Wẹnlatọ Ahọluduta lọ Tọn lẹ Na Linlin

“Jiwheyẹwhe ma yin Mẹnukuntahopọntọ Gba”

TO OWHE fọtọ́n fẹnẹkanweko lẹ die wayì, apọsteli Pita heyin gbigbọdo dọmọ: “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibu si i, bo wazọ́n dodo wẹ yè kẹalọyi to e de.” (Owalọ lẹ 10:34, 35) To Kunnudetọ Jehovah tọn lẹ ṣẹnṣẹn, wẹ yè sọgan mọ gbẹtọ lẹ sọn akọta po dodonu sinsẹ̀n tọn lẹpo mẹ te. Yé jlo dodowiwa, podọ yé nọ dibusi Jiwheyẹwhe. Jehovah dokuavọna yemẹpo wá ogbẹ́ aihọn yọyọ lọ tọn mẹ, di apajlẹ, dile e basi do na yọnnu de to Tchad.

Yọnnu ehe ma tindo pekọ to sinsẹ̀n etọn mẹ gba. Owhe delẹ jẹnukọn e ko kẹalọyi vọkan dopo owe lọ Jọja Whenu Towe—Mimọ Dagbe Hugan lọ yí Sọn E Mẹ, heyin zinzinjẹgbonu gbọn Kunnudetọ Jehovah tọn lẹ dali, podọ e yọ́n pinpẹn ayinamẹ dagbe he owe lọ bẹhẹn tọn. Plọnmẹ Biblu de bẹjẹeji, podọ e nọ tin to gbesisọmẹ na oplọn lọ to whepoponu. Etomọṣo, to whenuena e yin tulina nado wá opli lẹ to Plitẹnhọ Ahọlduuta Lọ Tọn mẹ, e ma kẹalọyi gba. Etẹwutu? Dile etlẹ yindọ asu etọn ma diọnukunsọ nupinplọn etọn, e gbẹ nado na ẹn dotẹnmẹ nado nọ yì opli lẹ to Plitẹnhọ Ahọluduta lọ Tọn mẹ.

To whenuena asi lọ jlo na yì plidopọ lẹdo tọn de, Kunnudetọ he to anadena oplọn lọ do tito-to-whinnu lọ hia asu lọ, bo zinnudo ayinamẹ dagbe he na yin zizedonukọnnamẹ lọ ji. E nagbe asi etọn nado yì “whladopo gee.” E yì plidopọ lọ bo duvivi tito-to-whinnu lọ pete tọn. To whenuena e basi zẹẹmẹ onu he e ko sè lẹ tọn na asu etọn godo, e ma sọ diọnukunsọ opli devo lẹ yìyì etọn gba. E yin whinwhan na nugbo lọ dọ gbẹtọ akọta voovo lẹ he nọ do mẹtọnhopọn sisosiso hia ode awetọ yetọn wẹ tin to agun lọ mẹ. Enẹgodo e yì plidopọ agbegbe tọn podọ e yin whinwhan nado mọ ovi etọn lẹ sinai to afọji na Kunnudetọ he wa sọn otò devo mẹ lẹ. Kunnudetọ lọ lẹ dunu hẹ ovi lọ lẹ bo yinuwa hẹ yé taidi ovi yetọn titi. Ehe yin ojlẹ diọdo tọn de na ewọ.

Ṣigba nukundiọsọmẹ bọdego. Dile etlẹ yindọ e yin winyankutọ to jọwamọ liho, e jẹ gblọndo na ji to pli lẹ bo nọ diọnukunsọ oho agọ̀ he nọ yin didọ gbọn hẹnnumẹ lẹ po kọmẹnu lẹ po dali. To whenuena e ko nọhẹ asu etọn na owhe susu lẹ, alọwle gbemima to yede ṣẹnṣẹn hẹnnumẹ tọn de poun wẹ yé basi. Nawẹ e sọgan zé ohó alọwle sọgbe hẹ osẹ́n tọn dai gbọn? To odẹ̀ vẹkuvẹku hiho hlan Jehovah godo, e dọho lọ na asu etọn, mẹhe dọ dọ emi na lẹnnupọn deji. To godomẹ e basi mọ, bọ asu po asi po lọ wlealọ sọgbe hẹ osẹ́n.

Nọviyọnnu asu lọ tọn dopo he tin to yede dọ̀n nuhahun susu wá, ṣigba asu lọ nọgodona asi etọn. Enẹgodo otọ́ asu lọ tọn basi dlapọn na yé. E degbe na visunnu etọn nado gbẹ́ asi etọn dai, na e diọ sinsẹ̀n etọn wutu. Otọ́ lọ dọ na visunnu etọn dọ emi na sú agbànnina-kuẹ na “asi he yọ́n humọ” de. Visunnu lọ gblọn bo dọmọ: “Lala, yẹn ma na wà mọ gba. Asi dagbe de wẹ ewọ yin. Eyin ewlọsu jlo nado yì, enẹ gbọnvo, ṣigba yẹn ma na dọ na ẹn dọ ni yì gba.” Asi lọ nọ na sisi otọ́ asu etọn tọn taun, podọ winyan hù i na nuyiwa etọn. Nalete, to whenuena e lẹkọyì gbeta etọn, e kanwe hlan visunnu etọn, to ojlẹ ehe mẹ e gblọn adan na ẹn. E dọ dọ eyin visunnu emitọn gbẹ nado yàn asi etọn, emi na gbẹ ẹ dai do ovi mẹ. Whladopo dogọ ovi lọ nọgodona asi etọn. Saa lẹnnupọn do ayajẹ asi lọ tọn ji to mimọ dọ asu emitọn basi dide nujikudo mọnkọtọn.

Todin visunnu pẹvi yetọn awe lẹ yiwanna nado hodo onọ̀ yetọn sọyì Plitẹnhọ Ahọluduta lọ tọn mẹ. Yé tlẹ biọ otọ́ yetọn okan he yè nọ sìn do okọ̀, to whenuena yé mọdọ mẹmẹsunnu he nọ na togunmẹho lẹpo wẹ nọ bla. To egbehe yọnnu ehe ko yin mẹmẹyọnnu he ko baptizi.

Ewọ yin dopo to Kunnudetọ ayajẹnọ 345 lẹ mẹ to Tchad he nọ lá wẹndagbe Ahọluduta Jehovah tọn bo sọ yọ́n pinpẹn etọn, na nugbo tọn, “Jiwheyẹwhe ma yin mẹnukuntahopọntọ gba.” (Pọ́n w-F 1/3/94, weda 31.)