Gbẹninọ Sọgbe hẹ Osẹ́n Klisti Tọn
“Mì nọ hẹn agbàn mìnọzo tọn, na mì nido hẹn osẹ́n Klisti tọn di.”—GALATIANU LE 6:2.
1. Naegbọn e do sọgan yin didọ dọ osẹ́n Klisti tọn yin nuyiwadomẹji huhlọnnọ dagbe wiwà de to egbehe?
TO Rwanda, Hutu po Tutsi heyin Kunnudetọ Jehovah Tọn lẹ ze ogbẹ̀ yetọn do owù mẹ nado basi hihọ́ na ode awetọ yetọn lẹ sọn vasudo akọ̀ tọn he zà aigba enẹ to agọe si. Kunnudetọ Jehovah Tọn lẹ to Kobe, Japon, he hẹn hagbẹ whẹndo tọn lẹ bú to aigba sisọsisọ nuvasudo tọn mẹ yin awugblena susu gbọn nuhẹnbu yetọn dali. Ṣogan, yé ze afọdide niyaniya tọn nado whlẹn mẹhe adángbò devo lẹ gán. Mọwẹ, apajlẹ ahunfọndotenamẹ tọn lẹ lẹdo aihọn pe dohia dọ osẹ́n Klisti tọn to azọ́nwà to egbehe. Nuyiwadomẹji huhlọnnọ dagbe wiwà tọn de wẹ e yin.
2. Nawẹ Mẹylọhodotọklisti gboawupo nado mọnukunnujẹ onú agokun osẹ́n Klisti tọn mẹ gbọn, podọ etẹwẹ mí sọgan wà nado hẹn osẹ́n enẹ di?
2 To ojlẹ dopolọ mẹ, dọdai Biblu tọn de dogbọn ‘azán godo tọn’ sinsinyẹn ehelẹ dali to yinyin hinhẹndi. Mẹsusu “tindo ohia jijọ-di-Jiwheyẹwhe tọn” ṣigba ‘mọ́n huhlọn etọn.’ (2 Timoti 3:1, 5) Titengbe to Mẹylọhodotọklisti tọn mẹ, sinsẹ̀n nọ saba yin whẹho aṣa tọn de, e ma yin ahún mẹ tọn gba. Be enẹ yinmọ na e vẹawu glanglan nado nọgbẹ̀ sọgbe hẹ osẹ́n Klisti tọn wutu wẹ ya? Lala. Jesu ma na na mí osẹ́n he ma sọgan yin hihodo gba. Mẹylọhodotọklisti ko gboawupo nado mọnukunnujẹ osẹ́n lọ mẹ. E ko gboawupo nado setonuna hogbe gbọdo ehelẹ dọmọ: “Mì nọ hẹn agbàn mìnọzo tọn, na mì nido hẹn osẹ́n Klisti tọn di.” (Galatianu lẹ 6:2) Mí nọ “hẹn osẹ́n Klisti tọn di” gbọn agbànpẹnmẹnu ode awetọ mítọn lẹ tọn hinhẹn dali, e ma yin gbọn apajlẹ Falesi lẹ tọn hihodo dali po yiyidogọ agbàn mẹmẹsunnu mítọn lẹ tọn po to aliho he ma jẹ mẹ gba.
3. (a) Gbedide tẹlẹ wẹ tin gọna osẹ́n Klisti tọn? (b) Naegbọn e nado yin nuhe ma sọgbe nado wá tadona lọ kọ̀n dọ agun Klistiani tọn ma dona tindo nunọwhinnusẹ́n depope gbọnvona gbedide tlọlọ Klisti tọn lẹ?
3 Osẹ́n Klisti tọn bẹ gbedide Jesu Klisti tọn lẹpo hẹn—vlavo yẹwhehodidọ po mẹpinplọn po, zize nukun mítọn lẹ do fidopo podọ do wiwe ṣeke ji, azọ́nwiwa nado hẹn jijọho go po kọmẹnu mítọn po, kavi dide onú mawé sẹ sọn agun lọ mẹ. (Matiu 5:27-30; 18:15-17; 28:19, 20; Osọhia 2:14-16) Na nugbo tọn, Klistiani lẹ tin to dandannu glọ nado setonuna gbedide he tin to Biblu mẹ lẹpo he yin nina hodotọ Klisti tọn lẹ. Podọ e ma ko vọ̀ do finẹ gba. Titobasinanu Jehovah tọn, to pọmẹ po dopodopo agun lẹ tọn po, dona ze osẹ́n gọna aliho nuwiwa tọn he jẹ lẹ dai nado sọgan hẹn titojininọ dagbe onú lẹ tọn go. (1 Kọlintinu lẹ 14:33, 40) Yèdọ, Klistiani lẹ ma tlẹ sọgan nọ plidopọ eyin yé ma tindo nunọwhinnusẹ́n gando ojlẹ lọ, nọtẹn lọ, po lehe opli mọnkọtọn lẹ na nọ yin bibasi do go gba! (Heblu lẹ 10:24, 25) Gbekọndopọ po anademẹ he sọgbe hẹ lẹnpọn dagbe he yin zizedai gbọn mẹhe yin nina aṣẹpipa lẹ dali to titobasinanu lọ mẹ sọ yin apadewhe osẹ́n Klisti tọn hinhẹn di ga.—Heblu lẹ 13:17.
4. Etẹwẹ yin huhlọn mẹwhinwhan tọn lọ he tin to godo na sinsẹ̀n-bibasi wiwe ṣeke?
4 Etomọṣo, Klistiani nugbo lẹ ma nọ na dotẹnmẹ sinsẹ̀n-bibasi yetọn nado lẹzun todohukanji hẹngogo osẹ́n he ma dota tọn lẹ gba. Yé ma nọ sẹ̀n Jehovah kiki na mẹde kavi titobasinanu de dọna yé nado wà mọ wutu gba. Kakatimọ, huhlọn mẹwhinwhan he tin to godona sinsẹ̀n-bibasi yetọn wẹ owanyi. Paulu wlan dọmọ: “Owanyi [Klisti, NW ] tọn to huhlọnna mí.” (2 Kọlintinu lẹ 5:14, wekun flinflin lẹ yin mítọn) Jesu degbena hodotọ etọn lẹ nado yiwanna ode awetọ yetọn. (Johanu 15:12, 13) Owanyi mẹde-yido-sanvọ́ tọn wẹ dodonu osẹ́n Klisti tọn, podọ e nọ na huhlọn kavi whàn Klistiani nugbo lẹ to filẹpo, to whẹndo mẹ podọ to agun mẹ. Mì gbọ mí ni pọ́n lehe e nọ wà mọ gbọn.
To Whẹndo Mẹ
5. (a) Nawẹ mẹjitọ lẹ sọgan hẹn osẹ́n Klisti tọn di to whégbè gbọn? (b) Nuhudo etẹ tọn wẹ ovi lẹ tindo sọn mẹjitọ yetọn lẹ si, podọ aliglọnnamẹnu tẹlẹ ji wẹ mẹjitọ delẹ dona dù te nado sọgan wleawuna yé?
5 Apọsteli Paulu wlan dọmọ: “Mì asu lẹ emi, mì yiwanna asi mìtọn lẹ, yèdọ dile Klisti ga yiwanna agun lọ do, bosọ yí ede na ẹn.” (Efesunu lẹ 5:25) To whenuena asu de nọ hodo apajlẹ Klisti tọn bo nọ yinuwa hẹ asi etọn po owanyi po gọna nukunnumọjẹnumẹ, e nọ hẹn ada titengbe osẹ́n Klisti tọn de di. Humọ, Jesu do owanyi hia ovi lẹ hezeheze, bo ze yé do awa etọn lẹ mẹ, ze alọ etọn lẹ do yé ji, bo dona yé. (Malku 10:16) Mẹjitọ he nọ hẹn osẹ́n Klisti tọn di lẹ sọ nọ do owanyi hia ovi yetọn lẹ ga. Nugbo, mẹjitọ delẹ tin he mọ ẹn taidi nuhe vẹawu nado hodo apajlẹ Jesu tọn to awa ehe ji. Delẹ to yé mẹ ma tindo jijọ awuyadomẹ tọn. Mẹjitọ lẹ emi, mì ma dike nulẹnpọn ehelẹ ni glọnalina mì sọn owanyi he mì tindo numọtolanmẹ etọn na ovi mìtọn lẹ didohia yé blo! E ma ko pe na mì nado yọnẹn dọ mì yiwanna ovi mìtọn lẹ gba. Yé dona yọnẹn ga. Podọ yé ma na yọnẹn adavo mì din aliho lẹ nado do owanyi mìtọn hia.—Yijlẹdo Malku 1:11 go.
6. (a) Be ovi lẹ tindo nuhudo osẹ́n mẹjitọ tọn lẹ ya, podọ naegbọn hiẹ do na gblọndo do mọ? (b) Whẹwhinwhẹn titengbe he tin na osẹ́n whédo tọn tẹlẹ wẹ ovi lẹ dona tindo nukunnumọjẹnumẹ etọn? (c) Owù tẹlẹ wẹ nọ yin didapana to whenuena osẹ́n Klisti tọn gbayipe to whẹndo mẹ?
6 To ojlẹ dopolọ mẹ, ovi lẹ tindo nuhudo anademẹ lẹ tọn, ehe zẹẹmẹdo dọ mẹjitọ yetọn lẹ dona ze osẹ́n lẹ dai podọ to whedelẹnu nọ hẹn yé po huhlọn po nado setonuna osẹ́n ehelẹ gbọn mẹplọnlọdomẹgo dali. (Heblu lẹ 12:7, 9, 11) Eyin etlẹ yinmọ, ovi lẹ dona yin alọgọna sọn ojlẹ de mẹ jẹ devo mẹ nado mọnukunnujẹ whẹwhinwhẹn titengbe osẹ́n ehelẹ tọn mẹ: mẹjitọ yetọn lẹ yiwanna yé. Podọ yé dona plọn dọ owanyi wẹ yin whẹwhinwhẹn he yọ́n hugan lọ na yé nado setonu na mẹjitọ yetọn lẹ. (Efesunu lẹ 6:1; Kọlọsinu lẹ 3:20; 1 Johanu 5:3) Yanwle mẹjitọ wuntuntunnọ de tọn wẹ nado plọn ovi lẹ nado yí ‘huhlọn nulẹnpọn’ yetọn tọn zan na to godo mẹ yé na basi dide he yọ́n lẹ na yedetiti. (Lomunu lẹ 12:1; yijlẹdo 1 Kọlintinu lẹ 13:11 go.) To alọ devo mẹ, osẹ́n lẹ ma dona suhugan gba mọwẹ mẹplọnlọdomẹgo ma sọ dona zẹ̀pá gba. Paulu dọmọ: “Mì otọ́ lẹ, mì hẹn homẹgblena ovi mìtọn lẹ blo, na yé nikaa gblehomẹ.” (Kọlọsinu lẹ 3:21; Efesunu lẹ 6:4) To whenuena osẹ́n Klisti tọn gbayipe to whédo lọ mẹ, dotẹnmẹ depope ma na tin na mẹplọnlọdomẹgo adi tọn he ma tin to jlẹkaji kavi na hogbe awugblenamẹ tọn. To owhé mọnkọtọn gbè, ovi lẹ nọ tindo numọtolanmẹ tintin to hihọ́ mẹ po mẹjlọdote po tọn, e ma yin agbànpẹnmẹnu kavi mẹdèpo tọn gba.—Yijlẹdo Psalm 36:7 go.
7. To aliho tẹlẹ mẹ wẹ owhé Bẹtẹli gbè tọn lẹ sọgan wleawuna apajlẹ de to whenuena e jẹ nunọwhinnusẹ́n lẹ zizedai to whégbè kọ̀n?
7 Delẹ to mẹhe ko basi dlapọn sọyì owhé Bẹtẹli tọn lẹ gbe lẹdo aihọn pe dọ dọ enẹ yin apajlẹ dagbe jlẹkajininọ tọn to whẹho osẹ́n tọn lẹ mẹ na whẹndo de. Dile e tlẹ yindọ mẹho lẹ wẹ tin to finẹ, owhé mọnkọtọn nọ wazọ́n taidi whẹndo lẹ pẹpẹ.a Azọ́nwiwa Bẹtẹli tọn gẹdẹ bosọ biọ sọha osẹ́n delẹ tọn—na taun tọn hugan dehe whẹndo kleun de sọgan tindo nuhudo etọn. Etomọṣo, mẹho he to nukọntọ yin to owhé Bẹtẹli tọn gbè lẹ, yèdọ to wekantẹn lẹ, po anadena wezintẹn lẹ po nọ tẹnpọn nado yí osẹ́n Klisti tọn zan. Yé nọ pọ́n ẹn hlan taidi azọ́ndenamẹ yetọn e ma yin nado basi tito azọ́n lọ tọn kẹdẹ wẹ gba ṣigba nado ze nukọnyiyi gbigbọmẹ tọn po “ayajẹ Oklunọ tọn” po daga to azọ́nwatọgbẹ́ yetọn lẹ ṣẹnṣẹn. (Nẹhemia 8:10) Enẹwutu, yé nọ tẹnpọn nado wà onú lẹ to aliho nujikudo po tulinamẹ tọn po mẹ bosọ nọ tẹnpọn nado yin lẹnpọn dagbenọ. (Efesunu lẹ 4:31, 32) Abajọ whẹndo Bẹtẹli tọn lẹ do yin yinyọnẹn na gbigbọ ayajẹnọ yetọn!
To Agun Mẹ
8. (a) Etẹwẹ dona yin yanwle mítọn to whepoponu to agun mẹ? (b) To ninọmẹ tẹlẹ glọ wẹ mẹdelẹ ko kàn osẹ́n lẹ biọ te kavi tẹnpọn nado basi osẹ́n lẹ te?
8 Mọdopolọ to agun mẹ yanwle mítọn wẹ nado jlọ ode awetọ mítọn dote to gbigbọ owanyi tọn mẹ. (1 Tẹsalonikanu lẹ 5:11) Enẹwutu Klistiani lẹpo dona họ́ yede ma nado yidogọ agbànpẹnmẹnu mẹdevo lẹ tọn gbọn zize do alọ yedelẹ tọn mẹ nado hẹn yé po huhlọn po nado kẹalọyi linlẹn yetọn titi lẹ do whẹho nudide mẹdetiti tọn lẹ ji. To ojlẹ delẹ mẹ, mẹdelẹ nọ kanwe hlan Ogbẹ́ Watch Tower nado kàn osẹ́n lẹ sè do whẹho mọnkọtọn lẹ ji taidi pọndohlan he yé dona tindo do yẹdide-to-okànji titengbe delẹ, owe lẹ, yèdọ etlẹ yin do aihundanu delẹ ji. Ṣogan, Ogbẹ́ ma yin gbedena nado din tlintlindo onú mọnkọ lẹ tọn bo de osẹ́n tọ́n do yé ji gba. To whẹho susu mẹ, whẹho he mẹdopodopo kavi tatọ whẹndo tọn dona basi dide etọn, sinai do owanyi etọn na nunọwhinnusẹ́n Biblu tọn lẹ. Mẹdevo lẹ nọ jlo nado diọ ayinamẹ po anademẹ Ogbẹ́ tọn lẹ po zun osẹ́n. Di apajlẹ, to zinjẹgbonu Atọ̀họ̀-Nuhihọ́ Lọ Tọn (Flansegbe) heyin 15 mars 1996 tọn mẹ, wẹ hosọ dagbe de tin te he to tulina mẹho lẹ nado basi dlapọn lẹngbọhọtọ tọn sọyì hagbẹ agun lọ tọn lẹ dè to gbesisọmẹ. Be lẹndai osẹ́n lẹ zizedai tọn wẹ ya? Lala. Dile e tlẹ yindọ mẹhe penugo nado hodo ayinamẹ lọ lẹ mọ alemọyinu susu lẹ, mẹho delẹ ma penugo nado wà mọ gba. Mọdopolọ, hosọ lọ “Kanbiọ sọn Wehiatọ lẹ Dè” to zinjẹgbonu Atọ̀họ̀-Nuhihọ́ Lọ Tọn (Flansegbe) heyin 1er avril 1995 tọn mẹ, gbẹnunamẹ sọta ayidonugo dindọn sọn yẹyi nujijọ baptẹm tọn ji gbọn nuyiwa zẹjlẹgo lẹ, taidi agọ́ pligidi lẹ bibasi kavi tito hùnwhẹ tọn lẹ bibasi dali. Mẹdelẹ ko yí ayinamẹ he whèwhín ehe zan to aliho agọ̀ mẹ, bo tlẹ nọ ze osẹ́n dai dọ kalti tulinamẹ tọn de yiyidohlan to ojlẹ ehe mẹ na yin nuhe ma sọgbe!
9. Naegbọn e do yin onú titengbe dọ mí ni dapana hẹngogonọ yinyin glanglan po whẹdidana ode awetọ mítọn po?
9 Sọ lẹnnupọn ga, dọ eyin “osẹ́n mẹdekannu-jẹ he sọgbe” tọn dona gbayipe to ṣẹnṣẹn mítọn, mí dona kẹalọyi dọ ayihadawhẹnamẹnu Klistiani lẹpo tọn ma yin onú dopolọ gba. (Jakobu 1:25) Be mí dona gblehomẹ eyin gbẹtọ lẹ tindo nudide mẹdetiti tọn he ma gbà nunọwhinnusẹ́n Owe wiwe tọn lẹ wẹ ya? Lala. Mọwiwà mítọn na hẹn kinklan wá. (1 Kọlintinu lẹ 1:10) Paulu, to whenuena e to nugbẹna mí sọta whẹdana hatọ Klistiani de, dọmọ: “Hlan mẹmẹnu etọn titi wẹ e nọte, kavi wẹ e jai. Mọwẹ, yè na ze e daga: na Jiwheyẹwhe sọgan hẹn ẹn nọte.” (Lomunu lẹ 14:4) Mí sọgan hẹn homẹgble Jiwheyẹwhe eyin mí nọ dọho sọta ode awetọ mítọn do whẹho he dona yin jijodo na ayihamẹdawhẹnamẹnu mẹdopodopo tọn ji.—Jakobu 4:10-12.
10. Mẹnu lẹ wẹ yin azọ́ndena nado basi hihọ́ na agun lọ, podọ nawẹ mí dona nọgodona yé gbọn?
10 Mì gbọ mí ni flin ga, dọ mẹho lẹ yin azọ́ndena nado nọ basi hihọ́ na apó Jiwheyẹwhe tọn. (Owalọ lẹ 20:28) Yé tin to finẹ nado gọalọ. Mí dona vòawú nado dọnsẹpọ yé na ayinamẹ, na yé yin nuplọntọ Biblu tọn lẹ bosọ jẹakọ hẹ nuhe ko yin hodọdeji to owe Ogbẹ́ Watch Tower tọn lẹ mẹ. To whenuena mẹho lẹ mọ walọyizan he sọgan dekọtọn do nunọwhinnusẹ́n Owe wiwe tọn lẹ hinhẹngbà mẹ, yé nọ namẹ ayinamẹ he nuhudo tin na lẹ po adọgbigbo po. (Galatianu lẹ 6:1) Hagbẹ agun tọn lẹ nọ hodo osẹ́n Klisti tọn gbọn gbekọndopọ hẹ lẹngbọhọtọ owanyinọ ehelẹ dali, he nọ yin nukọntọ to ṣẹnṣẹn yetọn.—Heblu lẹ 13:7.
Mẹho lẹ Nọ Yí Osẹ́n Klisti Tọn Zan
11. Nawẹ mẹho lẹ nọ yí osẹ́n Klisti tọn zan to agun mẹ gbọn?
11 Mẹho lẹ nọ tin to awuwlemẹ nado hẹn osẹ́n Klisti tọn di to agun mẹ. Yé nọ yin nukọntọ to yẹwheho wẹndagbe lọ tọn didọ mẹ, nọ plọnmẹ sọn Biblu mẹ nado sọgan jẹ ahún lẹ mẹ podọ, dile lẹngbọhọtọ owanyinọ, walọmimiọnnọ lẹ, nọ dọho hẹ “ayi mawhiwhẹnọ lẹ” do. (1 Tẹsalonikanu lẹ 5:14) Yé nọ dapana walọyizan he ma yin Klistiani tọn lẹ he tin to suhugan sinsẹ̀n Mẹylọhodotọklisti tọn lẹ mẹ to egbehe. Nugbo wẹ dọ, aihọn ehe to doyì po awuyiya po, podọ taidi Paulu, mẹho lẹ sọgan tindo numọtolanmẹ ayimajai tọn na apó lọ; ṣigba yé nọ hẹn jlẹkajininọ go dile yé to nuyiwa do nuduahunmẹnamẹ mọnkọtọn lẹ ji.—2 Kọlintinu lẹ 11:28.
12. To whenuena Klistiani de dọnsẹpọ mẹho de na alọgọ, nawẹ mẹho lọ sọgan na gblọndo gbọn?
12 Di apajlẹ, Klistiani de sọgan jlo nado dọho po mẹho de po dogbọn whẹho titengbe de dali he ma yin hodọdeji gbọn alọdlẹndonu tlọlọ Owe wiwe lẹ tọn de dali kavi he biọ hinhẹn nunọwhinnusẹ́n voovo Klistiani tọn delẹ do jlẹkaji. Vlavo e ko yin zize nukọnyiyi to azọ́nmẹ do nukọn na ẹn he tindo sùnmẹkuẹ daho de ṣigba bẹ azọngban daho hẹn. Kavi otọ́ mayisenọ Klistiani jọja de tọn sọgan to obiọ he sọgan yinuwa do lizọnyizọn visunnu etọn tọn ji basi. To ninọmẹ mọnkọtọn lẹ mẹ mẹho lọ na jagọ sọn linlẹn mẹdetiti tọn nina mẹ. Kakatimọ, vlavo e na hùn Biblu bo gọalọna omẹ lọ nado lẹnnupọn do nunọwhinnusẹ́n titengbe lẹ ji. E sọgan yí Index des publications de la Société Watch Tower tọn zan, eyin e tin to aimẹ, nado din nuhe “afanumẹ nugbonọ, nuyọnẹntọ” lọ ko dọ do hosọ lọ ji to weda Atọ̀họ̀-Nuhihọ́ Lọ Tọn po owe devo lẹ po mẹ. (Matiu 24:45) To whelọnu lo etẹwẹ eyin Klistiani lọ basi dide he ma taidi nuyọnẹn-nu to nukun mẹho lọ tọn mẹ? Eyin dide lọ ma gbà nunọwhinnusẹ́n kavi osẹ́n Biblu tọn lẹ tlọlọ, Klistiani lọ na mọdọ mẹho lọ mọnukunnujẹ jlọjẹ mẹdopodopo tọn mẹ nado basi dide mọnkọtọn, to yinyọnẹn mẹ dọ “omẹ dopodopo wẹ na hẹn agbàn ede tọn.” Ṣigba, Klistiani lọ dona flin dọ, “nudepope gbẹtọ do, enẹ wẹ e na gbẹ̀n ga.”—Galatianu lẹ 6:5, 7.
13. Kakati nado na gblọndo tlọlọ hlan kanbiọ lẹ kavi linlẹn yedetiti tọn lẹ nina, naegbọn mẹho lẹ nado gọalọna mẹdevo lẹ nado lẹnnupọn do whẹho lẹ ji?
13 Naegbọn mẹho numimọnọ lọ nado yinuwa to aliho ehe mẹ? E whè gbahu na whẹwhinwhẹn awe wutu wẹ. Tintan, Paulu dọna agun dopo dọ emi ma yin ‘ogán do yise yetọn ji gba.’ (2 Kọlintinu lẹ 1:24) Mẹho lọ, to alọgigọna mẹmẹsunnu etọn nado lẹnnupọn do Owe wiwe lẹ ji bo basi dide edetiti tọn he sinai do oyọnẹn ji, to apajlẹ walọyizan Paulu tọn hodo. E yọnẹn dọ aṣẹpipa emitọn tindo dogbo, kẹdẹdile Jesu yọnẹn dọ dogbo tin na aṣẹpipa emitọn do. (Luku 12:13, 14; Juda 9) To ojlẹ dopolọ mẹ, mẹho lẹ nọ tin to awuwlemẹ nado na alọgọ, yèdọ e tlẹ yin ayinamẹ tlọlọ Owe wiwe tọn tlọlọ to fie nuhudo etọn tin te. Awetọ, azọ́nplọn hatọ Klistiani etọn wẹ ewọ te. Apọsteli Paulu dọmọ: “Núdùdù sinsinyẹn yin yé he tindo azán susu to ota lẹ tọn, yé he gbọn linlẹn zinzan tọn dali yí nuyọnẹn yetọn do to dagbe po oylan po yọnẹn.” (Heblu lẹ 5:14) Gbọnmọ dali, nado whẹ́n zun mẹhe pegan, mí dona yí huhlọn wuntuntun mítọn titi lẹ zan, e ma yin nado nọ ganjẹ mẹde go to whepoponu nado basi dide lẹ na mí gba. Mẹho lọ, gbọn dido lehe yè sọgan lẹnnupọn sọn Owe wiwe lẹ mẹ hia Klistiani hatọ etọn tọn dali, to alọgọna ẹn to aliho ehe mẹ nado zindonukọn.
14. Nawẹ mẹhe whẹ́n lẹ sọgan dohia gbọn dọ yé dotudo Jehovah go?
14 Mí sọgan tindo yise dọ Jehovah Jiwheyẹwhe gbọn gbigbọ wiwe etọn dali na yinuwa do ahún sinsẹ̀n-basitọ nugbonọ lẹ tọn ji. Gbọnmọ dali, Klistiani he whẹ́n lẹ nọ whàn ahún mẹmẹsunnu yetọn lẹ tọn, bo nọ dotuhomẹna yé, dile apọsteli Paulu basi do. (2 Kọlintinu lẹ 8:8; 10:1; Filemọni 8, 9) Paulu yọnẹn dọ mawadodonọ lẹ kẹdẹ, wẹ tindo nuhudo osẹ́n susu lẹ tọn nado hẹn aliho yetọn lẹ jlọ, e mayin dodonọ lẹ gba. (1 Timoti 1:9) E do yise hia to mẹmẹsunnu etọn lẹ mẹ, e ma yin nuvẹdomẹ kavi jimadedomẹgo gba. Hlan agun dopo e wlan dọmọ: “Mí sọ do tugbigbo to Oklunọ mẹ na mìtọn wutu.” (2 Tẹsalonikanu lẹ 3:4) Matin ayihaawe yise, jidedomẹgo, po tugbigbo Paulu tọn po yí onú susu wà nado whàn Klistiani nẹlẹ. Mẹho lẹ po nugopọntọ tomẹyitọ lẹ po to egbehe tindo yanwle dopolọ lẹ. Lehe mẹmẹsunnu nugbonọ ehelẹ yin homẹmimiọnnọ do sọ, dile yé nọ gbọn owanyi dali do nọ penukundo apó Jiwheyẹwhe tọn go!—Isaia 32:1, 2; 1 Pita 5:1-3.
Gbẹ̀ninọ Sọgbe hẹ Osẹ́n Klisti Tọn
15. Etẹwẹ yin delẹ to kanbiọ he mí sọgan kanse mídelẹ mẹ nado yọnẹn vlavo eyin mí to osẹ́n Klisti tọn yizan to haṣinṣan mítọn mẹ hẹ mẹmẹsunnu mítọn lẹ?
15 Mímẹpo tindo nuhudo nado gbadopọnna mídelẹ to gbesisọmẹ nado yọnẹn vlavo eyin mí to gbẹ̀nọ sọgbe hẹ osẹ́n Klisti tọn bosọ to zize e daga. (2 Kọlintinu lẹ 13:5) Na nugbo tọn, mímẹpo sọgan mọaleyi gbọn kinkanse dali dọmọ: ‘Be mẹjlọdotetọ kavi hẹngogonọ wẹ yẹn yin ya? Be jlẹkajinọtọ kavi wazẹjlẹgonọ wẹ yẹn yin ya? Be yẹn nọ hò mẹdevo lẹ tọn pọ́n kavi nọ tẹkú do jlọjẹ ṣie titi lẹ ji wẹ ya?’ Klistiani de ma nọ tẹnpọn nado dọ afọdide he mẹmẹsunnu etọn dona ze kavi ma dona ze to whẹho he ma yin hodọdeji tlọlọ to Biblu mẹ lẹ gba.—Lomunu lẹ 12:1; 1 Kọlintinu lẹ 4:6.
16. Nawẹ mí sọgan gọalọna mẹhe tindo pọndohlan agọ̀ dogbọn yedelẹ dali gbọn, bo gbọnmọ dali do to ada titengbe osẹ́n Klisti tọn de hẹndi?
16 To ojlẹ awusinyẹn tọn ehelẹ mẹ, onú titengbe wẹ e yin na mí nado din aliho lẹ nado na tuli ode awetọ mítọn. (Heblu lẹ 10:24, 25; yijlẹdo Matiu 7:1-5 go.) To whenuena mí pọ́n mẹmẹsunnu po mẹmẹyọnnu mítọn lẹ po, be jẹhẹnu dagbe yetọn lẹ ma zẹẹmẹdo onú susu na mí hugan madogán yetọn lẹ ya? Hlan Jehovah, nuhọakuẹ wẹ dopodopo mítọn yin. E blawu dọ, e ma yin mẹlẹpo wẹ nọ tindo numọtolanmẹ to aliho enẹ mẹ gba, etlẹ yin dogbọn yedelẹ dali. Mẹsusu nọ to nuṣiwa po mapenọ-yinyin yetọn titi lẹ kẹdẹ mọ. Nado na tuli omẹ mọnkọtọn lẹ—po mẹdevo lẹ po—be mí sọgan tẹnpọn nado dọho hẹ omẹ dopo kavi awe to opli dopodopo tẹnmẹ, bo hẹn yé nado yọ́n nuhewutu mí do yọ́n nuhọakuẹ tintin to finẹ yetọn po nujọnu-yinyin nunina he yé nọ basi to agun lọ mẹ po tọn ya? Lehe e yin ayajẹnu nado dè agbànpẹnmẹnu yetọn pò to aliho ehe mẹ bo gbọnmọ dali do hẹn osẹ́n Klisti tọn di do sọ!—Galatianu lẹ 6:2.
Osẹ́n Klisti Tọn to Azọ́n Wà!
17. To aliho voovo tẹlẹ mẹ wẹ hiẹ mọ osẹ́n Klisti tọn to azọ́nwa to agun towe mẹ te?
17 Osẹ́n Klisti tọn to azọ́n wà to agun Klistiani tọn mẹ. Mí nọ mọ ẹn egbesọegbesọ—to whenuena Kunnudetọ hatọ lẹ nọ tindo mahẹ wẹndagbe lọ tọn po jeje po, to whenuena yé miọnhomẹnamẹ bo na tuli ode awetọ, to whenuena yé dovivẹnu nado sẹ̀n Jehovah mahopọnna nuhahun he sinyẹn hugan lẹ, to whenuena mẹjitọ lẹ dovivẹnu nado pọ́n ovi yetọn lẹ go whẹ́n nado yiwanna Jehovah po ahún ayajẹ tọn lẹ po, to whenuena nugopọntọ lẹ plọnmẹ Ohó Jiwheyẹwhe Tọn po owanyi po gọna zohunhun, bo nọ whàn apó lọ nado tindo zohunhun ganji nado sẹn Jehovah kakadoi. (Matiu 28:19, 20; 1 Tẹsalonikanu lẹ 5:11, 14) Lehe e nọ hẹn Jehovah jaya, to whenuena dopodopo mítọn yí osẹ́n Klisti tọn do yizan mẹ to gbẹzan mítọn lẹ mẹ do sọ! (Howhinwhẹn lẹ 23:15) E jlo mẹhe yiwanna osẹ́n pipé etọn lẹpo ni nọgbẹ̀ kakadoi. To Paladisi he ja lọ mẹ, mí na mọ ojlẹ de to whenuena gbẹtọvi lẹ na yin pipé, ojlẹ de matin sẹ́nhẹngbatọ lẹ, podọ ojlẹ de to whenuena ayilinlẹn ahún mítọn mẹ tọn lẹpo na tin to hihọ́ glọ́. Lehe e na yin alemọyinu gigonọ de na gbẹninọ gbọn osẹ́n Klisti tọn dali do sọ!
[Nudọnamẹ odò tọn]
a Owhé mọnkọtọn lẹ gbè ma taidi sinsẹ̀n-pámẹ Mẹylọhodotọklisti tọn lẹ gba. “Abbots,” kavi “otọ́,” lẹ matin to linlẹn enẹ mẹ gba. (Matiu 23:9) Mẹmẹsunnu azọngbannọ lẹ nọ yin nina sisi, ṣigba sinsẹ̀nzọn yetọn nọ yin anadena gbọn nunọwhinnusẹ́n dopolọ lẹ he nọ deanana mẹho lẹpo dali.
Etẹwẹ Hiẹ Lẹn?
◻ Naegbọn Mẹylọhodotọklisti gboawupo nado mọnukunnujẹ onú agokun osẹ́n Klisti tọn mẹ?
◻ Nawẹ mí sọgan yí osẹ́n Klisti tọn do yizan mẹ to whẹndo mẹ gbọn?
◻ Nado yí osẹ́n Klisti tọn do yizan mẹ to agun mẹ, etẹwẹ mí dona dapana, podọ etẹwẹ mí dona wà?
◻ Nawẹ mẹho lẹ sọgan setonuna osẹ́n Klisti tọn to nuyiwa yetọn lẹ mẹ hẹ agun lọ gbọn?
[Yẹdide to weda 30]
Nuhudo he klo hugan ovi towe tọn wẹ owanyi
[Yẹdide to weda 31]
Lehe mẹho yiwanna mítọn lẹ yin homẹmimiọnnọ do sọ!