Mọ Homẹmiọnnamẹ Yí to Huhlọn Jehovah Tọn Mẹ
“To gege tumajai ṣie lẹ tọn mẹ to yẹn homẹ, homẹmiọn towe lẹ hẹn homẹ ṣie hùn.”—PSALM 94:19.
NA MẸHE to homẹfanamẹ dín vẹkuvẹku lẹpo, Biblu tindo hogbe homẹmiọnnamẹ tọn lẹ. To whelọnu lo, abajọ bọ The World Book Encyclopedia dọ dọ: “gbẹtọ madosọha lẹ ko lẹhlan Biblu na homẹmiọnnamẹ, todido, po anademẹ po to ojlẹ nuhahun po bẹwlu tọn lẹ po mẹ.” Etẹwutu?
Na Biblu yin gbigbọdo gbọn Mẹdatọ owanyinọ mítọn, yèdọ “Jiwheyẹwhe homẹmimiọn lẹpo tọn,” Omẹ lọ “[he] to homẹmiọnna mí to tukla mítọn lẹpo mẹ” dali wutu wẹ. (2 Kọlintinu lẹ 1:3, 4) Ewọ wẹ yin ‘Jiwheyẹwhe he nọ namẹ homẹmimiọn.’ (Lomunu lẹ 15:5) Jehovah ko ze apajlẹ lọ dai to awuwiwlena nuyizan lọ na kọgbọ nina mímẹpo mẹ. E do Visunnu dopo akàn etọn, yèdọ Jesu Klisti hlan aigba ji nado na mí todido po homẹmiọnnamẹ po. Jesu plọnmẹ dọmọ: “Na Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Biblu basi zẹẹmẹ Jehovah tọn taidi omẹ lọ “he to agbàn hẹn na mí egbesọegbesọ, yèdọ Jiwheyẹwhe [nugbo, NW] whlẹngán mítọn tọn.” (Psalm 68:19) Gbẹtọvi budisi-Jiwheyẹwhe tọ́ lẹ sọgan dọ po jidide po dọmọ: “Yẹn ko ze OKLUNỌ do nukọn ṣie whepoponu: na e tin to adusi ṣie mẹ wutu, yè ma na diọtẹn na mi.”—Psalm 16:8.
Wefọ Biblu tọn mọnkọtọn lẹ do owanyi sisosiso he Jehovah Jiwheyẹwhe tindo na mí gbẹtọvi lẹ hia. E họnwun dọ ewọ tindo ojlo sọn ahun mẹ wá—gọna nugopipe lọ—nado wleawuna homẹmiọnnamẹ susugege bosọ de awufiẹsa mítọn lẹ pò to ojlẹ ayimajai tọn lẹ mẹ. “E to huhlọn na mẹhe nuṣikọna lẹ; bosọ do huhlọn e ji na ewọ he ma do huhlọn lẹ.” (Isaia 40:29) To whelọnu lo, nawẹ mí sọgan mọ homẹmiọnnamẹ yí sọn huhlọn Jehovah tọn mẹ gbọn?
Nugandomẹgo Awumiọnnamẹ Nukunpedomẹgo Jehovah Tọn
Psalm-kàntọ lọ wlan dọmọ: “Ze agbàn towe dlan OKLUNỌ ji, ewọ nasọ hẹn we dote; ewọ ma na dike dodonọ ni yin sisẹtẹnna.” (Psalm 55:22) Mọwẹ, Jehovah Jiwheyẹwhe tindo ojlo to whẹndo gbẹtọvi tọn mẹ. Apọsteli Pita na jide Klistiani owhe kanweko-tintan whenu tọn lẹ dọmọ: “Ewọ [Jiwheyẹwhe] to tukla mìtọn jẹ.” (1 Pita 5:7) Jesu Klisti zinnudo nuhọakuẹ he Jiwheyẹwhe nọ ze do gbẹtọvi lẹ ji gbọn didọ dali dọmọ: “Be oblẹnọ atọ́n ma wẹ yè nọ sà yin abọgan-kuẹ flinflin awe, ode to yé mẹ ma yin winwọn to Jiwheyẹwhe nukọn gba? Ṣigba yèdọ oda he tin to ota mìtọn lẹpo wẹ yè hia. Enẹwutu mì dibu blo: mì doale hú oblẹnọ susu.” (Luku 12:6, 7) Mí họakuẹ na Jiwheyẹwhe sọmọ bọ etlẹ nọ doayi nuhe whè hugan lẹ go to mí go. E yọ́n nuhe mílọsu ma tlẹ yọnẹn lẹ na e tindo ojlo sisosiso to dopodopo mítọn mẹ wutu.
Ayidido ojlo mẹdetiti tọn Jehovah tọn ehe go sọawuhia nado yin homẹmiọnnamẹnu taun de na Svetlana, yèdọ yọnnu jọja galọtọ heyin nùdego to hosọ he jẹnukọn lọ mẹ. E pò vude e ni ko hù ede whẹpo e do dukosọ hẹ Kunnudetọ Jehovah tọn lẹ. To enẹgodo e kẹalọyi plọnmẹ Biblu de, he gọalọna ẹn nado jẹakọ hẹ Jehovah taidi gbẹtọ nujọnu tọn de he tindo ojlo to dagbemẹ-ninọ ewọ tọn mẹ. Ehe yinuwado ahun etọn ji, whàn ẹn nado diọ aliho gbẹninọ tọn etọn podọ nado klán ede do wiwe hlan Jiwheyẹwhe. E sọ na Svetlana sisi-mẹdetiti tọn he jẹ he e tindo nuhudo etọn nado to nukọnzindo mahopọnna nuhahun etọn lẹ bosọ tindo pọndohlan nujikudo tọn de gando ogbẹ̀ go jẹ obá de mẹ. E dọ todin dọmọ: “Yẹn yin hinhẹn deji dọ Jehovah ma na jo mi do gbede gba. Yẹn ko mọdọ nuhe yin winwlan to 1 Pita 5:7 mẹ yin nugbo. E dọmọ: ‘Mì bẹ magbọjẹ mìtọn lẹpo do alọ [Jehovah] tọn mẹ; na ewọ to tukla mìtọn jẹ wutu.’ ”
Todido Sinai-do-Biblu Ji Nọ Miọnhomẹnamẹ
Aliho titengbe dopo he mẹ Jiwheyẹwhe nọ wleawuna homẹmiọnnamẹ te wẹ yin gbọn Ohó heyin kinkàndai etọn gblamẹ, he bẹ todido jiawu de hẹn na sọgodo. Apọsteli Paulu wlan dọmọ: “Na onú depope he yè ko wlan dai, yè wlan yé na oplọn mítọn, dọ míwlẹ gbọn homẹfa po homẹmiọn Owe-wiwe lẹ tọn po dali nido tindo otodo.” (Lomunu lẹ 15:4) Paulu hẹn kọndopọ he tin to todido nugbo tọn po homẹmiọnnamẹ po ṣẹnṣẹn họnwun to whenuena e wlan dọmọ: “Na . . . Jiwheyẹwhe . . . yèdọ Otọ́ mítọn lọ, mẹhe yiwanna mí, bosọ yí homẹmimiọn madopodo po todido dagbedagbe po na mí gbọn ojọmiọn mẹ, ni [miọnhomẹna ahun mìtọn lẹ, NW], bosọ hẹn mì lodo to ohó po azọ́n dagbe lẹpo po mẹ.” (2 Tẹsalonikanu lẹ 2:16, 17) “Todido dagbedagbe” ehe bẹ nukundido ogbẹ̀ pipé, ayajẹnọ, he ma na wá vivọnu pọ́n gbede to paladisi aigba ji tọn de mẹ hẹn.—2 Pita 3:13.
Todido nujikudo tọn po dehe họnwun mọnkọtọn de po wẹ na tuli Laimonis, awukuzọ̀nnọ he sọ yin ahànnumunọ heyin nùdego to hosọ he jẹnukọn mẹ lọ. To owe sinai-do-Biblu ji Kunnudetọ Jehovah tọn lẹ tọn hihia godo, e jaya nado plọnnu gando aihọn yọyọ lọ to Ahọluduta Jiwheyẹwhe tọn glọ go, to fie agbasalilo etọn sọgan yin hinhẹn gọdotẹnmẹ mlẹnmlẹn te. To Biblu mẹ, e hia opagbe họnwun he bọdego helẹ heyin azọ̀nhẹngbọ azọ́njiawu-liho tọn dọmọ: “Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin, odẹ́ unbọpẹn tọn nasọ jihàn [to homẹhun mẹ, NW].” (Isaia 35:5, 6) Nado sọgan pegan nado nọ Paladisi enẹ mẹ, Laimonis basi diọdo sinsinyẹn lẹ. E doalọtena ahànnunu, podọ diọdo etọn lẹ ma nọ mayin ayidego gbọn kọmẹnu po mẹhe jẹakọ hẹ ẹ lẹ po dali gba. E to anadena plọnmẹ Biblu susu lẹ todin, bosọ to homẹmiọnnamẹ he todido sinai-do-Biblu ji nọ namẹ má hẹ mẹdevo lẹ.
Azọngban Odẹ̀ Tọn
To whenuena ahun mítọn tin to awufiẹsa mẹ na whẹwhinwhẹ́n delẹ wutu, mí sọgan mọ homẹmiọnnamẹ yí gbọn dẹ̀hiho hlan Jehovah dali. Enẹ sọgan de agbàn pinpẹn lọ sẹ̀. To ovẹvivẹ mítọn lẹ whenu, mí sọgan yin homẹmiọnna gbọn finflin nuhe yin didọ to Ohó Jiwheyẹwhe tọn mẹ lẹ dali. Psalm he dite hugan to Biblu mẹ tin taidi odẹ̀ whanpẹnọ de. Mẹhe kàn ẹn jihàn dọmọ: “Yẹn flin whẹdida towe hoho tọn lẹ, OKLUNỌ E, bosọ miọnhomẹna de e.” (Psalm 119:52) To ninọmẹ he sinyẹnawu hugan lẹ mẹ, na titengbe tọn dehe bẹ nuhahun agbasalilo tọn lẹ hẹn, gblọndo dopo he bẹ pọngbọ lẹpo hẹn ma nọ saba tin gba. To huhlọn mídetiti tọn mẹ, mí sọgan nọ ma yọ́n fie mí dona lẹhlan na taun tọn. Mẹsusu ko mọdọ to whenuena nuhe go gbẹtọvi lẹ pé lẹpo ko yin wiwà godo, lilẹhlan Jiwheyẹwhe to odẹ̀ mẹ nọ dekọtọn do homẹmiọnnamẹ daho mẹ podọ, to whedelẹnu, do pọngbọ madonukun lẹ mẹ.—1 Kọlintinu lẹ 10:13.
Pat, heyin zize yì abò nujijọ ajiji dotowhé tọn de mẹ po awuyiya po, tindo numimọ nugandomẹgo homẹmiọnnamẹ odẹ̀ tọn ehe. To whenuena e ko jẹgángán godo, e dọmọ: “Yẹn hodẹ̀ hlan Jehovah bosọ plọn na taun tọn dọ yẹn dona jo gbẹzan ṣie do alọ etọn lẹ mẹ, bo dotudo ewọ go nado wà nudepope heyin ojlo etọn. To ojlẹ ehe lẹpo whenu, yẹn tindo numọtolanmẹ fifa tọn; yẹn to numimọ jijọho Jiwheyẹwhe tọn heyin nùdego to Filippinu lẹ 4:6, 7 mẹ tọn tindo.” Lehe wefọ ehelẹ sọgan yin homẹmiọnnamẹnu do sọ na mímẹpo! To finẹ Paulu dotuhomẹna mí dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po [huhlọn apọ̀nmẹ tọn, NW] mìtọn lẹ po [to] Klisti Jesu mẹ.”
Gbigbọ Wiwe Taidi Homẹmiọnnamẹtọ
To ozán he jẹnukọnna okú etọn mẹ, Jesu hẹn ẹn họnwun na apọsteli etọn lẹ dọ emi na jo yé do to madẹnmẹ. Ehe dotukla bosọ hẹn awubla yé. (Johanu 13:33, 36; 14:27-31) To yinyọ́n nuhudo yetọn na homẹmiọnnamẹ he na to nukọnzindo de mẹ, Jesu dopagbe dọmọ: “Yẹn nasọ hodẹ̀ hlan Otọ́, ewọ nasọ na [alọgọtọ, NW] [kavi, homẹmiọnnamẹtọ] devo mì, na dọ ewọ nido tin to mì dè kakadoi.” (Johanu 14:16; nudọnamẹ odò tọn) Tofi Jesu to alọdlẹndo gbigbọ wiwe Jiwheyẹwhe tọn. Gọna onú devo lẹ, gbigbọ Jiwheyẹwhe tọn miọnhomẹna apọsteli lẹ to whlepọn yetọn lẹ whenu bosọ hẹn yé lodo nado zindonukọn to ojlo Jiwheyẹwhe tọn wiwà mẹ.—Owalọ lẹ 4:31.
Angie, he asu etọn ko dibla kú to asidan sinsinyẹn de godo, penugo nado pehẹ ayimajai gọna awufiẹsa ninọmẹ etọn lẹpo tọn po kọdetọn dagbe po. Etẹwẹ gọalọna ẹn? E dọmọ: “Matin godonọnamẹ gbigbọ wiwe Jehovah tọn tọn, mí ma sọgan ko jugbọn nuhe mí tindo numimọ etọn lẹ gblamẹ bo gbẹsọ lodo gba. Na nugbo tọn huhlọn Jehovah tọn ko yin hinhẹn sọawuhia gbọn madogán mítọn lẹ gblamẹ, podọ ewọ ko sọawuhia nado yin figángán de to ojlẹ ayimajai tọn mítọn mẹ.”
Mẹmẹsunnu-Yinyin Homẹmiọnnamẹ Tọn De
Depope he ninọmẹ mẹdopodopo tọn sọgan yin to gbẹ̀mẹ, mahopọnna ninọmẹ awusinyẹn tọn depope he sọgan wleawu lẹ, ewọ dona penugo nado mọ homẹmiọnnamẹ yí to mẹmẹsunnu-yinyin he tin-to-aimẹ to agun Jehovah tọn ṣẹnṣẹn mẹ. Mẹmẹsunnu-yinyin ehe nọ wleawuna godonọnamẹ po alọgọnamẹ gbigbọmẹ tọn po na mẹhe kọnawudopọ hẹ ẹ lẹ. To ṣẹnṣẹn etọn, mẹde sọgan mọ pipli họntọn owanyinọ, mẹtọnhopọntọ, po homẹmiọnnamẹtọ lẹ po, he tin to gbesisọmẹ bo to jijlo nado gọalọ bosọ miọnhomẹna mẹdevo lẹ to ojlẹ ayimajai tọn lẹ mẹ.—2 Kọlintinu lẹ 7:5-7.
Hagbẹ agun Klistiani tọn lẹ nọ yin pinplọn nado “nọ wà dagbe hlan omẹ popo, humọ hlan yé he yin yise whédo tọn lẹ.” (Galatianu lẹ 6:10) Wepinplọn sinai-do-Biblu ji he yé nọ mọyi nọ whàn yé nado do owanyi mẹmẹsunnu tọn po awuvẹmẹ mẹtọnhopọn tọn po hia hlan ode awetọ. (Lomunu lẹ 12:10; 1 Pita 3:8) Mẹmẹsunnu po mẹmẹyọnnu gbigbọmẹ tọn lẹ po to agun lọ mẹ nọ yin whinwhàn nado jọmẹ, miọnhomẹnamẹ, bosọ tindo numọtolanmẹ awuvẹmẹ tọn.—Efesunu lẹ 4:32.
Joe po Rebecca po, he hẹn visunnu yetọn bu to okú mẹ to aliho awubla tọn de mẹ, tindo numimọ homẹmiọnnamẹ mọnkọtọn tọn sọn hagbẹ agun Klistiani tọn lẹ dè. Yé dọmọ: “Jehovah po agun owanyinọ etọn po ko gọalọna mí gbọn ojlẹ awusinyẹn tọn mítọn gblamẹ. Kalti, wekanhlanmẹ, po oylọ alokan tọn po kanweko susu lẹ wẹ yin mimọyi. Ehe hẹn mí nado mọnukunnujẹ lehe mẹmẹsunnu-yinyin mítọn yin nuhọakuẹ sọ mẹ. Dile mí tin to nuyiwadomẹji nugbajẹmẹji lọ tọn glọ, agun lẹdo mẹ tọn susu wẹ wá nado gọalọna mí, wleawuna núdùdù lẹ bosọ hẹn ohọ̀ lọ do wiwe ji.”
Mọ Homẹmiọnnamẹ Yí!
To whenuena yujẹhọn sinsinyẹn yajiji tọn lẹ jẹ yìnyìn po zingidi po ji, bọ jikun wùdùdù po kẹ́njikun ayimajai tọn po to jijà sinsinyẹn, Jiwheyẹwhe ko wleawufo nado wleawuna hihọ́-basinamẹ awumiọnnamẹ tọn. Lehe dopo to psalm-kàntọ lẹ mẹ basi zẹẹmẹ etọn do taidi mẹhe nọ wleawuna hihọ́-basinamẹ homẹmiọnnamẹ tọn do die dọmọ: “E na yí awà etọn lẹ ṣinyọ́n oji we, podọ to awà etọn lẹ glọ wẹ hiẹ na nọ dín fibẹtado te.” (Psalm 91:4) Yẹdenanu heyin yiyizan tofi sọgan yin enẹ heyin akùn de tọn. E yin yẹdenanu ohẹ̀ he nọ mọ owù hlan nukọn bo nọ gbọn hihọ́-basinamẹ dali dlẹn awà etọn lẹ ṣinyọ́n ovi etọn lẹ ji tọn. To linlẹn he tlẹ yiaga hugan mọ de mẹ, Jehovah nọ lẹzun Hihọ́-basinamẹtọ nugbo tọn de na mẹhe dín fibẹtado to ewọ mẹ lẹpo.—Psalm 7:1.
Eyin hiẹ jlo nado plọnnu dogọ gando Jiwheyẹwhe, gbẹtọ-yinyin etọn, lẹndai etọn lẹ, po nugopipe etọn nado wleawuna homẹmiọnnamẹ po go, hiẹ yin oylọ basina nado plọn Ohó etọn. Kunnudetọ Jehovah tọn lẹ na yin homẹhunnọ nado gọalọna we to vivẹnudido enẹ mẹ. Mọwẹ, hiẹ lọsu sọgan mọ homẹmiọnnamẹ yí to huhlọn Jehovah tọn mẹ!
[Yẹdide to weda 7]
Todido sinai-do-Biblu ji sọgodo tọn sọgan wleawuna homẹmiọnnamẹ