Be Hiẹ Flin ya?

Be hiẹ ko mọ zinjẹgbonu agọe Atọ̀họ̀-Nuhihọ́ Lọ Tọn lẹ nado yin nuhọakuẹ yọn-na-yizan na we ya? To whelọnu lo naegbọn hiẹ ma nado tẹ́n oflin towe pọ́n po kanbiọ he bọdego ehelẹ po?

◻ Vogbingbọn tẹwẹ tin to “azán Oklunọ tọn” po ‘azán Jehovah tọn’ po ṣẹnṣẹn? (Osọhia 1:10; Joẹli 2:11)

“Azán Oklunọ tọn” bẹ hẹndi numimọ 16 heyin zẹẹmẹ basina to Osọhia weta 1 jẹ 22 mẹ lẹ hẹn gọna nujijọ tangan lẹ he Jesu dọ dọdai yetọn to gblọndo nina mẹ na kanbiọ devi etọn lẹ tọn gando ohia tintin tofi etọn tọn go. Taidi nujijọ tadona tọn na azán Oklunọ tọn, azán daho he dobu Jehovah tọn na gbajẹgbonu to whenuena ewọ na hẹn whẹdida ṣẹ do Satani po aihọn gblezọn etọn po ji. (Matiu 24:3-14; Luku 21:11)—1/1, weda 3.

◻ Nawẹ Jehovah do awuvẹmẹ hia to gandudu etọn do akọta Islaeli tọn ji gbọn?

Jehovah whlẹn Islaelivi lẹ sọn kanlinmọgbenu to Egipti. E wleawu núdùdù tọn na yé gbọn azọ́njiawu dali, bo whlẹn yé biọ aigba yedetiti tọn ji. E sọ degbena yé nado yinuwa hẹ tọṣiọvi lẹ, asuṣiọsi lẹ, waṣinu lẹ, po madogánnọ lẹ po to awuvẹmẹ mẹ. (Deutelonomi 15:12-14; 24:17-22; 27:18)—1/1, weda 30.

◻ Nawẹ whiwhẹ sọgan gọalọna mẹde to ojlẹ yajiji tọn mẹ gbọn?

Eyin tukla wá aimẹ, whiwhẹ nọ gọalọna mẹde nado nọte bo doakọnnanu podọ nado zindonukọn to sinsẹ̀nzọn etọn mẹ hlan Jiwheyẹwhe. Dile etlẹ yindọ Davidi jiya yasanamẹ susu tọn, whiwhẹ etọn yí onú daho wà to hinhẹn ẹn gọwa nukundagbe Jehovah tọn mẹ.—2/15, weda 30.

◻ Mẹnu lẹ wẹ yin Jehu po Jehonadabi egbezangbe tọn lẹ po?

Jehu nọtena Jesu Klisti, mẹhe yin afọ etọn zedai to aigba ji gbọn “Islaeli Jiwheyẹwhe tọn” dali, yèdọ Klistiani yiamisisadode lẹ. (Galatianu lẹ 6:16; Osọhia 12:17) Kẹdẹdile Jehonadabi tọ́n jẹgbonu nado pé Jehu do, “gbẹtọ susugege” de sọn akọta lẹ mẹ ko tọ́n jẹgbonu nado nọgodona nukunmọnu aigba ji Jesu tọn lẹ. (Osọhia 7:9, 10; 2 Ahọlu lẹ 10:15)—1/1, weda 20.

◻ Etẹwẹ ‘zọnlinzinzin hẹ Jiwheyẹwhe’ zẹẹmẹdo? (Gẹnẹsisi 5:24; 6:9)

Ehe zẹẹmẹdo dọ mẹhe to mọ wà lẹ, taidi Enọku po Noa po, yí yedelẹ zan to aliho de mẹ he na kunnudenu yise he dolido to Jiwheyẹwhe mẹ tọn. Yé wà nuhe Jehovah degbena yé lẹ bo hẹn gbẹzan yetọn lẹ tin to kọndopọmẹ hẹ nuhe yé yọnẹn gando ewọ go sọn nuyiwa etọn lẹ hẹ gbẹtọvi mẹ.—15/1, weda 13.

◻ Naegbọn mẹde dona basi tito dai na yọnbasi okú etọn tọn?

To linlẹn de mẹ, tito mọnkọtọn lẹ bibasi yin nunina de na whẹndo mẹde tọn. E nọ do owanyi hia. E nọ do kunnudenu nado ‘wleawudaina hagbẹ whédo mẹdetiti tọn lẹ hia’ etlẹ yin to whenuena omẹ lọ ma tlẹ sọ tin po yé po. (1 Timoti 5:8)—15/1, weda 22.

◻ Etẹwẹ “alẹnu hoho” lọ basi wadotana etọn? (2 Kọlintinu lẹ 3:14)

E yin yẹhiadonu alẹnu yọyọ lọ tọn podọ, po avọ́sinsan debọdo-dego etọn lẹ po, e basi dohia nuhudo egblemaku gbẹtọ tọn na ofligọ sọn ylando po okú po si. E yin “mẹplọntọ nado hẹn mí wá Klisti dè.” (Galatianu lẹ 3:24)—1/2, weda 14.

◻ To aliho tẹlẹ mẹ wẹ alẹnu yọyọ lọ yin madopodo te? (Heblu lẹ 13:20)

Tintan, to ma taidi alẹnu Osẹ́n tọn mẹ, e ma na yin tẹndiọna gbede. Awetọ, kọdetọn nuyiwa etọn lẹ tọn dẹn-to-aimẹ. Podọ atọ̀ntọ, mẹjidugando aigba ji tọn Ahọluduta Jiwheyẹwhe tọn lẹ na to nukọnzindo nado to alemọyi tindo sọn tito alẹnu yọyọ lọ tọn mẹ gbọn Owhe fọtọ́n lọ gblamẹ.—1/2, weda 22.

◻ Alemọyi tẹlẹ wẹ nọ dekọtọn sọn yinyin pẹdotọ mẹ?

Zohunhun he mẹde nọ tindo numimọ etọn na yinyin pẹdotọ sọn ahun mẹ nọ yidogọna ayajẹ po jijọho etọn po. (Yijlẹdo Howhinwhẹn lẹ 15:13, 15 go.) Na yinyin jẹhẹnu dagbe de wutu, pinpẹn-nutọn-yinyọnẹn nọ basi hihọ́na mẹde sọn numọtolanmẹ agọ̀ lẹ taidi homẹgble, awuwhàn, po mẹhẹndohomẹ po si.—15/2, weda 4.

◻ Alẹnu tẹlẹ mẹ wẹ mẹhe yin jìjì gbọn gbigbọ dali lẹ yin hinhẹn biọ?

Alẹnu yọyọ lọ, ehe Jehovah basi hẹ hagbẹ Islaeli gbigbọmẹ tọn lẹ, po alẹnu na Ahọluduta lọ po, ehe Jesu basi hẹ mẹyiamisisadode he nọ hodo afọdòmẹ etọn lẹ. (Luku 22:20, 28-30)—15/2, weda 16.

◻ Hùnwhẹ daho atọ̀n tẹlẹ wẹ Islaelivi lẹ yin gbedena nado nọ yì?

Hùnwhẹ Akla Madotọ́n tọn, ehe yin hihodo tlolo gbọn Juwayi Nisan 14 tọn dali; Hùnwhẹ Osẹ lẹ tọn, to azán 50tọ gbè sọn Nisan 16; po Hùnwhẹ Jibẹwawhé tọn, kavi Hùnwhẹ Gòhọtúntún tọn po, to osun ṣinawetọ mẹ. (Deutelonomi 16:1-15)—1/3, weda 8, 9.

◻ Naegbọn e do yin lẹblanulọkẹyi de nado nọ yì pipli Klistiani tọn lẹ?

Jesu dọmọ: “Na ofi he omẹ awe kavi atọ̀n bẹ́ yede pli dopọ to oyin ṣie mẹ te, yẹn tin to gblagbla yetọn mẹ to finẹ. (Matiu 18:20; 28:20) Humọ, aliho tangan he mẹ núdùdù gbigbọmẹ tọn nọ yin dùdù te wẹ gbọn opli agun tọn lẹ po pipli daho lẹ po gblamẹ. (Matiu 24:45)—1/3, weda 14.

◻ Etẹwẹ yin bẹjẹeji oyín Nimlọdi tọn?

Weyọnẹntọ susu wẹ tindo linlẹn lọ dọ Nimlọdi mayin oyín heyin nina to jìjì whenu de gba. Kakatimọ, yé pọ́n ẹn hlan taidi oyín de heyin nina to godo mẹ nado sọgbe hẹ walọyizan atẹṣiṣi tọn etọn to whenuena e ko sọawuhia godo.—15/3, weda 25.

◻ Nawẹ whẹndo yin onú titengbe de do sọ na ogbẹ́ gbẹtọvi tọn?

Dandannu de wẹ whẹndo yin na gbẹtọvi lẹ. Whenuho dohia dọ dile tito whẹndo tọn to doyi do, huhlọn ogbẹ́ tọn lẹ po akọta lẹ tọn po to gbigbọjọ. Enẹwutu whẹndo tindo nugandomẹgo tlọlọ do dolilo ogbẹ́ tọn gọna dagbemẹ-ninọ ovi lẹ tọn po whẹndo sọgodo tọn lẹ po ji.—1/4, weda 6.

◻ Etẹwẹ yin hukan atọ̀n kunnudenu tọn lẹ dọ Biblu yin Ohó Jiwheyẹwhe tọn?

(1) E sọgbe to lẹnunnuyọnẹn liho; (2) e bẹ nunọwhinnusẹ́n dẹn-to-aimẹ lẹ hẹn he yọn-na-yizan na gbẹninọ egbezangbe tọn; (3) e bẹ dọdai tangan he ko yin hinhẹndi lẹ hẹn, dile e yin kunnudena gbọn nugbo whenuho tọn lẹ dali do.—1/4, weda 15.