Hinhẹn Yise Mítọn Lodo to Ohó Jiwheyẹwhe Tọn Mẹ

MẸSUSU ko hia Biblu lọ hugan owe devo depope. Ṣigba omẹ nẹmu wẹ ko do yise hia to owẹ̀n etọn mẹ? Biblu lọsu basi zẹẹmẹ dọ “omẹ pó ma tindo yise gba.” (2 Tẹsalonikanu lẹ 3:2) E họnwun dọ, mí mayin jiji po yise po gba. E dona yin awuwlena. Yèdọ mẹhe tlẹ tindo yise jẹ obá de mẹ lẹ ma dona yí nukunpẹvi do pọ́n ẹn gba. Yise sọgan depò bo kú. Enẹwutu, vivẹnu yin nuhudo nado gbọṣi ‘zinzin to yise mẹ’ mẹ.—Titu 2:2.

To whelọnu lo, po whẹwhinwhẹ́n dagbe po, Hagbẹ Anademẹtọ Kunnudetọ Jehovah Tọn lẹ tọn dè hosọ lọ “Yise To Ohó Jiwheyẹwhe Tọn Mẹ” na plidopọ agbegbe debọdo-dego yetọn lẹ na owhe 1997/98 tọn. Gbọnmọ dali, livi susu Kunnudetọ lẹ tọn po mẹdevo lẹ po ko yin nina lẹblanulọkẹyi lọ nado plidopọ nado hẹn yise yetọn lodo to Ohó Jiwheyẹwhe Tọn mẹ.

Ohó Jiwheyẹwhe Tọn Yin Nugbo —Yèdọ Dodonu Yise Mítọn Tọn

Ehe wẹ yin hosọ azán tintan plidopọ lọ tọn. E bẹjẹeji po hogbe mẹpipa tọn lẹ po hlan mẹplidopọ lẹpo. Tintin to plidopọ lọ tẹnmẹ yin kunnudenu sisi tọn na Biblu. Ṣogan, kanbiọ mẹhẹnlẹnnupọn tọn lẹ yin kinkanse gando jẹhẹnu yise mítọn lẹ tọn go: ‘Be mí penugo nado yiavunlọ na nuyise mítọn lẹ, gbọn yizan Ohó Jiwheyẹwhe Tọn dali taidi kandai dejido lọ ya? Be mí nọ do pinpẹn-nutọn-yinyọnẹn hia na núdùdù gbigbọmẹ tọn lọ, to ma yí nukunpẹvi do pọ́n Biblu, opli agun tọn lẹ, po owe sinai do Biblu ji lẹ po ya? Be mí to whinwhẹ́n to owanyi, oyọnẹn he pegan, po wuntuntun po mẹ ya?’ Hodọtọ lọ na tuli mẹlẹpo nado dotoai po sọwhiwhe po, bo doayi e go dọ “Plidopọ Agbegbe ‘Yise To Ohó Jiwheyẹwhe Tọn Mẹ’ tọn ehe ko yin awuwlena nado gọalọna mí nado dindona mídelẹ bo gbadopọnna sọha po jẹhẹnu yise tọn he dopodopo mítọn lẹ tindo po.”

Hosọ hodidọ ayidego tọn lọ wẹ yin ‘Zọnlinzinzin Gbọn Yise Dali, E Mayin Gbọn Mimọ Dali Gba.’ (2 Kọlintinu lẹ 5:7) “Yise mẹhe lẹzun Kunnudetọ Jehovah Tọn lẹ tọn mayin nuhe yè ma sọgan yise gba,” wẹ hodọtọ lọ dọ. Lehe ehe yin nugbo do sọ! Yise nujọnu tọn mayin dehe tọ́nnukun gba. E yin zize sinai do nugbo ji. Heblu lẹ 11:1 dọmọ: “Yise wẹ dòdó onú yè to tódo tọn, okunnu onú he mí ma mọ tọn.” Hodọtọ lọ doayi e go dọmọ: “Na nugbo tọn, eyin mí na zinzọnlin gbọn yise dali, mí tindo nuhudo yise he lodo tọn.” Na mí to zọnlinzin gbọn yise dali, e mayin gbọn mimọ dali wutu, mí ma tindo nuhudo zẹẹmẹ gigọ́ lẹ gando lehe po whenuena Jehovah na dotana adà lẹndai etọn lẹpo po tọn gba. Nuhe mí ko yọnẹn dogbọn dali etọn lẹ na jidide mlẹnmlẹn mí to huhlọn etọn nado hẹn opagbe etọn lẹ di to owanyi po dodowiwa po mẹ.

Hodidọ lọ “Jọja Klistiani Lẹ—Adà Titengbe Agun lọ Tọn De” flin jọja lẹ lehe yé yin nuhọakuẹ hlan Jehovah sọ. Yé yin tulina nado whẹ́n to gbigbọmẹ gbọn afọdidona yanwle mọnkọtọn lẹ taidi Biblu lọ blebu hihia gọna jijẹ nubiọtomẹsi lẹ na klandowiwe po baptẹm po kọ̀n dali. Afọdona wepinplọn dogọ yin whẹho mẹdetiti tọn nado yin nudide etọn basi hẹ mẹjitọ mẹtọn lẹ, ṣigba yin eyin afọdona janwẹ, yanwle lọ to whepoponu dona yin nado yin awuwlena nado basi sinsẹ̀n hlan Jiwheyẹwhe po kọdetọn dagbe dogọ po. Wepinplọn sọgan yin na lẹndai alemọyi tọn lẹ to whenuena mí ‘mọdona onú heyin nujọnu taun’ he gando yise mítọn go lẹ.—Filippinu lẹ 1:9, 10.

Enẹgodo wẹ homádọ hodidọ atọ̀n tọn do hosọ lọ ji “Nujinọtedo Mẹnu Tọn Go Wẹ Hiẹ Nọ Doayi?” wá aimẹ. Yise to Ohó Jiwheyẹwhe Tọn mẹ nọ whàn mí nado tẹdo nujinọtedo Biblu tọn lẹ go. Klistiani lẹ nọ setonu na osẹ́n po nunọwhinnusẹ́n Jehovah tọn lẹ po. Di dohia, Owe wiwe lẹ gbẹnuna mí ma nado yí hogbe ylankan po mẹzunzun tọn lẹ po zan. (Efesunu lẹ 4:31, 32) Hodọtọ lọ kanse dọmọ: “To whenuena hiẹ gblehomẹ kavi duadi, be hiẹ nọ dọjlẹ hẹ alọwlemẹ towe kavi hẹ ovi towe lẹ wẹ ya?” Na nugbo tọn, enẹ ma na yin walọ Klistiani tọn de gba. Jiwheyẹwhe sọ tindo nujinọtedo gando awusọhia mẹdetiti tọn mítọn go. Klistiani lẹ dona “yí avọ̀ jlẹmẹjlẹmẹ do doaṣọna yede.” (1 Timoti 2:9, 10) Hogbe lọ “jlẹmẹjlẹmẹ” bẹ linlẹn osi-mẹdetiti tọn, linlẹn gbégbigbò tọn, dẹdẹwiwa, po jlẹkaji tọn po hẹn. Mí yin whinwhan gbọn owanyi na mẹdevo lẹ dali bo yin anadena gbọn nunọwhinnusẹ́n Biblu tọn lẹ podọ gbọn linlẹn nuhe sọgbe tọn dali.

Hodidọ awe he bọdego lẹ bẹ dogbapọnna wefọ debọdo-dego Heblu lẹ 3:7-15 po 4:1-16 po hẹn. Wefọ Biblu tọn ehelẹ na avase mí sọta owù yinyin hinhẹn “sinyẹn gbọn oklọ ylando tọn dali.” (Heblu lẹ 3:13) Nawẹ mí sọgan dù to avunhiho mítọn sọta ylando ji gbọn? Jehovah nọ gọalọna mí gbọn Ohó etọn gblamẹ. Na nugbo tọn, “ohó Jiwheyẹwhe tọn tin to ogbẹ̀, e do huhlọn . . . ewọ sọ wẹ linlẹn ayiha tọn po ojlo ayiha tọn po yọnẹntọ.”—Heblu lẹ 4:12.

Hodidọ godo tọn to azán tintan plidopọ lọ tọn gbè wẹ “Owe de na Gbẹtọ Lẹpo.” E zinnudo nugbo-yinyin, gbesisọ-yinyin, po nuhọakuẹ yọn-na-yizan Biblu tọn po ji. Lehe e yin ojlofọndotenamẹ do sọ nado sè hodọtọ lọ basi nulila didetọ́n alọnuwe yọyọ weda 32 tọn he hosọ etọn yin Owe de na Gbẹtọ Lẹpo! Owe yọyọ ehe yin awuwlena titengbe na mẹhe, dile yé tlẹ yì wehọmẹ sọ, yọ́n onú vude poun gando Biblu go lẹ. Hodidọ lọ wá tadona kọ̀n po hogbe lọ lẹ po dọmọ: “Gbẹtọ lẹ tindo nuhudo nado gbadopọnna Ohó Jiwheyẹwhe Tọn na yedelẹ. Mí tindo jide dọ eyin yé de afọdide tintan nado gbadopọnna ẹn, yé na wá yọnẹn dọ owe matin awetọ ehe, yèdọ Biblu, yin owe de na gbẹtọ lẹpo nugbonugbo!”

Hodo Apajlẹ “Opòdo Yise Mítọn Tọn”

Hosọ azán awetọ plidopọ lọ tọn ehe dọ̀n ayidonugo hlan Jesu Klisti, yèdọ “Opodo yise mítọn tọn.” Mí dona ‘gbọn afọ etọn ji pẹkipẹki.’ (Heblu lẹ 12:2; 1 Pita 2:21) Mẹsusu to Mẹylọhodotọklisti tọn mẹ yin didọna dọmọ: ‘Yise to Oklunọ Jesu mẹ, hiẹ nasọ yin whinwhlẹngan!’ Ṣigba be nuhe yise biọ lẹpo niyẹn ya? Biblu lá dọ “yise matin azọ́n yin oṣiọ.” (Jakobu 2:26) Enẹwutu, gbọnvona yise to Jesu mẹ, mí dona wà azọ́n he e wà lẹ, titengbe gbọn yẹwheho wẹndagbe Ahọluduta Jiwheyẹwhe Tọn didọ dali.

Tito-to-whinnu afọnnu tọn sinai do azọ́n devi lẹ bibasi tọn ji. Taidi Paulu, mí dona to jejeji nado lá wẹndagbe whlẹngán tọn lọ. (Lomunu lẹ 1:14-16) Jesu dọyẹwheho na gbẹtọ lẹ to filẹpo. Dile lizọnyizọn whédegbè-jẹ-whédegbè gbesisọ tọn mítọn to kọdetọn dagbe lẹ tindo do sọ, gbẹtọ susu lẹ ma nọ tin to whégbè to whenuena mí basi dlapọn gba. (Owalọ lẹ 20:20) Mẹsusu lẹ nọ tin to wehọmẹ, agbasazọ́n mẹ, nusatẹn, kavi to gbejizọnlin ji. Enẹwutu, mí sọ dona dọyẹwheho to nọtẹn gbangba tọn lẹ po fidepope he gbẹtọ lẹ sọgan yin mimọ te po.

Hodidọ lọ “Lẹzun Mẹhe Doadọ̀do bo Lodo to Nugbo Mẹ” flin mí sọha daho devi yọyọ lẹ he to yinyin bibaptizi—yèdọ hugan madozẹnzẹn 1 000 to gbedopo! E yin nujọnu dọ omẹ yọyọ ehelẹ ni doadọ̀do bo lodo to yise mẹ. (Kọlọsinu lẹ 2:6, 7) Hodọtọ lọ basi zẹẹmẹ dọ adọ̀-jọ-adọ̀ lẹ nọ dọ̀n osin po núdùdù po bosọ nọ yinuwa taidi húnsingàn de kavi hẹn atin lọ lodo. Mọdopolọ, gbọn walọyizan nupinplọn tọn dagbe po gbẹdido he nọ jlọmẹdote de po dali, devi yọyọ lẹ sọgan lodo to yise mẹ.

Ayinamẹ ehe yin dehe sọgbe titengbe na baptẹm-yitọ lẹ. Mọwẹ, to azán awetọ plidopọ lọ tọn gbè, pipli daho devi yọyọ lẹ tọn yin bibaptizi, bo hodo apajlẹ Jesu tọn. Hodidọ lọ “Yise to Ohó Jiwheyẹwhe Tọn Mẹ Nọ Planmẹ Jẹ Baptẹm Kọ̀n” flin mẹhe yí baptẹm lẹ dọ yinyin yinylọ́n do osin glọ pete yin yẹhiadonu he sọgbe heyin nado kú na aliho gbẹninọ tọn yetọn dai tọn heyin pekọ-mẹdetiti tọn díndín. Yinyin hinhẹn wá aga sọn osin lọ mẹ nọtena yinyin hinhẹngọwa ogbẹ̀ nado wà ojlo Jiwheyẹwhe tọn.

Hodidọ lọ “Hoavun Sinsinyẹn na Yise” yin zize sinai do owe Biblu tọn Juda ji. Mí yin tulina nado basi hihọ́ na yise mítọn gbọn avunteninọ sọta nuyiwadomẹji ylankan lẹ dali, taidi fẹnnuwiwa, tasinsinyẹn, po atẹṣiṣi po. Enẹgodo, mẹjitọ lẹ—titengbe otọ́ lẹ—mọ ayidonugo vonọtaun yí to hodidọ lọ “Wleawudai na Whédo Towe” mẹ. Awuwiwle na nuhudo whẹndo lọ tọn lẹ to gbigbọmẹ, agbasamẹ, po numọtolanmẹ po mẹ yin dandannu Owe wiwe tọn. (1 Timoti 5:8) Ehe biọ whenu, hodọdopọ, po pọninọ pẹkipẹki po. Na jide tọn homẹ Jehovah Jiwheyẹwhe tọn nọ hùn na azọ́n sinsinyẹn lẹpo he mẹjitọ Klistiani lẹ to wiwà nado pọ́n ovi yetọn lẹ go whẹ́n to nugbo lọ mẹ.

Homádọ he bọdego lọ, “Mì Gbọ Mí Ni Yì Owhé Jehovah Tọn Gbè,” wleawu pinpẹn-nutọn-yinyọnẹn na opli Klistiani tọn lẹ. Yé nọ wleawuna gbọjẹ sọn magbọjẹ aihọn ehe tọn lẹpo si. To opli lẹ tẹnmẹ mí nọ tindo dotẹnmẹ hundote nado miọnhomẹna ode awetọ, podọ mí sọgan basi dohia owanyi mítọn na hagbẹ yisenọ lẹ. (Heblu lẹ 10:24, 25) Opli lẹ sọ nọ gọalọna mí nado hẹn azọ́nyinyọnẹn mítọn taidi mẹplọntọ lẹ pọnte, bọ yé sọ nọ hẹn nukunnumọjẹnumẹ lẹndai Jiwheyẹwhe tọn mítọn siso deji. (Howhinwhẹn lẹ 27:17) Na mí ni ma klan mídelẹ dovo sọn agun lọ go gbede blo, bosọ gbọ mí ni nọ flin hogbe Jesu tọn lẹ dọmọ: “Ofi he omẹ awe kavi atọ̀n bẹ́ yede pli dopọ to oyín ṣie mẹ te, yẹn tin to gblagbla yetọn mẹ to finẹ.”—Matiu 18:20.

Hodidọ godo tọn na azán lọ wẹ “Jẹhẹnu Yise Towe Tọn—Yin Whiwhlepọn Todin.” Yise he mayin whiwhlepọn ma tindo nuhọakuẹ depope gba, podọ jẹhẹnu etọn gbọṣi mayọnẹn mẹ. E taidi akuẹ-yiwema he yè ma ko mọ akuẹ etọn yí de. Be nuhọakuẹ etọn sọ sọha akuẹ he tin to e ji lọ tọn wẹ ya? Mọdopolọ, yise mítọn dona yin whiwhlepọn nado dohia dọ e tindo nugonu po jẹhẹnu nujọnu tọn po. (1 Pita 1:6, 7) Hodọtọ lọ dọmọ: “To whedelẹnu, linlinnanu lẹ po aṣẹpatọ lẹ po nọ yin kiklọ gbọn sinsẹ̀ngan lẹ po atẹṣitọ lẹ po dali nado tindo pọndohlan agọ̀ gando mí go, bo nọ basi dohia agọ̀ yise Klistiani tọn po aliho gbẹzan tọn mítọn po. . . . Be mí na dike mẹhe Satani tọ́nnukunna lẹ ni dobuna mí bo hẹn apọṣi mí nado hẹn mí tindo numọtolanmẹ winyan tọn na wẹndagbe lọ wẹ ya? Be mí na dike na lalo lẹ gando nugbo lọ go ni yinuwa do opli yìyì gbesisọ tọn po nuwiwa yẹwhehodidọ tọn mítọn po ji wẹ? Kavi be mí na nọte gli bo yin adọgbotọ podọ nujikudonọ hugan gbede pọ́n nado to nukọnzindo to lilá nugbo dogbọn Jehovah po Ahọluduta etọn po dali ya?”

Nọgbẹ̀ Gbọn Whẹwhinwhẹ́n Yise Tọn Dali

Hosọ azán atọ̀ntọ plidopọ lọ tọn yin zize sinai do hogbe Paulu tọn lẹ ji dọmọ: “Yè ma suwhẹna omẹ depope to Jiwheyẹwhe nukọn gbọn azọ́n osẹ́n tọn dali gba, na, dodonọ na nọ̀ ogbẹ̀ gbọn yise dali.” (Galatianu lẹ 3:11) Homádọ lọ, “Hogbe Dọdai Joẹli Tọn lẹ na Azán Mítọn,” yin adà dopo hodidọ afọnnu tọn. Owe Joẹli tọn dlẹnalọdo ojlẹ mítọn bo dọ po linlẹn niyaniya tọn de po dọmọ: “Haa na azán lọ! azán OKLUNỌ tọn lọ tin to alọji, podọ azán lọ e na wá di vivà sọn, Ganhunupotọ lọ dè.” (Joẹli 1:15) To aliho dopolọ mẹ taidi owẹ̀n he agbọ́ ma nọ pé lẹ tọn nkọ, Klistiani yiamisisadode lẹ ma ko dike na nudepope ni glọnalina yé sọn lilá Ahọluduta lọ tọn mẹ to ojlẹ opodo tọn ehe mẹ gba.

Owe Joẹli tọn sọ na todido, dọmọ: “Mẹdepope he dawhá ylọ oyín OKLUNỌ tọn wẹ yè na whlẹngán.” (Joẹli 2:32) Ehe zẹẹmẹdo hugan yíyí yinkọ Jehovah tọn zan poun. Lẹnvọjọ ahun doponọ yin nuhudo, podọ ehe bẹ gbigbẹ́ ylanwiwa dai hẹn. (Joẹli 2:12, 13) Ojlẹ matin nado dọngban gba na to madẹnmẹ Jehovah na hẹn whẹdida ṣẹ̀ do akọta lẹ ji, yèdọ dile e basi do na Moabi, Ammọni, po otò osó Seili tọn lẹ po to azán Ahọlu Jehọṣafati Juda tọn lẹ tọn gbè.—2 Otannugbo lẹ 20:1-30; Joẹli 3:2, 12.

Mẹlẹpo yin tulina gbọn hodidọ lọ “Do Yise Hia Gbọn Tenọpọn Jehovah Dali.” Todin biọ ojlẹ opodo tọn mẹ sisosiso, mí sọgan pọ́n godo hlan hẹndi suhugan opagbe Jehovah tọn lẹ tọn, bọ mí sọ tindo ojlo vẹkuvẹku to onú he ma ko mọ hẹndi yí lẹ mẹ. Omẹ Jehovah tọn lẹ dona zindonukọn nado to homẹfa tindo, bo to finflin dọ nuhe Jiwheyẹwhe ko dopagbe etọn lẹpo na wá mọ hẹndi yí.—Titu 2:13; 2 Pita 3:9, 10.

Tito-to-whinnu afọnnu tọn wá tadona kọ̀n po nupinpọn-do-plọnnu lọ “Hẹn Nukun Towe Yin Dopo” po. Nupinpọn-do-plọnnu nujọnu tọn ehe na tuli mí nado gbadopọnna walọyizan mítọn gando mọdidona agbasanu lẹ go. Mahopọnna fidepope he mí nọ nọ̀, eyin mí jlo dọ gbẹzan mítọn ni vò sọn tukla si, mí dona hodo ayinamẹ Jesu tọn nado hẹn nukun mítọn yin dopo, bo ze e do Ahọluduta Jiwheyẹwhe Tọn ji.—Matiu 6:22.

Togunmẹho lọ tindo hosọ mẹwhantọ lọ “Yise po Sọgodo Towe Po.” E ze kunnudenu nugomape nukọntọ gbẹtọvi tọn lẹ nado didẹ nuhahun aihọn tọn lẹ donukọnnamẹ. (Jẹlemia 10:23) Whenuho gbẹtọ tọn to ede vọ́ dohia janwẹ—to obá he klo bosọ nọ gbleawunamẹ deji de mẹ. Etẹwẹ yin numọtolanmẹ Kunnudetọ Jehovah Tọn lẹ tọn gando sọgodo go? Mí yise dọ gbẹtọvi nugbonọ lẹ tindo sọgodo he to sisẹ́ de to Ahọluduta Jiwheyẹwhe Tọn glọ. (Matiu 5:5) Jiwheyẹwhe na hẹn opagbe etọn lẹ di na alemọyi mẹlẹpo he tindo yise to Ohó etọn mẹ lẹ, he dotuhomẹnamẹ dọmọ: “Mì din OKLUNỌ, whenu yè sọgan mọ ẹn do, mì ylọ ẹ, whenuena e tin to yakẹ.”—Isaia 55:6.

Jesu fọ́n kanbiọ titengbe de dote to pọndohlan mẹ gando azán mítọn go. E kanse dọmọ: “Whenuena Ovi gbẹtọ tọn na wá, be e na mọ yise to aihọn mẹ?” (Luku 18:8) Hodidọ godo tọn gbadopọnna tito-to-whinnu plidopọ lọ tọn bosọ do lehe e wleawuna kunnudenu họnwun lẹ dọ yise to Ohó Jiwheyẹwhe Tọn mẹ tin to aimẹ, dile etlẹ yindọ mí to gbẹnọ to aihọn he ma tindo yise po agbasanu bibẹpli tọn de po mẹ do.

Ṣogan, dopodopo mítọn lẹ sọgan kanse mídelẹ dọ, ‘Be yẹn tin to mẹhe tindo yise mawhango to Jiwheyẹwhe po Ohó etọn po lẹ ṣẹnṣẹn ya?’ Plidopọ Agbegbe “Yise To Ohó Jiwheyẹwhe Tọn Mẹ” tọn dona gọalọna mí nado na gblọndo mọwẹ hlan kanbiọ enẹ. Podọ lehe mí gọna pẹdido do sọ na Jehovah na hinhẹn yise mítọn lodo to ewọ mẹ podọ to Ohó gbọdo etọn, yèdọ Biblu lọ mẹ!

[Yẹdide to weda 24]

Mẹdezejotọ susu wazọ́n po ayajẹ po nado mọ adọtẹn na fọtọ́n afọzedaitọ lẹ tọn

[Yẹdide to weda 25]

L. A. Swingle heyin dopo to Hagbẹ Anademẹtọ lọ tọn mẹ to alọnuwe yọyọ lọ detọ́n

[Yẹdide to weda 25]

Aihundatẹn daho lẹ taidi ehe nkọtọn yin yiyizan lẹdo aihọn pé

[Yẹdide to weda 26]

Mẹsusu wẹ yin bibaptizi to yẹhiadonu klandowiwe yetọn hlan Jehovah mẹ

[Yẹdide to weda 27]

Plidopọ-watọ lẹ to ohàn Ahọluduta tọn lẹ ji po ayajẹ po. To ṣẹnṣẹn: nupinpọn-do-plọnnu lọ “Hẹn Nukun Towe Yin Dopo”