Be Azọ́n Towe Na Nọte to Miyọ́n lọ Nukọn Ya? — WESẸDOTẸN INTẸNẸT JI TỌN Watchtower Tọn

Be Azọ́n Towe Na Nọte to Miyọ́n lọ Nukọn Ya?

“Mì gbọ omẹ dopodopo ni payi le e to dido do [dodonu lọ] ji do go.”—1 KỌLINTINU LẸ 3:10.

1. Todido tẹwẹ Klistiani nugbonọ lẹ tindo gando devi sọgodo tọn lẹ go?

KLISTIANI asu po asi po de nọ to ovi yẹyẹ yetọn he ṣẹṣẹ yin jiji lọ pọ́n. Wẹnlatọ Ahọluduta tọn de nọ mọ dohia ojlo, jejejininọ tọn to nukun plọnmẹ Biblu etọn de tọn mẹ. Klistiani mẹho de he to mẹplọ́n sọn oplò ji nọ doayi jlodotọ yọyọ de go to mẹplidopọ lẹ mẹ he to wefọ lẹ hùn to Biblu etọn mẹ po zohunhun po. Devizọnwatọ nugbonọ Jehovah tọn ehelẹ tindo ahun he yin gigọ́ po todido po lẹ. To jọwamọ liho e nọ paṣa yé dọ, ‘Be omẹ ehe na wá yiwanna bo sẹ̀n Jehovah—bosọ gbọṣi nugbonọ-yinyin mẹ ya?’ Na nugbo tọn, kọdetọn mọnkọtọn ma nọ wá na ede gba. E nọ biọ azọ́n.

2. Nawẹ apọsteli Paulu flin nujọnu-yinyin azọ́n mẹpinplọn tọn Klistiani Heblu tọn lẹ gbọn, podọ dogbapọn-mẹdetiti tọn tẹwẹ ehe sọgan whàn mí nado basi?

² Taidi mẹplọntọ azọ́nyọnẹntọ de na edetiti, apọsteli Paulu mọnukunnujẹ nujọnu-yinyin azọ́n mẹpinplọn po devi lẹ bibasi tọn po mẹ to whenuena e wlan dọmọ: “Ojlẹ he mẹ e jẹ dọ mì [ni] yin mẹplọntọ.” (Heblu lẹ 5:12) Klistiani he e dọho hlan lẹ ko basi nukọnyiyi vude, eyin yè lẹnnupọn do lehe e dẹnsọ bọ yé ko yin yisenọ lẹ ji. E mayin dọ yé ma ko wleawu nado plọn mẹdevo lẹ kẹdẹ wẹ gba, ṣigba yé dona yin finflin dogbọn adà dodonu nugbo lọ tọn lẹ dali ga. To egbehe, mímẹpo na wà dagbe nado nọ gbadopọnna nugopipe mítọn taidi mẹplọntọ lẹ sọn ojlẹ de mẹ jẹ devo mẹ bosọ pọ́n lehe mí sọgan hẹn yé pọnte do. Ogbẹ̀ lẹ tin to owù mẹ. Etẹwẹ mí sọgan wà?

3. (a) Etẹ go wẹ apọsteli Paulu yí nuwiwa devi Klistiani de tọn bibasi jlẹdo? (b) Taidi didotọ Klistiani tọn lẹ, lẹblanulọkẹyi daho tẹwẹ mí tindo?

³ To oló he gbloada de mẹ, Paulu yí devi lẹ bibasi jlẹdo nuyiwa ohọ̀ de gbigbá tọn go. E bẹjẹeji gbọn didọ dali dọmọ: “Na azọ́nyiwahẹmẹtọ dopọ hẹ Jiwheyẹwhe wẹ míwlẹ: oglelilẹ Jiwheyẹwhe tọn wẹ mìwlẹ, mì wẹ họdido Jiwheyẹwhe tọn.” (1 Kọlintinu lẹ 3:9) Enẹwutu mí nọ tindo mahẹ to azọ́n họdido tọn de mẹ he bẹ gbẹtọ lẹ hẹn; mí nọ gọalọ nado dó yé dote nado lẹzun devi Klisti tọn lẹ. Mí nọ wàmọ taidi azọ́nyiwahẹmẹtọ Omẹ lọ he “do onú popo” tọn. (Heblu lẹ 3:4) Lẹblanulọkẹyi nankọtọn die! Mì gbọ mí ni pọ́n lehe ayinamẹ gbọdo Paulu tọn hlan Kọlintinu lẹ sọgan gọalọna míwlẹ nado lẹzun azọ́nyọnẹntọ taun to azọ́n mítọn mẹ do. Mí na ze ayidonugo mítọn do ‘azọ́n mẹpinplọn’ tọn ji na taun tọn.—2 Timoti 4:2.

Dodonu He Sọgbe lọ Didoai

4. (a) Etẹwẹ yin azọngban Paulu tọn to azọ́n Klistiani dido tọn mẹ? (b) Naegbọn e sọgan yin didọ dọ Jesu po hosetọ etọn lẹ po yọ́n nujọnu-yinyin dodonu dagbe lẹ tọn?

⁴ Eyin ohọ̀ de na lodo bosọ dẹn-to-aimẹ, e tindo nuhudo dodonu dagbe de tọn. Gbọnmọ dali, Paulu wlan dọmọ: “Kẹdẹdi ojọmiọn Jiwheyẹwhe tọn he yè na mi, taidi ogán nuyọnẹntọ azọ́n tọn de, yẹn ko do dodonu de ai.” (1 Kọlintinu lẹ 3:10, NW) To oló mọnkọtọn de yiyizan mẹ, Jesu Klisti dọ dogbọn ohọ̀ de dali he lùn jẹhọn ahìzì de tọ́n na mẹhe gbá ẹ ko de dodonu he lodo de wutu. (Luku 6:47-49) Jesu yọ́n nulẹpo gando nujọnu-yinyin dodonu lẹ tọn go. E tin to finẹ to whenuena Jehovah dó dodonu aigba lọ tọn ai.a (Howhinwhẹn lẹ 8:29-31) Hosetọ Jesu tọn lẹ lọsu ga yọ́n nuhọakuẹ dodonu dagbe lẹ tọn. Ohọ̀ he tindo dodonu he lodo lẹ kẹdẹ wẹ sọgan nọte to osingigọ po aigba sisọsisọ he nọ jọ to Palestine to whedelẹnu po nukọn. Nalete, etẹwẹ yin dodonu lọ he Paulu tindo to ayiha mẹ?

5. Mẹnu wẹ yin dodonu agun Klistiani tọn, podọ nawẹ ehe yin didọdai gbọn?

⁵ Paulu wlan dọmọ: “Dodo devo de ma tin bọ mẹde sọ sọgan doai hú ehe yè doai nẹ, heyin Jesu Klisti.” (1 Kọlintinu lẹ 3:11) Ehe mayin whla tintan he Jesu ko yin yíyí jlẹdo dodonu de go gba. Na nugbo tọn, Isaia 28:16 dọ dọdai dọmọ: “Le wẹ Oklunọ JIWHEYẸWHE dọ, Doayi e go, yẹn ze awinyan dopo tùnte to Ziọni mẹ na odòdo, awinyan he yè whlepọn, awinyan he họakuẹ họ̀lọnglọnẹn tọn, odòdo gángán.” Jehovah ko lẹndai sọn whenu dindẹn die dọ Visunnu etọn na lẹzun dodonu agun Klistiani tọn.—Psalm 118:22; Efesunu lẹ 2:19-22; 1 Pita 2:4-6.

6. Nawẹ Paulu dó dodonu he sọgbe lọ ai to Klistiani Kọlinti tọn lẹ mẹ gbọn?

⁶ Etẹwẹ yin dodonu Klistiani dopodopo tọn? Dile Paulu dọ do, dodonu devo depope matin na Klistiani nugbo de adavo dehe yin didoai do Ohó Jiwheyẹwhe tọn mẹ—yèdọ Jesu Klisti. Dodonu mọnkọtọn wẹ Paulu doai na jide tọn. To Kọlinti, fie tamẹnuplọnmẹ nọ yin nukun nujọnu tọn yí do pọ́n te sọmọ, ewọ ma dín nado dù to gbẹtọ lẹ ji po nuyọnẹn aihọn tọn po gba. Kakatimọ, Paulu dọ yẹwheho “Klisti [mẹwhedoyatingo] tọn,” ehe akọta lẹ gbẹdai taidi “onulu.” (1 Kọlintinu lẹ 1:23) Paulu plọnmẹ dọ Jesu wẹ yin ahọ́nkan lẹndai Jehovah tọn lẹ tọn.—2 Kọlintinu lẹ 1:20; Kọlọsinu lẹ 2:2, 3.

7. Etẹwẹ mí sọgan plọn sọn alọdlẹndonu mẹdetiti Paulu tọn taidi ‘ogán azọ́nwatọ nuyọnẹntọ de’ mẹ?

⁷ Paulu doayi e go dọ ewọ wazọ́n mẹpinplọn tọn mọnkọtọn ‘taidi ogán nuyọnẹntọ azọ́n tọn de.’ Hodidọ ehe mayin goyiyi tọn gba. Gbeyiyi nunina jiawu de he Jehovah ko na ẹn tọn wẹ e yin poun—yèdọ enẹ heyin titobibasina kavi anadidena azọ́n tọn. (1 Kọlintinu lẹ 12:28) Nugbo wẹ dọ, míwlẹ to egbehe ma tindo nunina azọ́njiawu tọn lẹ heyin nina Klistiani owhe kanweko tintan whenu tọn lẹ gba. Podọ mí sọgan gọ̀n ma pọ́n mídelẹ hlan taidi mẹhe tindo nunina mẹpinplọn tọn lẹ. Ṣigba to linlẹn nujọnu tọn de mẹ, mí yinmọ. Lẹnnupọn deji: Jehovah na gbigbọ wiwe etọn mí nado gọalọna mí. (Yijlẹdo Luku 12:11, 12 go.) Podọ mí tindo owanyi Jehovah tọn po oyọnẹn dodonu nuplọnmẹ Ohó etọn tọn lẹ po. Na nugbo tọn ehelẹ yin nunina jiawu lẹ nado yizan to nupinplọn mẹdevo lẹ mẹ. Mì gbọ mí ni magbè nado yí yé zan nado dó dodonu he sọgbe lọ ai.

8. Nawẹ mí nọ dó Klisti ai taidi dodonu de to devi sọgodo tọn lẹ mẹ gbọn?

⁸ To whenuena mí dó Klisti ai taidi dodonu de, mí ma nọ do e hia taidi ovivu he to alọgọ biọ to ajákẹn de mẹ, kavi taidi mẹhe sọzẹn hẹ Jehovah to Atọ̀n-to-dopomẹ de mẹ gba. Lala, linlẹn he ma sọgbe hẹ Owe-wiwe mọnkọtọn lẹ wleawu dodonu de tọn na Klistiani yẹnuwatọ lẹ. Kakatimọ, mí nọ plọnmẹ dọ ewọ yin dawe klo hugan lọ he ko nọgbẹ̀ pọ́n, dọ ewọ ze ogbẹ̀ pipé etọn dai do ota mítọn mẹ, podọ ewọ to egbehe yin Ahọlu dide Jehovah tọn he to gandu to olọn mẹ. (Lomunu lẹ 5:8; Osọhia 11:15) Mí sọ nọ tẹnpọn nado whàn nuplọntọ mítọn lẹ nado zinzọnlin gbọn afọdò Jesu tọn lẹ ji bosọ hodo apajlẹ jẹhẹnu etọn lẹ tọn. (1 Pita 2:21) Mí jlo dọ yé ni yin whinwhan sisosiso gbọn zohunhun Jesu tọn na lizọnyizọn lọ dali, awuvẹmẹ etọn na mayọndenọ po mẹhe yin kọgbidina lẹ po, lẹblanu etọn hlan ylandonọ he jẹflumẹ na whẹhuhu yede titi tọn lẹ, adọgbigbo mawhango etọn to whlepọn lẹ nukọn. Na nugbo tọn, Jesu yin dodonu daho gángán de. Ṣigba etẹwẹ jẹgodona enẹ?

Dido po Azọ́nwanu He Sọgbe lẹ Po

9. Dile etlẹ yindọ Paulu na taun tọn yin dodonu-doaitọ de, ahunmẹdunamẹnu tẹwẹ e tindo na mẹhe kẹalọyi nugbo nuhe e plọnmẹ tọn lẹ?

⁹ Paulu wlan dọmọ: “Ṣigba eyin omẹ de dó sika, fataka, zannu akuẹgege tọn, atin, ogbé, ogbésanpo, do dodo he ji; azọ́n omẹ dopodopo tọn na sọawuhia; na azán lọ na la ẹ, na yè na dè e hia gbọn miyọ́n dali; podọ miyọ́n na whle azọ́n omẹ dopodopo tọn pọ́n ehe nkọ e yin.” (1 Kọlintinu lẹ 3:12, 13) Etẹ dọ wẹ Paulu te? Gbadopọnna dodonu lọ. Paulu yin dodonu-doaitọ de na taun tọn. To gbejizọnlin mẹdehlan tọn etọn lẹ whenu, e zìn gbejizọnlin sọn todaho de mẹ jẹ todaho devo mẹ, bo to yẹwhehodọ hlan mẹsusu he ma ko sè dogbọn Klisti dali pọ́n lẹ. (Lomunu lẹ 15:20) Dile gbẹtọ lẹ kẹalọyi nugbo he e to pinplọnmẹ, agun lẹ yin didoai. Paulu yin ahunmẹduna sisosiso dogbọn omẹ nugbonọ ehelẹ dali. (2 Kọlintinu lẹ 11:28, 29) Etomọṣo, azọ́n etọn biọ dọ ewọ ni to nukọnyi to gbejizọnlin etọn mẹ. Enẹwutu to osun 18 yiyizan to dodonu de didoai to Kọlinti godo, e sẹtẹn nado yì dọyẹwheho to todaho devo lẹ mẹ. Etomọṣo, ewọ tindo ojlo vẹkuvẹku to lehe mẹdevo lẹ to dido do azọ́n he ewọ ko wà to finẹ lọ ji do mẹ.—Owalọ lẹ 18:8-11; 1 Kọlintinu lẹ 3:6.

10, 11. (a) Nawẹ Paulu yí họgbánu wunmẹ voovo lẹ jlẹdo yedelẹ go gbọn? (b) Wunmẹ họgbigbá paa tọn tẹlẹ wẹ sọgan ko tin to Kọlinti hohowhenu tọn mẹ? (c) Wunmẹ họgbigbá tọn tẹlẹ wẹ nọ saba doakọnna miyọ́n, podọ nuplọnmẹ tẹwẹ enẹ wleawu etọn na Klistiani he nọ basi devi lẹ?

¹⁰ E taidi dọ mẹdelẹ he to dido do dodonu he Paulu ko doai to Kọlinti ji to azọ́n he ma lodo de wà. Nado hẹn whẹho lọ họnwun, Paulu yí họgbánu wunmẹ awe jlẹdo yedelẹ go: sika, fataka, po zannu akuẹgege tọn po to alọ dopo mẹ; atin, ogbé, po ogbésanpo po to alọ devo mẹ. Ohọ̀ de sọgan yin gbigbá po họgbánu dagbe, he nọ dẹn-to-aimẹ, bọ miyọ́n ma sọgan dù lẹ po; kavi mẹde sọgan gbọn whlẹndo dali yí họgbánu he nọ gble, ojlẹ gli tọn, po dehe miyọ́n nọ dù lẹ po zan. Matin ayihaawe, todaho mọnkọtọn taidi Kọlinti yin gigọ́ po họgbigbá wunmẹ awe lẹ po. Tẹmpli gangansu lẹ tin to finẹ heyin gbigbá po bliki zannu tọn, daho daho lẹ po, vlavo yin titlẹ́ kavi yin aṣọdona to apadewhe gbọn sika po fataka po dali.b Vlavo họgbánu he nọ dẹn-to-aimẹ ehelẹ tin to ota na ohọ̀ lẹ, gohọ lẹ, po ahi-họ̀ he tin to yakẹ lẹ po heyin gbigbá po owhlẹ he ma sinyẹn lẹ po gọna ogbé lẹ.

¹¹ Etẹwẹ na jọ do họgbigbá ehelẹ go to miyọ́n de mẹ? Gblọndo lọ họnwun to azán Paulu tọn gbè dile e yin do to azán mílọsu tọn gbè. Na nugbo tọn, todaho Kọlinti tọn ko yin zinzindai bo yin mimẹ gbọn Awhàngan Lomu tọn Mummius dali yigodo jẹ owhe 146 J.W.M. E họnwun dọ ohọ̀ susu lẹ heyin atin, ogbé kavi ogbésanpo tọn lẹ ko yin vivasudo mlẹnmlẹn. Etẹwẹ dogbọn ohọ̀ zannu tọn he lodo lẹ, ehe yè yí sika po fataka po do doaṣọna lẹ dali? Matin ayihaawe, ehelẹ luntọ́n. Nuplọntọ Paulu tọn he tin to Kọlinti lẹ sọgan ko nọ jugbọn ohọ̀ mọnkọtọn lẹ kọ̀n to egbesọegbesọ—yèdọ ohọ̀ zannu tọn he lùn nugbajẹmẹji lẹ tọ́n he sọgan ko và ohọ̀ he ma sọgan dẹn-to-aimẹ lẹ sudo sọn whenu dindẹn die. To whelọnu lo, lehe Paulu zinnudo nuagokun etọn ji do sọ! To whenuena mí to mẹplọ́n mí dona nọ pọ́n mídelẹ hlan taidi họgbátọ lẹ. Mí na jlo nado wazọ́n po họgbánu dagbe hugan, he na dẹn-to-aimẹ lẹ po. To aliho enẹ mẹ e yọnbasi dọ azọ́n mítọn ni dẹn-to-aimẹ. Etẹwẹ yin azọ́nwanu he nọ dẹn-to-aimẹ enẹlẹ, podọ naegbọn e yin onú titengbe nado yí yé zan?

Be Azọ́n Towe Na Nọte to Miyọ́n lọ Nukọn Ya?

12. To aliho tẹlẹ mẹ wẹ Klistiani Kọlinti tọn delẹ to azọ́n họgbigbá numakiyana tọn basi te?

¹² E họnwun dọ, Paulu tindo numọtolanmẹ lọ dọ delẹ to Klistiani he tin to Kọlinti lẹ mẹ to ohọ̀ he ma lodo gba. Etẹwẹ jẹdò? Dile lẹdo hodidọ lọ tọn dohia do, agun lọ to yinyin tuklado dogbọn kinklan dali, yèdọ nukun nujọnu tọn yíyí do pọ́n mẹhe diyin lẹ mahopọnna owù lọ hlan pọninọ agun tọn. Mẹdelẹ to didọ dọ, “Paulu tọn wẹ yẹn,” to whenuena mẹdevo lẹ kudeji dọ, “Apọlo tọn wẹ yẹn.” E taidi dọ mẹdelẹ to nulẹnpọndo nuyọnẹn yedetiti tọn ji hugan. E ma paṣamẹ dọ, kọdetọn lọ wẹ yin lẹdo nulẹnpọn to agbasaliho, mawhẹn to gbigbọmẹ, gọna “nuvẹun po wiwọ́ po” he gbayipe. (1 Kọlintinu lẹ 1:12; 3:1-4, 18) Walọyizan ehelẹ nọ sọawuhia na jide tọn to nuplọnmẹ he nọ yin bibasi to agun mẹ po lizọnyizọn lọ po mẹ. Kọdetọn lọ wẹ yindọ azọ́n devi lẹ bibasi tọn yetọn yin numakiyana tọn, taidi azọ́n họgbigbá tọn heyin bibasi po azọ́nwanu he mayin nujọnu tọn lẹ po. E ma na lùn “miyọ́n” lọ tọ́n gba. Miyọ́n nankọ hodọ wẹ Paulu te?

13. Etẹwẹ miyọ́n lọ to oló Paulu tọn mẹ nọtena, podọ etẹwẹ Klistiani lẹpo dona yọnẹn?

¹³ Miyọ́n de tin he mímẹpo pannukọn to gbẹ̀mẹ—yèdọ whlepọn yise mítọn tọn lẹ. (Johanu 15:20; Jakobu 1:2, 3) Klistiani he tin to Kọlinti lẹ dona ko yọnẹn, kẹdẹdile míwlẹ dona ko yọnẹn to egbehe do, dọ mẹlẹpo he míwlẹ to nugbo lọ plọn na yin whiwhlepọn. Eyin mí plọnmẹ to aliho he ma sọgbe mẹ, kọdetọn awubla tọn lẹ sọgan tin. Paulu na avase dọmọ: “Eyin azọ́n omẹ de tọn he e dó do e ji nọte, ewọ na mọaleyi. Eyin azọ́n omẹ de tọn fiọ, onú na gú i: ṣigba yè na whlẹn ewlọsu gán; ganṣo di gbọn miyọ́n mẹ.”c—1 Kọlintinu lẹ 3:14, 15.

14. (a) Nawẹ Klistiani he nọ basi devi lẹ sọgan ‘jiya nuhẹngu’ tọn gbọn, ṣogan nawẹ yé sọgan mọ whlẹngán yí gbọn miyọ́n gblamẹ do? (b) Nawẹ míwlẹ sọgan dè owù yajiji nuhẹngu tọn pò gbọn?

¹⁴ Hogbe mẹhẹnlẹnnupọn tọn wẹ nugbonugbo! Awufiẹsa taun wẹ e nọ yin nado wazọ́n sinsinyẹn nado gọalọna mẹde nado lẹzun devi de, podọ nado wá mọ poun dọ omẹ lọ ko jogbe na whlepọn kavi homẹkẹn bọ to agọgbọnẹnmẹ jo aliho nugbo tọn lọ do. Paulu yigbe domọ to whenuena e dọ dọ mí nọ jiya nuhẹngu tọn to whẹho mọnkọtọn lẹ mẹ. Numimọ lọ sọgan yin awufiẹsa tọn sọmọ bọ whlẹngán mítọn yin zẹẹmẹ basina taidi “gbọn miyọ́n mẹ”—taidi dawe de he hẹn nulẹpo bu to miyọ́n de mẹ bọ po huhlọn po wẹ ewọ lọsu do lùn miyọ́n lọ tọ́n. Na míwlẹ tọn, nawẹ mí sọgan dè owù nuhẹngu tọn lọ pò gbọn? Gbá po azọ́nwanu he nọ dẹn-to-aimẹ lẹ po! Eyin mí plọn nuplọntọ mítọn lẹ bo biọ ahun yetọn lẹ mẹ, bo whàn yé nado yí nukun nujọnu tọn do pọ́n jẹhẹnu Klistiani tọn mọnkọtọn lẹ taidi nuyọnẹn, wuntuntun, obu Jehovah tọn, po yise nujọnu tọn po, to whenẹnu mí to gbigbá po azọ́nwanu he nọ dẹn-to-aimẹ, bọ miyọ́n ma sọgan dù lẹ po. (Psalm 19:9, 10; Howhinwhẹn lẹ 3:13-15; 1 Pita 1:6, 7) Mẹhe wleawuna jẹhẹnu ehelẹ na to ojlo Jiwheyẹwhe tọn wà zọnmii; yewlẹ tọn wẹ todido gbẹninọ kakadoi tọn. (1 Johanu 2:17) Nalete, nawẹ mí sọgan ze oló Paulu tọn do yizan mẹ gbọn? Lẹnnupọndo apajlẹ delẹ ji.

15. To aliho tẹlẹ mẹ wẹ mí sọgan hẹn ẹn diun te dọ mí dapana azọ́n họgbigbá numakiyana tọn gando Biblu plọntọ mítọn lẹ go?

¹⁵ To whenuena yè to nuplọn Biblu plọntọ lẹ, mí ma dona ze gbẹtọ daga hugan Jehovah Jiwheyẹwhe pọ́n gbede gba. Yanwle mítọn mayin nado plọn yé nado nọ pọ́n mí hlan taidi asisa dodonu nuyọnẹn lọ tọn gba. Mí jlo dọ yé ni nọ pọ́n dohlan Jehovah, Ohó etọn, po titobasinanu etọn po dè na anademẹ. Na yanwle enẹ tọn wutu, mí ma nọ ze pọndohlan míde titi tọn lẹ donukọnnamẹ poun to gblọndo nina hlan kanbiọ yetọn lẹ mẹ gba. Kakatimọ, mí nọ plọn yé nado dín gblọndo lẹ, gbọn yizan Biblu po owe he “afanumẹ nugbonọ nuyọnẹntọ” ko wleawuna lẹ po dali. (Matiu 24:45-47) Na whẹwhinwhẹ́n he taidi enẹlẹ wutu, mí nọ họ́ mídelẹ ma nado duklunọ do Biblu plọntọ mítọn lẹ ji. Kakati nado gblehomẹ to whenuena mẹdevo lẹ de ojlo hia to yé mẹ, mí dona na tuli nuplọntọ mítọn lẹ nado “hùn dote” to owanyi zogbe yetọn lẹ mẹ, nado jẹakọhẹ bosọ yọ́n mẹsusu lẹ to agun lọ mẹ dile e na yọnbasi do.—2 Kọlintinu lẹ 6:12, 13.

16. Nawẹ mẹho lẹ sọgan gbá po azọ́nwanu he miyọ́n ma sọgan dù lẹ po gbọn?

¹⁶ Mẹho Klistiani lẹ lọsu nọ yí adà titengbe de wà to devi lẹ jijlọdote mẹ. To whenuena yé to mẹplọ́n to agun nukọn, yé nọ tẹnpọn nado dó po azọ́nwanu he miyọ́n ma sọgan dù lẹ po. Nugopipe mẹpinplọn tọn, numimọ, po gbẹtọ-yinyin yetọn po sọgan gbọnvo tlala, ṣigba yé ma nọ yí vogbingbọn ehelẹ zan nado dọ̀n hodotọ lẹ do yedelẹ godo gba. (Yijlẹdo Owalọ lẹ 20:29, 30 go.) Mí ma yọ́n nuhewutu mẹdelẹ to Kọlinti to didọ dọ, “Paulu tọn wẹ yẹn” kavi, “Apọlo tọn wẹ yẹn” na taun tọn gba. Ṣigba mí sọgan deji dọ depope to mẹho nugbonọ ehelẹ mẹ ma ze linlẹn kinklan tọn mọnkọtọn daga gba. Paulu mayin kiklọ gbọn numọtolanmẹ mọnkọtọn lẹ dali gba; yèdọ e gbẹ́ yé dai mlẹnmlẹn. (1 Kọlintinu lẹ 3:5-7) Mọdopolọ to egbehe, mẹho lẹ nọ hẹn do ayiha mẹ dọ yé to ‘lẹngbọpa Jiwheyẹwhe tọn’ yìn. (1 Pita 5:2) E mayin gbẹtọ depope tọn gba. Enẹwutu mẹho lẹ nọ nọte gligli sọta ayilinlẹn depope dọ omẹ dopo ni dugán do vlavo apó lọ kavi pipli mẹho lẹ tọn ji. Dile e na dẹnsọ bọ mẹho lẹ na nọ yin whinwhan gbọn ojlo whiwhẹ tọn nado sẹ̀n agun lọ dali, bo biọ ahun lẹ mẹ, bosọ gọalọna lẹngbọ lẹ nado sẹ̀n Jehovah po alindọn lẹpo po, yé nọ to dido po azọ́nwanu he miyọ́n ma sọgan dù lẹ po.

17. Nawẹ mẹjitọ Klistiani lẹ nọ dovivẹnu nado gbá po azọ́nwanu he miyọ́n ma sọgan dù lẹ po gbọn?

¹⁷ Mẹjitọ Klistiani lẹ lọsu nọ yin ahunmẹduna sisosiso po whẹho ehe po ga. Lehe yé nọ tindo ojlo vẹkuvẹku do sọ nado mọdọ ovi yetọn lẹ nọgbẹ kakadoi! Enẹwutu wẹ yé nọ wazọ́n sinsinyẹn sọmọ nado “yí sọwhiwhe do” zín nunọwhinnusẹ́n Ohó Jiwheyẹwhe tọn do ahun ovi yetọn lẹ tọn mẹ. (Deutelonomi 6:6, 7) Yé jlo dọ ovi yetọn lẹ ni yọ́n nugbo lọ, e mayin taidi pipli osẹ́n lẹ tọn de kavi odẹ̀ he yè nọ basi dọvọdọ etọn de poun gba, ṣigba taidi aliho gbẹzan tọn gigọ́ de, he nọ na ale omẹ, bosọ yin ayajẹ tọn de. (1 Timoti 1:11) Nado sọgan jlọ ovi yetọn lẹ dote nado lẹzun devi nugbonọ Klisti tọn lẹ, mẹjitọ owanyinọ lẹ nọ dovivẹnu nado yí azọ́nwanu he miyọ́n ma sọgan dù lẹ zan. Yé nọ yí sọwhiwhe do wazọ́n hẹ ovi yetọn lẹ, bo nọ gọalọna yé nado de walọyizan lẹ he Jehovah gbẹwanna sẹ̀ bosọ wleawuna jẹhẹnu he e yiwanna lẹ.—Galatianu lẹ 5:22, 23.

Mẹnu Wẹ Yin Azọngbannọ?

18. To whenuena devi de gbẹ́ nuplọnmẹ he nọ jlọmẹdote dai, naegbọn e sọgan gọ̀n ma yin owhẹ̀ mẹhe to vivẹnudo nado plọnnu bosọ plọn azọ́n ẹn lẹ na dandan tọn?

¹⁸ Hodọdopọ ehe fọ́n kanbiọ titengbe de dote. Eyin mẹde he mí dovivẹnu nado gọalọna de jai sọn nugbo lọ mẹ, be enẹ zẹẹmẹdo dọ mí ma pegan taidi mẹplọntọ lẹ wẹ—dọ mí ko gbá po azọ́nwanu he ma yọ́n lẹ po wẹ ya? E mayin mọ na dandan tọn gba. Hogbe Paulu tọn lẹ na jide tọn flin mí dọ azọngban daho de wẹ e yin nado tindo mahẹ to devi lẹ jijlọdote mẹ. Mí na jlo nado wà nulẹpo he go huhlọn mítọn pé nado gbá ganji. Ṣigba Ohó Jiwheyẹwhe tọn ma to didọna mí nado didá azọngban lọ blebu do ota bo lẹzun agban pinpẹn whẹhuhu tọn dona to whenuena mẹhe mí to tintẹnpọn nado gọalọna lẹ joagọ sọn nugbo lọ mẹ gba. E sọ bẹ onú devo lẹ hẹn ga gbọnvona azọ́n mílọsu tọn taidi họgbátọ lẹ. Di apajlẹ, doayi nuhe Paulu dọ gando etlẹ yin mẹplọntọ lọ he ma wazọ́n ganji to azọ́n họdido tọn ehe mẹ go dọmọ: “Onú na gú i, ṣigba yè na whlẹn ewlọsu gán.” (1 Kọlintinu lẹ 3:15) Eyin mẹplọntọ ehe sọgan mọ whlẹngán yí to godo mẹ—bọ gbẹtọ-yinyin Klistiani tọn he e tẹnpọn nado wleawuna etọn to nuplọntọ etọn mẹ yin yẹdena taidi dehe “fiọ” to whlepọn sinsinyẹn de mẹ—tadona tẹ kọ̀n wẹ mí dona wá? Na jide tọn, dọ Jehovah na hẹn nuplọntọ lọ nado dogbe na nudide ewọ lọsu tọn lẹ vlavo eyin ewọ hodo aliho nugbo tọn kavi lala.

19. Etẹwẹ mí na gbadopọnna to hosọ he na bọdego mẹ?

¹⁹ Na mídetiti, kavi mẹdopodopo, azọngban yin whẹho nujọnu tọn daho de. E nọ gando dopodopo mítọn lẹ go. Na taun tọn, etẹwẹ Biblu plọnmẹ do whẹho ehe ji? Hosọ mítọn he bọdego na gbadopọnna ehe.

[Nudọnamẹ Odò Tọn Lẹ]

a ‘Dodonu aigba lọ tọn’ sọgan dlẹnalọdo huhlọn nujọnu tọn he hẹn ẹn dote lẹ—gọna nugonu olọn mẹ tọn lẹpo—heyin didoai gligli lẹ. To yidogọmẹ, aigba lọ na edetiti yin bibasi to aliho mọnkọtọn de mẹ bọ e ma na yin “tẹnsẹna,” kavi jiya vasudo tọn pọ́n gbede.—Psalm 104:5.

b “Zannu akuẹgege tọn” he Paulu dlẹnalọdo lẹ mayin zannu họakuẹ lẹ na dandan tọn, taidi diamọndi po lubi tọn po gba. Yé sọgan ko yin zannu họgbigbá tọn họakuẹ whanpẹnọ he nọ to sisẹ́ lẹ.

c Paulu ma to didọ dọ whlẹngán họdotọ lọ tọn na tin to owù mẹ gba, ṣigba “azọ́n” họdotọ lọ tọn wẹ e to zizedo ayihaawe mẹ. La Bible en français courant basi lẹdogbedevomẹ wefọ ehe tọn dọmọ: “Eyin azọ́n mẹde tọn nọte, ewọ na mọ ahọsumẹ yí; eyin e fiọ, ewọ dona doakọnna nuhẹnbu lọ; ṣogan ewọ na luntọ́n po ogbẹ̀ etọn po, dile mẹde sọgan basi do sọn miyọ́n de mẹ.”

Nawẹ Hiẹ Na Na Gblọndo Gbọn?

● Etẹwẹ yin “dodonu” lọ to Klistiani nugbo de mẹ, podọ nawẹ e nọ yin didoai gbọn?

● Etẹwẹ mí sọgan plọn sọn azọ́nwanu họgbigbá tọn wunmẹ voovo lẹ mẹ?

● Etẹwẹ “miyọ́n” lọ nọtena, podọ nawẹ e sọgan hẹn mẹde nado ‘jiya nuhẹngu’ tọn gbọn?

● Nawẹ mẹplọntọ Biblu tọn lẹ, mẹho lẹ, po mẹjitọ lẹ po nọ gbá po azọ́nwanu he miyọ́n ma sọgan dù lẹ po gbọn?

[Yẹdide to weda 9]

To susu todaho hohowhenu tọn lẹ mẹ, ohọ̀ he yè yí zannu do gbá he miyọ́n ma sọgan dù lẹ tin to finẹ po ohọ̀ he ma lodo lẹ po