Míwlẹ Wẹ Gbẹtọ Wunmẹ He Tindo Yise Lẹ
Ahọluduta Jiwheyẹwhe Tọn Lilá to Lopo Fiji Tọn lẹ Ji
JESU KLISTI dọho gando aliho awe go to ojlẹ de mẹ wayi. Dopo gblo bo nọ planmẹ yì okú. Awetọ bó ṣigba nọ planmẹ yì ogbẹ̀ mẹ. (Matiu 7:13, 14) Na mẹde nido penugo nado de aliho he jlọ lọ, lẹndai Jehovah Jiwheyẹwhe tọn wẹ e yin dọ wẹndagbe Ahọluduta lọ tọn ni yin yẹwheho etọn dọ to aihọn lọ blebu mẹ. (Matiu 24:14) Enẹwutu, gbẹtọ lẹ to filẹpo to todoai na owẹ̀n Ahọluduta lọ tọn, bọ mẹdelẹ to ogbẹ̀ de gbọn lilẹzun “gbẹtọ wunmẹ he tindo yise hlan whiwhla do ogbẹ̀ alindọn tọn lẹ” dali. (Heblu lẹ 10:39, NW ) Mí basi oylọ na we nado hia nudide ogbẹ̀ tọn he mẹdelẹ ko basi to Fiji po lopo he tin to yakẹ devo lẹ po ji to Hùwaji Pacifique tọn.
Yé Dotudo Jehovah Go
Mere gbẹ́ pò to viyọnnu he to wehọmẹ yì de yin to whenuena e sè owẹ̀n Ahọluduta lọ tọn to tintan whenu to 1964. Na e tin to ṣokẹdẹ to lopo he tin to olá de ji wutu, e tindo kọndopọ vude poun hẹ Kunnudetọ Jehovah tọn lẹ. Ṣigba, to agọgbọnẹnmẹ e penugo nado mọ oyọnẹn he pegan Biblu tọn yí. To ojlẹ enẹ mẹ, e ko wlealọ hẹ dawe de heyin ogán to gbétatò etọn mẹ. Na nudide Mere tọn nado nọgbẹ̀ sọgbe hẹ nunọwhinnusẹ́n Biblu tọn lẹ wutu, asu etọn po hẹnnumẹ etọn lẹ po yinuwa hẹ ẹ po kanyinylan po, podọ hatọ he nọ nọ̀ gbétatò lọ mẹ lẹ sọ gbẹwanna ẹn. Etomọṣo, e yin bibaptizi to 1991.
To madẹnmẹ to enẹgodo, Josua, heyin asu Mere tọn, dèkanpò to walọyizan etọn mẹ bo tlẹ jẹ aisin ji to hodọdopọ Biblu tọn he Mere nọ tindo hẹ ovi yetọn lẹ tẹnmẹ. Josua doalọtena Ṣọṣi Méthodiste tọn yìyì. Ṣigba, taidi ogán de, e gbẹsọ nọ deanana opli sẹmẹsẹmẹ tọn gbétatò lọ tọn lẹ. To nukun mẹhe nọ nọ̀ gbétatò lọ mẹ lẹ tọn mẹ, Josua yin nugbomadọtọ, na Ṣọṣi Méthodiste tọn yin adà tangan de na gbẹzan gbétatò Fiji-nu lẹ tọn wutu. Enẹwutu, sinsẹ̀ngán lẹdo lọ mẹ tọn dotuhomẹna Josua nado lẹkọwá sinsẹ̀n dai tọn etọn mẹ.
Josua gbọn adọgbigbo dali zinnudeji dọ emi po whẹndo emitọn po ko basi nudide bosọ magbe nado basi sinsẹ̀n hlan Jehovah Jiwheyẹwhe “to gbigbọ mẹ podọ to nugbo mẹ.” (Johanu 4:24) To opli gbétatò lọ tọn he bọdego de ji, ahọlu lọ degbè dọ Josua po whẹndo etọn po ni tọ́n sọn gbétatò lọ mẹ taidi mẹyandogbe. Yé yin nina azán ṣinawe nado tọ́n sọn lopo lọ ji bo jo owhé, aigba, po jinukun yetọn lẹ po do—mọwẹ, yèdọ nutindo yetọn lẹpo.
Mẹmẹsunnu gbigbọmẹ tọn he tin to lopo devo ji lẹ wá gọalọna Josua po whẹndo etọn po, bo gọalọna yé po nọtẹn de po podọ aigba he ji yé na nọ do jinukun do. Josua po visunnu mẹho hugan etọn po ko yí baptẹm todin, podọ visunnu devo to sinsẹ̀nzọnwà taidi wẹnlatọ wẹndagbe lọ tọn he ma ko yí baptẹm de. To agọe Mere ze yinkọ dai taidi gbehosọnalitọ whepoponu tọn (lilatọ whenu-gigọ́ tọn Ahọluduta lọ tọn de). Nudide yetọn nado sẹ̀n Jehovah dekọtọn do nọtẹn po nutindo agbasa tọn lẹ po hinhẹnbú mẹ, ṣigba taidi apọsteli Paulu, yé pọ́n ehe hlan taidi onú tata to yiyijlẹdo nuhe yé ko mọyi go mẹ.—Filippinu lẹ 3:8.
Nudide de He Bẹ Ayihadawhẹnamẹnu Hẹn
Dide nado hodo ayihadawhẹnamẹnu heyin pinplọn gbọn Biblu dali de nọ biọ yise po adọgbigbo po. Na taun tọn ehe wẹ yin whẹho lọ gando Suraang he ṣẹṣẹ yí baptẹm go, yèdọ yọnnu jọja de he nọ nọ̀ Tarawa, heyin dopo to lopo Kiribati tọn lẹ mẹ. Suraang biọ gbè nado yin didesẹ sọn adà dopo azọ́n etọn tọn mẹ taidi doto mẹgopọntọ de to dotowhé lọ. Obiọ etọn mayin alọkẹyi po nukundagbe po gba, bo dekọtọn do didohlan etọn nado yì penukundo dotowhé nukunpedomẹgo tọn kleun he tin to lopo he tin to olá de ji to fie ewọ yin kinklan sọn yisenọ hatọ etọn devo lẹ go te mẹ.
Aṣa nuyiwa tọn de wẹ e yin to lopo enẹ ji na omẹ yọyọ he wá lẹpo nado basi avọ́sinsan de hlan “gbigbọ” lẹdo lọ tọn. Omẹ lọ lẹ yise dọ awugbopo nado wàmọ na dekọtọn do okú mẹ. To whenuena e yindọ Suraang gbẹ́ nado dike nuyiwa boṣiọ-sinsẹ̀n tọn ehe ni yin wiwà na ewọ po hagbẹ etọn lẹ po, omẹ gbétatò lọ tọn lẹ nọtepọn ẹn nado yin kọslona hù gbọn gbigbọ heyin homẹhẹngblena lọ dali. To whenuena awugble depope ma wá Suraang kavi hagbẹ etọn lẹ ji, dotẹnmẹ hundote susu hùndonuvo na ẹn nado na kunnudide dagbe de.
Ṣigba whlepọn Suraang tọn lẹ ma ko wá vivọnu gba. Delẹ to sunnu jọja he tin to lopo lọ ji lẹ mẹ nọ pọ́n ẹn hlan taidi avùnnukundiọsọmẹnu de nado doyẹklọ yọnnu jọja he wá basi dlapọn lẹ. Ṣigba, Suraang nọavunte sọta nuzedonukọnnamẹ zanhẹmẹ tọn yetọn lẹ bosọ hẹn tenọgli etọn go hlan Jiwheyẹwhe. Na nugbo tọn, ewọ penugo nado wadevizọn taidi gbehosọnalitọ whepoponu tọn, yèdọ dile etlẹ yindọ gbẹtọ lẹ nọ to didla ẹ pọ́n taidi doto mẹgopọntọ de na ganhiho 24 to gbèdopo.
Jẹnukọnna jonọ-yíyí de heyin bibasi do ota Suraang tọn mẹ to whenuena e to awuwle nado tọ́n sọn lopo lọ ji, mẹho gbétatò lọ tọn lẹ dọ dọ ewọ wẹ yin mẹdehlan nujọnu tọn tintan he dla yé pọ́n. Na teninọ gligli etọn na nunọwhinnusẹ́n Biblu tọn lẹ wutu, mẹdevo lẹ to lopo enẹ ji ko yigbe dagbe hlan owẹ̀n Ahọluduta lọ tọn.
Avùnnukundiọsọmẹ Agbasa Tọn Lẹ
Tintin to olá gbétatò delẹ tọn zẹẹmẹdo dọ Kunnudetọ Jehovah tọn lẹ dona dovivẹnu sinsinyẹn nado tindo mahẹ to lizọnyizọn lọ mẹ podọ nado yì opli Klistiani tọn lẹ. Lẹnnupọndo apajlẹ Kunnudetọ he ko yí baptẹm ẹnẹ tọn ji—yèdọ sunnu dopo po yọnnu atọ̀n po—he nọ zan ganhiho susu to zọnlinzinzin yì po gigọ̀ sọn opli lẹ ji po mẹ. Zọnlinzinzin yetọn bẹ otọ̀ atọ̀n didasa hẹn to yìyì kẹdẹ mẹ. To whenuena otọ̀ lọ lẹ gọ́ taun, mẹmẹsunnu lọ nọ lìnsin dasá whẹ́, bo nọ dọ̀n nudazẹ́n daho de he mẹ saki, owe, po avọ̀ opli tọn yetọn lẹ po tin te. Enẹgodo e nọ lìnsin lẹkọ nado gọalọna mẹmẹyọnnu atọ̀n lọ lẹ.
Pipli pẹvi devo, he nọ yì opli lẹ to lopo dindẹn Nonouti tọn ji to Kiribati, pehẹ avùnnukundiọsọmẹnu he gbọnvo lẹ. Ohọ̀ he mẹ yé nọ pli te nọ hẹn gbẹtọ ṣinawe kavi ṣinatọ̀n poun. Mẹdevo he wá lẹ nọ sinai to gbonu bo nọ to nupọn gbọn adó gànja tọn lẹ mẹ. Nọtẹn opli tọn lọ nọ yin mimọ gbọn omẹ gbétatò lọ tọn devo lẹ dali dile yé to yìyì bo to kọlẹ sọn ṣọṣi whanpẹnọ yetọn lẹ. Na nugbo tọn, devizọnwatọ Jehovah tọn lẹ yọnẹn dọ e mayin họgbigbá lẹ gba, ṣigba gbẹtọ lẹ wẹ yin nutindo ojlona nugbonugbo lẹ sọn pọndohlan Jiwheyẹwhe tọn mẹ. (Hagai 2:7) Mẹmẹyọnnu dopo akàn he ko yí baptẹm to lopo lọ ji ko poyọnho bo ma sọgan zinzọnlin yì fidindẹn ba. Ṣogan, e nọ yin alọgọna to lizọnyizọn lọ mẹ gbọn yọnnu jọja de dali, yèdọ wẹnlatọ he ma ko yí baptẹm de he nọ sisẹ ẹ dánpe to kẹkẹvi de mẹ. Pinpẹn-nutọn-yinyọnẹn nankọtọn die yé dohia hlan nugbo lọ!
Hugan wẹnlatọ 2 100 he to devizọnwa to lopo Fiji tọn ji lẹ magbe nado to nukọnzindo to wẹndagbe Ahọluduta Jiwheyẹwhe tọn tọn lilá mẹ. Podọ yé sọ deji dọ mẹsusu dogọ na gbẹsọ wá lẹzun “gbẹtọ wunmẹ he tindo yise hlan whiwhla do ogbẹ̀ alindọn tọn lẹ.”
[Yẹdide Otò Tọn to weda 8]
Australie
Fiji