Nulila Vonọtaun De
TO VIVỌNU opli whemẹwhemẹ Watch Tower Bible and Tract Society of Pennsylvania tọn to 7 octobre 2000, nulila vonọtaun de yin bibasi gbọn azinponọ lọ, John E. Barr heyin dopo to Hagbẹ Anademẹtọ mẹ dali. Nulila ehe sọ vọ́ nùzindo hodidọ he ko yin didọ jẹnukọn to azán lọ gbè gbọn Theodore Jaracz po Daniel Sydlik po dali lẹ ji yinukọn dogọ.—Pọ́n weda 12-16 po 28-31 po linlinnamẹwe ehe tọn.
To nùdido nuagokun titengbe de go mẹ, Mẹmẹsunnu Barr dọmọ: “Dagbenu he yiaga tlala bosọ bẹ nususu hẹn hugan dehe yin nina nuyizan sọgbe hẹ osẹ́n lẹ wẹ ko yin zizedo alọmẹ na ‘afanumẹ, nugbonọ nuyọnẹntọ’ po Hagbẹ Anademẹtọ etọn po. Kandai lẹndai gbemima nuyizan sọgbe hẹ osẹ́n tọn mọnkọtọn lẹ dopodopo tọn bẹ whẹho he tindo dogbó lẹ hẹn. Ṣigba, Ogán mítọn, Jesu Klisti ko dè hagbẹ afanumẹ lọ tọn lẹ do ‘nutindo’ etọn, kavi dagbenu Ahọluduta tọn lẹpo ji tofi to aigba ji.”—Matiu 24:45-47.
Gando nuyizan sọgbe hẹ osẹ́n Pennsylvania tọn go, Mẹmẹsunnu Barr yidogọ dọmọ: “Sọn didoai etọn whenu gbọ́n to 1884, Watch Tower Bible and Tract Society of Pennsylvania ko yí azọngban nujọnu tọn de wà to whenuho egbezangbe tọn mítọn mẹ. Etomọṣo, nuyizan sọgbe hẹ osẹ́n de wẹ e yin poun he tin-to-aimẹ he ‘afanumẹ, nugbonọ nuyọnẹntọ’ lọ nọ yizan to whenuena e lẹzun dandan.”
To hodidọ yetọn lẹ mẹ, Mẹmẹsunnu Sydlik po Jaracz po ko basi zẹẹmẹ dọ nugbo lọ dọ nutindo aigba ji tọn Oklunọ tọn lẹpo ko yin zizedo alọmẹ na “afanumẹ, nugbonọ nuyọnẹntọ” lọ ma glọnalina hagbẹ afanumẹ lọ tọn lẹ sọn dotẹnmẹ nina sunnu he pegan lẹ sọn “lẹngbọ devo” lẹ ṣẹnṣẹn nado penukundo azọngban anadenanu gbesisọmẹ tọn delẹ go mẹ gba. (Johanu 10:16) Mọjanwẹ whẹwhinwhẹ́n Owe-wiwe tọn depope matin he biọ dọ popolẹpo kavi anadenanutọ nuyizan sọgbe hẹ osẹ́n tọn he nọ yin yiyizan gbọn Kunnudetọ Jehovah tọn lẹ dali lẹ depope dona yin Klistiani yiamisisadode lẹ do niyẹn.
Mẹmẹsunnu Barr dọna mẹplidopọ lẹ dọ to agọe, delẹ to Hagbẹ Anademẹtọ Kunnudetọ Jehovah tọn lẹ tọn he ko to sinsẹ̀nzọnwa taidi anadenanutọ po mẹhe tin to otẹn azọngban tọn mẹ po delẹ sọn ojlo mẹ wá ko de yedelẹ sẹ̀ sọn ogbẹ́ anadenanutọ nuyizan sọgbe hẹ osẹ́n tọn he to yinyin yiyizan gbọn “afanumẹ, nugbonọ nuyọnẹntọ” lọ dali to États-Unis lẹ tọn mẹ. Mẹmẹsunnu dejidego lẹ sọn lẹngbọ devo lẹ mẹ yin dide taidi nunọnutẹnmẹ lẹ.
Nudide ehe yin alemọyinu na taun tọn. E na dotẹnmẹ Hagbẹ Anademẹtọ tọn lẹ nado yí whenu dogọ zan to awuwiwlena núdùdù gbigbọmẹ tọn lẹ mẹ podọ to alọ devo mẹ to nukunpipedo nuhudo gbigbọmẹ tọn mẹmẹsunnu-yinyin lẹdo aihọn pé tọn lẹ go.
To tadona mẹ, azinponọ lọ dọna mẹplidopọ homẹhunnọ etọn lẹ dọmọ: “Dile etlẹ yindọ azọngban sọgbe hẹ osẹ́n po anadenanu tọn susu lẹ po ko yin didena mẹmẹsunnu numimọnọ lẹ, . . . yemẹpo to sinsẹ̀nzọnwa to anademẹ gbigbọmẹ tọn Hagbẹ Anademẹtọ tọn glọ. . . . Mímẹpo gbọn odẹ̀ dali ganjẹ Jehovah go na dona etọn do vivẹnudido pọmẹ tọn mítọn ji to ojlo etọn wiwà mẹ, hlan yẹyi po gigo oyín daho etọn tọn po.”