Be Alindọn Yin Jọmaku Wẹ Ya?

PO ABỌẸNINỌ po, họntọn lẹ gọna whẹndo lẹ po tò vlìlì sọyi ṣiọ-potin he tin to hùnhùn lọ kọ̀n. Yé yìnnukunpọn ṣiọ lọ, enẹ heyin visunnu owhe 17-mẹvi de tọn. E vẹawuna họntọn etọn wehọmẹ tọn lẹ nado yọ́n visunnu lọ. Nukunpedomẹgo gbọn yizan amasin sinsinyẹn tọn dali ko wọ̀ suhugan oda etọn tọn sẹ̀, awutu agbasa wiwọ̀ tọn ko hẹn ẹn nado dùnpò taun. Be họntọn yetọn wẹ ehe sọgan yin nugbonugbo ya? To osẹ delẹ die wayi, e gọ́ na linlẹn lẹ, kanbiọ lẹ, hlọnhlọn—heyin ogbẹ̀ tọn! Po avi po onọ visunnu lọ tọn vọẹ dọ pludopludo dọmọ: “Tommy yin ayajẹnọ hugan todin. Jiwheyẹwhe jlo Tommy to olọn mẹ po e po.”

Vinọ he ko yin ayihagbadona ehe mọ wunmẹ todido po kọgbọ jẹ obá de mẹ tọn po yí to linlẹn lọ mẹ dọ to aliho de mẹ visunnu etọn gbẹ́ pò to ogbẹ̀. To ṣọṣi mẹ e ko yin pinplọn dọ alindọn yin jọmaku, dọ onú titengbe wẹ e yin to gbẹtọ-yinyin, linlẹn lẹ, oflin lẹ—yèdọ to “mẹlọsu” mẹ. E yise dọ, alindọn visunnu etọn tọn ma ko kú lala gba; na e yin nutogbẹ̀ gbigbọnọ de wutu, e jó agbasa etọn do to okú whenu bo yì olọn mẹ nado tin hẹ Jiwheyẹwhe po angẹli lẹ po.

To ojlẹ nugbajẹmẹji tọn whenu, ahún gbẹtọ tọn nọ tẹdo ohia pẹvi todido tọn depope go, enẹwutu e vẹawu nado yọ́n nuhewutu mẹsusu nọ kẹalọyi yise ehe. Di dohia, lẹnnupọn do aliho he mẹ sinsẹ̀n-nuplọnmẹtọ J. Paterson-Smyth basi zẹẹmẹ ede tọn do to owe lọ The Gospel of the Hereafter mẹ dọmọ: “Onú pẹvi de poun wẹ okú yin to yijlẹdo nuhe nọ bọdego mẹ—yèdọ aihọn he jiawu, jiawu tlala de he Okú nọ zedonukọnna mí.”

Lẹdo aihọn pe podọ to suhugan sinsẹ̀n lẹ tọn po aṣa lẹ po mẹ, gbẹtọ lẹ yise dọ gbẹtọ tindo alindọn he ma nọ kú de to ohò etọn mẹ, gbigbọ gbẹ̀te de he nọ zindonukọn nado to gbẹ̀nọ to whenuena agbasa lọ kú godo. Yise ehe yin nuhe dibla gbayipe to sinsẹ̀n po hagbẹ́ klandovo fọtọ́n susu Mẹylọhodotọklisti tọn lẹ po mẹ. Sinsẹ̀n-nuplọnmẹ he yin alọkẹyi to osẹ́n liho de wẹ e yin to sinsẹ̀n Juda tọn mẹ ga. Hindu lẹ yise dọ gbigbọ, kavi alindọn, yin didá to bẹjẹeji ojlẹ de tọn mẹ, yin zize do ganpamẹ to agbasamẹ to jìjì whenu, bo zindonukọn to okú whenu sọyi agbasa devo mẹ to aliho lẹdope vọdiọ-wá-gbẹ̀mẹ zọnmii tọn de mẹ. Malẹnu lẹ yise dọ alindọn nọ wá tintin mẹ to jiji whenu bo nọ zindonukọn nado to gbẹ̀nọ to okú agbasa lọ tọn godo. Yisenọ devo lẹ—Aflikanu he tindo yise dọ nuhe tin lẹpo wẹ tindo alindọn, yèdọ Shinto, etlẹ yin sinsẹ̀n-basitọ Bouddha tọn lẹ to aliho de mẹ—nọ plọn mẹ onú voovo lẹ do hosọ ehe dopolọ ji.

Kanbiọ Tukladomẹ Tọn Delẹ

Dile e tlẹ yindọ linlẹn jọmaku-yinyin alindọn tọn yin nuhe yè ma sọgan gbẹdai bo dibla yin nuhe yin alọkẹyi to aliho he gbayipe mẹ, etomọṣo, e fọ́n kanbiọ tukladomẹ tọn delẹ dote. Di apajlẹ, e nọ paṣa gbẹtọ lẹ fie alindọn mẹyiwanna de tọn nọ yì eyin omẹ enẹ ma ko zan gbẹzan apajlẹ dagbe tọn de. Be e na yin vivọdiọ-wá-ogbẹ̀ taidi nutogbẹ̀ he yìdo de wẹ ya? Kavi be ewọ na yin didohlan lẹwezomẹ, fie e na yin kiklọwe te gbọn aliho miyọ́n tọn delẹ dali kakajẹ whenuena e na yin pinpọndohlan di mẹhe jẹ nado yì olọn mẹ wẹ ya? Dehe sọ ylan hugan wẹ yindọ, be ewọ na yin yasana kakadoi to olọnzo he to jiji de mẹ wẹ ya? Kavi be ewọ, dile suhugan sinsẹ̀n he tindo yise dọ nuhe tin lẹpo wẹ tindo alindọn plọn mẹ do, be gbigbọ etọn dona yin vẹvẹna wẹ ya?

Linlẹn mọnkọtọn lẹ nọ ze nukundido agbanpẹnmẹnu tọn lẹ do ayiha mẹ na mẹhe tin to ogbẹ̀ lẹ. Be mí na vẹvẹna gbigbọ mẹyiwanna mítọn he ko kú lẹ tọn na yé ma nado hẹn ahọsu-yiyi wá mí ji wẹ ya? Be mí yin nukundo nado gọalọna yé nado tọ́n sọn lẹwezomẹ he dobunamẹ delẹ mẹ wẹ ya? Kavi be mí na to sisọsisọ poun to obu he siso mẹ matin alọgọ na linlẹn yajiji yetọn to olọnzomẹ wẹ ya? Kavi be mí na yinuwa hẹ kanlin gbẹ̀te delẹ taidi dọ yé tindo alindọn gbẹtọvi he ko kú lẹ tọn wẹ ya?

Kanbiọ he fọndote gando Jiwheyẹwhe lọsu go lẹ blawu tlala. Di dohia, suhugan mẹjitọ lẹ tọn, taidi vinọ he yin hodọdego to bẹjẹeji, yin homẹmiọnna to tintan whenu gbọn linlẹn lọ dali dọ Jiwheyẹwhe “yí” alindọn jọmaku ovi yetọn tọn sọyì olọn mẹ nado tin po e po. Ṣigba, na mẹsusu, e nọ jẹ pipaṣa yé ji to godomẹ wunmẹ Jiwheyẹwhe he na hẹn awutu ylankan mọnkọtọn wá ovivu mayọndenọ de ji, bo na dọn mẹvivẹ mọnkọtọn sọyi sọn mẹjitọ heyin ayihagbadonanọ lẹ sí vaun kiki nado sẹtẹn na ovi lọ yì olọn mẹ gbọn okú ajiji dali. Fie whẹdida dodo lọ, owanyi lọ, lẹblanu lọ tin te, to Jiwheyẹwhe mọnkọtọn mẹ? Mẹsusu tlẹ kanse gando nuyọnẹn Jiwheyẹwhe mọnkọtọn tọn go dali. Yé kanse dọ, naegbọn wẹ Jiwheyẹwhe nuyọnẹn tọn de na tlẹ do gbọ na alindọn ehe lẹpo ni tin to aigba ji to tintan whenu eyin olọn mẹ wẹ yemẹpo na yì to godomẹ? Be enẹ ma na zẹẹmẹdo dọ didá aigba tọn yin vivẹnudido ovọ́ mẹ tọn de ya?—Yijlẹdo Deutelonomi 32:4; Psalm 103:8; Isaia 45:18; 1 Johanu 4:8.

To whelọnu lo, e họnwun dọ, sinsẹ̀n-nuplọnmẹ jọmaku-yinyin alindọn gbẹtọvi tọn, mahopọnna aliho depope he mẹ sinsẹ̀n-nuplọnmẹ lọ nọ yin pinplọn te, hẹn kanbiọ he vẹawu lẹ wá, yèdọ he ma tlẹ tin to onù dopo ji. Etẹwutu? Na suhugan tukla lọ lẹ tọn yìgodo jẹ bẹjẹeji nuplọnmẹ ehe tọn. Hiẹ sọgan mọ ẹn taidi nuhe hẹnmẹ tindo nukunnumọjẹnumẹ nado basi dodinnanu kleun do dodonu ehelẹ ji; podọ e sọgan paṣawe nado plọn nuhe Biblu lọsu dọ dogbọn alindọn dali. E nọ ze todido ogbẹ̀ to okú godo he pọnte hugan de donukọnnamẹ hugan nuhe sinsẹ̀n aihọn mẹ tọn lẹ nọ saba plọn mẹ.