Atọ̀họ̀-Nuhihọ́ lọ Tọn po Réveillez-vous! po—Linlinwe Nugbo lọ Tọn He Nọ Wá Do Ganmẹ Lẹ
“Hiẹ wẹ fli mi dai, Oklunọ È, Jiwheyẹwhe nugbo tọn.”—PSALM 31:5.
1, 2. (a) Etẹwẹ yin numọtolanmẹ mẹmẹyọnnu de tọn dogbọn nuhe e hia to Atọ̀họ̀-Nuhihọ́ Lọ Tọn mẹ dali? (b) Kanbiọ tẹlẹ wẹ yin kinkanse dogbọn linlinwe mítọn lẹ dali?
“MÌ WANU susu,” wẹ yin nuhe mẹmẹyọnnu Klistiani de wlan, “na nudọnamẹ jiawu he tin to hosọ Atọ̀họ̀-Nuhihọ́ Lọ Tọn (Flansegbe) mẹ heyin ‘Vous pouvez trouver la consolation au temps de la détresse.’ (Hiẹ Sọgan Mọ Kọfanamẹ yí to Ojlẹ Ayimajai tọn Mẹ.)a Onu agokun susu he mì detọ́n wẹ yin numọtolanmẹ he yẹn ko tindo nuhahun nado yinuwa hẹ pẹpẹ; e taidi dọ hosọ ehe yin kinkan tlọlọ hlan mi nkọtọn. To whenuena yẹn hia ẹ to tintan whenu, dasin wá nukun ṣie mẹ. Onu jiawu de wẹ e yin nado doayi e go dọ mẹde yọ́n nuhe yin numọtolanmẹ ṣie! Homẹ ṣie hùn nado yin dopo to Kunnudetọ Jehovah tọn lẹ mẹ. Fidevo tẹwẹ mí sọgan mọ opagbe ogbẹ̀ madopodo tọn to Paladisi mẹ to sọgodo madẹnmẹ tọn mẹ te podọ, todin, mọ kọfanamẹ yí na alindọn mítọn lẹ! Mì wanu. Yẹn dọnudo mì tlala.”
2 Be hiẹ ko tindo numọtolanmẹ to aliho enẹ mẹ pọ́n ya? Be e ko sọawuhia gbede dọ nude to Atọ̀họ̀-Nuhihọ́ Lọ Tọn kavi linlinwe awetọ etọn, Réveillez-vous! mẹ, yin kinkan titengbe na we ya? Etẹwẹ yin onu lọ dogbọn linlinnamẹwe mítọn lẹ dali he gbẹtọ lẹ nọ tindo ojlo na? Nawẹ mí sọgan gọalọna mẹdevo lẹ nado mọaleyi sọn owẹ̀n ogbẹ̀ whlẹngantọ tọn he yé bẹhẹn mẹ gbọn?—1 Timoti 4:16.
Linlinnamẹwe he Nọ Nọgodona Nugbo Lọ
3. Na whẹwhinwhẹn dagbe tẹ wutu wẹ Atọ̀họ̀-Nuhihọ́ Lọ Tọn po Réveillez-vous! po do yinuwa do ahun wehiatọ susu tọn ji?
3 Jehovah wẹ yin “Jiwheyẹwhe nugbo tọn.” (Psalm 31:5) Ohó etọn, heyin Biblu lọ, yin owe nugbo tọn de. (Johanu 17:17) Omẹ ahun doponọ lẹ nọ kẹalọyi nugbo lọ. (Yijlẹdo Johanu 4:23,24 go.) Whẹwhinwhẹn dopo na nuhewutu Atọ̀họ̀-Nuhihọ́ Lọ Tọn po Réveillez-vous! po do tindo nuyiwadomẹji he siso do ahun wehiatọ susu lẹ tọn ji wẹ yindọ yé yin linlinwe tenọgli go hinhẹn po nugbo tọn po wutu. Na nugbo tọn, whẹho nugbonọ-yinyin hlan nugbo Biblu tọn lẹ wutu wẹ Atọ̀họ̀-Nuhihọ́ Lọ Tọn do jẹ yinyin zinzinjẹgbonu ji.
4, 5. (a) Ninọmẹ tẹlẹ wẹ hẹn C.T.Russell nado jẹ zinjẹgbonu Atọ̀họ̀-Nuhihọ́ Lọ Tọn basi ji? (b) Nawẹ linlinwe Atọ̀họ̀-Nuhihọ́ Lọ Tọn nọ yin yiyizan gbọn “afanumẹ nugbonọ nuyọnẹntọ lọ dali gbọn”?
4 To 1876, Charles T.Russell lẹzun mẹkọndopọtọ hẹ Nelson H.Barbour, heyin Rochester, New York tọn. Russell zé akuẹ dai nado fọ́n zinjẹgbonu bibasi sunmẹ sunmẹ owe sinsẹ̀n tọn heyin Herald of the Morning, Barbour tọn, po Barbour po taidi wekantọ tintan podọ Russell taidi alọgọtọ wekantọ tọn. Nalete, to owhe dopo daa godo, to zinjẹgbonu août 1878 tọn heyin Herald mẹ, Barbour wlan hosọ de he gbẹ́ nuhọakuẹ-yinyin ofligọ okú Klisti tọn dai. Russell, he dibla yí owhe 30 do whèhu Barbour, dọho to hosọ de mẹ to zinjẹgbonu he bọdego tlolo mẹ he kẹalọyi ofligọ lọ, he e dlẹnalọ hlan taidi “nuplọnmẹ titengbe hugan dopo to Ohó Jiwheyẹwhe tọn mẹ.” (Matiu 20:28) To vivẹnudido pludopludo nado lẹnnupọn to Owe wiwe lẹ mẹ hẹ Barbour godo, Russell to godomẹ basi dide nado hẹn haṣinṣan yetọn lẹpo wá opodo po Herald lọ po. Jẹeji po zinjẹgbonu juin 1879 tọn heyin linlinwé lọ tọn po, yinkọ Russell tọn ma sọ sọawuhia taidi alọgọtọ wekantọ tọn de ba gba. To osun dopo godo, Russell he yin owhe 27 mẹvi jẹ zinzin Zion’s Watch Tower and Herald of Christ’s Presence jẹgbonu ji (he yin yinyọnẹn todin taidi Atọ̀họ̀-Nuhihọ́ Lọ Tọn To Ahọluduta Jehovah Tọn Lá), ehe sọn bẹjẹeji ko zé nugbo Owe wiwe lẹ tọn daga, taidi enẹ heyin ofligọ lọ.
5 Na owhe 114 he wayi lẹ, Atọ̀họ̀-Nuhihọ́ Lọ Tọn, taidi whẹyidọtọ azọ́nyọnẹntọ de, ko do ede hia taidi hihọ́ basitọ na nugbo Biblu tọn po sinsẹ̀n-nuplọnmẹ po. To nuyiwa lọ mẹ, e ko mọ jidedomẹgo wehiatọ pinpẹn nutọn yọnẹntọ livi lẹ tọn yí. E gbẹsọ to godonọna ofligọ lọ po huhlọn po. (Pọ́n, di dohia, zinjẹgbonu 1er avril 1992.) Podọ e zindonukọn nado to yinyin azọ́nwanu titengbe heyin “afanumẹ nugbonọ, nuyọnẹntọ” lọ tọn po Hagbẹ Anademẹtọ etọn po na lilá basina Ahọluduta heyin zizedai Jehovah tọn po nududu gbigbọmẹ tọn ninamẹ “to osaa sisọ mẹ” po.”—Matiu 24:14,45.
6, 7. Etẹwẹ yin yanwle titengbe Age d’or tọn, podọ etẹwẹ dohia dọ gbẹtọ he nọ lẹnnupọn lẹ kẹalọyi owẹ̀n etọn?
6 Etẹwẹ dogbọn linlinnamẹwe Réveillez-vous! tọn dali? Sọn bẹjẹeji etọn, Réveillez-vous! ko lá nugbo Biblu tọn ga. To dowhenu e nọ yin yiylọdọ Age d’or, linlinnamẹwe ehe yin awuwlena na mimá na gbẹtọ lẹ. Gando lẹndai etọn go, zinjẹgbonu tintan, heyin 1er octobre 1919 tọn, dọmọ: “Lẹndai etọn wẹ yin nado basi zẹẹmẹ to hinhọn nuyọnẹn Sọn Olọn mẹ wá mẹ heyin zẹẹmẹ nugbo nujijọ jiawu daho azan dinvie tọn podọ nado dohia ayiha he nọ lẹnnupọn lẹ gbọn whẹwhinwhẹn he họnwun bo dutomẹji dali dọ ojlẹ dona daho de tọn na gbẹtọvi lẹ tin to yakẹ todin.” Gbẹtọ he nọ lẹnnupọn lẹ kẹalọyi owẹ̀n Age d’or tọn. Na sọha owhe delẹ tọn, mimá etọn tlẹ sọ hugan enẹ heyin Atọ̀họ̀-Nuhihọ́ Lọ Tọn.b
7 Nalete, mẹdọndogo Atọ̀họ̀-Nuhihọ́ Lọ Tọn po Réveillez-vous! tọn po, yinukọn zẹ nugbo lọ go dọ yé nọ lá nugbo sinsẹ̀n-nuplọnmẹ tọn bo nọ basi zẹẹmẹ nujọnu dọdai tọn gando ninọmẹ aihọn lọ tọn lẹ go. Titengbe to owhe ao kavi oko he wayi lẹ mẹ, linlinnamẹwe mítọn lẹ ko dọ̀n ahun gbẹtọ lẹ tọn na whẹwhinwhẹn devo ga.
Hosọ lẹ he Wá Do Ganmẹ he Nọ Yinuwa Do Gbẹzan Gbẹtọ lẹ Tọn Ji
8. Vọjlado wekinkan tọn tẹwẹ Juda basi, bo to tudohomẹna wehiatọ etọn lẹ nado nọte pehẹ nuyiwadomẹji tẹ to agun lọ mẹ?
8 Nudi owhe 30 to okú po fọnsọnku Jesu Klisti tọn po godo, Biblu kantọ lọ Juda pannukọn ninọmẹ avunnukundiọsọmẹ tọn de. Sunnu fẹnnuwatọ, kanlinjọmẹ lẹ ko lìnbiọ Klistiani lẹ ṣẹnṣẹn. Juda ko tindo linlẹn nado kanwe hlan Klistiani hatọ etọn lẹ dogbọn hosọ sinsẹ̀n-nuplọnmẹ de tọn dali—yedọ whlẹngan he Klistiani mẹyiamisisadode lẹ tindo. Kakatimọ, na yinyin anadena gbọn gbigbọ wiwe dali, e mọdọ eyin dandannu nado dotuhomẹna wehiatọ etọn lẹ nado nọte pehẹ nuyiwadomẹji mẹhẹnflu tọn lẹ to agun lọ mẹ. (Juda 3, 4, 19-23) Juda yinuwa sọgbe hẹ ninọmẹ lọ bo wleawuna ayinamẹ he wá do ganmẹ he sọgbe hẹ nuhudo mẹmẹsunnu Klistiani etọn tọn lẹ.
9. Etẹwẹ awuwlena hosọ he wá do ganmẹ lẹ na linlinwe mítọn lẹ bẹhẹn?
9 Mọdopolọ, awuwlena hosọ he wá do ganmẹ lẹ na linlinwe mítọn lẹ yin azọngban avunnukundiọsọmẹ tọn de. Ojlẹ lẹ nọ diọ, podọ mọwẹ gbẹtọ lẹ lọsu ga—nuhudo yetọn lẹ po ojlo yetọn lẹ po ma yin nuhe yé yin to owhe ao kavi oko die wayi gba. Nugopọntọ tomẹyitọ de doayi e go to madẹnmẹ dọmọ: “To whenuena yẹn lẹzun Kunnudetọ de wayi to whelọnu dọ́n to 1950 lẹ mẹ, mẹdọnsẹpọ mítọn nado plọn Biblu hẹ gbẹtọ lẹ yin to sinsẹ̀n-nuplọnmẹ liho taun—pinplọn yé nugbo lọ dogbọn Atọ̀n-to-dopomẹ, olọnzomẹ, alindọn, po mọmọ po sọyi. Ṣigba todin, e taidi dọ, nuhahun po awusinyẹnnamẹnu susu lẹ po tin to gbẹzan gbẹtọvi lẹ tọn mẹ sọmọ bọ mí dona plọn yé lehe yè nọ nọgbẹ do.” Etẹwutu wẹ ehe do yinmọ?
10. Etẹwutu wẹ e ma dona paṣa mí dọ whẹndo he gblezọn de ko tin to whẹho gbẹtọvi lẹ tọn mẹ sọn whenue ojlẹ opodo lọ tọn ko bẹjẹeji sọn 1914 gbọ́n?
10 Gando ‘azán godo tọn lẹ go,’ Biblu dọ dọdai dọmọ: “Mẹylankan lẹ, po mẹklọtọ lẹ po na to yinylan yì nukọn, yé na to mẹklọ, yè na sọ to yé klọ.” (2 Timoti 3:1,13) Enẹwutu, e ma dona paṣa mí dọ whẹndo he gblezọn de ko tin to whẹho gbẹtọvi lẹ tọn mẹ sọn whenue ojlẹ opodo lọ tọn ko bẹjẹeji sọn 1914 gbọ́n. Satani, he ojlẹ etọn he pò whègli hugan ojlẹ depope tọn, to homẹgble etọn kọ̀njẹgbonu do ogbẹ́ gbẹtọvi lẹ tọn ji hugan gbede pọ́n tọn. (Osọhia 12:9,12) Taidi kọdetọn de, nuhọakuẹ walọyizan po whẹndo tọn po gbọnvo pete na nuhe yé yin to owhe 30 kavi 40 die poun wayi. Gbẹtọ lẹ na paa tọn ma sọ yiwanna sinsẹ̀n taidi owhe ao ao he wayi lẹ tọn bà. Danuwiwa gbayipe sọmọ bọ gbẹtọ lẹ to afọdide hihọ́ bibasi tọn lẹ zé he ma yin yinyọnẹn to owhe 20 kavi 30 poun lẹ die wayi.—Matiu 24:12.
11. (a) Hosọ alọpa tẹlẹ wẹ tin to ayiha gbẹtọ lẹ tọn mẹ, podọ nawẹ afanumẹ nugbonọ nuyọnẹntọ lọ na gblọndo hlan nuhudo lọ gbọn? (b) Na apajlẹ Atọ̀họ̀-Nuhihọ́ Lọ Tọn kavi Réveillez-vous! de tọn he ko yinuwa do gbẹ̀zan towe ji.
11 Abajọ, to whelọnu lò, dọ whẹho numọtolanmẹ tọn, gbẹ̀ninọ tọn, po whẹndo tọn po tin to ayiha gbẹtọ susu lẹ tọn mẹ. Afanumẹ nugbonọ nuyọnẹntọ lọ ko yí tugbigbo do na gblọndo to Atọ̀họ̀-Nuhihọ́ Lọ Tọn po Réveillez-vous! po mẹ gbọn zinjẹgbonu basina hosọ he wá do ganmẹ lẹ he ko yinuwa hẹ nuhudo nujọnu gbẹtọ lẹ tọn dali podọ he ko gando gbẹ̀zan yetọn lẹ go taun dali. Gbadopọnna apajlẹ delẹ.
12. (a) Etẹwutu wẹ hosọ lẹ dogbọn whẹndo mẹjitọ godoponọ tọn lẹ dali do yin awuwlena to Atọ̀họ̀-Nuhihọ́ Lọ Tọn mẹ to 1980? (b) Nawẹ mẹmẹyọnnu dopo do pinpẹn nutọn yinyọnẹn etọn hia na hosọ lọ lẹ do whẹndo mẹjitọ godoponọ tọn ji gbọn?
12 Whẹho whẹndo tọn lẹ. To whenuena linlin lẹdo aihọn pé do jideji awuyiya tọn de hia to sọha whẹndo mẹjitọ godoponọ lẹ tọn mẹ, hosọ alọgọ tọn lẹ do hosọ lọ “Whẹndo Mẹjitọ Godoponọ Tọn lẹ — Akọndona Nuhahun lọ Lẹ” yin awuwlena to zinjẹgbonu Atọ̀họ̀-Nuhihọ́ Lọ Tọn (Flansegbe) 15 décembre 1980 mẹ. Hosọ lọ tindo lẹndai blebu awe tọn: (1) nado gọalọna mẹjitọ godoponọ lẹ nado doakọnna nuhahun vonọtaun he yé nọ pannukọn lẹ podọ (2) nado gọalọna mẹdevo lẹ nado yin didọna ganji na yé nido sọgan do ‘owanyi’ hia bo “penukundo, NW ” whẹndo mẹjitọ godoponọ lẹ go sọn ahun mẹ wá. (1 Pita 3:8; Jakobu 1:27) Wehiatọ susu kanwehlan nado do pinpẹn nutọn yinyọnẹn hia na hosọ lọ lẹ. “E hẹn dasìn wá nukun ṣie mẹ to whenue yẹn mọ wepa lọ,” wẹ mẹjitọ godoponọ de wlan, “podọ to whenuena yẹn hùn linlinnamẹwe lọ bo hia nudọnamẹ lọ, ayiha ṣie gọfla po opẹdido po hlan Jehovah na awuwlena nudọnamẹ mọnkọtọn to ojlẹ nuhudo tọn lọ mẹ.”
13. Hodọdopọ he siso do ayimajai ji tẹwẹ yin zinzinjẹgbonu to Réveillez-vous! mẹ to 1981, podọ etẹwẹ wehiatọ dopo tindo nado dọ dogbọn dali etọn?
13 Whẹho numọtolanmẹ tọn lẹ. Hogo ayimajai tọn ko to yinyin zẹẹmẹ basi do e ji to Atọ̀họ̀-Nuhihọ́ Lọ Tọn po Réveillez-vous! po mẹ sọn owhe 1960 lẹ whenu gbọ́n. (1 Tẹsalonikanu lẹ 5:14) Ṣigba nukun yọyọ he sọgbe yiyi do pọ́n hosọ lọ yin hinhẹnwá to hogo debọdo-dego wepa tọn lọ ji heyin “Vos armes contre la dépression!” [Hiẹ Sọgan Hoavun Sọta Ayimajai!] to Réveillez-vous! (Flansegbe) 8 décembre 1981 mẹ. To ojlẹ vude godo wekanhlanmẹ pinpẹn nutọn yinyọnẹn tọn lẹ yin mimọyi gbọn Ogbẹ́ Watch Tower dali sọn agosu aihọn tọn lẹpo ji. “Nawẹ yẹn sọgan do numọtolanmẹ ahun ṣie tọn lẹ hia to wekanhlanmẹ mẹ gbọn?” wẹ yin nuhe mẹmẹyọnnu dopo wlan. “Owhe 24 mẹvi wẹ yẹn yin, podọ hugan owhe ao he wayì lẹ, yẹn ko tindo ojlẹ ayimajai tọn susu lẹ. Ṣigba todin yẹn tindo numọtolanmẹ dindọnsẹpọ Jehovah pẹkipẹki tọn bo dopẹ na ẹn dọ ewọ nọ hẹn pekọ wá na nuhudo omẹ ayimajainanọ lẹ tọn po hosọ owanyinọ ehelẹ po, podọ yẹn jlo na dọ mọ na mì.”
14, 15. (a) Nawẹ hogo zinzanhẹ ovivu lẹ gannugannu ko yin hodọdeji to linlinwe mítọn mẹ gbọn? (b) Hosọ linlinnamẹwe tẹ tọn lẹ wẹ whàn osọkuntọ de to Australie?
14 Whẹho gbẹ̀ninọ tọn lẹ. Biblu dọ dọdai dọ to ‘azán godo tọn lẹ mẹ’ gbẹtọ lẹ na lẹzun “owanyi na yede tọ́, ... matin owanyi ohẹnnumẹ tọn, ... awumajainanọ, kanylantọ, vivlẹtọ mẹdagbe lẹ tọn.” (2 Timoti 3:1-3) Enẹwutu, e ma dona paṣa mí dọ ovivu lẹ zinzanhẹ gannugannu nọ yin bibasi to oba he yiaga de mẹ to egbehe. Hogo ehe yin nukunpedego dile e jẹ do to hosọ lọ “Alọgọ na Mẹhe yin zinzanhẹ Gbọn Hẹnnumẹ He Sẹpọ Yé Lẹ Dali” to Atọ̀họ̀-Nuhihọ́ Lọ Tọn (Flansegbe) 1er janvier 1984 mẹ. To owhe ṣinatọ̀n godo, hosọ debọdo-dego lọ lẹ heyin “Abus sexuels sur les enfants: Comment en effacer les séquelles?” [Hinhẹn Pọngbọ Wá na Awugble Ovivu lẹ Zinzanhẹ Gannugannu Tọn] to Réveillez-vous! 8 octobre 1991 (Flansegbe) mẹ, yin awuwlena ganji nado ná nukunnumọjẹnumẹ po todido po mẹhe go e jọ do lẹ podọ nado hẹn mẹdevo lẹ tindo nukunnumọjẹnumẹ na yé nido sọgan basi alọgọ. Hosọ debọdo-dego ehelẹ ko hẹn wehiatọ susu nado dọho dogbọn whenuho linlinwe mítọn tọn lẹ dali. Wehiatọ dopo wlan dọmọ: “Nuyiwadomẹji daho hugan do pọngbọ mimọyi ṣie tọn ji wẹ yin linlẹn kọfanamẹ po alọdlẹndonu Owe wiwe lẹ tọn po he tin to hosọ ehelẹ mẹ. Nado yọnẹn dọ Jehovah ma nọ yí nukun pẹvi do pọ́n mi yin kọgbọ daho hugan de. Nado yọnẹn dọ yẹn ma tin dee ṣo yin kọfanamẹnu ga.”
15 Osọkùntọ de to Melbourne, Australie, tẹkan sọn fidindẹn hlan wekantẹn alahọ Ogbẹ́ Watch Tower tọn he tin to Sydney, bo basi zẹẹmẹ wangbẹna lẹdo aihundatẹn osọ-kunkun etọn tọn. E dọ dọ emi dukosọ hẹ hosọ lẹ to linlinnamẹwe Réveillez-vous! 8 mars mẹ do “Le viol—un cauchemar pour les femmes” [Zanhẹmẹ Gannugannu—Nupehẹ Vẹadi Yọnnu Lẹ Tọn] ji bọ e vẹawu na emi nado yise dọ linlinnamẹwe họakuẹ mọnkọtọn tin. E kan kanbiọ se na nukunwhiwhe 30 delẹ bo tindo homẹhun nado sè gblọndo he yin nina lẹ.
16. To aliho tẹlẹ mẹ wẹ hiẹ sọgan do pinpẹn nutọn yinyọnẹn towe hia na linlinwe mítọn lẹ te?
16 Etẹwẹ dogbọn hiẹ dali? Be ogbẹ̀ towe ko yin nuyiwadeji gbọn hosọ vonọtaun he nọ yin zinzinjẹgbonu to Atọ̀họ̀-Nuhihọ́ Lọ Tọn kavi Réveillez-vous! mẹ dali ya? Eyin mọwẹ, matin ayihaawe hiẹ na nọ do numọtolanmẹ opẹdido he siso tọn hia na linlinnamẹwe mítọn lẹ. Nawẹ hiẹ sọgan do pinpẹn nutọn yinyọnẹn towe hia gbọn? Na nugbo tọn gbọn hihia zinjẹgbonu dopodopo na dewe dali wẹ. Hiẹ sọgan sọ tindo mahẹ to linlinwe họakuẹ ehelẹ mimá to oba he gblo de mẹ dile e sọgan yọnbasi do. Nawẹ ehe sọgan yin bibasi gbọn?
Má Yé hẹ Mẹdevo Lẹ!
17. Etẹwẹ agun lẹ sọgan basi nado hẹn linlinnamẹwe mimá jideji?
17 Tintan, nude tin he agun dopodopo sọgan wà. Zinjẹgbonu octobre 1952 Informant tọn (heyin Lizọnyizọn Ahọluduta Tọn Mítọn todin) dọmọ: “Aliho kọdetọn dagbe hugan tọn nado má linlinnamẹwe lẹ wẹ yin sọn whedegbe jẹ whedegbe po nusatẹn de jẹ devo mẹ po. Na mọtọn wutu Ogbẹ́ na ayinamẹ dọ aliho linlinnamẹwe mimá ehelẹ tọn ni yin ada gbesisọ tọn de heyin nuyiwa Azán Linlinnamẹwe Tọn.” Ayinamẹ enẹ gbẹsọ yọn-na-yizan to egbehe. Agun lẹ sọgan basi todohukanji Azán Linlinnamẹwe mimá gbesisọ tọn, yedọ azan de heyin tito basina titengbe na kunnudide linlinnamẹwe mimá tọn. Na suhugan agun lẹ tọn, Sibigbe (samedi) lẹ didè matin ayihaawe na yin ojlẹ dagbe de. Mọwẹ, mì gbọ agun dopodopo ni dè azán vonọtaun lẹ kavi whejai lẹ dovo na kunnudide linlinnamẹwe mimá tọn—sọn whedegbe jẹ whedegbe, sọn nusatẹn de jẹ devo mẹ, to alihogbo ji, podọ to aliho linlinamẹwe mimá tọn lẹ ji. To yidogọ mẹ, etẹwẹ hiẹ, wẹnlatọ Ahọluduta lọ tọn, sọgan wà nado gọalọ nado hẹn linlinnamẹwe mimá jideji?
18, 19. (a) Nawẹ yinyin ahunmẹduna gbọn Atọ̀họ̀-Nuhihọ́ Lọ Tọn po Réveillez-vous! po dali sọgan gọalọna we nado do linlinnamẹwe gbonu gbọn? (b) Etẹwẹ yin alemọyi nuzedonukọnnamẹ he whegli, he zinnudo nuagokun lọ ji tlọlọ tọn to whenuena yè to linlinnamẹwe zedonukọnnamẹ? (c) Etẹwẹ do nuhọakuẹ zize linlinnamẹwe lẹ do owhé gbẹtọ lẹ tọn gbè hia?
18 Yinyin ahunmẹduna gbọn Atọ̀họ̀-Nuhihọ́ Lọ Tọn po Réveillez-vous! po dali yin afọdide tintan. Nọ yawu hia linlinnamẹwe lọ lẹ domẹwhenu. Dile hiẹ to hosọ dopodopo hia, kanse dewe, ‘Mẹnu wẹ hosọ ehe na jlo?’ Lẹnnupọn do ohó vude he hiẹ sọgan dọ nado fọ́n ojlo dote to hosọ lọ mẹ ji. Gbọnvona godoninọ na Azan Linlinnamẹwe mimá gbesisọ tọn, naegbọn hiẹ ma nado hẹn vọkan lẹ po hiẹ po to whenue a jei gbonu na hiẹ nido sọgan yí dotẹnmẹ hundote lẹpo zan nado má yé hẹ mẹdevo lẹ—to whenuena hiẹ to gbejizọnlin basi kavi to nuhọ̀ podọ to whenuena hiẹ to hodọ hẹ azọnwatọgbẹ́ lẹ, kọmẹnu lẹ, wehọmẹvigbẹ́ lẹ, kavi mẹplọntọ lẹ?
19 Nuzedonukọnnamẹ towe hinhẹn bọawu wẹ yin ayinamẹ awetọ. Atọ̀họ̀-Nuhihọ́ Lọ Tọn (Glẹnsigbe) 15 mai 1957 tọn, dọmọ: “Nuzedonukọnnamẹ he whègli, he zinnudo onu agokun lọ ji wẹ yin dehe yọ́n hugan to linlinnamẹwe zizedonukọnnamẹ whenu. Yanwle lọ wẹ yin nado do vọkan susu gbonu. Yé na ‘dọho’ na yede.” Wẹnlatọ delẹ ko mọdọ e nọ tindo kọdetọn nado dè linlẹn dopo sọn hosọ de mẹ, bo yi i do hodidọ kleun de mẹ, bo ze linlinnamẹwe lọ donukọnnamẹ. To whenuena linlinnamẹwe lọ lẹ yin hinhẹn biọ whegbe, e sọgan “dọho” na mẹdevo lẹ to yidogọ mẹ na mẹhe kẹalọyi yé sọn asi we. To Irelande jọja wehọmẹvi wehọmẹ daho (université) de tọn hia zinjẹgbonu Atọ̀họ̀-Nuhihọ́ Lọ Tọn 1er septembre 1991 (Flansegbe) tọn, he otọ́ etọn ko kẹalọyi sọn Kunnudetọ de si. Hosọ lọ lẹ do hodọdopọ po hogo devo lẹ po ji fọ́n ojlo etọn dote. Afọdopolọji he e hia linlinnamẹwe lọ, e tẹkan hlan Kunnudetọ lọ lẹ, bo ylọ sọha heyin tito do owe alokan tọn lọ ji. Plọnmẹ Biblu de yin bibẹjẹeji to ojlẹ vude godo, podọ yọnnu jọja lọ yin bibaptizi to Plidopọ Agbegbe “Mẹpinplọn Sọn Olọn Mẹ Wá” tẹnmẹ to juillet 1993 mẹ. Depope he e sọgan yin, mì gbọ na mí ni zé linlinnamẹwe lẹ jó na gbẹtọ lẹ to owhé lẹ gbè, to fie yé sọgan “dọho” na gbẹtọ lẹ te! Nugopọntọ tomẹyitọ de na ayinamẹ bọawu devo dọmọ: “Dè linlinnamẹwe lẹ tọ́n sọn saki towe mẹ.” Na nugbo tọn, eyin nuhe hiẹ dọ ma dọ̀n ojlo whetọ lọ tọn, vlavo wepa yẹdide whanpẹnọ yetọn na do linlinnamẹwe lẹ gbonu na we.
20, 21. (a) Nawẹ hiẹ sọgan yin alọdiọtọ to whenuena hiẹ to mahẹ tindo to azọ́n linlinnamẹwe mimá tọn mẹ gbọn? (b) Etẹwẹ hiẹ sọgan wà nado do linlinnamẹwe susu gbonu to osun dopodopo mẹ?
20 Ayinamẹ atọ̀ntọ wẹ yin nado yin alọdiọtọ. (Yijlẹdo 1 Kọlintinu lẹ 9: 19- 23 go.) Wleawuna nuzedonukọnnamẹ kleun vude lẹ. Hẹn hosọ dopo do ayiha mẹ he na dọ̀n sunnu lẹ, devo na yọnnu lẹ. Na jọja lẹ, hiẹ sọgan zé hosọ “Les Jeunes s’interrogent ...” de donukọnna ẹn. Yin alọdiọtọ ga, na nuhe dù whenue hiẹ na nọ tindo mahẹ to azọ́n linlinnamẹwe mimá tọn mẹ. To yidogọmẹ na Azán Linlinnamẹwe Mimá Tọn, hiẹ sọgan mọ dọ kunnudide whejai tọn hùn dotẹnmẹ dagbe hugan de dote nado zé linlinnamẹwe lẹ donukọnnamẹ sọn whedegbe jẹ whedegbe.
21 Ayinamẹ ẹnẹtọ wẹ yin nado ze yanwle de do nukọn. Owe-to-wemẹ he hosọ etọn yin “Linlinnamẹwe lẹ Nọ Dlẹnalọdo Aliho Ogbẹ̀ Tọn,” ehe sọawuhia to Lizọnyizọn Ahọluduta Tọn Mítọn mai 1984 (Glẹnsigbe) mẹ, dọmọ: “Taidi ayinamẹ de, wẹnlatọ lẹ sọgan tindo yanwle, mí ni dọdọ, linlinnamẹwe ao tọn to osun dopo mẹ, sọgbe hẹ yetọn lẹ; gbehosọnalitọ lẹ sọgan dovivẹnu na 90. Nugbo wẹ dọ, wẹnlatọ delẹ sọgan penugo nado do linlinnamẹwe he hugan mọ gbonu to osun dopo mẹ bo sọgan gbọnmọ dali zé yanwle mẹdetiti tọn he hugan mọ de donukọn. Nalete, na nuhahun agbasalilo tọn, wunmẹ aigba-denamẹ tọn, kavi whẹwhinwhẹn devo lẹ tọn wutu, yanwle mẹdelẹ tọn sọgan yìdo. Ṣogan sinsẹnzọn yetọn na Jehovah yin nuhọakuẹ. (Mat.13:23; Luku 21:3,4) Onu titengbe lọ wẹ yin nado tindo yanwle mẹdetiti tọn de.”
22. To aliho tẹ mẹ wẹ mí sọgan dohia dọ mí yin pẹdidonọ hlan Jehovah na linlinwe mítọn nugbo lọ tọn he nọ wá do ganmẹ?
22 Lehe mí yin pẹdidonọ dọ Jehovah, “Jiwheyẹwhe nugbo,” ko yí afanumẹ nugbonọ nuyọnẹntọ po Hagbẹ Anademẹtọ etọn po zan nado wleawuna linlinwe he wá do ganmẹ ehelẹ na mí do sọ! (Psalm 31:5) Dile e na dẹnsọ bọ Jehovah na jlo, linlinnamẹwe ehelẹ na zindonukọn nado to ayidonugo lẹ dọ̀n po nuhudo nujọnu gbẹtọ lẹ tọn po. Yé na zindonukọn nado to zize nujinọtedo walọyizan dagbe Jehovah tọn lẹ daga. Yé ma na doalọte nado zé sinsẹ̀n-nuplọnmẹ he jlọ daga gba. Podọ yé na sinyẹnlin to ayidonugo dindọn hlan hẹndi dọdai he dohiagona azán mítọn lẹ taidi ojlẹ lọ to whenuena Ahọluduta Jiwheyẹwhe tọn to gandu bọ ojlo Jiwheyẹwhe tọn to yinyin wiwà to aigba ji hugan gbede pọn gbọn sọha he to jideji tindo sinsẹ̀n basitọ nugbo Jehovah tọn lẹ dali. (Matiu 6:10; Osọhia 11:15) Adọkun mayọnhọ nankọ die he mí tindo to Atọ̀họ̀-Nuhihọ́ Lọ Tọn po Réveillez-vous! po mẹ! Mì gbọ mí ni yí dotẹnmẹ hundote lẹpo zan nado má linlinwe nujọnu tọn ehelẹ he nọ yinuwa do gbẹzan gbẹtọvi lẹ tọn ji bo nọ zé nugbo Ahọluduta lọ tọn lẹ daga hẹ homẹmimiọnnọ lẹ.
[Nudọnamẹ odò tọn lẹ]
a 15 juillet 1992, weda 19 jẹ 22.
b Na owhe susu lẹ Atọ̀họ̀-Nuhihọ́ Lọ Tọn yin pinpọn hlan taidi linlinnamẹwe na Klistiani mẹyiamisisadode lẹ. Nalete, bẹjẹeji sọn 1935, nuzindonuji he yiaga yin zizedo tulinina “gbẹtọ susugege” lẹ ji, mẹhe todido yetọn yin ogbẹ̀ madopodo to aigba ji, nado mọ bo hia Atọ̀họ̀-Nuhihọ́ Lọ Tọn. (Osọhia 7:9) Owhe vude lẹ godo, to 1940, Atọ̀họ̀-Nuhihọ́ Lọ Tọn nọ yin zize na gbẹtọ lẹ to gbesisọ mẹ to alihogbo lẹ ji. Enẹgodo, mimape etọn jideji po awuyiya po.
Etẹwẹ yin Gblọndo Towe?
◻ Etẹwẹ dohia dọ Atọ̀họ̀-Nuhihọ́ Lọ Tọn po Réveillez-vous! po yin linlinwe nugbo lọ tọn lẹ?
◻ Nawẹ Atọ̀họ̀-Nuhihọ́ Lọ Tọn po Réveillez-vous! po ko yinuwa do gbẹ̀zan gbẹtọ lẹ tọn ji gbọn?
◻ Etẹwẹ agun lẹ sọgan wà nado hẹn linlinnamẹwe mimá jideji?
◻ Ayinamẹ tẹlẹ wẹ sọgan gọalọna we nado do linlinnamẹwe susu dogọ lẹ gbonu?
[Apotin to weda 22]
Hosọ Delẹ he Ko Yinuwa Do Gbẹzan Gbẹtọ lẹ Tọn Ji
To owhe lẹ gblamẹ wehiatọ susu ko kanwe nado do pinpẹn nutọn yinyọnẹn hia na hosọ vonọtaun he nọ yin zinzinjẹgbonu to Atọ̀họ̀-Nuhihọ́ Lọ Tọn po Réveillez-vous! po mẹ. Dehe yin todohukanji basina to odò yin vude poun to hosọ susu he nọ yinuwa do wehiatọ mítọn lẹ ji mẹ. Be hosọ ehelẹ kavi devo lẹ ko diọ gbẹ̀zan towe ya?
Atọ̀họ̀-Nuhihọ́ Lọ Tọn
“Kẹalọyi Alọgọ Jiwheyẹwhe tọn nado Dù to Nuṣiwa Nuglọ tọn lẹ Ji” (15 avril 1985)
“Jijọ-di-Jiwheyẹwhe Didohia Hlan Mẹjitọ Yọnhonọ Lẹ” (1er juin 1987)
“Wehọmẹ Po Lẹndai de Po” (1er novembre 1992)
Réveillez-vous!
“Hiẹ Sọgan Hoavun Sọta Ayimajai!” (8 décembre 1981)
“To Whenue Mẹyiwanna Towe de Kú ...” (22 juillet 1985)
“Basi Hihọ Na Ovi Towe Lẹ!” (8 octobre 1993)
[Yẹdide to weda 23]
To Canada—yẹwhehodidọ sọn whedegbe jẹ whedegbe po linlinnamẹwe lẹ po
[Yẹdide to weda 24]
To Myanmar—Linlinnamẹwe zizedonukọnnamẹ he dlẹnalọ hlan aliho ogbẹ̀ tọn