Gbẹninọ Na Egbehe Kavi Na Sọgodo Madopodo De?
“Gbọn todido dali wẹ yè whlẹn mí.”—LOMUNU LẸ 8:24.
1. Etẹwẹ Nuvividutọ lẹ plọnmẹ, podọ nawẹ wunmẹ tamẹnuplọnmẹ enẹ tọn yinuwa do Klistiani delẹ ji gbọn?
APỌSTELI Paulu kanwe hlan Klistiani he tin to Kọlinti lẹ dọmọ: “Nawẹ omẹ delẹ to mì mẹ to didọ do dọ fọnsọnku oṣiọ lẹ tọn de ma tin?” (1 Kọlintinu lẹ 15:12) E họnwun dọ, tamẹnuplọnmẹ adínọ nuyọnẹn Nuvividutọ Glẹki tọn lọ ko lìn biọ Klistiani owhe kanweko tintan tọn lẹ ṣẹnṣẹn. Gbọnmọ dali Paulu lẹ́ ayidonugo hlan nuplọnmẹ Nuvividutọ lọ lẹ tọn dọmọ: “Mì gbọ mí ni to dùdù bo to nùnù, na osọ̀ wẹ mí na kú.” (1 Kọlintinu lẹ 15:32) To todido ogbẹ̀ to okú godo tọn depope gbigbẹdai, hodotọ tamẹnuplọnmẹtọ lọ tọn lẹ yise dọ gbẹ̀fẹdudu wẹ yin onú tangan kavi onú titengbe lọ to gbẹ̀mẹ. (Owalọ lẹ 17:18, 32) Tamẹnuplọnmẹ gbẹ̀fẹdutọ tọn yin ṣejannabinọ, he go yè ma sọgan deji do, podọ yigodo yinukọn to gbigblezọn.
2. (a) Naegbọn e do yin owunu sọmọ nado gbẹ́ fọnsọnku lọ? (b) Nawẹ Paulu na huhlọn yise Klistiani Kọlinti tọn lẹ gbọn?
2 Gbigbẹ́ fọnsọnku dai tindo nugandomẹgo lẹnpọn sisosiso tọn. Paulu yihojlẹdohogo dọmọ: “Ṣigba eyin fọnsọnku oṣiọ lẹ tọn de ma tin, be yè ma ze Klisti tite gba; eyin yè ma sọ ze Klisti tite, be ovọ́ wẹ yẹwhehodidọ mítọn yín, ovọ́ wẹ yise mítọn sọ yín ga. . . . Eyin e yín ogbẹ̀ mẹ fi ṣokẹdẹ wẹ mí dotódido te to Klisti mẹ, be míwlẹ wẹ lèlènọ susu to gbẹtọ lẹpo mẹ.” (1 Kọlintinu lẹ 15:13-19) Mọwẹ, matin todido sọgodo madopodo tọn, Klistiani-yinyin na yin ‘to ovọ́ mẹ.’ E ma na tindo lẹndai depope. Abajọ, to whelọnu lo, bọ to nuyiwadomẹji lẹnpọn kosi tọn ehe mẹ, agun Kọlinti tọn ko lẹzun nọtẹn fie nuhahun lẹ nọ wleawu te po awubibọ po. (1 Kọlintinu lẹ 1:11; 5:1; 6:1; 11:20-22) Enẹwutu, Paulu jlo nado hẹn yise yetọn lodo to fọnsọnku mẹ. To Owe wiwefọ, po apajlẹ lẹnpọn dagbenọ hugan lẹ yiyizan po mẹ, e dohia zẹ̀ ayihaawe depope tintindo go dọ todido fọnsọnku tọn mayin otangblo gba ṣigba yin nugbo he na mọ hẹndi yí. To dodonu ehe ji, e sọgan dotuhomẹna hatọ yisenọ etọn lẹ dọmọ: “Mì yín tenọglinọ, masẹafọ, bo nọ to susudeji to azọ́n Oklunọ tọn mẹ whepoponu, sọle mì yọnẹn do dọ tuklajẹ mìtọn ma yín ovọ́ to Oklunọ mẹ gba.”—1 Kọlintinu lẹ 15:20-58.
“Mì Gbọṣi Nukle”
3, 4. (a) Sọgbe hẹ Pita, walọyizan owunọ tẹwẹ na duto mẹdelẹ ji to azán godo tọn lẹ whenu? (b) Etẹwẹ mí dona nọ to finflin mídelẹ?
3 To egbehe, mẹsusu yin ayihaawenọ, bo nọ tindo walọyizan gbẹninọ na egbehe tọn. (Efesunu lẹ 2:2) E taidi lehe apọsteli Pita dọ dọdai etọn do. E dọ dogbọn “mẹvlẹtọ lẹ [he] na wá po ovlẹ po . . . didọmọ, Fie wẹ opagbe gigọwa etọn tọn te? Na sọn whenuena otọ́ mítọn lẹ ko damlọn doponẹ wẹ onú popo te sọn whẹwhẹwhenu nudida tọn gbọ́n” dali. (2 Pita 3:3, 4) Eyin sinsẹ̀ntọ nugbo lẹ joawuna pọndohlan mọnkọtọn de, yé sọgan lẹzun “adidọnọ kavi madosinsẹ́nnọ.” (2 Pita 1:8) Po ayajẹ po, enẹ mayin mọ na susu omẹ Jiwheyẹwhe tọn lẹ to egbehe gba.
4 E ma ylan nado tindo ojlo to wiwá vivọnu titonu ylankan dinwhenu tọn mẹ gba. Flin ojlo he devi Jesu lọsu tọn lẹ dohia dọmọ: “Oklunọ, hiẹ na gọ̀ ahọludu jo hlan Islaeli to ojlẹ he mẹ lò?” Jesu gblọn dọmọ: “E ma tin na mìwlẹ nado yọ́n owhenu kavi ojlẹ he Otọ́ yí do huhlọn ede tọn mẹ gba.” (Owalọ lẹ 1:6, 7) Hogbe enẹlẹ bẹ owẹ̀n dodonu tọn he e ko dọ to Osó Olivie tọn ji hẹn dọmọ: “Mì ma yọ́n azán he gbè Oklunọ mìtọn ja. . . . Ojlẹ he mẹ mì ma lẹn do wẹ Ovi gbẹtọ tọn ja.” (Matiu 24:42, 44) Mí dona to ayinamẹ enẹ flin mídelẹ whepoponu! Mẹdelẹ sọgan yin whiwhlepọn po walọ lọ po dọ, ‘Vlavo yẹn dona de nuwiwa pò vude bo ma dona yin ahunmẹduna gbọn opodo he to sisẹpọ lọ dali.’ Nuṣiwa tẹwẹ enẹ na yin! Lẹnnupọn do Jakobu po Johanu po ji, “Ovisunnu osò tọn lẹ.”—Malku 3:17.
5, 6. Nuplọnmẹ tẹwẹ mí sọgan mọ sọn apajlẹ Jakobu po Johanu po tọn mẹ?
5 Mí yọnẹn dọ Jakobu yin apọsteli zohunhunnọ titengbe de. (Luku 9:51-55) Tlolo he agun Klistiani tọn yin zizedai, e dona ko yí azọngban nujọnu tọn de wà. Ṣigba to whenuena Jakobu gbẹ́ pò to jọja pete yin, Hẹlọdi Aglipa I hùi. (Owalọ lẹ 12:1-3) Be mí lẹndọ Jakobu, to mimọ ogbẹ̀ etọn to vivọnu wá madonukun, tindo numọtolanmẹ homẹgble tọn dọ e ko yín zohunhunnọ hugan, ko yí ede zan to lizọnyizọn etọn mẹ wẹ ya? Paali! Na jide tọn e yin ayajẹnọ dọ e ko zan diblayin dagbe hugan gbẹzan gli etọn tọn to sinsẹ̀nzọn Jehovah tọn mẹ. Todin, depope mítọn ma sọgan yọnẹn vlavo eyin ogbẹ̀ mítọn sọgan wá vivọnu to ajijimẹ gba. (Yẹwhehodọtọ 9:11; yijlẹdo Luku 12:20, 21 go.) Enẹwutu e họnwun bosọ yin nuyọnẹnnu nado hẹn zohunhun po nuwiwa mítọn po do obá he yiaga de mẹ to Jehovah sinsẹ̀n mẹ. To aliho enẹ mẹ mí na hẹn oyín dagbe mítọn go hẹ ẹ bo gbọṣi gbẹninọ mẹ po sọgodo madopodo mítọn tọn po to pọndohlan mẹ.—Yẹwhehodọtọ 7:1.
6 Nunọwhinnusẹ́n yọn-na-yizan de tin gando apọsteli Johanu go, he tin to finẹ to whenuena Jesu dotuhomẹnamẹ sinsinyẹn dọ, “Mì nọ họ́ mìde.” (Matiu 25:13; Malku 13:37; Luku 21:34-36) Johanu hẹn enẹ do ayiha mẹ, bo to sinsẹ̀nzọnwà po zohunhun po na owhe ao susu lẹ. Na nugbo tọn, e taidi dọ e nọgbẹ̀ hugan apọsteli devo he pò lẹpo. To whenuena agbasa ko yìgodo na Johanu, bo penugo nado pọ́n godo hlan nuwiwa nugbonọ owhe ao ao tọn lẹ, be e pọ́n ẹn taidi nuṣiwa de, gbẹzan ṣiṣizan kavi he ma tin to jlẹkaji de wẹ ya? Na nugbo tọn, lala! E gbẹ́ pò to sọgodo pọnhlan po jeje po. To whenuena Jesu he yin finfọnsọnku lọ dọ dọ, “Mọwẹ; yẹn ja niyaniya” Johanu to afọdopolọji gblọn dọ, “Niṣẹ. Wá, Jesu Oklunọ.” (Osọhia 22:20) Na jide tọn Johanu ma to gbẹ̀nọ na dinwhenu, bo tindo ojlo na vivomẹninọ po ‘gbẹzan dagbe’ po gba. E kudeji nado gbọṣi sinsẹ̀n-bibasi mẹ po gbẹzan etọn lẹpo po gọna huhlọn, whedepopenu he Oklunọ sọgan wá. Etẹwẹ dogbọn míwlẹ dali?
Dodonu lẹ na Yise to Ogbẹ̀ Madopodo Mẹ
7. (a) Etẹwẹ dogbọn todido ogbẹ̀ madopodo tọn ‘heyin opagbe etọn do whẹpo aihọn do ṣẹ’ dali? (b) Nawẹ Jesu tá hinhọ́n do todido ogbẹ̀ mavọmavọ tọn ji gbọn?
7 Tindo jide dọ todido ogbẹ̀ madopodo tọn mayin odlọ yialọ do basi gbẹtọ tọn kavi lẹnpọn ovọ́ tọn gba. Dile Titu 1:2 dọ do, mẹdezejo jijọ-di-Jiwheyẹwhe tọn mítọn sinai do “todido mẹ na ogbẹ̀ madopodo, he Jiwheyẹwhe, he ma nọ dolalo, ko dopagbe etọn whẹpo aihọn do ṣẹ” ji. Lẹndai dowhenu tọn Jiwheyẹwhe tọn wẹ e yin na gbẹtọvi tonusetọ lẹpo nado nọgbẹ̀ kakadoi. (Gẹnẹsisi 1:28) Nudepope, e ma tlẹ yin atẹṣiṣi Adam po Evi po tọn, ma sọgan diọnukunsọ lẹndai ehe gba. Dile eyin kinkandai to Gẹnẹsisi 3:15 mẹ do, Jiwheyẹwhe dopagbe “okun” de tọn to afọdopolọji he na dè awugble lẹpo he to nukunbia na gbẹtọvi lẹ sẹ̀. To whenuena “okun” lọ kavi Mẹssia, Jesu, wá, e hẹn todido ogbẹ̀ mavọmavọ tọn zùn dopo to nuplọnmẹ dodonu tọn etọn lẹ mẹ. (Johanu 3:16; 6:47, 51; 10:28; 17:3) Gbọn ogbẹ̀ pipé etọn zizedai taidi ofligọ de dali, Klisti mọ jlọjẹ sọgbe hẹ osẹ́n yí nado na ogbẹ̀ madopodo gbẹtọvi lẹ. (Matiu 20:28) Delẹ to devi etọn lẹ mẹ, yèdọ hagbẹ 144 000 lẹpo, na nọgbẹ̀ kakadoi to olọn mẹ. (Osọhia 14:1-4) Gbọnmọ dali mẹhe ko yin gbẹtọvi he nọ kú dai lẹ na ‘ze jọmakú do’!—1 Kọlintinu lẹ 15:53.
8. (a) Etẹwẹ ‘jọmakú’ yin, podọ naegbọn Jehovah do na ẹn hlan 144 000 lẹ? (b) Todido tẹwẹ Jesu hẹn tin to aimẹ na “lẹngbọ devo lẹ”?
8 ‘Jọmakú’ zẹẹmẹdo hugan ma na kú gbede poun. E bẹ “huhlọn ogbẹ̀ he ma sọgan yin vivasudo tọn NW ” hẹn. (Heblu lẹ 7:16; yijlẹdo Osọhia 20:6 go.) Nalete, etẹwẹ Jiwheyẹwhe wadotana to alọkẹyi nunina ayidego tọn mọnkọtọn mẹ? Flin avùnnukundiọsọmẹ Satani tọn dọ nudida gbẹ̀te Jiwheyẹwhe tọn depope ma sọgan yin jide dego. (Job 1:9-11; 2:4, 5) Gbọn nina jọmakú 144 000 lọ lẹ dali, Jiwheyẹwhe do jidide mlẹnmlẹn etọn hia to pipli he ko na gblọndo ayidego avùnnukundiọsọmẹ Satani tọn mẹ. Ṣigba etẹwẹ dogbọn gbẹtọvi he pò lẹ dali? Jesu dọ na hagbẹ tintan “lẹngbọpa pẹvi” ehe tọn heyin whédutọgbẹ́ Ahọluduta tọn dọ yé na “sinai to ofin lẹ ji, [nado dawhẹna] whẹndo wiawe Islaeli tọn lẹ.” (Luku 12:32; 22:30) Ehe dohia dọ mẹdevo lẹ na mọ ogbẹ̀ madopodo to aigba ji yí taidi mẹjidugando Ahọluduta etọn tọn. To whenuena “lẹngbọ devo” ehelẹ ma yin nina jọmakú, yé mọ “ogbẹ̀ madopodo” yí. (Johanu 10:16; Matiu 25:46) Gbọnmọ dali ogbẹ̀ madopodo yin todido Klistiani lẹpo tọn. E mayin lẹnpọn ovọ́ tọn de gba ṣigba onú titengbe heyin opagbe etọn do gbọn “Jiwheyẹwhe, he ma nọ dolalo” dali, ehe yè suahọ etọn po ohùn họakuẹ Jesu tọn po wẹ e yin.—Titu 1:2.
To Sọgodo he Dẹn Mẹ Ya?
9, 10. Dohia họnwun tẹwẹ tin to finẹ dọ mí ko sẹpọ opodo lọ?
9 Apọsteli Paulu dọdai dọ ‘ojlẹ awusinyẹn tọn lẹ he na vẹawu nado pehẹ’ na dohia dọ matin nudindọn mí ko wá ‘azán godo tọn lẹ’ mẹ. Dile ogbẹ́ gbẹtọ tọn he lẹdo mí jai biọ ninọmẹ owanyi matindo tọn, nukunkẹn, pekọ mẹdetiti tọn, po jijọ-madi-Jiwheyẹwhe tọn po mẹ, be mí ma yọnẹn dọ azán Jehovah tọn na hinhẹn whẹdida ṣẹ do aihọn titonu ylankan ehe ji to dindọnsẹpọ po awuyiya po ya? Dile danuwiwa po wangbẹna po to agayi, be mí ma mọ hẹndi yinukọn dogọ hogbe Paulu tọn lẹ to lẹdo mítọn mẹ dọmọ: “Mẹylankan lẹ, po mẹklọtọ lẹ po na to yinylan yì nukọn” ya? (2 Timoti 3:1-5, 13) Mẹdelẹ po todido po sọgan dawhá “jijọho po gingán po” tọn, ṣigba nukundido jijọho tọn lẹpo na busẹ, na “whenẹnu wẹ dindọn ajiji wá ota yetọn, kẹdẹdi ajlù to yọnnu he mọhò ji; yé ma sọ to na gán.” Mí ma ko yin jijodo zinvlu mẹ na nuhe dù zẹẹmẹ ojlẹ mítọn tọn gba. Enẹwutu, “mì gbọ mí ni nọ họ́ míde, bo sọ yin huwhẹnọ.”—1 Tẹsalonikanu lẹ 5:1-6.
10 Yinukọn dogọ, Biblu dohia dọ azán godo tọn lẹ yin “whenu gli de.” (Osọhia 12:12; yijlẹdo 17:10 go.) Suhugan “whenu gli” enẹ tọn ko sọawuhia nado depò. Di apajlẹ, dọdai Daniẹli tọn, po gbesisọ po basi zẹẹmẹ tasọmẹ he tin to “ahọlu agewaji” po “ahọlu huwaji tọn” po ṣẹnṣẹn he ko dlẹnkan biọ owhe kanweko ehe mẹ. (Daniẹli 11:5, 6) Ehe pò nado yin hinhẹndi wẹ mẹji jijẹ godo tọn “ahọlu agewaji tọn,” heyin zẹẹmẹ basina to Daniẹli 11:44, 45.—Pọ́n Atọ̀họ̀-Nuhihọ́ Lọ Tọn [flansegbe] 1er juillet 1987, po 1er novembre 1993 po, na hodọdopọ de do dọdai ehe ji.
11. (a) Jẹ obá tẹ mẹ wẹ Matiu 24:14 to yinyin hinhẹndi te? (b) Etẹwẹ hogbe Jesu tọn he yin kinkandai to Matiu 10:23 mẹ lẹ dohia?
11 Dọdai Jesu lọsu tọn tin ga dọ “yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) To egbehe, Kunnudetọ Jehovah Tọn lẹ hẹn azọ́n yetọn jẹ aigba 233 lẹ ji, pipli lopo tọn lẹ, po aigba-denamẹ lẹ po ji. Na nugbo tọn, aigba-denamẹ he mayin azọ́nwadeji lẹ gbẹ́ tin, podọ vlavo to ojlẹ dide Jehovah tọn mẹ, ohọ̀n dotẹnmẹ hundote tọn na hùn. (1 Kọlintinu lẹ 16:9) Etomọṣo, hogbe Jesu tọn lẹ heyin kinkandai to Matiu 10:23 mẹ lẹ yin nujọnu dọmọ: “Mìwlẹ ma na jugbọn otò Islaeli tọn lẹpo mẹ, whẹpo Ovi gbẹtọ tọn nado wá gba.” To whenuena wẹndagbe lọ na jide tọn na yin lila lẹdo aigba lẹpo pé, mí ma sọgan jẹ adà aigba lẹpo tọn ji po wẹndagbe Ahọluduta lọ tọn po na míde whẹpo Jesu na “wá” taidi Whẹdida-hẹnṣẹtọ gba.
12. (a) ‘Ohiadomẹgo’ tẹwẹ yin alọdlẹndo to Osọhia 7:3 mẹ? (b) Etẹwẹ yin nujọnu-yinyin didepo sọha mẹyiamisisadode lẹ tọn to aigba ji?
12 Gbadopọnna wefọ lọ to Osọhia 7:1, 3 mẹ, he dọ dọ “jẹhọn ẹnẹ” vasudo tọn lẹ yin hinhẹndote “kaka mí nado yí hiadonu do dohia ogo na mẹmẹglọ Jiwheyẹwhe mítọn tọn lẹ to nukọn yetọn.” Ehe ma to alọdlẹndo hiadomẹgo tintan lọ, he wá aimẹ to whenuena mẹhe yin 144 000 lẹ mọ oylọ olọn mẹ tọn lọ yí gba. (Efesunu lẹ 1:13) E dlẹnalọdo hiadomẹgo godo tọn lọ, to whenuena yé yin yinyọnẹn to aliho mayọn diọ tọn de mẹ taidi mẹhe yin whiwhlepọn bo yin nugbonọ “afanumẹ Jiwheyẹwhe mítọn tọn.” Sọha mẹyiamisisadode ovi Jiwheyẹwhe tọn nujọnu tọn lẹ he to ogbẹ̀ to aigba ji lẹ depò taun. Humọ, Biblu dọ hezeheze dọ na “mẹṣinyanṣinyan lẹ tọn wutu” wẹ awusọhia nukunbibia daho lọ tọn na yin ‘sinsán do ogli.’ (Matiu 24:21, 22) Suhugan mẹhe yin yiylọ nado yin mẹyiamisisadode lẹ tọn ko pòyọnho. Whladopo dogọ, be ehe ma dohia dọ opodo ko sẹpọ ya?
Nuhọ́tọ Nugbonọ
13, 14. Etẹwẹ yin azọngban hagbẹ nuhọtọ lọ tọn?
13 To ojlẹ dopolọ mẹ, mí na wà dagbe nado kẹalọyi anademẹ heyin nina gbọn “afanumẹ nugbonọ” lọ dali. (Matiu 24:45) Na hugan owhe kanweko lẹ, “afanumẹ” egbezangbe tọn lọ po nugbonọ-yinyin po ko wà sinsẹ̀nzọn taidi “nuhọtọ” de. (Ezekiẹli 3:17-21) Atọ̀họ̀-Nuhihọ́ Lọ Tọn [flansegbe] 1er avril 1984 tọn, basi zẹẹmẹ dọmọ: “Hihọ́tọ ehe doayi lehe nujijọ lẹ to awuwle do to aigba ji to hẹndi dọdai Biblu tọn mẹ, bo nọ lá nugbẹnamẹ ‘nukunbibia daho he hunkọ ma ko tin sọn whẹwhẹwhenu aihọn tọn’ bo nọ lá ‘wẹndagbe onú dagbe tọn.’ ”—Matiu 24:21; Isaia 52:7.
14 Flindọ: Azọ́n nuhọ́tọ de tọn wẹ e yin nado dọ “onú he e mọ.” (Isaia 21:6-8) To ojlẹ Biblu tọn mẹ nuhọ́tọ de nọ namẹ avase yèdọ to whenuena yọnbasi owù de tọn tlẹ gbẹ́ pò to nukọn tlala nado sọgan yin yinyọnẹn hezeheze. (2 Ahọlu lẹ 9:17, 18) Na jide tọn awhágbe lalo tọn nọ jọ to whenẹnu. Ṣigba nuhọ́tọ dagbe de ma na joagọyigodo na obu winyandomẹ tọn wutu. Eyin owhé towe to miyọ́n ji, numọtolanmẹ tẹwẹ hiẹ na tindo eyin miyọnṣitọ́ lẹ gboawupo nado wá na yé lẹndọ e sọgan yin awhágbe lalo tọn de? Lala, mí nọ donukun sunnu mọnkọtọn lẹ nado yigbe po awuyiya po hlan ohia owù tọn depope! To aliho dopolọ mẹ, hagbẹ nuhọtọ lọ tọn lẹ ko dọho jẹgbonu to whenuena dodonu ninọmẹ tọn lẹ sọawuhia nado wà mọ.
15, 16. (a) Naegbọn vọjlado lẹ to nukunnumọjẹnumẹ dọdai tọn mítọn mẹ nọ yin bibasi? (b) Etẹwẹ mí sọgan plọn sọn devizọnwatọ nugbonọ Jiwheyẹwhe tọn lẹ si he tindo nukunnumọjẹnumẹ agọ̀ dọdai delẹ tọn?
15 Nalete, dile nujijọ lẹ to awuwle, nukunnumọjẹnumẹ dọdai lẹ tọn mítọn ko lẹzun nuhe họnwun dogọ. Whenuho dohia dọ, vlavo, wẹ dọdai sọn olọn mẹ wá lẹ nọ yin nukunnumọjẹemẹ jẹnukọnna hẹndi yetọn lẹ. Jiwheyẹwhe dọna Ablam to aliho gigọ́ mẹ lehe okun etọn na dẹn do taidi “wáṣinu to aigba he ma yin yetọn ji,” heyin, owhe 400. (Gẹnẹsisi 15:13) Ṣigba, Mose do ede hia taidi whlẹngantọ jẹnukọnna ojlẹ dide.—Owalọ lẹ 7:23-30.
16 Gbadopọnna dọdai Mẹssia lọ tọn ga. To ayihamẹlẹnpọn do nujijọ he wayi lẹ ji e họnwun hezeheze dọ okú Mẹssia lọ tọn po fọnsọnku etọn po yin didọ dai. (Isaia 53:8-10) Etomọṣo, devi Jesu lọsu tọn lẹ gboawupo nado doayi nugbo ehe go. (Matiu 16:21-23) Yé ma mọ dọ Daniẹli 7:13, 14 na yin hinhẹndi to pa.rou.si’a, kavi ‘tintin tofi’ sọgodo tọn Klisti tọn whenu gba. (Matiu 24:3) Enẹwutu nulinlẹn yetọn gboawupo na nudi owhe 2 000 lẹ nkọtọn to whenuena yé kanse Jesu dọmọ: “Oklunọ, hiẹ na gọ̀ ahọludu jo hlan Islaeli to ojlẹ he mẹ lò?” (Owalọ lẹ 1:6) Yèdọ to whenuena agun Klistiani tọn tlẹ yin didoai taun godo, ayilinlẹn agọ̀ po nukundido lalo lẹ po zindonukọn nado to awusọhia. (2 Tẹsalonikanu lẹ 2:1, 2) Dile etlẹ yindọ mẹdelẹ nọ tindo pọndohlan agọ̀ lẹ to whedelẹnu, matin ayihaawe Jehovah dona azọ́n yisenọ owhe kanweko tintan nẹlẹ tọn!
17. Etẹwẹ dona yin pọndohlan vọjlado tọn mítọn to nukunnumọjẹnumẹ Owe wiwe lẹ tọn mítọn mẹ?
17 Mọdopolọ to egbehe hagbẹ nuhọ́tọ lọ tọn dona hẹn pọndohlan etọn zun yinyọnẹn sọn ojlẹ de mẹ jẹ devo mẹ. Ṣigba, be mẹdepope sọgan tindo ayihaawe dọ Jehovah ko dona “afanumẹ nugbonọ” lọ ya? Humọ, pọndohlan he tin to hogo lọ mẹ, be e mayin vude wẹ suhugan vọjlado he ko yin bibasi lẹ ya? Nukunnumọjẹnumẹ dodonu Biblu tọn mítọn ma ko diọ gba. Nujikudo mítọn dọ mí to gbẹnọ to azán godo tọn lẹ mẹ yin huhlọnnọ hugan gbede pọ́n!
Gbẹninọ na Sọgodo Mavọmavọ De
18. Naegbọn mí dona dapana gbẹninọ na egbehe kẹdẹ?
18 Aihọn sọgan dọ, ‘Mì gbọ mí ni dù bo nù, na osọ̀ mí na kú,’ ṣigba ehe ma dona yin walọyizan mítọn gba. Naegbọn mí na to vivẹnudo to ovọ́ mẹ na awuvivi he hiẹ sọgan mọ to gbẹ̀mẹ todin whenuena hiẹ sọgan wazọ́n na sọgodo mavọmavọ de? Todido enẹ, vlavo ogbẹ̀ jọmaku to olọn mẹ kavi ogbẹ̀ madopodo to aigba ji, mayin odlọ, mọ e mayin lẹnpọn ovọ́ tọn gba. Nugbo heyin opagbe etọn do gbọn Jiwheyẹwhe “he ma nọ dolalo” dali wẹ e yin. (Titu 1:2) Kunnudenu lọ yin daho dọ todido mítọn yinyọnẹn ko sẹpọ! ‘Ogli wẹ ojlẹ he pò lọ.’—1 Kọlintinu lẹ 7:29.
19, 20. (a) Nukun tẹwẹ Jehovah do nọ pọ́n avọ́sinsan he mí ko basi na Ahọluduta lọ tọn wutu lẹ? (b) Naegbọn mí dona nọgbẹ po pọndohlan mavọmavọ tọn po?
19 Nugbo wẹ dọ, titonu ehe ko dẹn to aimẹ hugan lehe mẹsusu lẹndọ e na yin. Todin omẹ kleun de sọgan tindo numọtolanmẹ dọ eyin yé ko yọ́n ehe dai wẹ, yé sọgan nọ ma ko basi avọ́sinsan delẹ. Ṣigba e ma dona vẹ́ na mẹde na mọwiwà gba. To popolẹpo mẹ, avọ́sinsan lẹ bibasi yin adà dodonu Klistiani yinyin tọn de. Klistiani lẹ ‘mọ́n yedelẹ.’ (Matiu 16:24) Mí ma dona tindo linlẹn gbede dọ vivẹnudido mítọn nado hẹn homẹ Jiwheyẹwhe tọn hùn ko yin to ovọ́ mẹ. Jesu dopagbe dọmọ: “Mẹde ma tin ehe jo owhé kavi mẹmẹsunnu lẹ, kavi mẹmẹyọnnu lẹ, kavi otọ́ kavi onọ̀, kavi asi, kavi ovi lẹ, kavi aigba lẹ dai, na yẹn tọn wutu, podọ na wẹndagbe tọn wutu, ṣigba e na mọ yí to dinvie to ojlẹ he mẹ, kanweko donu kanweko . . . podọ to aihọn he ja mẹ ogbẹ̀ madopodo.” (Malku 10:29, 30) Owhe fọtọ́n de sọn din, nawẹ azọ́n, owhé, kavi adọkun towe lẹ na taidi nujọnu do sọ? Etomọṣo, avọ́sinsan he hiẹ basi na Jehovah na tindo zẹẹmẹ owhe livi lẹ sọn din—yèdọ owhe liva lẹ sọn din! “Na Jiwheyẹwhe ma yín mawadodonọ nado wọn azọ́n mìtọn.”—Heblu lẹ 6:10.
20 Enẹwutu, mì gbọ mí ni nọgbẹ po pọndohlan ogbẹ̀ mavọmavọ tọn po, to hinhẹn nukun mítọn lẹ, ‘e mayin do onú he yè mọ lẹ ji, ṣigba do onú he yè ma mọ lẹ ji: na onú he yè to mimọ lẹ wẹ dinvie tọn; ṣigba onú he yè ma to mimọ lẹ wẹ madopodo tọn.’ (2 Kọlintinu lẹ 4:18) Yẹwhegan Habbakuk wlan dọmọ: “Numimọ lọ gbẹsọ tin na ojlẹ dide lọ, podọ e to unklẹn hlan opodo lọ dali, bo ma na dolalo: yin etlẹ dọngban, nọtepọn ẹn; na e ma na nọma wá wutu, e ma na gọ̀n gba.” (Habbakuk 2:3) Nawẹ ‘gbigbọṣi tenọpọn mẹ’ na azán godo tọn yinuwa do aliho he mẹ mí nọ hẹn azọngban mẹdetiti po whẹndo tọn lẹ po di ji gbọn? Hosọ mítọn he bọdego na dọhodo whẹho ehelẹ ji.
Nuagokun lẹ na Dogbapọn
◻ Nawẹ omẹ kleun de to egbehe ko yin nuyiwadeji gbọn mimọ gbandindọn opodo titonu onú lẹ tọn dali?
◻ Etẹ ji wẹ todido ogbẹ̀ madopodo tọn mítọn sinai do?
◻ Nukun tẹwẹ mí dona yí do pọ́n avọ́sinsan he mí ko basi na dagbenu Ahọluduta tọn lẹ?
[Yẹdide to weda 6]
Azọ́n yẹwhehodidọ globu tọn lọ dona wá tadona kọ̀n whẹpo opodo nado wá