Nuhewutu Sinsẹ̀n Nugbo Do Nọ Mọ Dona Jiwheyẹwhe Tọn Yí
“Halleluia; whlẹngán, po gigo po, yẹyi po huhlọn po, hlan Oklunọ Jiwheyẹwhe mítọn: na nugbo po dodo po wẹ whẹdida etọn lẹ.”—OSỌHIA 19:1, 2.
1. Nawẹ Babilọni Daho lọ na wá opodo etọn gbọn?
“BABILỌNI DAHO LỌ” ko jai to nukun Jiwheyẹwhe tọn mẹ bo pannukọn vasudo mlẹnmlẹn todin. Dọdai Biblu tọn dohia dọ ogalọtọ sinsẹ̀n tọn lẹdo aihọn pe ehe to madẹnmẹ na pehẹ vasudo to alọ galọtọgbẹ́ tonudidọ etọn tọn lẹ tọn mẹ; vivọnu etọn na yin ajiji plaun tọn. Osọhia Jesu tọn hlan Johanu bẹ hogbe dọdai tọn ehelẹ hẹn dọmọ: “Angẹli huhlọnnọ de sọ ze ozannu de daga taidi gilise daho, bo ze e dlan ohù mẹ, bo to didọmọ, Le wẹ yè na yí huhlọn do dọn Babilọni otò daho lọ dlan odò do, yè ma sọ to na mọn ẹn gbedegbede ba.”—Osọhia 18:2, 21.
2. Nawẹ devizọnwatọ Jehovah tọn lẹ na yinuwa hlan vasudo Babilọni tọn gbọn?
2 Vasudo Babilọni Daho lọ tọn na yin nuhe ji omẹ heyin nugonu aihọn Satani tọn delẹ na viavi do ṣigba na nugbo tọn e ma na yin gbọn devizọnwatọ Jiwheyẹwhe tọn lẹ, he tin to olọn mẹ kavi aigba ji lẹ dali gba. Awhadido ayajẹnọ yetọn hlan Jiwheyẹwhe na yin: “Halleluia; whlẹngán, po gigo po, yẹyi po huhlọn po, hlan oklunọ Jiwheyẹwhe mítọn: na nugbo po dodo po wẹ whẹdida etọn lẹ: na e ko dawhẹna ayọdetọ daho lọ, he yí ayọdide etọn do hẹn aigba gble, bosọ yiahọsu ohùn devi etọn lẹ tọn to alọ etọn mẹ.”—Osọhia 18:9, 10; 19:1, 2.
Sinsẹ́n Tẹwẹ Sinsẹ̀n Nugbo Dona Detọ́n?
3. Kanbiọ tẹlẹ wẹ biọ gblọndo?
3 To whenuena e yindọ aigba lọ na yin ziza we-ṣeke sọn sinsẹ̀n lalo tọn si, wunmẹ sinsẹ̀n-bibasi tọn tẹwẹ na gbọṣi aimẹ? Nawẹ mí sọgan yọ́n pipli sinsẹ̀n he tọn na lùn vasudo aihọn ahọluigba sinsẹ̀n lalo Satani tọn tọ́n gbọn? Etẹwẹ yin sinsẹ́n dodo he pipli ehe dona detọ́n? E whè gbau nujinọtedo ao wẹ tin nado yido yọ́n vogbingbọn sinsẹ̀n-bibasi nugbo Jehovah tọn.—Malaki 3:18; Matiu 13:43.
4. Etẹwẹ yin nubiọtomẹsi tintan lọ na sinsẹ̀n-bibasi nugbo, podọ nawẹ Jesu ze apajlẹ lọ dai to aliho ehe mẹ gbọn?
4 Tintan heyin titengbe hugan lọ wẹ yindọ, Klistiani nugbo lẹ dona nọgodona nupojipetọ-yinyin lọ he tọn wutu Jesu do kú—yèdọ nupojipetọ-yinyin Otọ́ etọn tọn. Jesu ma ze ogbẹ̀ etọn jó na whẹjijọ tonudidọ, akọta, akọ̀, kavi otò tọn depope gba. E ze Ahọluduta Otọ́ etọn tọn do aga hú tito zedai tonudidọ kavi gufinfọn Ju lẹ tọn. E na gblọndo nuzedonukọnnamẹ Satani tọn na huhlọn aihọn tọn po hogbe lọ lẹ po dọmọ: “Tọ́n sọn ofi, Satani: na yè wlanwe etọn dọ, Hiẹ na litaina Oklunọ Jiwheyẹwhe towe, ewọ dopokẹdẹ wẹ hiẹ na nọ sẹ̀n.” Ewọ yọnẹn sọn Owe wiwe Heblu tọn lẹ mẹ dọ Jehovah wẹ yin Nupojipetọ nugbo lọ do aigba lọ pete ji. Pipli sinsẹ̀n tẹ tọn matin ayihaawe wẹ nọ nọgodona gandudu Jehovah tọn kakati nado yin titonu tonudidọ aihọn ehe tọn?—Matiu 4:10; Psalm 83:18.
5. (a) Nukun tẹwẹ sinsẹ̀n-basitọ nugbo lẹ dona yí do pọ́n yinkọ Jiwheyẹwhe tọn? (b) Etẹwẹ dohia dọ Kunnudetọ Jehovah Tọn lẹ nọ gbògbéna yinkọ enẹ?
5 Nubiọtomẹsi awetọ lọ wẹ yindọ sinsẹ̀n-bibasi nugbo dona zedaga bo klan yinkọ Jiwheyẹwhe tọn do wiwe. Ganhunupotọ lọ do yinkọ etọn, Jehovah (Yahweh to zẹẹmẹ Biblu tọn delẹ mẹ) hia, omẹ etọn Islaeli, podọ e yin yiyizan whla fọtọ́n fọtọ́n lẹ to Owe wiwe Heblu tọn lẹ mẹ. Etlẹ yin jẹnukọnna enẹ, Adam, Evi, po mẹdevo lẹ po yọ́n yinkọ lọ, dile etlẹ yindọ yé ma nọ saba na sisi i do. (Gẹnẹsisi 4:1; 9:26; 22:14; Eksọdusi 6:2) To whenuena e yindọ Mẹylọhodotọklisti po lẹdogbedevomẹ basitọ Ju lẹ tọn po ko nọ saba dè yinkọ sọn olọn mẹ wá lọ sẹ sọn Biblu yetọn lẹ mẹ, Kunnudetọ Jehovah Tọn lẹ ko na yinkọ enẹ otẹn he e jẹ na bo ko na ẹn sisi to Traduction du monde nouveau mẹ. Yé gbògbéna yinkọ enẹ, dile Klistiani fliflimẹ tọn lẹ basi do. Jakobu dekunnuna dọmọ: “Simeọni ko dọ le Jiwheyẹwhe to whẹwhẹwhenu dla Kosi lẹ pọ́n do, nado dè gbẹtọ to yé mẹ na oyín etọn. Podọ ehe wẹ ohó yẹwhegan lẹ tọn sọgbe hẹ, . . . na pipotọ gbẹtọ lẹ tọn nido to Oklunọ din, po Kosi lẹpo po, mẹhe go yé to oyín ṣie ylọ do, wẹ Oklunọ dọ, mẹhe wà onú he yin yinyọnẹn helẹ pó.”—Owalọ lẹ 15:14-17; Amọsi 9:11, 12.
6. (a) Etẹwẹ yin nubiọtomẹsi atọ̀ntọ na sinsẹ̀n-bibasi nugbo? (b) Nawẹ Jesu po Daniẹli po zinnudo gandudu Ahọluduta lọ tọn ji gbọn? (Luku 17:20, 21)
6 Nubiọtomẹsi atọ̀ntọ na sinsẹ̀n-bibasi nugbo wẹ yindọ e dona ze Ahọluduta Jiwheyẹwhe Tọn daga taidi pọngbọ he sọgbe hẹ osẹ́n po dehe penugo dopo kẹdẹ lọ po na nuhahun gbẹtọ lẹ tọn gando gandudu go. Jesu plọn hodotọ etọn lẹ hezeheze nado nọ hodẹ̀ na Ahọluduta enẹ nado wá, na gandudu Jiwheyẹwhe tọn nido yitẹn nuyiwa tọn to aigba ji. Daniẹli yin gbigbọdo nado dọ dọdai gando azán godo tọn lẹ go dọmọ: “Jiwheyẹwhe olọn tọn na ze ahọludu de daga, he ma na yin viva gbede . . . ṣigba e na gbà ahọludu [tonudidọ, aihọn mẹ tọn lẹ] do flinflin bo sú ahọludu he lẹpo do, ewọ bo nasọ nọte kakadoi.” Mẹnu lẹ wẹ ko dohia gbọn nuyiwa yetọn lẹ dali to owhe kanweko 20tọ ehe whenu dọ yé nọgodo mlẹnmlẹn na Ahọluduta enẹ—be sinsẹ̀n Babilọni Daho lọ tọn lẹ wẹ kavi Kunnudetọ Jehovah Tọn lẹ tọn?—Daniẹli 2:44; Matiu 6:10; 24:14.
7. Nukun tẹwẹ sinsẹ̀n-basitọ nugbo lẹ nọ yí do pọ́n Biblu lọ?
7 Nubiọtomẹsi ẹnẹtọ na alọkẹyi Jiwheyẹwhe tọn wẹ yindọ devizọnwatọ nugbo Jiwheyẹwhe tọn lẹ dona tẹdo Biblu lọ go taidi Ohó gbọdo Jiwheyẹwhe tọn. Gbọnmọ dali yé ma na lẹzun mẹhe jai biọ mẹṣanko mẹ, ehe nọ tẹnpọn nado dè Biblu pò taidi owe kinkan paa gbẹtọ lẹ tọn po awugbopo he ehe na bẹhẹn po. Kunnudetọ Jehovah Tọn lẹ tindo yise dọ Biblu yin Ohó gbọdo Jiwheyẹwhe tọn, yèdọ dile Paulu wlan hlan Timoti do dọmọ: “Owe wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọn-mẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.”a Gbọnmọ dali, Kunnudetọ Jehovah Tọn lẹ kẹalọyi Biblu lọ taidi anademẹtọ yetọn, yèdọ nuplọnwe yetọn na gbẹninọ egbesọ tọn, po asisa todido yetọn tọn po na sọgodo.—2 Timoti 3:16, 17.
Sinsẹ̀n Owanyi Tọn, E Ma Yin Wangbẹna Tọn
8. Etẹwẹ yin onú titengbe atọ́ntọ na sinsẹ̀n-bibasi nugbo?
8 Nawẹ Jesu do vogbingbọn hia to hodotọ nugbo etọn lẹ ṣẹnṣẹn gbọn? Gblọndo etọn hẹn mí wá ohia mẹyinyọnẹn tangan atọ́ntọ sinsẹ̀n-bibasi nugbo tọn kọ̀n. Jesu dọmọ: “Osẹ́n yọyọ de wẹ yẹn na hlan mì, dọ mì ni yiwanna mìnọzo: dile yẹn yiwanna mì, na mìwlẹ ga ni yiwanna mìnọzo. Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:34, 35) Nawẹ Jesu do owanyi etọn hia gbọn? Gbọn nina ogbẹ̀ etọn taidi avọ́sinsan ofligọ tọn de dali wẹ. (Matiu 20:28; Johanu 3:16) Naegbọn owanyi nugbo do yin jẹhẹnu titengbe de na Klistiani nugbo lẹ? Johanu basi zẹẹmẹ dọmọ: “Mẹyiwanna emi, mì gbọ mí ni yiwanna mínọzo: na owanyi jọ̀ sọn Jiwheyẹwhe de . . . Ewọ he ma yiwanna omẹ, ma yọ́n Jiwheyẹwhe gba; na Jiwheyẹwhe wẹ owanyi.”—1 Johanu 4:7, 8.
9. Mẹnu lẹ wẹ ko do owanyi nugbo hia, podọ gbọnna?
9 Mẹnu lẹ to ojlẹ mítọn mẹ wẹ ko do wunmẹ owanyi tọn ehe hia, etlẹ yin to wangbẹna akọta, otò, kavi akọ̀ tọn nukọn? Mẹnu lẹ wẹ ko jugbọn whlepọn sinsinyẹn hugan mẹ, jẹ okú lọsu, na owanyi yetọn nido gbayipe wutu? Be mí sọgan dọ dọ yẹwhenọ lẹ po yẹwhenọ-yọnnu pamẹnọtọ Katholiki tọn lẹ po he tindo mahẹ po gbeyiyi po to azọngban akọ̀ vasudo he wá aimẹ to Rwanda lọ tọn mẹ to 1994 wẹ ya? Be sinsẹ̀n Orthodoxe Serbie tọn kavi Katholiki Croatie tọn lẹ he ko tindo mahẹ to “zizasẹ akọ̀ tọn mẹ” po nuyiwa he ma sọgbe hẹ Klistiani tọn devo lẹ po mẹ to tòwhan enẹ mẹ to Balkanie wẹ ya? Kavi be sinsẹ̀ngan Katholiki kavi Plọtẹstan tọn lẹ he ko na huhlọn akọ̀ ṣinṣinyan po wangbẹna po to Agewaji Irlande tọn to owhe ao ao vude he wayi lẹ gblamẹ wẹ ya? Na nugbo tọn Kunnudetọ Jehovah Tọn lẹ ma sọgan yin whẹsadokọna na mahẹ depope tintindo to hunyanhunyan mọnkọtọn lẹ mẹ gba. Yé ko jiya to ganpa lẹ po opá yasanamẹ tọn lẹ po mẹ, yèdọ jẹ okú lọsu, kakati nado gbẹ́ owanyi Klistiani yetọn tọn dai.—Johanu 15:17.
10. Naegbọn Klistiani nugbo lẹ do nọ gbọṣi kada?
10 Nubiọtomẹsi ṣidopotọ na sinsẹ̀n-bibasi he Jiwheyẹwhe kẹalọyi wẹ yin kadaninọ gando nuyiwa tonudidọ aihọn ehe tọn lẹ go. Naegbọn Klistiani lẹ dona gbọṣi kadaninọ mẹ to tonudidọ lẹ mẹ? Paulu, Jakobu, po Johanu po na mí whẹwhinwhẹn he lodo na teninọ enẹ. Apọsteli Paulu wlan dọ Satani wẹ yin “yẹwhe owhenu he tọn,” he to nukuntọ́n na mayisenọ lẹ gbọn aliho he yọnbasi lẹpo mẹ, gọna tonudidọ kinklan hẹnwatọ lẹ ga. Devi Jakobu dohia dọ “họntọnji hẹ aihọn, okẹ̀n wẹ e yin to Jiwheyẹwhe de,” podọ apọsteli Johanu dọ dọ “aihọn lẹpo sọ mlọnai to omẹ ylankan lọ mẹ.” Gbọnmọ dali, Klistiani nugbo de, ma sọgan jogbe mẹdezejo etọn tọn hlan Jiwheyẹwhe gbọn mahẹ tintindo to aihọn gblezọn Satani tọn heyin tonudidọ lẹ po huhlọn po mẹ gba.—2 Kọlintinu lẹ 4:4; Jakobu 4:4; 1 Johanu 5:19.
11. (a) Nukun tẹwẹ Klistiani lẹ do nọ pọ́n awhàn? (b) Dodonu Owe wiwe tọn tẹlẹ wẹ tin to finẹ na otẹn ehe? (2 Kọlintinu lẹ 10:3-5)
11 To pọndohlan mẹ na nubiọtomẹsi awe he jẹnukọn lẹ, ṣinawetọ lẹzun dehe họnwun, heyin, Klistiani nugbo lẹ ma dona tindo mahẹ to awhànfunfun mẹ. To whenuena eyindọ sinsẹ̀n nugbo yin mẹmẹsunnu-yinyin lẹdo aihọn pe he sinai do owanyi ji, to whelọnu lo nudepope ma sọgan klan kavi hẹn ‘titobasinanu mẹmẹsunnu-yinyin he tin to aihọn mẹ tọn’ enẹ gble gba. Jesu plọnmẹ owanyi, e ma yin wangbẹna; jijọho, e ma yin awhàn gba. (1 Pita 5:9; Matiu 26:51, 52) “Omẹ ylankan” dopolọ, Satani, he klọ Kaini nado hù Abẹli zindonukọn nado to didó wangbẹna to gbẹtọvi lẹ ṣẹnṣẹn podọ nado hẹn hunyanhunyan lẹ wá po hùnsọndai po to dodonu kinklan tonudidọ tọn, sinsẹ̀n tọn, po akọ̀ tọn lẹ po ji. Klistiani nugbo lẹ ‘ma sọ nọ plọn awhànfunfun ba,’ mahopọnna onú depope he yé sọgan yido sanvọ́. To yẹhiadonu liho, yé ko yí ‘ohi yetọn lẹ do tùn agbogọdọẹ lẹ podọ owhán yetọn lẹ do tùn glepọnu lẹ.’ Yé nọ wleawuna sinsẹ́n jijọho gbigbọ Jiwheyẹwhe tọn.—1 Johanu 3:10-12; Isaia 2:2-4; Galatianu lẹ 5:22, 23.
Jiwheyẹwhe nọ Dona Walọyizan po Nuplọnmẹ he We-ṣeke lẹ Po
12. (a) Etẹwẹ yin nubiọtomẹsi ṣinatọ̀ntọ, ṣigba kinklan sinsẹ̀n tọn tẹlẹ wẹ hiẹ sọgan dohia? (b) Nawẹ Paulu zinnudo nubiọtomẹsi ṣinatọ̀ntọ ehe ji gbọn?
12 Gbekọndopọ Klistiani lẹ tọn wẹ yin nubiọtomẹsi ṣinatọ̀ntọ heyin sinsẹ̀n-bibasi nugbo tọn. Nalete, sinsẹ̀n Mẹylọhodotọklisti tọn he mẹ kinklan tin te ma ko gọalọ to ninọmẹ ehe mẹ gba. Suhugan nuhe nọ yin yiylọdọ sinsẹ̀n lẹ ko má do flinflin do sinsẹ̀n he kata voovo lẹ mẹ, podọ bẹwlu wẹ nọ yin kọdetọn lọ. Taidi apajlẹ, sinsẹ̀n Baptist tọn to États-Unis, má do flinflin to Baptists Agewaji tọn (Ṣọṣi Baptist Amelika tọn to États-Unis) po Baptists Huwaji tọn (Pipli Baptist Huwaji tọn), gọna susu pipli Baptist tọn devo he ko dekọtọn sọn gbèmanọpọ lẹ mẹ. Susu kinklan lọ tọn lẹ ko wá aimẹ sọn vogbingbọn sinsẹ̀n-nuplọnmẹ tọn lẹ kavi gandudu ṣọṣi tọn mẹ (di apajlẹ, Presbytérien, Episcopalien, Congregational). Kinklan Mẹylọhodotọklisti tọn lẹ sọgbe hẹ sinsẹ̀n devo lẹ he ma yin Mẹylọhodotọklisti tọn—vlavo Bouddha wẹo, Islam, kavi Sinsẹ̀n Hindu tọn. Ayinamẹ tẹwẹ apọsteli Paulu na Klistiani fliflimẹ tọn lẹ? “Yẹn vẹ̀ mì, mẹmẹsunnu emi, gbọn oyin Jesu Klisti Oklunọ mítọn tọn mẹ, dọ mì omẹ pó ni nọ dọ onú dopolọ, podọ kinklan de tin to mì ṣẹnṣẹn blo; ṣigba dọ yè ni yi gbesisọ do kọ̀n mì dopọ to ayiha dopolọ mẹ podọ to linlẹn dopolọ mẹ.”—1 Kọlintinu lẹ 1:10; 2 Kọlintinu lẹ 13:11.
13, 14. (a) Etẹwẹ e zẹẹmẹdo nado yin ‘wiwe’? (b) Nawẹ sinsẹ̀n-bibasi nugbo yin hinhẹn do wiwe ji gbọn?
13 Etẹwẹ yin nubiọtomẹsi ṣinẹnẹtọ na sinsẹ̀n heyin alọkẹyi gbọn Jiwheyẹwhe dali? Nunọwhinnusẹ́n Biblu tọn de yin didohia to Levitiku 11:45 mẹ he dọmọ: “Mì na yin wiwe, na wiwe wẹ yẹn.” Apọsteli Pita vọ́ nubiọtomẹsi ehe dọ to whenuena e wlan dọmọ: “Ṣigba le ewọ he ylọ mì yin wiwe do, mọwẹ mì ni yin wiwe do to owalọ alọpalọpa popo mẹ.”—1 Pita 1:15.
14 Etẹwẹ e biọ to nuhudo ehe mẹ nado yin wiwe? Dọ sinsẹ̀n-basitọ Jehovah tọn lẹ dona yin wiwe to gbigbọ liho podọ to walọyizan liho. (2 Pita 3:14) Otẹn depope ma tin na ylanwatọ sọn ojlo mẹ wá, he ma lẹnvọjọ lẹ, mẹhe gbọn walọyizan yetọn lẹ dali do do osi matindo hia na avọ́sinsan ofligọ Klisti tọn. (Heblu lẹ 6:4-6) Jehovah biọ dọ agun Klistiani tọn lọ ni yin hinhẹn do minmẹ́n ji bo wé. Nawẹ enẹ nọ yin wiwadotana gbọn? To apadewhe gbọn aliho whẹdida tọn heyin dide mẹhe na kọ̀n masin do agun lọ go lẹ sẹ dali.—1 Kọlintinu lẹ 5:9-13.
15, 16. Diọdo tẹwẹ Klistiani susu lẹ ko basi to gbẹzan yetọn lẹ mẹ?
15 Jẹnukọnna yinyọ́n nugbo Klistiani tọn, mẹsusu zan gbẹzan wazẹjlẹgo tọn, gbẹ̀fẹdudu tọn, po ṣejannabi tọn lẹ po. Ṣigba hogbe lọ lẹ dogbọn Klisti dali diọ yé, podọ yé ko mọ jona ylando yetọn tọn lẹ yí. Paulu do e hia po nuzindeji po to whenuena e wlan dọmọ: “Be mì ma yọnẹn dọ mawadodonọ lẹ ma na dugu ahọludu Jiwheyẹwhe tọn? Yè klọ mì blo; ogalọtọ lẹ, kavi boṣiọsẹntọ lẹ, kavi ayọdetọ lẹ, kavi yọnnujọmẹ lẹ, kavi yé he nọ yí sunnu do hẹn yede gble lẹ. Kavi ajotọ lẹ, kavi nukunkẹnnọ lẹ, kavi ahannumunọ lẹ, kavi mẹvlẹtọ lẹ, kavi alọslonamẹtọ lẹ de ma na dugu ahọludu Jiwheyẹwhe tọn. Mọwẹ mẹdelẹ te to mì mẹ; ṣigba yè ko klọ mì, ṣigba yè ko lẹ̀ mì wé.—1 Kọlintinu lẹ 6:9-11.
16 Kunnudenu wẹ e yin dọ Jehovah nọ kẹalọyi mẹhe lẹnvọjọ sọn walọyizan he ma sọgbe hẹ owe wiwe yetọn tọn mẹ, bo lẹ́ sọn e mẹ, podọ lẹzun hodotọ nugbo Klisti po nuplọnmẹ etọn lẹ po tọn. Yé yiwanna kọmẹnu yetọn lẹ di yede taun podọ nọ do e hia to aliho susu lẹ mẹ, taidi sinsinyẹnlin to lizọnyizọn lọ mẹ he nọ ze owẹ̀n ogbẹ̀ tọn donukọnna mẹlẹpo he jlo na sè.—2 Timoti 4:5.
“Nugbo Nasọ Hẹn Mì Jẹ Mẹdekannu”
17. Etẹwẹ yin nubiọtomẹsi aotọ na sinsẹ̀n-bibasi nugbo? Na apajlẹ lẹ.
17 Nubiọtomẹsi aotọ de tin he Jehovah tindo na mẹhe nọ basi sinsẹ̀n hlan ẹn to gbigbọ po nugbo po mẹ lẹ—yèdọ nuplọnmẹ he we-ṣeke. (Johanu 4:23, 24) Jesu dọ na hodotọ etọn lẹ dọmọ: “Mìwlẹ nasọ yọ́n nugbo, nugbo lọ nasọ hẹn mì jẹ mẹdekannu.” (Johanu 8:32) Nugbo Biblu tọn nọ hẹn mí jẹ mẹdekannu sọn sinsẹ̀n-nuplọnmẹ he ma nọ gbògbéna Jiwheyẹwhe lẹ mẹ, taidi alindọn jọmaku, olọnzomẹ, po lẹwezomẹ po. (Yẹwhehodọtọ 9:5, 6, 10; Ezekiẹli 18:4, 20) E nọ hẹn mí jẹ mẹdekannu sọn onú dabla Babilọni tọn heyin “Atọ̀n-to-dopomẹ Wiwe Hugan” Mẹylọhodotọklisti tọn mẹ. (Deutelonomi 4:35; 6:4; 1 Kọlintinu lẹ 15:27, 28) Tonusise na nugbo Biblu tọn nọ dekọtọn do gbẹtọ owanyinọ, mẹtọnhopọntọ, dagbewanyinọ, po lẹblanunọ po mẹ. Sinsẹ̀n Klistiani nugbo tọn ma ko yí whedepopenu do na tuli hlọnvivi, dodinnanutọ yasanamẹ sinsẹ̀n tọn lẹ, taidi Tomás de Torquemada, kavi wangbẹnamẹ awhànfọndote, taidi papa he nọ hẹn Awhàn sinsẹ̀n tọn wá lẹ gba. Ṣogan, Babilọni Daho lọ ko wleawuna wunmẹ sinsẹ́n ehe tọn gbọn whenuho gblamẹ, e whè gbau sọn ojlẹ Nimlọdi tọn mẹ kakajẹ din.—Gẹnẹsisi 10:8, 9.
Yinkọ He Gbọnvo De
18. (a) Mẹnu lẹ wẹ jẹ nubiọtomẹsi aotọ kọ̀n na sinsẹ̀n-bibasi nugbo podọ gbọnna? (b) Etẹwẹ dopodopo mítọn dona wà nado dugu dona he tin to nukọn na mí tọn?
18 Na nugbo tọn mẹnu lẹ to egbehe wẹ nọ hẹn nubiọtomẹsi sinsẹ̀n-bibasi nugbo tọn ao ehelẹ di? Mẹnu lẹ wẹ yin yinyọnẹn bo yin ayidego gbọn mẹdevo lẹ dali na kandai tenọgligo hinhẹn po jijọhonọ-yinyin po tọn? Lẹdo aihọn pe Kunnudetọ Jehovah Tọn lẹ yin yinyọnẹn na ‘apadewhe aihọn tọn mayin’ yetọn tọn wutu. (Johanu 15:19; 17:14, 16; 18:36) Omẹ Jehovah tọn lẹ yin gbégbòna nado tindo yinkọ etọn podọ nado yin Kunnudetọ etọn lẹ, yèdọ dile Jesu Klisti tlẹ yin kunnudetọ nugbonọ de hlan Otọ́ etọn do. Mí nọ yin yinkọ wiwe enẹ, bo yọnẹn taidi azọngban mítọn nado nọgbẹ sọgbe hẹ nuhe e zedonukọnnamẹ. Podọ, taidi Kunnudetọ etọn lẹ, nukundido gigonọ nankọ die he tin to nukọn na mí! Enẹ wẹ yin nado yin apadewhe whẹndo gbẹtọvi tonusetọ, gbekọndopọtọ, he to sinsẹ̀n-basi na Nupojipetọ Wẹkẹ lọ tọn to paladisi he yè hẹn gọwa aigba ji file de mẹ. Nado mọ dona mọnkọtọn de yí, mì gbọ na mí ni zindonukọn nado do mídelẹ hia hezeheze po sinsẹ̀n-bibasi nugbo po podọ nado tindo yinkọ lọ Kunnudetọ Jehovah Tọn lẹ po awagundido po “na nugbo po dodo po wẹ whẹdida etọn lẹ”!—Osọhia 19:2; Isaia 43:10-12; Ezekiẹli 3:11.
[Nudọnamẹ odò tọn]
a Lẹdogbedevomẹ Biblu tọn lẹ ma nọ yin gbigbọdo gbọn Jiwheyẹwhe dali gba. Lẹdogbedevomẹ lẹ, gbọn wunmẹ yetọn taun dali, sọgan do nukunnumọjẹnumẹ voovo hia gando ogbè dowhenu tọn lọ lẹ go to ehe mẹ Biblu lọ yin kinkandai do.
Nawẹ Hiẹ Na Na Gblọndo Gbọn?
◻ Nawẹ devizọnwatọ Jehovah tọn lẹ nọ pọ́n vasudo Babilọni Daho lọ tọn gbọn?
◻ Etẹwẹ yin nubiọtomẹsi titengbe lẹ na sinsẹ̀n-bibasi nugbo?
◻ Nawẹ nugbo lọ hẹn mì jẹ mẹdekannu gbọn?
◻ Gbégbò vonọtaun tẹwẹ mí tindo taidi Kunnudetọ Jehovah Tọn lẹ?
[Yẹdide to weda 11]
Kunnudetọ Jehovah Tọn lẹ to yẹwheho wẹndagbe Ahọluduta Jiwheyẹwhe Tọn dọ bosọ to mẹplọn
[Yẹdide to weda 12]
Klistiani nugbo lẹ nọ saba gbọṣi kada na nuhe dù tonudidọ lẹ po awhàn aihọn tọn lẹ po
[Asisa Yẹdide tọn]
Agahun: Courtesy of the Ministry of Defense, London