Lilatọ Ahọluduta lọ Tọn lẹ Na Linlin

Nugbo Biblu Tọn lẹ to Nukọnzindo Nado Yin Yẹwheho Etọn Dọ to Irlande

TO OWHE agọe tọn lẹ mẹ otò nupinpọn Irlande tọn ko lẹzùn oplò na nuyiwa hunyanhunyan daho tọn. To ojlẹ dopolọ mẹ, omẹ Irlande tọn lẹ ko yigbe dagbe hlan owẹ̀n todido Biblu tọn he yin hinhẹn wá yé dè gbọn Kunnudetọ Jehovah Tọn lẹ dali. Numimọ he bọdego lọ sọn Irlande do ehe hia.

■ To Dublin dopo to Kunnudetọ Jehovah Tọn lẹ mẹ po ovi yọnnu jọja etọn po to mahẹ tindo to azọ́n yẹwhehodidọ họndekọ̀n-jẹ-họndekọ̀n tọn mẹ. Yé dukosọ hẹ yọnnu de he nọ yin Cathy he alọnu etọn ján taun po ovi susu etọn lẹ po. Kunnudetọ lọ kanse eyin viyọnnu etọn, he to pinplọn lehe yè nọ dọyẹwheho gbọn, sọgan má owẹ̀n kleun de hẹ ẹ. Cathy kẹalọyi, podọ ovi yọnnu pẹvi lọ na nuzedonukọnnamẹ họnwun, he yin awuwlena ganji de. Homẹ Cathy tọn hùn na ahundoponọ-yinyin po sisi tintindo viyọnnu lọ tọn he họnwun po, podọ e kẹalọyi nuzedonukọnnamẹ alọnuwe pẹvi Biblu tọn de.

To nukọnmẹ Cathy lẹnnupọn do awuwle po walọyizan dagbe ovivu mẹdlapọntọ lọ tọn ji. “Homẹhun mi dọ viyọnnu pẹvi de sọgan má owẹ̀n ojlofọndotenamẹ tọn mọnkọtọn de matin kikla,” e dọmọ. “Yẹn basi nudide dọ whedevonu he Kunnudetọ Jehovah Tọn lẹ basi dlapọn, yẹn na dotoai hlan yé.”

To ojlẹ dopolọ mẹ Cathy sẹtẹn yì otò pẹvi de to hùwaji whèyihọ Irlande tọn mẹ sẹpọ dogbo aimatẹn Cork po Kerry po tọn. To ojlẹ vude godo Kunnudetọ Jehovah Tọn lẹ basi dlapọn wá ohọ̀n etọn ji, podọ e ylọ yé biọ họmẹ. E kẹalọyi plọnmẹ Biblu gbesisọ tọn de podọ todin nọ wá opli agun tọn lẹ gọna delẹ to ovi etọn lẹ mẹ. Cathy yin homẹhunnọ na ojlo nujọnu viyọnnu pẹvi lọ tọn nado má wẹndagbe lọ hẹ ẹ.

■ To awà otò Tullamore tọn ji, Kunnudetọ lẹ tindo hodọdopọ Biblu tọn hẹ yọnnu de he nọ yin Jean hugan ojlẹ owhe ṣinawe tọn lẹ. Whedelẹnu e nọ do ojlo hia bo nọ kẹalọyi owé, ṣigba to ojlẹ devo mẹ ojlo etọn nọ depò. To gbedopo, to whenuena Kunnudetọ he nọ yin Frances po gbẹdohẹmẹtọ de po basi dlapọn sọyi Jean de, yé mọ ẹn to agọjẹdomẹ homẹgble sinsinyẹn tọn de mẹ. Kunnudetọ lọ lẹ na linlin dọmọ: “Mahopọnna nudepope he mí dọ, e nọ lẹzùn adìnọ dogọ. To godo mẹ, e dọna mí nado bu sọn nukunmẹ na emi bo sú ohọ̀n lọ vaun.”

E paṣa Frances eyin dlapọn dogọ lẹ na hẹn nuyiwa mọnkọtọn kẹdẹ wá. ‘E ma tlẹ sọ jẹ ba nado basi dlapọn na ẹn eyin na nugbo tọn e ma tindo ojlo to owẹ̀n lọ mẹ,’ wẹ yin nuhe Frances lẹ̀n. Etomọṣo e dọho do whẹho lọ ji hẹ asu etọn, Thomas, podọ e yin todidonọ dogọ. Ojlẹ devo mẹ he yé wá lẹdo lọ mẹ, dlapọn devo yin bibasi na Jean. E yin họntọn jihẹmẹtọ bo kẹalọyi vọkan Atọ̀họ̀-Nuhihọ́ Lọ Tọn po Réveillez-vous! tọn lẹ po. Dlapọn dogọ lẹ yin ayajẹnu, podọ Thomas po Frances po bẹ plọnmẹ Biblu whégbè gbesisọ tọn de jẹeji hẹ ẹ.

Naegbọn e do diọ? Jean basi zẹẹmẹ dọ to ojlẹ he mẹ emi yinuwa po osi matindo po hlan Kunnudetọ lẹ, emi ṣẹṣẹ ji bosọ ṣẹṣẹ gọ̀ sọn dotowhé wẹ. Na anọnina ovivu etọn po ṣivi yíyí do na núdùdù ovivu mẹho etọn po wutu, amlọn ganhiho dopo-daa tọn poun wẹ e nọ tindo to ozanmẹ. “Onú godo tọn he yẹn sọgan wà,” Jean dọmọ, “wẹ nado dọho dogbọn sinsẹ̀n dali.”

To gblagbla osun awe tọn mẹ Jean ko to opli agun tọn lẹpo yì, podọ to osun ẹnẹ gblamẹ e ko jẹ mahẹ tindo ji to lizọnyizọn kunnudegbe tọn mẹ. Osun ao sọn ojlẹ he mẹ e bẹ plọnmẹ Biblu etọn jẹeji, e yí baptẹm. Todin numimọ Jean tọn titi gọalọna ẹn to lizọnyizọn lọ mẹ. E dọmọ: “Eyin yẹn mọ zingidinọ taun de, yẹn nọ tẹnpọn nado yin nukunnumọjẹnumẹtọ hugan. Yẹn nọ saba basi kandai etọn. Vlavo ninọmẹ lọ sọgan diọ to ojlẹ devo mẹ he yẹn lẹkọ wá; omẹ lọ sọgan to numọtolanmẹ dagbe tindo bo na yin todoaitọ dagbe.”