Be Azọ́njiawu Azọ̀nhẹngbọ Tọn lẹ Gbẹ́ Nọ Jọ Wẹ Ya?

“KẸALỌYI Jesu bo yin azọ̀nhẹngbọna!” Aṣagbe nulilá taidi ehe nkọtọn tọn hẹn Alexandre, hagbẹ ṣọṣi Evangelisti tọn de, nado yise dọ amasin zinzan na awutuzọ̀n etọn na do yise matindo hia. E yin dududeji dọ yise emitọn kẹdẹ na hẹn azọ́njiawu azọ̀nhẹngbọ tọn he e tindo nuhudo etọn lọ wá. Benedita, Katholiki vivẹnunọ de, yin nuyiwadeji sisosiso to whenuena e se dogbọn azọ̀nhẹngbọ jiawu to fiwiwe Aparecida do Norte tọn dali, to tohọluduta São Paulo, Brésil tọn mẹ. To hogbe bogbèsisa tọn delẹ heyin pinplọn ẹn gbọn nafẹ́ etọn dali yiyizan mẹ, Benedita hodẹ̀ hlan Awhlivu Mítọn Aparecida Tọn, yèdọ Anthony, po “mẹwiwe” devo lẹ po na huhlọn nado hẹnazọ̀ngbọna awutunọ lẹ.

Eyin nuhe họnwun dọ, etlẹ yin to vivọnu owhe kanweko 20tọ tọn, mẹsusu gbẹ́ tindo yise to azọ́njiawu azọ̀nhẹngbọ tọn mẹ—ṣigba naegbọn? Vlavo, apọ̀ nọ ṣì mẹdelẹ to whenuena doto lẹ ma penugo nado wà nude sọmọ nado hẹn pọngbọ wá na awutu, awufiẹsa, po yajiji mẹyiwanna yetọn lẹ tọn po, titengbe ovi yetọn lẹ tọn. Mẹhe yin yasana gbọn awutu sinsinyẹn dali lẹ sọgan mọtolanmẹ dọ to pọndohlan agayiyi akuẹ amasin egbezangbe tọn lẹ tọn mẹ, yé ma tindo nudepope nado hẹngu to dindin yise azọ̀nhẹngbọ tọn gba. Mẹdelẹ nọ mọ to nuzedonukọnnamẹ televiziọn tọn po ṣọṣi voovo lẹ tọn po mẹ mẹdopodopo he nọ ze pọngbọ na SIDA, flumẹjijẹ, azọ̀n agbasa wiwọ̀ tọn, apọ̀nmẹzọ̀n, finfọndaga ohùn tọn zẹjlẹgo, po awutu susu devo lẹ po donukọnnamẹ. Vlavo yé tindo yise depope to alọsọakọn mọnkọtọn lẹ mẹ kavi lala, yé sọgan lẹhlan yé taidi pọngbọ godo tọn lọ. Ṣogan mẹdevo lẹ he yise dọ awutuzọ̀n yetọn lẹ yin dindọnwá gbọn gbigbọ ylankan lẹ dali sọgan mọtolanmẹ dọ amasin kẹalọyi lẹ ma tindo huhlọn nado gọalọna yé.

To alọ devo mẹ, mẹdevo lẹ tin he jẹagọdo sinsinyẹn, tlẹ gblewhẹdo, linlẹn azọ́njiawu azọ̀nhẹngbọ tọn lẹ gbọn “mẹwiwe” he kú lẹ kavi azọ̀nhẹngbọtọ he tin to ogbẹ̀ lẹ dali. Sọgbe hẹ Jornal da Tarde, amasinzọnwatọ Dráusio Varella mọtolanmẹ dọ yise lọ “vlẹ yise mayọndenọ lẹ tọn po mẹhe ma tindo todido lẹ tọn po.” E yidogọ dọmọ: “To todido tintindo to azọ́njiawu mẹ, mẹsusu ko gbẹ́ nukunpedomẹgo dotowhé tọn nujọnu tọn lẹ dai na mẹklọtọ ehelẹ tọn wutu.” Podọ The New Encyclopædia Britannica basi zẹẹmẹ dọmọ: “Azọ̀nhẹngbọ he mayin amasin tọn ehelẹ to ojlẹ he ko wayi mẹ yin kinkọndopọ hẹ fiwiwe lẹ po nuwiwa sinsẹ̀n tọn lẹ po, podọ amasìnzọ́n lẹnunnuyọnẹn tọn ko jlo nado ze azọ̀nhẹngbọ mọnkọtọn lẹ hlan nuyiwa ayinamẹ azọ́nwiwa he sọgbe lẹ to ninọmẹ he yọ́n lẹ glọ.” Ṣogan, mẹsusu tin he yise taun dọ yé yin azọ̀nhẹngbọna gbọn azọ́njiawu dali. Na yewlẹ, azọ̀nhẹngbọ lọ nọ wazọ́n!

Mẹhe jẹakọ hẹ Biblu lẹ yọnẹn dọ Jesu Klisti hẹnazọngbọna awutunọ lẹ to nujijọ susu whenu, wiwà ehe gbọn “gigodaho Jiwheyẹwhe tọn” dali. (Luku 9:42, 43) Nalete e sọgan paṣa yé dọ, ‘Be huhlọn Jiwheyẹwhe tọn gbẹ́ po to nuyiwa bo to azọ́njiawu azọ̀nhẹngbọ tọn lẹ basi to egbehe wẹ?’ Eyin mọwẹ, naegbọn tintẹnpọn nado hẹnazọngbọ lẹ nọ gboawupo nado hẹn kọdetọn dopagbe lẹ wá? Be na awutunọ lọ ma tindo yise he pe kavi na nunina etọn ma klo sọmọ wutu wẹ? Be e jẹ na Klistiani de nado din azọ́njiawu azọ̀nhẹngbọ tọn to whenuena e to yaji sọn awutu vẹadi de kavi vlavo awutu he ma tindo pọngbọ de si ya? Podọ be wunmẹ azọ́njiawu azọ̀nhẹngbọ magbọvọ he Jesu basi lẹ na sọ wá jọ pọ́n gbede ya? Hiẹ sọgan mọ gblọndo na kanbiọ nujọnu tọn ehelẹ to hosọ he na bọdego lọ mẹ.