Be Hiẹ Nọ Dibu Nado Dejido Mẹdevo lẹ Go Wẹ Ya?

‘MẸDEPOPE matin he yẹn sọgan dọho hẹ. Gbẹtọ lẹ ma na mọnukunnujẹemẹ. Alọnu yé lọsu tọn lẹ ko ján po nuhahun yetọn titi lẹ po. Yé ma tindo whenu na ṣie tọn gba.’ Mẹsusu nọ tindo numọtolanmẹ to aliho enẹ mẹ, enẹwutu yé nọ hẹn linlẹn yetọn lẹ do hòmẹ. Whenuena mẹdevo lẹ kàn lehe yé te do sè, yé nọ saba jlo nado dọ na yé, ṣigba yé ma nọ wà mọ gba. E nọ vẹawu na yé nado dọ linlẹn yetọn tọ́n.

Nugbo wẹ dọ, mẹdelẹ tin he ma nọ jlo alọgọ sọn mẹdevo lẹ si. Ṣogan, mẹsusu jlo alọgọ egblemaku tọn ṣigba nọ dibu nado dọ linlẹn, numọtolanmẹ, po numimọ yetọn lẹ po tọ́n po awubibọ po. Be dopo to yé mẹ wẹ hiẹ yin ya? Be mẹdepope matin he go hiẹ sọgan dejido nugbonugbo ya?

Nukunnumọjẹ Obu lọ Mẹ

To aihọn egbezangbe tọn mẹ lẹdo jimadedomẹgo tọn de tin. Jọja lẹ ma nọ dọho hẹ mẹjitọ yetọn lẹ. Mẹjitọ lẹ ma sọgan dọho hẹ ode awetọ yetọn lẹ. Omẹ vude wẹ nọ jlo nado dọho hẹ aṣẹpatọ lẹ. To ma penugo nado dọhòmẹna mẹdevo lẹ, mẹdelẹ ko lẹhlan ahàn sinsinyẹn, amasìn-adínọ lẹ kọ̀n, kavi gbẹzan gbévún tọn zinzan nado sọgan tẹnpọn bo họngán sọn nuhahun yetọn lẹ mẹ.—Howhinwhẹn lẹ 23:29-35; Isaia 56:12.

Jidide do mẹhe tin to otẹn aṣẹpipa tọn mẹ lẹ go, taidi sinsẹ̀ngan lẹ, doto lẹ, doto ayinamẹtọ lẹ, po mẹplọntọ lẹ po, ko yin whinwhàn gbọn madosọha nugbomadọ po fẹnnuwiwa po dali. Di apajlẹ, nulinlẹn de dọ dọ hugan sinsẹ̀ngan 10 to kanweko ji wẹ tindo mahẹ to walọyizan agọ̀ zanhẹmẹ tọn mẹ. Wekantọ dopo doayi e go dọ, “jidedomẹgo husudotọ [ehelẹ], hẹn kinklan daho wá to haṣinṣan gbẹtọvi lẹ tọn mẹ.” Nawẹ ehe nọ gando agun yetọn lẹ go gbọn? E nọ và jidedomẹgo sudo.

Aijijẹ gbayipe walọ dagbe tọn lẹ ko sọ dekọtọn do hunyanhunyan mẹ to whẹndo mẹ, sọmọ bọ nuyiwa ylankan whẹndo tọn lẹ dibla lẹzun walọyizan tangan, ode mayin didedovo gba. Whégbè ko yin lẹdo mẹgopinpọn tọn dai. To egbehe e ma yí nude do hugan mọto-jladotẹn gba. To whenuena ovi de whẹ́n to whẹndo he mẹ “owanyi hẹnnumẹ tọn” matin te, kọdetọn he gbayipe de wẹ yin nugopipe matindo lọ nado dejido mẹdevo lẹ go to whenuena e whẹ́n.—2 Timoti 3:3.

Yinukọn dogọ, dile ninọmẹ aihọn tọn lẹ to yinylan deji, mí to yinyin hunhundonuvo hugan na yọnbasi numimọ awugble dẹn-to-aimẹ lẹ tintindo. To ninọmẹ dopolọ mẹ, yẹwhegan Mika wlan dọmọ: “Mì dotu to họntọn de mẹ blo.” (Mika 7:5) Hiẹ sọgan tindo numọtolanmẹ dopolọ to mẹhẹnjẹflumẹ he ma sinyẹn sọmọ, aṣli towe didegbà, kavi to nujijọ he ze ogbẹ̀ towe do owù mẹ de godo. Hiẹ na mọ ẹn taidi nuhe vẹawu nado vọ́ dejido mẹdevo lẹ go bo na lẹzun mẹhe tindo bẹwlu to numọtolanmẹ liho, bo nọ to gbẹ̀nọ egbesọegbesọ to aliglọnnamẹnu numọtolanmẹ tọn mẹ. (Yijlẹdo Psalm 102:1-7 go.) Nugbo wẹ dọ, walọyizan mọnkọtọn sọgan gọalọna we nado to nukọnzindo, ṣigba “awubla ayiha tọn” towe na fìn ayajẹ depope he hiẹ sọgan tindo to gbẹzan mẹ. (Howhinwhẹn lẹ 15:13) Nugbo lọ wẹ yindọ, na hiẹ nado tindo agbasalilo to gbigbọ liho, numọtolanmẹ liho, apọnmẹ liho, podọ to agbasa liho, aliglọnnamẹnu enẹ dona yin didesẹ podọ hiẹ dona plọn nado dejido gbẹtọ lẹ go. Be enẹ yọnbasi ya? Mọwẹ.

Naegbọn Aliglọnnamẹnu lọ Dona Yin Didesẹ?

Hòmẹdidọ na mẹdevo lẹ nọ hẹn kọgbọ wá na ayiha he yin tuklado de. Hanna tindo numimọ ehe. E tindo alọwle dagbe de, owhé he tindo hihọ́ de, ṣigba e tindo ayimajai sisosiso. Dile etlẹ yindọ e tin to “vivẹ́ ayiha tọn mẹ,” po nuyọnẹn po e “hodẹ̀ hlan Oklunọ” jẹ obá he mẹ nùflo etọn lẹ to whinwhàn ma dọhó. Mọwẹ, e dọhòmẹna Jehovah. Enẹgodo e hùn ayiha etọn na nukunmọnu Jiwheyẹwhe tọn Eli. Po kọdetọn tẹ po? “[Hanna] wleali etọn yì, bo dùnú, nukunmẹ etọn ma sọ yin awublanọ ba.”—1 Samuẹli 1:1-18.

Aṣa susu lẹ ko yọ́n alemọyinu aṣliho didọ tọn lẹ. Di apajlẹ, linlẹn lẹ po numimọ lẹ po mimá hẹ mẹhe ko tin to ninọmẹ dopolọ mẹ lẹ sọgan sọawuhia nado yin alemọyinu. Dodinnanutọ lẹ dotana dọmọ: “Tintin to kada to numọtolanmẹ liho nọ hẹnmẹ jẹazọ̀n—mí dona dọhòmẹ tọ́n bo jẹgángán to apọ̀nmẹ.” Sọha dodinnanu lẹnunnuyọnẹn he to jijideji tọn do nugbo-yinyin howhinwhẹn gbọdo lọ tọn hia dọmọ: “Ewọ he klan ede do ovò na domọ́ na ojlo ede tọn, bosọ diọavunnukunsọ nudepope he yin zìnzìn tọn.”—Howhinwhẹn lẹ 18:1.

Eyin hiẹ ma nọ dọhòmẹ na mẹdevo lẹ, nawẹ yé sọgan gọalọna we gbọn? To whenuena e yindọ Jehovah Jiwheyẹwhe wẹ ayiha yọnẹntọ, whẹndo po họntọn towe lẹ po ma yọ́n linlẹn po numọtolanmẹ sisosiso towe lẹ po gba—adavo hiẹ dọ yé tọ́n. (1 Otannugbo lẹ 28:9) To whenuena nuhahun lọ gando osẹ́n Jiwheyẹwhe tọn hinhẹngba go, zize ylando lọ didọ tọ́n whla nọ hẹn whẹho lọ ylan poun wẹ.—Howhinwhẹn lẹ 28:13.

Na jide tọn, alemọyinu ayimajai didọ tọ́n na mẹdevo lẹ klo hugan owù yinyin awugblena tọn tlala. Nugbo wẹ dọ, enẹ ma zẹẹmẹdo dọ mí dona nọ dọ aṣli mẹdetiti tọn to gigọ́mẹ na mẹdepope gba. (Yijlẹdo Whẹdatọ 16:18; Jẹlemia 9:4; Luku 21:16 go.) “Ewọ he tindo họntọn lẹ basi i na viva ede tọn,” wẹ nugbẹnamẹ Howhinwhẹn lẹ 18:24 tọn ṣigba yidogọ to enẹgodo dọmọ: “Họntọn de sọ tin bo sẹpọmẹ hú nọvisunnu.” Fie wẹ hiẹ sọgan mọ họntọn mọnkọtọn de te?

Dejido Whẹndo Towe Go

Eyin hiẹ tindo nuhahun de, be hiẹ ko tẹnpọn nado dọhodeji hẹ awetọ towe to alọwlemẹ kavi hẹ mẹjitọ towe lẹ ya? “Na nuhe dù nuhahun susu lẹ, hodọdopọ sisosiso do yé ji wẹ yin nuhudo lọ,” wẹ ayinamẹtọ numimọnọ lọ doayi e go. (Howhinwhẹn lẹ 27:9) Asu Klistiani he ‘yiwanna asi yetọn taidi yedetiti lẹ,’ asi he “nọ basi mẹmẹglọ hlan asu [yetọn] lẹ,” podọ mẹjitọ he nọ yí azọngban he yin dide na yé gbọn Jiwheyẹwhe dali do do nujọnu nado ‘pọ́n ovi yetọn lẹ go whẹ́n to pọndohlan linlẹn Jehovah tọn mẹ’ lẹ na wazọ́n sinsinyẹn nado lẹzun todoaitọ awuvẹmẹtọ lẹ po ayinamẹtọ alọgọtọ lẹ po. (Efesunu lẹ 5:22, 33; 6:4) Dile etlẹ yindọ e ma tindo asi kavi ovi lẹ to linlẹn agbasa liho tọn mẹ do, apajlẹ jiawu nankọtọn die Jesu zedai to pọndohlan ehe mẹ!—Malku 10:13-16; Efesunu lẹ 5:25-27.

Eyin nuhahun lọ hugan nuhe whẹndo lọ sọgan penukundego ka lo? To agun Klistiani tọn mẹ, mí ma dona tin mídelẹ ṣokẹdẹ gba. “Mẹnu wẹ yin madogánnọ, bọ yẹn mayin madogánnọ?” wẹ apọsteli Paulu dọ. (2 Kọlintinu lẹ 11:29) E dotuhomẹnamẹ dọmọ: “Mì nọ hẹn agbàn mìnọzo tọn.” (Galatianu lẹ 6:2; Lomunu lẹ 15:1) Matin ayihaawe to mẹmẹsunnu po mẹmẹyọnnu gbigbọmẹ tọn mítọn lẹ po ṣẹnṣẹn, mí sọgan mọ hugan dopo to ‘mẹmẹsunnu he yin jiji to whenuena ayimajai tin.’—Howhinwhẹn lẹ 17:17.

Dejido Agun lọ Go

To hugan agun 80 000 Kunnudetọ Jehovah Tọn lẹ tọn mẹ lẹdo aihọn pé, sunnu whiwhẹnọ lẹ tin he to sinsẹ̀nzọn wà taidi “alọgọnamẹtọ ayajẹ mìtọn tọn.” (2 Kọlintinu lẹ 1:24) Omẹ ehelẹ wẹ mẹho lẹ. Isaia doayi e go dọmọ: “Gbẹtọ dopo na taidi otẹn whiwhla tọn sọn jẹhọn nù, bẹtẹn sọn yujẹhọn nù; di otọ̀ osìn tọn to ofi húhú, di oyẹ awinyan daho tọn to aigba húhú ji.” Enẹ wẹ mẹho lẹ nọ tẹnpọn nado yin.—Isaia 32:2; 50:4; 1 Tẹsalonikanu lẹ 5:14.

Mẹho lẹ nọ jẹ nubiọtomẹsi Owe wiwe lẹ tọn kọ̀n jẹnukọnna yinyin ‘dide gbọn gbigbọ wiwe dali.’ Ehe yinyọnẹn na hẹn jide towe to yé mẹ lodo. (Owalọ lẹ 20:28; 1 Timoti 3:2-7; Titu 1:5-9) Nuhe hiẹ dọna mẹho de na gbọṣi ohò etọn mẹ pete kẹdẹdi aṣliho. Yinyin mẹhe go yè dejido yin dopo to jẹhẹnu etọn lẹ mẹ.—Yijlẹdo Eksọdusi 18:21; Nẹhemia 7:2 go.

Mẹho agun mẹ tọn lẹ “to alindọn [towe] họ́, yé he ma sọgan nọma dogbè onú yé wà lẹ tọn.” (Heblu lẹ 13:17) Be ehe ma whàn we nado ze jide towe do omẹ ehelẹ mẹ ya? To jọwamọ liho, e mayin mẹho lẹpo wẹ yiaga to jẹhẹnu dopolọ lẹ mẹ gba. Mẹdelẹ sọgan sọawuhia nado yin mẹhe yè sọgan dọnsẹpọ hugan, jọmẹ, kavi yin nukunnumọjẹnumẹtọ hugan mẹdevo lẹ. (2 Kọlintinu lẹ 12:15; 1 Tẹsalonikanu lẹ 2:7, 8, 11) Naegbọn hiẹ ma do hùnhòmẹ na mẹho he mẹ ayiha towe nọ jai te?

Sunnu ehelẹ ma yin azọ́nyọnẹntọ he nọ yin ahọ́ sú gba. Kakatimọ, ‘nunina to gbẹtọ lẹ mẹ,’ he yin awuwlena gbọn Jehovah dali nado gọalọna we wẹ yé yin. (Efesunu lẹ 4:8, 11-13; Galatianu lẹ 6:1) Gbọnna? To Biblu yiyizan po azọ́nyinyọnẹn po mẹ, yé na yí huhlọn mẹhẹnjẹgángán etọn zan do ninọmẹ mẹdetiti towe tọn ji. (Psalm 107:20; Howhinwhẹn lẹ 12:18; Heblu lẹ 4:12, 13) Yé na hodẹ̀ hẹ we podọ na we. (Filippinu lẹ 1:9; Jakobu 5:13-18) Alọgọ sọn ayinamẹtọ owanyinọ mọnkọtọn dè sọgan yí onú susu wà nado hẹn gbigbọ he to yinyin tuklado de jẹ gángán bo na hẹn jijọho ayiha mẹ tọn wá.

Lehe Yè Sọgan Wleawuna Haṣinṣan Jidedomẹgo Tọn lẹ Gbọn

Alọgọ po ayinamẹ po dindin, kavi todoai poun mayin ohia madogán kavi awugbopo tọn gba. Gbeyiyi lẹnpọn dagbe tọn de poun wẹ e yin dọ mapenọ wẹ mí yin podọ dọ mẹdepope ma tindo gblọndo lẹpo gba. Na nugbo tọn, ayinamẹtọ po mẹhe go yè sọgan dejido he klo hugan he mí tindo lọ wẹ Otọ́ olọn mẹ tọn mítọn, Jehovah Jiwheyẹwhe. Mí yigbe po psalmkantọ lọ po mẹhe wlan dọmọ: “Oklunọ wẹ huhlọn ṣie, awọ̀yínú ṣie; ewọ go wẹ ayiha ṣie dotudo, yè sọ gọalọna mi.” (Psalm 28:7) To odẹ̀ mẹ mí sọgan ‘dọ nuhe tin to ahun mítọn mẹ’ lẹpo na ẹn to whedepopenu, po jide lọ po dọ e nọ sè bo nọ penukundo mí go.—Psalm 62:7, 8; 1 Pita 5:7.

Ṣigba nawẹ hiẹ sọgan plọn nado dejido mẹho lẹ po mẹdevo lẹ po go to agun lọ mẹ gbọn? Tintan, gbadopọnna dewe. Be obu towe lẹ tindo whẹwhinwhẹ́n he lodo ya? Be hiẹ nọ vẹnudo linlẹn mẹdevo lẹ tọn wẹ ya? (1 Kọlintinu lẹ 13:4, 7) Be aliho de tin nado dè owù yinyin awugblena tọn pò ya? Mọwẹ. Gbọnna? Tẹnpọn nado jẹakọ hẹ mẹhe hiẹ jlo nado dè taidi mẹhe go hiẹ na dejido to aliho gbigbọmẹ tọn mẹ. Dọho hẹ yé to opli agun tọn lẹ tẹnmẹ. Tindo mahẹ to azọ́n whédegbè-jẹ-whédegbè tọn mẹ dopọ. Alè jidedomẹgo, taidi sisi, dona yin dùdù. Enẹwutu whèsọ. Di apajlẹ, dile hiẹ wá yọnẹn taidi lẹngbọhọtọ gbigbọmẹ tọn de, jide towe to ewọ mẹ na jideji. Do nuduahunmẹnamẹ towe hia vudevude. Eyin e na gblọndo to aliho he sọgbe, awuvẹmẹ, po nuyọnẹn po tọn mẹ, to whelọnu lo hiẹ sọgan tẹnpọn nado dè aṣliho susu tọ́n.

Hatọ sinsẹ̀n-basitọ Jehovah tọn lẹ, titengbe mẹho Klistiani lẹ, wazọ́n sinsinyẹn nado hodo apajlẹ jẹhẹnu họakuẹ Jiwheyẹwhe tọn lẹ to haṣinṣan yetọn lẹ mẹ hẹ ode awetọ yetọn. (Matiu 5:48) Ehe nọ dekọtọn do lẹdo jidedomẹgo tọn mẹ to agun lọ mẹ. Mẹhe ko yin mẹho na whenu dindẹn de dọmọ: “Mẹmẹsunnu lẹ dona yọ́n onú dopo, enẹ wẹ yin: Mahopọnna nuhe mẹde nọ wà, mẹho lọ ma nọ gbẹkọ owanyi Klistiani tọn go na ẹn gba. E sọgan gọ̀n ma yiwanna nuhe jọ lọ, ṣigba e gbẹ́ yiwanna mẹmẹsunnu etọn bo jlo nado gọalọna ẹn.”

Enẹwutu nuhudo de matin nado tindo numọtolanmẹ ṣokẹdẹninọ tọn po nuhahun de po gba. Dọho hẹ mẹhe “yin gbigbọnọ” de he sọgan gọalọna we nado didá agbanpẹnmẹnu towe. (Galatianu lẹ 6:1) Flin dọ “awubla to ayiha gbẹtọ tọn mẹ wẹ nọ hẹn ẹn dokọdo,” ṣigba “ohó vivi taidi owinja, e vivi na ayiha, e sọ hẹn ohú jẹ gángán.”—Howhinwhẹn lẹ 12:25; 16:24.

[Apotin to weda 4]

Klistiani depope sọgan yin oylọ-basina nado gọalọna hẹnnumẹ de, họntọn de, kavi mẹmẹsunnu gbigbọmẹ tọn de po nuhahun mẹdetiti tọn de po. Be hiẹ yọ́n lehe hiẹ sọgan gọalọ gbọn ya?

AYINAMẸTỌ KỌDETỌN DAGBENỌ DE

yin mẹhe yọ́n dọnsẹpọ: Matiu 11:28, 29; 1 Pita 1:22; 5:2, 3

nọ dè nọtẹn he sọgbe: Malku 9:33-37

nọ din nado mọnukunnujẹ nuhahun lọ mẹ: Luku 8:18; Jakobu 1:19

ma nọ yinuwa zẹjlẹgo: Kọlọsinu lẹ 3:12-14

nọ gọalọ po numọtolanmẹ awufiẹsa tọn lẹ po: 1 Tẹsalonikanu lẹ 5:14; 1 Pita 3:8

nọ yọ́n madogán edetiti tọn lẹ: Galatianu lẹ 6:3; 1 Pita 5:5

nọ na ayinamẹ tangan lẹ: Psalm 19:7-9; Howhinwhẹn lẹ 24:26

nọ hẹn aṣliho: Howhinwhẹn lẹ 10:19; 25:9