Jesu Do Devi 70 Hlan — WESẸDOTẸN INTẸNẸT JI TỌN Watchtower Tọn

Yé Wà Ojlo Jehovah tọn

Jesu Do Devi 70 Hlan

EYIN afò-whenu owhe 32 W.M. tọn. Osun ṣidopo poun wẹ pò whẹpo Jesu nido kú. Enẹwutu, nado sọgan hẹn azọ́n yẹwhehodidọ tọn yin niyaniya tọn bo plọn azọ́n delẹ to hodotọ etọn lẹ mẹ yinukọn dogọ, ewọ wleawuna devi 70 bo “do yé hlan, awe awe jẹnukọn na ẹn yì otòdaho po ofi he ewlọsu na jẹ lẹ po mẹ.”—Luku 10:1.a

Jesu do devi etọn lẹ hlan “jẹnukọn na ẹn yì” na gbẹtọ lọ lẹ nido penugo nado basi dide po awuyiya po vlavo yé tin na kavi sọta Mẹssia lọ to whenuena Jesu lọsu na wá to godo mẹ. Ṣigba naegbọn e do yé hlan “awe awe”? Kunnudenu dohia dọ, na yé nido sọgan yin tuli hlan ode awetọ to whenuena yé pehẹ nukundiọsọmẹ.

To nùzindo niyaniya-yinyin azọ́n yẹwhehodidọ tọn yetọn ji mẹ, Jesu dọ na hodotọ etọn lẹ dọmọ: “Ojijẹ lọ yin susunọ, ṣigba azọ́nwatọ lẹ wẹ vude; enẹwutu mì hodẹ̀ hlan Oklunọ ojijẹ tọn, na e ni do azọ́nwatọ hlan ojijẹ etọn mẹ.” (Luku 10:2) Dopolọ-yinyin jibẹwawhé tọn sọgbe, na awugbopo depope to ojlẹ jijẹ tọn mẹ sọgan dekọtọn do hinhẹn jinukun họakuẹ lẹ bú mẹ. Mọdopolọ, eyin devi lẹ dovọna azọ́ndenamẹ yẹwhehodidọ tọn yetọn, ogbẹ̀ họakuẹ lẹ sọgan yin hinhẹnbu!—Ezekiẹli 33:6.

Lizọnyizọnwatọ He Mayin Ayihafẹsẹna Lẹ

Jesu na ayinamẹ devi etọn lẹ yinukọn dogọ dọmọ: “Mì hẹn sẹgẹ, kavi ṣakoto, kavi afọpa, blo: mì sọ dọnudo mẹdepope to aliho blo.” (Luku 10:4) Nuwiwa aṣa tọn wẹ e yin na gbejizọnlin basitọ de nado hẹn e mayin sẹgẹ po núdùdù po kẹdẹ gba ṣigba afọpa devo, na afọpa lọ sọgan dù podọ okàn etọn lẹ sọgan wẹ́n. Ṣigba devi Jesu tọn lẹ ma dona jẹtukla dogbọn onú mọnkọtọn lẹ dali gba. Kakatimọ, yé dona deji dọ Jehovah na penukundo yé go gbọn Islaelivi hatọ lẹ dali, mẹhe ṣẹnṣẹn johẹmẹ yin walọ aṣa tọn te.

Ṣigba naegbọn Jesu do dọ na devi etọn lẹ ma nado gbò mẹdepope fán to nudọdomẹ whenu? Be yé dona yin hlònọ, yèdọ kanylantọ lẹ wẹ ya? Paali! Hogbe Glẹki tọn lọ a·spaʹzo·mai, he zẹẹmẹdo nado gbomẹfan to nudọdomẹ whenu, sọgan tindo zẹẹmẹ hugan “nawẹ a te” kavi “a fọ́n-dagbe ya” awuyadomẹ tọn de didọ. E sọgan sọ bẹ nudonugonamẹ aṣa tọn lẹ, mẹgbofan, po hodọdopọ gaa po he nọ wá aimẹ to whenuena mẹhe jẹakọhẹ yede awe pé hẹn. Linlinnatọ dopo doayi e go dọmọ: “Nudọdomẹ to omẹ Whezẹtẹn tọn lẹ ṣẹnṣẹn ma yin, dile e te to mí ṣẹnṣẹn do gba, yèdọ ota didẹ́ vude, kavi alọnamẹ, ṣigba nọ yin bibasi gbọn mẹgbofan susu dali, po doyiyi po, podọ etlẹ yin dindlẹn agbasa do aigba mlẹnmlẹn. Ehe lẹpo biọ ojlẹ susu.” (Yijlẹdo 2 Ahọlu lẹ 4:29 go.) Gbọnmọ dali Jesu gọalọna hodotọ etọn lẹ nado dapana ayihafẹsẹnamẹ he mayin dandan tọn lẹ, dile etlẹ yindọ eyin nuwiwa aṣa tọn.

To godo mẹ, Jesu dọ na devi etọn lẹ dọ to whenuena yé biọ owhé de gbè bo yin kuavọdona, yé ni ‘nọ owhé enẹ gbè, bo dù bosọ nù onú he yé na wleawu etọn.’ Ṣigba eyin yé biọ tòdaho de mẹ bo mayin alọkẹyi ganji, yé ni “tọ́n biọ alihogbo tòdaho lọ tọn lẹ mẹ bo dọmọ, yèdọ kọ́gudu sọn otòdaho mìtọn mẹ, he tẹ́do afọ mítọn go, mí súnsún sẹ̀ do mì ji.” (Luku 10:7, 10, 11) Nado súnsún kavi húnhún kọ́gudu sẹ̀ sọn afọ mẹde tọn go na dohia dọ devi lẹ yí jijọho do jó owhé kavi tòdaho he ma kẹalọyi yé lọ do hlan kọdetọn he na wá yé ji sọn Jiwheyẹwhe dè to agọgbọnẹnmẹ. Ṣigba mẹhe kẹalọyi devi Jesu tọn lẹ po homẹdagbe po ze yedelẹ do hukan ji na dona lẹ. Jesu dọna apọsteli etọn lẹ to nujijọ devo whenu dọmọ: “Mẹhe yí mì, e yí mi, mẹhe sọ yí mi, e yí mẹhe do mi hlan. Mẹdepope he na yí kọfo osìn miọnmiọn tọn de ṣokẹdẹ na dopo to yé omẹ vunvun helẹ mẹ to oyín nuplọntọ tọn mẹ, nugbo wẹ yẹn dọ hlan mì, ewọ ma na bà ale etọn pò to alọ depope mẹ gba.”—Matiu 10:40, 42.

Oplọn na Míwlẹ

Gbedide lọ nado dọyẹwheho wẹndagbe Ahọluduta Jiwheyẹwhe Tọn tọn podọ nado basi devi lẹ to yinyin hinhẹndi taun todin gbọn hugan Kunnudetọ Jehovah Tọn 5 000 000 lẹ dali lẹdo aihọn pé. (Matiu 24:14; 28:19, 20) Yé yọnẹn dọ owẹn yetọn yin niyaniya tọn. Enẹwutu, yé nọ yí whenu yetọn zan ganji, bo nọ dapana ayihafẹsẹnamẹnu lẹ he na glọnalina yé sọn ayidonugo gigọ́ nina hlan azọ́ndenamẹ titengbe tọn yetọn.

Kunnudetọ Jehovah Tọn lẹ nọ dovivẹnu nado yin awuvẹmẹtọ hẹ mẹhe yé dukosọhẹ lẹpo. Etomọṣo, yé ma nọ tindo mahẹ to nuwhedọ mẹ, mọjanwẹ yé ma nọ tindo mahẹ to nudindọn do whẹho lẹdo tọn kavi awugbopo vivẹnudido aihọn ehe tọn nado vọ́ whẹdida mawadodo tọn jlado ji gba. (Johanu 17:16) Kakatimọ, yé nọ ze hodọdopọ yetọn sinaido pọngbọ dẹn-to-aimẹ dopo kẹdẹ lọ hlan nuhahun gbẹtọvi lẹ tọn ji—yèdọ Ahọluduta Jiwheyẹwhe Tọn.

Whlasusu, Kunnudetọ Jehovah Tọn lẹ nọ yin mimọ nado to azọ́nwa awe awe. Be onú susu ma na yin wiwadotana eyin dopodopo yetọn lẹ wazọ́n yede ṣokẹdẹ ya? Vlavo. Ṣogan, Klistiani egbehe tọn lẹ yọ́n alemọyi azọ́nwiwa dopọ hẹ hatọ yisenọ mẹtọn tọn. E nọ na hihọ jẹ obá de mẹ to whenuena yè to kunnude to lẹdo owù tọn lẹ mẹ. Azọ́nwiwa hẹ omẹ awetọ de sọ nọ hẹn omẹ yọyọ lẹ penugo nado mọaleyi sọn azọ́nyinyọnẹn wẹnlatọ numimọnọ wẹndagbe lọ tọn lẹ mẹ. Na taun tọn, mẹlẹpo sọgan yidogọna tulinina ode awetọ.—Howhinwhẹn lẹ 27:17.

Matin ayihaawe, azọ́n yẹwhehodidọ tọn yin azọ́n niyaniya tọn hugan he to yinyin hinhẹndi to “azán godo tọn” ehelẹ mẹ. (2 Timoti 3:1) Kunnudetọ Jehovah Tọn lẹ yin homẹhunnọ nado tindo godonọnamẹ mẹmẹsunnu-yinyin lẹdo aihọn pé tọn to ehe mẹ yé nọ wazọ́n “bosọ [nọ] nọpọ . . . na yise wẹndagbe tọn wutu.”—Filippinu lẹ 1:27.

[Nudọnamẹ Odò Tọn]

a Biblu po alọnuwe-hihia hohowhenu Glẹki tọn delẹ po dọ dọ Jesu do devi “kandegbàn-nukunawe” hlan. Etomọṣo, alọnuwe-hihia susugege nọgodona hihia lọ “kandegbàn.” Vogbingbọn zẹẹmẹ bibasi tọn ehe ma dona fẹ́ayihasẹnamẹ sọn nuagokun lọ ji, dọ Jesu do pipli daho devi etọn lẹ tọn hlan nado dọyẹwheho gba.