeria biọ ogbẹ́ gbehosọnalitọ lẹ tọn mẹ hia. E wlan dọmọ: “To whenuena yẹn dibla dotana wehọmẹ daho (collège) tọn, yẹn yì nado gọalọ to nudida mẹ na mẹhe wá wehọmẹ gbehosọnalitọ lẹ tọn heyin Kunnudetọ Jehovah tọn lẹ tọn. Yẹn mọ mẹmẹyọnnu awe he yin mẹho hugan onọ̀ daho ṣie. To whenuena yẹn dindona dọ gbehosọnalitọ wẹ yé yin bo wá na wehọmẹ, yẹn lẹn to dee mẹ dọ, ‘Eyin yé omẹ awe enẹlẹ sọgan basi gbehosọnalitọ, etẹwutu wẹ yẹn ma do sọgan basi i?’ Enẹwutu to whenue yẹn dotana wehọmẹ, yẹn lọsu lẹzun gbehosọnalitọ whepoponu tọn de.”
15. To aliho tẹ mẹ wẹ kunnudide mayin aṣa tọn sọgan hùn dotẹnmẹ na mẹdevo lẹ nado din fibẹtado to Jiwheyẹwhe dè gbọn?
15 E ma yin mẹlẹpo wẹ sọgan basi gbehosọnalitọ gba, ṣigba mẹlẹpo sọgan dekunnu. To Belgique mẹmẹyọnnu owhe 82 mẹvi de yì họ̀ olàn. E doayi e go dọ asi olànsatọ lọ tọn to nulẹnpọn do hunyanhunyan tonudidọ tọn agọe tọn ji. Enẹwutu mẹmẹyọnnu lọ kì alọnuwe pẹvi lọ Etẹwẹ Kunnudetọ Jehovah Tọn Lẹ Yise? do akuẹ ṣẹnṣẹn bo yi do suahọ. To whenuena mẹmẹyọnnu lọ lẹgọyì nusatẹn lọ, asi olànsatọ lọ tọn, matin awuwhiwhle depope, kanse nuhe Biblu dọ dogbọn yọnbasi wẹkẹ whàn atọ̀ntọ tọn dali. Mẹmẹyọnnu lọ hẹn owe lọ La paix et la sécurité véritables: comment est-ce possible? sọyi na ẹn. Azan vude lẹ godo, dile mẹmẹyọnnu mẹho lọ biọ ṣọfu lọ mẹ, asi olànsatọ lọ tọn ko wleawu kanbiọ susu tọn nado kanse e. Onu yọnnu ehe tọn walẹblanu na mẹmẹyọnnu lọ; e ze plọnmẹ Biblu de do nukọn na ẹn poun, podọ ehe yin alọkẹyi. Dinvie, asi olànsatọ lọ tọn jlo na yí baptẹm. Etẹwẹ dogbọn olànsatọ lọ lọsu dali? E hia alọnuwe pẹvi lọ podọ e to Biblu lọ plọn todin ga.
‘Adọkun Dagbewiwa tọn De’
16. Nawẹ Jehovah zé adọkunnu dagbewiwa tọn de dai na omẹ etọn lẹ gbọn?
16 To azán godo tọn sinsinyẹn ehelẹ mẹ, be Jehovah ma ko “yí dagbewanyi etọn he jiawu hia” mẹhe din fibẹtado to ewọ mẹ lẹ ya? Taidi otọ́ owanyinanọ, hihọ́ basinamẹtọ de, Jehovah ko dè adọkun dagbe de dovo na ovi aigba ji tọn etọn lẹ. Ewọ ko to ayajẹ kọ̀n do yé ji to gbẹtọ lẹpo nukọn, kẹdẹdile psalmkantọ lọ dọ do dọmọ: “Na dagbe towe ka klo do le, he hiẹ sọ whlá na yé he dibusi we lẹ; dagbe he hiẹ basi na yé he dotudo ogo we, to nukọn ovi gbẹtọ lẹ tọn.”—Psalm 31:19,21.
17-19. To Ghana, dagbe tẹwẹ dekọtọn sọn kandai ahọluwhé tọn bibasi na alọwle dawe yọnhonọ de tọn mẹ?
17 Enẹwutu, aihọnmẹnu lẹ lẹzun mẹhe yi nukun yetọn do mọ nugbonọ yinyin mẹhe to Jehovah sẹ̀n lẹ tọn, podọ avò vò yé. Di dohia, to Ghana dawe owhe 96 mẹvi de yì wekantẹn fie alọwle nọ yin kandai basina te bo biọ dọ alọwle gbọn osẹ́n liho etọn heyin owhe 70 tọn dinvie ni yin kandai basina. Kandai basitọ alọwle tọn lọ jọsi bo kanse dọmọ: “Be a tindo jide dọ nuhe a jlo na basi lọ niyẹn ya? Po owhe he a tindo to ota po?”
18 Dawe lọ basi zẹẹmẹ dọmọ: “Yẹn jlo na yin dopo to Kunnudetọ Jehovah tọn lẹ mẹ bo tindo mahẹ to azọ́n titengbe hugan lọ mẹ jẹnukọnna vivọnu aihọn lọ tọn—yedọ azọ́n yẹwhehodidọ wẹndagbe Ahọluduta Jiwheyẹwhe tọn. Azọ́n ehe nọ planmẹ sọyi ogbẹ̀ mavọmavọ mẹ. Kunnudetọ Jehovah tọn lẹ nọ setonuna osẹ́n ahọlu tọn, gọna osẹ́n kandai bibasina alọwle tọn. Enẹwutu jaale bo basi kandai lọ na mi.” Kandai basitọ lọ pọ́n aga bọ hodidọ glo. E jẹ kandai lọ basi ji, podọ dawe mẹhomẹ lọ tọnyì po ayajẹ po dọ emi tindo alọwle heyin kandai basina gbọn osẹ́n dali.—Yijlẹdo Lomunu lẹ 12:2 go.
19 Enẹgodo, kandai basitọ alọwle tọn lọ lẹnnupọn sisosiso do nuhe e ko sè lẹ ji. “Kunnudetọ Jehovah tọn lẹ ... azọ́n titengbe hugan lọ ....vivọnu aihọn lọ tọn ... Ahọluduta Jiwheyẹwhe tọn ... ogbẹ̀ madopodo.” Na yinyin mẹhe e paṣa gando nuhe ehe lẹpo zẹẹmẹdo to gbẹ̀zan dawe he yin owhe 96 mẹvi tọn de mẹ, e basi dide nado din Kunnudetọ lẹ mọ nado gbadopọnna whẹho lọ yinukọn dogọ. E kẹalọyi plọnmẹ Biblu whegbe tọn de basi nukọnyiyi awuyiya tọn. To egbehe, kandai basitọ alọwle tọn ehe yin Kunnudetọ he ko basi baptẹm de. Gbọnmọ dali, to whenuena mí setonuna Jehovah e tlẹ yin to nuhe mẹdevo lẹ sọgan pọnhlan nado yin whẹho pẹvi lẹ mẹ, e sọgan dekọtọn do dagbe mayọndọ lẹ mẹ na mí podọ na mẹhe mọ walọyizan mítọn lẹ. —Yijlẹdo 1 Pita 2:12 go.
20. To Myanmar, nawẹ nugbonọ-yinyin mẹmẹyọnnu jọja de tọn dekọtọn do kunnudide dagbe de mẹ gbọn?
20 Mẹho lẹ he dike nugbo lọ ni diọ yé nado lẹzun gbẹtọ nugbonọ lẹ zé apajlẹ dagbe de dai na jọja lẹ to aihọn nugbomadọ tọn ehe mẹ. To Myanmar wẹ viyọnnu jọja mọnkọtọn nọ nọ. E tọ́n sọn whẹndo he tindo ovi ao bo yin hẹntọnọ po whiwhẹnọ po mẹ. Otọ́ etọn, he tin to gbọjẹ gaa mẹ, yin gbehosọnalitọ whepoponu tọn de. Gbedopo to wehọmẹ, mẹmẹyọnnu lọ mọ alọkẹ diamọdi (diamant) tọn de sọ, ehe e yawu zé e sọyi mẹplọntọ etọn dè. To whenuena afọpé to klasi to aihọngbe, mẹplọntọ lọ dọ lehe alọkẹ lọ yin mimọsọ do bo yin zize wá na gigọ ẹ jó na núnọ. Enẹgodo mẹplọntọ lọ kanse mẹmẹyọnnu jọja lọ nado nọte to klasi lọ pete nukọn bo basi zẹẹmẹ nuhewutu e basi ehe, to yinyọnẹn mẹ dọ ovi devo sọgan ko basi dide nado hẹn e go. Mẹmẹyọnnu lọ basi zẹẹmẹ dọ Kunnudetọ Jehovah tọn de wẹ emi yin podọ dọ Jiwheyẹwhe etọn ma nọ yiwanna ajojijẹ kavi wunmẹ nugbomadọ tọn depope gba. Wehọmẹ lọ pete sè dogbọn dali etọn, he na dotẹnmẹ mẹmẹyọnnu mítọn nado dekunnu na mẹplọntọ lẹ po wehọmẹvi lẹ po.
21. Dile jọja lẹ nọ dotudo Jehovah go, nawẹ walọyizan yetọn nọ do ewọ hia gbọn?
21 To Belgique mẹplọntọ de basi ayidonugo jlofọndote tọn to klasi dogbọn Kunnudetọ Jehovah tọn lẹ dali. Ewọ ko payi walọyizan dopo to wehọmẹvi etọn lẹ mẹ tọn, heyin mẹmẹyọnnu jọja de go ga, e dọmọ: “Dinvie yẹn tindo linlẹn he gbọnvo gando Kunnudetọ Jehovah tọn lẹ go. Akọṣinṣan ko hẹn mi nado lẹndọ yé ma na yin mẹhe nọ doakọnnanu gbede. Yé sọawuhia nado yin mẹhe nọ doakọnnanu hugan, to whenuena yé ma nọ jogbe nunọwhinnusẹ́n yetọn tọn.” To whemẹ whemẹ nunina de nọ yin nina wehọmẹvi he wazọ́n ganji lẹ gbọn mẹplọntọ lẹ dali. Gọna onu devo lẹ wẹ nunina na yanwle akọ tọn tin te. Na owhe atọ̀n debọdo-dego lẹ, nunina na weyinyọnẹn he yiaga atọ̀n lẹ yin nina ovi Kunnudetọ Jehovah tọn lẹ. Mọwẹ e nọ saba sọawuhia do na enẹnọ he tudido nugbonọ-yinyin yetọn tin to Jehovah mẹ lẹ.—Psalm 31:23.
22. Etẹwẹ yin tadona awhangbigba tọn na Psalm 31, podọ nawẹ enẹ nọ gọalọna mí to azán vivọnu titonu ehe tọn mẹ gbọn?
22 Psalm 31 dọnu po tadona awhàngbigba tọn po dọmọ: “Mì yin huhlọnnọ bo gbọ ayiha mìtọn ni deji, mì he dotodido to Oklunọ mẹ lẹpo.” (Psalm 31:24) Enẹwutu, dile mí pannukọn azán tadona titonu Satani tọn lẹ do, dẹn do jijo mí dai, Jehovah na dọnsẹpọ mí pẹkipẹki bo na na mí huhlọn etọn. Nugbonọ wẹ Jehovah podọ ma nọ gboawupo. Ewọ wẹ fibẹtado mítọn; ewọ wẹ atọhọ mítọn.—Howhinwhẹn lẹ 18:10.
Be Hiẹ Flin Ya?
◻ Naegbọn mí sọgan yí Jehovah do basi fibẹtado mítọn po jide po?
◻ Whẹwhinwhẹn tẹwẹ tin to finẹ dọ hagbẹ hanjitọ huhlọnnọ lẹ to ohàn pipa Ahọluduta lọ tọn jì po tugbigbo po?
◻ Naegbọn mí sọgan tindo jide dọ odọ̀ Satani tọn ma na wlé omẹ Jehovah tọn lẹ do omọ̀ mẹ?
◻ Adọkun tẹwẹ Jehovah ko zedo sẹdotẹnmẹ na mẹhe din fibẹtado to ewọ dè lẹ?
[Apotin to weda 12-15]
LINLIN OWHE SINSẸNZỌN 1993 TỌN HEYIN KUNNUDETỌ JEHOVAH TỌN LẸ TỌN LẸDO AIHỌN PÉ
(Pọ́n zinjẹgbonu mẹ)
[Yẹdide to weda 16, 17]
Mẹhe nọ din fibẹtado to Jehovah mẹ lẹ yin hagbẹ́ lilatọ Ahọluduta lọ tọn—4 709 889 huhlọnnọ lẹ!
1. Sénégal
2. Brésil
3. Chile
4. Bolivie