Apajlẹ Dagbe lẹ—Be Hiẹ to Alemọyi sọn Yé mẹ Ya?

“MÌWLẸ sọ lẹzun [apajlẹ] de hlan omẹ he yise lẹpo to Makedonia po Akaia po.” Apọsteli Paulu wlan hogbe ehelẹ hlan Klistiani nugbonọ he nọ nọ̀ Tẹsalonika lẹ. Apajlẹ he yé zedai na yisenọ hatọ lẹ jẹna pipà na nugbo tọn. Etomọṣo, Tẹsalonikanu lẹ na yedelẹ to nuyiwa sọgbe hẹ apajlẹ he Paulu po gbẹdohẹmẹtọ etọn lẹ po ko zedai. Paulu dọmọ: “Wẹndagbe mítọn ma wá mì dè to ohó kẹdẹ mẹ gba, ṣigba to huhlọn mẹ ga, to [gbigbọ wiwe] mẹ, podọ to tudido susu mẹ; dile mìwlẹ ko yọ́n omẹ he nkọ míwlẹ yin to mì ṣẹnṣẹn na mì wutu. Mìwlẹ sọ lẹzun mẹhodotọ mítọn.”—1 Tẹsalonikanu lẹ 1:5-7.

Mọwẹ, Paulu yí nususu wà hugan yẹwheho didọ. Gbẹzan blebu etọn yin yẹwhehodidọ tọn—yèdọ apajlẹ yise, akọ́ndonanu, po mẹdetiti-yido-sanvọ́ tọn po. Na ehe tọn wutu, Paulu po gbẹdohẹmẹtọ etọn lẹ po wá lẹzun nuyiwadomẹji huhlọnnọ de do gbẹzan Tẹsalonikanu lẹ tọn ji, bo whàn yé nado kẹalọyi nugbo lọ to “nukunbibia susu mẹ.” Nalete, Paulu po azọ́nwahẹmẹtọ etọn lẹ po to aliho depope mẹ mayin nuyiwadomẹji dagbe kẹdẹ lọ lẹ do yisenọ enẹlẹ ji gba. Apajlẹ mẹdevo he doakọnna nukunbibia lẹ tọn lọsu yin tulinamẹnu de. Paulu wlan hlan Tẹsalonikanu lẹ dọmọ: “Mẹmẹsunnu emi, mì basi mẹhodotọ na agun he tin to Judé he to Klisti Jesu mẹ lẹ: na mìwlẹ jiya dopolọ nkọtọn ga to tòmẹnu mìtọn lẹ dè, dile yewlẹ jiya to Ju lẹ dè do ga.”—1 Tẹsalonikanu lẹ 2:14.

Klisti Jesu—Apajlẹ Dagbe Hugannọ Lọ

Dile etlẹ yindọ Paulu lọsu ko ze apajlẹ de dai he jẹna hihodo do sọ, e ma gboawupo nado dlẹnalọdo Jesu Klisti taidi apajlẹ titengbe lọ he Klistiani lẹ dona hodo gba. (1 Tẹsalonikanu lẹ 1:6) Klisti wẹ Apajlẹ dagbe hugannọ mítọn bo gbẹsọ to mọ yin. Apọsteli Pita wlan dọmọ: “Na ehe mẹ wẹ yè ylọ mì do: na Klisti jiya na mí ga, bo yí ohia dai na mí, na míwlẹ nido nọ gbọn afọ etọn ji.”—1 Pita 2:21.

Ṣigba, Jesu dotana gbẹzan gbẹtọvi tọn etọn to diblayi owhe 2 000 lẹ die wayi. Todin e “nọ nọ̀ hinhọ́n mẹ, he mẹde ma sọgan sẹpọ” taidi nudida gbigbọnọ jọmaku de. Taidi omẹ mọnkọtọn de, “mẹde ma ko mọ [ẹn] gbede, bọ yè ma sọ sọgan mọ” ewọ. (1 Timoti 6:16) To whelọnu lo, nawẹ mí sọgan hodo apajlẹ etọn gbọn? Aliho dopo wẹ gbọn pinplọn kandai ẹnẹ gbẹzan Jesu tọn lẹ to Biblu mẹ dali. Owe Wẹndagbe tọn lẹ wleawuna wuntuntun do gbẹtọ-yinyin, aliho gbẹzan tọn, po ‘walọ apọ̀nmẹ tọn’ etọn po ji. (Filippinu lẹ 2:5-8) Wuntuntun dogọ sọgan yin mimọ gbọn sọwhiwhe yíyí do plọn owe lọ Le plus grand homme de tous les temps, he dọhodo nujijọ gbẹzan Jesu tọn lẹ tọn ji to gigọ́mẹ podọ to todohukanji ojlẹ hihia tọn mẹ liho.a

Apajlẹ mẹdetiti-yido-sanvọ́ Jesu tọn tindo nuyiwadomẹji huhlọnnọ de do apọsteli Paulu ji. E dọna Klistiani Kọlinti tọn lẹ dọmọ: “Na yẹn na yí homẹhunhun do zan bosọ yin mẹzinzan na mì.” (2 Kọlintinu lẹ 12:15) Walọ jijọ-di-Klisti tọn nankọtọn die! Dile mí to nulẹnpọndo apajlẹ pipé Klisti tọn ji, mílọsu lẹ dona yin whinwhàn nado hodo apajlẹ etọn to aliho gbẹzan mídetiti tọn mẹ.

Di dohia, Jesu plọn mí dọ mí dona ganjẹ opagbe Jiwheyẹwhe tọn nado wleawuna nuhudo agbasa tọn mítọn lẹ go. Ṣigba e yí nususu wà hugan mọ. E do yise po jidide mọnkọtọn po hia to Jehovah mẹ to dodonu egbesọegbesọ tọn de ji. E dọmọ: “Wọtupọẹ lẹ tindo odò, ohẹ̀ olọn tọn lẹ sọ tindo adọ́: ṣigba Ovi gbẹtọ tọn ma tindo ofi e na yí ota etọn dai te.” (Matiu 6:25; 8:20) Be ahunmẹdunamẹnu agbasanu lẹ tọn nọ dugán do nulẹnpọn po nuyiwa towe lẹ po ji wẹ? Kavi be gbẹzan towe nọ do kunnudenu hia dọ hiẹ to Ahọluduta lọ dín jẹnukọn whẹ́ ya? Podọ etẹwẹ dogbọn walọyizan towe hlan sinsẹ̀nzọn Jehovah tọn dali? Be e taidi enẹ heyin Apajlẹnọ mítọn, yèdọ Jesu tọn ya? Biblu dohia dọ Jesu ma lá zohunhun poun gba ṣigba do zohunhun sinsinyẹn hia to nujijọ susu lẹ whenu. (Johanu 2:14-17) Humọ, apajlẹ dagbe nankọtọn die Jesu zedai to whenuena e wá jẹ owanyi ji! Etẹ, yèdọ e yí ogbẹ̀ ede tọn do sanvọ́ na devi etọn lẹ! (Johanu 15:13) Be hiẹ to apajlẹ Jesu tọn hodo gbọn owanyi didohia hlan mẹmẹsunnu Klistiani tọn towe lẹ dali ya? Kavi be hiẹ nọ dike na mapenọ-yinyin mẹdevo lẹ tọn lẹ ni glọnalina owanyi towe hlan yé wẹ ya?

To kanvinván mítọn nado hodo apajlẹ Klisti tọn mẹ, mí na nọ saba gboawupo. Ṣigba po jide po mí nọ hẹn homẹ hùn Jehovah gbọn vivẹnudido mítọn lẹ nado “ze Jesu Klisti Oklunọ do ogò” dali.—Lomunu lẹ 13:14.

‘Apajlẹ lẹ Hlan Apó Lọ’

Be mẹdelẹ tin to agun mẹ to egbehe he sọgan yinuwa taidi apajlẹ lẹ na mí ya? Yé tin na jide tọn! Mẹmẹsunnu he tin to otẹn denamẹ azọngban tọn mẹ lẹ dona ze apajlẹ de dai na titengbe tọn. Paulu dọna Titu he wadevizọn hlan agun he tin to Klete lẹ bosọ dè nugopọntọ lẹ, dọ mẹho heyin dide lẹ dopodopo dona yin “mẹmadovlẹ.” (Titu 1:5, 6) Mọdopolọ apọsteli Pita dotuhomẹna ‘sunnu mẹho lẹ’ nado lẹzun ‘apajlẹ lẹ hlan apó lọ.’ (1 Pita 5:1-3) Podọ etẹwẹ dogbọn mẹhe to devizọnwa taidi devizọnwatọ lizọnyizọnwiwa tọn lẹ dali? Yé lọsu lẹ dona yin ‘sunnu he nọ wadevizọn to aliho dagbe mẹ.’—1 Timoti 3:13.

Na nugbo tọn, e mayin nuhe sọgbe hẹ lẹnpọn dagbe gba nado donukun dọ mẹho kavi devizọnwatọ lizọnyizọnwiwa tọn lẹpo na yin azọ́nyọnẹntọ taun to adà lizọnyizọn Klistiani tọn lẹpo mẹ. Paulu dọna Klistiani he tin to Lomu lẹ dọmọ: “Míwlẹ tindo nunina wunmẹwunmẹ dile ojọmiọn he yè yina mí te.” (Lomunu lẹ 12:6) Mẹmẹsunnu voovo lẹ nọ wà dagbe taun to adà voovo lẹ mẹ. E ma sọgbe hẹ lẹnpọn dagbe nado donukun dọ mẹho lẹ na wà bosọ dọ onú lẹpo to aliho pipé mẹ gba. “Onú susu mẹ wẹ mí omẹ popo to ylanwa te,” wẹ Biblu dọ to Jakobu 3:2. “Eyin mẹde ma waylan to ohó mẹ, ewọ lọ wẹ sọgbe, ewọ wẹ sọgan dogànnuna agbasa lẹpo ga.” Ṣigba, mahopọnna mapenọ-yinyin yetọn lẹ, mẹho lẹ, taidi Timoti sọgan gbẹsọ yin “[apajlẹ lẹ] hlan yisenọ lẹ, to ohó mẹ, to owalọ mẹ, to owanyi mẹ, . . . to yise mẹ, to wiwe mẹ.” (1 Timoti 4:12) To whenuena mẹho lẹ wàmọ, mẹhe tin to apó lọ mẹ lẹ na yí tudohomẹnamẹ he tin to Heblu lẹ 13:7 mẹ do yizan mẹ po awubibọ po dọmọ: ‘Mì nọ flin mẹhe to nukọntọ yin to ṣẹnṣẹn mìtọn lẹ, podọ dile mì to nulẹnpọn do lehe walọ yetọn dekọtọn do ji mì nọ hodo apajlẹ yise yetọn tọn.’

Apajlẹ Egbezangbe Tọn Devo Lẹ

To owhe ao vude he wayi lẹ mẹ, madosọha mẹdevo lẹ tọn ko do yedelẹ hia nado yin apajlẹ dagbenọ. Etẹwẹ dogbọn mẹdehlan mẹdetiti-yido-sanvọtọ fọtọ́n susu he ko “jo owhé dai, kavi mẹmẹsunnu, kavi mẹmẹyọnnu, kavi otọ́, kavi onọ̀, . . . kavi ovi, kavi aigba” dai nado hẹn azọ́ndenamẹ Klistiani tọn di to aigba jonọ tọn lẹ ji lẹ dali? (Matiu 19:29) Sọ lẹnnupọn, ga, do nugopọntọ tomẹyitọ lẹ po asi yetọn lẹ po ji, sunnu po yọnnu po he to devizọnwa taidi mẹdezejotọ lẹ to wekantẹn Ogbẹ́ Watch Tower tọn lẹ mẹ, po gbehosọnalitọ he to lizọnyizọn wà hlan agun lẹ po ji. Be apajlẹ mọnkọtọn lẹ sọgan whàn mẹdevo lẹ ya? Klistiani wẹndagbe-jlatọ dopo to Asia flin mẹdehlan de he mọ gbedewema yí sọn klasi ṣinatọ̀ntọ Wehọmẹ Biblu Pinplọn Watchtower Giliadi Tọn. E dọ dọ mẹmẹsunnu nugbonọ ehe to “jijlo nado pannukọn awhàn omú lẹ tọn po ninọmẹ fifá aimẹ tọn kọgbidinamẹ tọn lọ po. . . . Dehe sọ yinuwadomẹji hugan wẹ nado basi nuzedonukọnnamẹ lẹ to ogbè Chine tọn po Malaisie tọn lẹ po mẹ dile etlẹ yindọ Angleterre wẹ ewọ wá sọn.” Etẹwẹ yin nugandomẹgo apajlẹ dagbe ehe tọn? Mẹmẹsunnu lọ dọmọ: “Abọẹninọ po adọgbigbo etọn po whàn mi nado jlo na lẹzun mẹdehlan de to whenuena yẹn whẹ́n.” E mayin nupaṣamẹ de gba, dọ mẹmẹsunnu ehe lẹzun mẹdehlan de.

Index des Publications de la Société Watch Tower bẹ susu todohukanji otàn gbẹzan tọn he ko sọawuhia to linlinnamẹwe Atọ̀họ̀-Nuhihọ́ Lọ Tọn po Réveillez-vous! po mẹ tọn lẹ hẹn. Otàn ehelẹ dọho gando mẹdopodopo he gbẹ́ aliho nuwiwa po yanwle aihọn tọn lẹ po dai go, bo dùto madogán lẹ ji, bosọ basi diọdo ayidego tọn lẹ to gbẹtọ-yinyin mẹ, bo hẹn ninọmẹ nujikudo tọn de go to yajiji nukọn, bosọ do azọ́n sinsinyẹn wiwà, akọ́ndonanu, nugbonọ-yinyin, whiwhẹ, po gbigbọ mẹdetiti-yido-sanvọ́ tọn po hia. Wehiatọ dopo wlan gando linlin ehelẹ go dọmọ: “Yé nọ hẹn mi yin Klistiani whiwhẹnọ po pinpẹn-nutọn-yọnẹntọ de po dogọ dile yẹn to nuhe mẹ mẹdevo lẹ ko jugbọn lẹ hia, podọ yé ko gọalọna mi ma nado lẹn dee titi tọn hugan kavi yin ṣejannabinọ gba.”

To yidogọ mẹ, ma wọnji apajlẹ dagbe he tin to agun towe titi mẹ lẹ go blo: yèdọ tatọ́ whẹndo tọn lẹ he ma nọ gboawupo to nukunpipedo nuhudo agbasa tọn po gbigbọmẹ tọn whẹndo yetọn lẹ tọn po go; mẹmẹyọnnu lẹ—gọna onọ̀ godoponọ lẹ—he nọ penukundo kọgbidinamẹnu ovi go pinpọn whẹ́n tọn go dile yé gbẹsọ to mahẹ zohunhun tọn de tindo to lizọnyizọn lọ mẹ; mẹhomẹ po madogánnọ lẹ po he to nukọnzindo po nugbonọ-yinyin po mahopọnna madogán he to jijideji po agbasalilo he to didepo po. Be hiẹ ma nọ yin whinwhàn gbọn apajlẹ mọnkọtọn lẹ dali ya?

Po alọkẹyi po, aihọn lọ gọna apajlẹ ylankan lẹ. (2 Timoti 3:13) Etomọṣo, lẹnnupọn do tudohomẹnamẹ Paulu tọn hlan Klistiani he nọ nọ̀ Judé lẹ ji. To whenuena e ko dọhodo walọyizan apajlẹ dagbenọ sunnu po yọnnu susu yisenọ hohowhenu tọn lẹ tọn po ji godo, apọsteli Paulu dotuhomẹna yé dọmọ: “Be enẹwutu sọle yè yí aslọ kunnude tọn susu lẹdo mí pé ga di ehe, mì gbọ mí . . . ni nọ yí [akọ́ndonanu, NW] do họ̀n alèwezun he yè ze do mí nukọn, bo nọ pọ́n hlan Jesu heyin dodo po opodo yise mítọn tọn po.” (Heblu lẹ 12:1, 2) To egbehe Klistiani lẹ lọsu yin lilẹdo pé gbọn ‘aslọ susugege’ apajlẹ dagbe lẹ tọn de dali—hohowhenu tọn po egbezangbe tọn po. Be hiẹ to alemọyi sọn yé mẹ nugbonugbo ya? Hiẹ sọgan wàmọ eyin hiẹ magbè nado yin ‘mẹhodotọ, e mayin onú ylankan lẹ tọn gba, ṣigba nuhe yin dagbe lẹ tọn.’—3 Johanu 11.

[Nudọnamẹ Odò Tọn]

[Yẹdide to weda 20]

E mayin nuhe sọgbe hẹ lẹnpọn dagbe gba nado donukun dọ mẹho kavi devizọnwatọ lizọnyizọnwiwa tọn lẹpo na yin azọ́nyọnẹntọ taun to adà lizọnyizọn Klistiani tọn lẹpo mẹ

[Yẹdide to weda 21]

Mẹho lẹ dona yin ‘apajlẹ lẹ hlan apó lọ’