Be Hiẹ to Oya Wangbẹna Tọn Ji Ya?

ETẸWẸ danuwiwa akọ̀, akọta ṣinṣinyan, mẹnukunta hihopọn, mẹkinklan, po vasudo akọ̀ tọn po tindo to pọmẹ? Yemẹpo wẹ yin kọdetọn mẹwhinwhan gbẹtọvi lẹ tọn he gbayipe—yèdọ wangbẹna!

Etẹwẹ wangbẹna yin? Otanwe aihọn tọn de basi zẹẹmẹ etọn taidi “linlẹn he yin awuwlena matin yizan whenu kavi mẹtọnhopọn tọn nado dawhẹ do dagbe ji.” Taidi gbẹtọvi mapenọ lẹ, mí tindo mẹwhinwhan lọ nado yin awuwhàntọ jẹ obá de mẹ. Vlavo hiẹ sọgan lẹnnupọn do ninọmẹ lẹ ji whenue hiẹ dawhẹ matin kunnudenu lẹpo tintindo. Biblu do vogbingbọn he tin to mẹwhinwhan wangbẹna mọnkọtọn lẹ po lehe Jehovah Jiwheyẹwhe nọ dawhẹ do po ṣẹnṣẹn hia. E dọmọ: “Oklunọ ma nọ mọnú dile gbẹtọ mọ do gba; na gbẹtọ nọ to awusọhia gbonu go tọn dali pọ́n, ṣigba ayiha pọ́n wẹ Oklunọ te.”—1 Samuẹli 16:7.

Wangbẹna Sọgan Gbleawunamẹ

Matin ayihaawe mẹlẹpo ko yin owhẹ agọ̀ dana gbọn mẹde dali to ojlẹ de mẹ pọ́n. (Yijlẹdo Yẹwhehodọtọ 7:21, 22 go.) Na paa tọn, mímẹpo wẹ to oya wangbẹna tọn ji. Ṣigba, to whenuena yé yawu yin didesẹ, linlẹn wangbẹna tọn lẹ vlavo sọgan gọn ma hẹn awugblenamẹ depope wá. Nulẹnpọn mapote do linlẹn mọnkọtọn lẹ ji wẹ sọgan dekọtọn do awugble mẹ. E sọgan klọ mí nado yí lalo de se. Taidi apajlẹ, to nuyiwadomẹji wangbẹna tọn glọ, mẹdelẹ yise nugbonugbo dọ mẹde sọgan yin nukunkẹnnọ, adidọnọ, nulunọ, kavi goyitọ na e yin apadewhe sinsẹ̀n, akọ̀, kavi pipli akọta de tọn poun wutu.

To whẹho susu mẹ whẹdida agọ̀ mọnkọtọn nọ planmẹ jẹ nuyiwa hẹ mẹdevo lẹ po okadomẹgo po, huhlọn ṣizan, kavi danuwiwa kọ̀n. Livi susu gbẹtọ lẹ tọn ko hẹn ogbẹ̀ yetọn bu to mẹhùhù, akọ̀ vivasudo, mẹhùhù akọ̀ tọn lẹ, po wunmẹ wangbẹna zẹjlẹgo tọn devo lẹ po.

Lẹdo aihọn pe, gandudu lẹ ko hoavun sọta wangbẹna gbọn nina jide jlọjẹ hlan mẹdekannujẹ, hihọ́, zẹnsisọ mẹlẹpo tọn sọgbehẹ osẹ́n he yè ma sọgan gbà dali. Eyin hiẹ hia bẹdopọ gbedide titengbe heyin osẹ́n otò towe tọn, matin ayihaawe hiẹ na mọ kandai de kavi vọjlado osẹ́n tọn heyin bibasi nado basi hihọ́ na jlọjẹ tovi lẹpo tọn, mahopọnna akọ̀, sunnu kavi yọnnu yinyin, kavi sinsẹ̀n yetọn. Ṣogan, wangbẹna po mẹkinklan po gbayipe lẹdo aihọn pe.

Be hiẹ to oya wangbẹna tọn ji ya? Be hiẹ ko yin alọdlẹndo taidi nukunkẹnnọ, adidọnọ, nulunọ, kavi goyitọ na akọ̀, owhe, sunnu kavi yọnnu yinyin, akọta, kavi yise sinsẹ̀n towe tọn lẹ wutu ya? Be yè ko gbẹ́ nado na we dotẹnmẹ hundote na wepinplọn he jẹ, azọ́n, ohọ̀, po sinsẹnzọn alọgọnamẹ tọn lẹ po na wangbẹna wutu ya? Eyin mọwẹ, nawẹ hiẹ sọgan pehẹ ẹ gbọn?

[Yẹdide to weda 3]

Nulẹnpọn mapote do wangbẹna ji nọ fọ́n wangbẹna akọ̀ tọn dote

[Asisa Yẹdide tọn]

Nina Berman/Sipa Press