Lehe Yè Sọgan Pehẹ Numọtolanmẹ Agọ̀ lẹ Do
● Asafu wule dọmọ: “Nugbo, ovọ́ wẹ yẹn klọ́ ayiha ṣie, bosọ klọ́ afọ ṣie to homẹvọ mẹ. Na azán popo gbè wẹ yè to yadona mi, hihò ṣie sọ yin afọnnu-afọnnu.”—Psalm 73:13, 14.
● Baluki wẹnhun dọmọ: “Dindọ̀n wẹ yẹn dinvie! na OKLUNỌ ko sọ dè awubla dogọ awufiẹsa ṣie; yẹn yin gbẹ́donọ po winwẹn ṣie po, yẹn ma sọ mọ gbọjẹ de.”—Jẹlemia 45:3.
● Naomi doavigbe dọmọ: “Ganhunupo ko yí vivẹ́ susu do zan hẹ mi. Yẹn tọ́n yì gbonu gigọ́, OKLUNỌ ko sọ hẹn mi gọ̀ do owhé ovọ́: etẹwutu wẹ mì yiylọ mi dọ Naomi, mimọ dọ OKLUNỌ ko sakunnu do oji e, bọ Gahunupo ko sọ bianukun mi.”—Luti 1:20, 21.
BIBLU bẹ apajlẹ sinsẹ̀n-basitọ nugbonọ susu Jehovah tọn lẹ hẹn he to ojlẹ delẹ mẹ nọ yin dududeji mlẹnmlẹn gbọn numọtolanmẹ flumẹjijẹ tọn lẹ dali. Nugbo lọ wẹ yindọ taidi gbẹtọvi mapenọ lẹ, mímẹpo nọ tindo numimọ numọtolanmẹ mọnkọtọn lẹ tọn sọn ojlẹ de mẹ jẹ devo mẹ. Mẹdelẹ to mí mẹ sọgan nọ joawuna flumẹjijẹ taun—vlavo etlẹ yin po awuvivẹ mẹdetiti kleun de po—hugan mẹdevo he ko nọgbẹ̀ to numimọ awubla tọn susu mẹ lẹ.
Ṣigba, yin e mayin anadena, numọtolanmẹ ehelẹ sọgan hẹn haṣinṣan towe hẹ mẹdevo lẹ podọ hẹ Jehovah Jiwheyẹwhe gble. Klistiani yọnnu dopo he nọ yawu joawuna awuvivẹ-ede yigbe dọmọ: “Yẹn ko gbẹ́ oylọ basinamẹ susu yì nuwiwa ayidedai tọn lẹ tẹnmẹ dai na yẹn nọ lẹndọ yẹn ma yin hagbẹ he sọgbe de na mẹhe tin to agun lọ mẹ lẹ gba.” Nugandomẹgo mẹvasudo tọn nankọ die numọtolanmẹ mọnkọtọn lẹ sọgan tindo do gbẹzan mẹde tọn ji! Etẹwẹ hiẹ sọgan wà nado glọnalina yé?
Dọnsẹpọ Jehovah
To Psalm 73, Asafu kanwe tlọlọ gando nupaṣamẹ etọn go. To whenuena e to ninọmẹ ede tọn yijlẹdo gbẹzan kọdetọn dagbenọ mẹylankan lẹ tọn go, e lẹzun nuvẹunnọ. E doayi e go dọ gbẹtọ jijọ-madi-Jiwheyẹwhe tọn lẹ yin goyitọ po danuwatọ po, podọ e taidi dọ yé ma nọ yin yasana nkọtọn. Enẹgodo Asafu do ayihaawe tintindo hia gando nuhọakuẹ afọdidona aliho nuyiwa jijlọ tọn de to gbẹzan mẹ etọn go.—Psalm 73:3-9, 13, 14.
Taidi Asafu, be hiẹ ko doayi kọdetọn dagbe mlẹnmlẹn mẹylankan he nọ to ylanwiwa yede tọn jla lẹ tọn go ya? Nawẹ Asafu dù to numọtolanmẹ agọ̀ etọn lẹ ji gbọn? E zindonukọn dọmọ: “Whenuena yẹn lẹn [nado] yọ́n ehe, e sinyẹnawu to nukun ṣie mẹ; kaka yẹn do yì biọ fiwiwe Jiwheyẹwhe tọn mẹ; [yẹn jlo na yọ́n sọgodo yetọn].” (Psalm 73:16, 17) Asafu ze afọdide nujikudo tọn lẹ gbọn lilẹhlan Jehovah dè to odẹ̀ mẹ dali. Nado yí hogbe he apọsteli Paulu yizan to godo mẹ lẹ zan, Asafu zín ‘gbẹtọ agbasalan tọn’ do odò gbọn ‘gbẹtọ gbigbọnọ’ lọ finfọndote to ede mẹ dali. Po pọndohlan gbigbọmẹ tọn heyin hinhẹn jẹ yọyọ po, e mọnukunnujẹemẹ dọ Jehovah gbẹwanna ylanwiwa podọ dọ mẹylankan lẹ na yin yasana to ojlẹ sisọ mẹ.—1 Kọlintinu lẹ 2:14, 15.
Lehe e yin nujọnu do sọ dọ hiẹ ni dike Biblu ni gọalọna we nado ze ayidonugo do nugbo gbẹ̀mẹ tọn lẹ ji! Jehovah flin mí dọ emi yọ́n nuhe mẹylankan lẹ to wiwà. Biblu plọnmẹ dọmọ: “Yè klọ mì blo; Jiwheyẹwhe mayin mẹvivlẹ gba; na nudepope gbẹtọ dó, enẹ wẹ e na gbẹ̀n ga . . . Mì dike nuṣikọna mí to dagbe wiwà mẹ blo.” (Galatianu lẹ 6:7-9) Jehovah na ze mẹylankan lẹ do ‘aigba he dídí ji’; e na hẹn yé ‘jai biọ dindọ̀n mẹ.’ (Psalm 73:18) Whẹdida dodo sọn olọn mẹ na nọ gbawhàn to whepoponu to godo mẹ.
Tito-to-whinnu gbọzangbọzan núdùdù gbigbọmẹ tọn dùdù to tafo Jehovah tọn ji po gbẹdido mẹjlọdote tọn hẹ omẹ Jiwheyẹwhe tọn lẹ po na gọalọna we nado hẹn yise towe lodo nado duto flumẹjijẹ kavi numọtolanmẹ agọ̀ devo lẹ ji. (Heblu lẹ 10:25) Taidi Asafu, gbọn dindọnsẹpọ Jiwheyẹwhe dali, hiẹ sọgan tindo numimọ godonọnamẹ owanyinọ etọn tọn. Asafu zindonukọn dọmọ: “Yẹn tin dè we to whepoponu: hiẹ sọ hẹn adusilọ ṣie go gligli. Hiẹ na yí hónamẹ towe do do aliho hia mi, to godo hiẹ nasọ yí mi do gigo mẹ.” (Psalm 73:23, 24) Klistiani de heyin onú agọ̀ yiwa hẹ to whenuena e tin to ovu plọn nuyọnẹn he tin to ohó ehelẹ mẹ. E dọmọ: “Gbẹdido pẹkipẹki hẹ agun lọ do adà gbẹzan tọn devo hia mi. Yẹn mọ hezeheze dọ Klistiani mẹho lẹ yin owanyinọ, dọ yé mayin ponọ lẹ gba ṣigba lẹngbọhọtọ lẹ.” Mọwẹ, Klistiani mẹho awuvẹmẹtọ lẹ nọ yí adà titengbe de wà to numọtolanmẹ awugblenamẹ tọn lẹ didesẹ mẹ.—Isaia 32:1, 2; 1 Tẹsalonikanu lẹ 2:7, 8.
Kẹalọyi Ayinamẹ Jehovah Tọn
Baluki, heyin wekantọ yẹwhegán Jẹlemia tọn, wẹnhun na numọtolanmẹ ayimajai azọ́ndenamẹ etọn tọn wutu. Ṣigba, Jehovah gbọn homẹdagbe dali ze ayidonugo Baluki tọn do nuhe yin nugbo ji. “Hiẹ to onú dahodaho lẹ dín na dewe . . . A dín yé blo: na, doayi e go, yẹn na hẹn oylan wá agbasalan lẹpo ji, wẹ OKLUNỌ dọ: ṣigba ogbẹ̀ towe wẹ yẹn na jo hlan we na wẹnyannu de to otẹn fiedali hiẹ to yìyì lẹpo mẹ.”—Jẹlemia 45:2-5.
Po hogbe madoadúdẹji tọn lẹ po Jehovah basi zẹẹmẹ dọ yanwle ṣejannabinọ Baluki lọsu titi tọn lẹ wẹ yin asisa flumẹjijẹ etọn tọn. Baluki ma sọgan to ayajẹ tindo to azọ́ndenamẹ sọn Jiwheyẹwhe dè etọn mẹ podọ to ojlẹ dopolọ mẹ to onú dahodaho lẹ dín na ede gba. Hiẹ lọsu sọgan mọdọ afọdide nujikudo tọn taun de hlan dùdù to flumẹjijẹ ji wẹ nado dapana ayihafẹsẹnamẹnu lẹ po alọkikẹyi jijọho ayiha mẹ tọn he nọ wá sọn pekọ jijọ-di-Jiwheyẹwhe tọn mẹ po.—Filippinu lẹ 4:6, 7.
Naomi asuṣiọsi ma na dotẹnmẹ ayimajai nado glọn ẹn do Moabi to whenuena asu etọn po visunnu etọn awe lẹ po ko kú godo gba. Ṣigba, dohia tin dọ e tindo numọtolanmẹ vivẹ́ lẹ gando ede po asi visunnu etọn tọn awe lẹ po go na ojlẹ de. To dido yé lẹkọ whenu, Naomi dọmọ: “E doadina mi gbau na mìtọn lẹ wutu, na yè hẹn alọ OKLUNỌ tọn jẹgbonu do ogo e.” Dogọ, to whenuena e jẹ Bẹtlẹhẹm, e tẹkudeji dọmọ: “Mì ylọ mi dọ Naomi [“Homẹvivi Ṣie”] blo, mì nọ ylọ mi dọ Mala [“Vivẹ́”]: na Ganhunupo ko yí vivẹ́ susu do zan hẹ mi.”—Luti 1:13, 20.
Nalete, Naomi ma klan ede dolá gbọn gbigbọṣi aluẹmẹninọ mẹ—yèdọ sọn Jehovah po omẹ etọn lẹ po dè gba. To Moabi e ko sè dọ “OKLUNỌ ko dla omẹ etọn lẹ pọ́n . . . to nina akla yé mẹ.” (Luti 1:6) E mọnukunnujẹemẹ dọ fie yọ́n hugan na emi nado tin te wẹ nado tin hẹ omẹ Jehovah tọn lẹ. To pọmẹ hẹ Luti asi visunnu etọn tọn, Naomi to enẹgodo lẹkọ do Juda bo gbọn azọ́nyinyọnẹn dali deanana Luti gando lehe e dona yinuwa hlan hẹnnumẹ yetọn Boazi, heyin mẹfligọtọ etọn do go.
Mọdopolọ to egbehe, omẹ nugbonọ he ko hẹn alọwlemẹ yetọn bu to okú mẹ lẹ to pipehẹ flumẹjijẹ numọtolanmẹ tọn lọ po kọdetọn dagbe po gbọn alọnu hinhẹn ján to agun Klistiani tọn mẹ dali. Taidi Naomi, yé to yedelẹ yizan na whẹho gbigbọmẹ tọn lẹ, bo nọ hia Ohó Jiwheyẹwhe tọn egbesọegbesọ.
Alemọyi lẹ sọn Nuyọnẹn Jijọ-di-Jiwheyẹwhe Tọn Yiyizan Mẹ
Kandai Biblu tọn ehelẹ wleawuna wuntuntun do lehe mẹde sọgan pehẹ nugandomẹgo numọtolanmẹ agọ̀ lẹ do ji. Asafu dín alọgọ to fiwiwe Jehovah tọn mẹ bo yí sọwhiwhe do nọtepọn Jehovah. Baluki yigbe hlan ayinamẹ bosọ dapana ayihafẹsẹnamẹnu yanwle agbasanu bibẹpli tọn. Naomi gbọṣi zohunhun mẹ to omẹ Jehovah tọn lẹ ṣẹnṣẹn, bo wleawuna yọnnu jọja Luti na lẹblanulọkẹyi etọn lẹ to sinsẹ̀n-bibasi Jiwheyẹwhe nugbo lọ tọn mẹ.—1 Kọlintinu lẹ 4:7; Galatianu lẹ 5:26; 6:4.
Hiẹ sọgan duto flumẹjijẹ po numọtolanmẹ agọ̀ devo lẹ po ji gbọn ayihamẹlinlẹnpọn do awhàngbigba sọn olọn mẹ wá lẹ he Jehovah ko na omẹ etọn lẹ ji dali, yèdọ na mẹdopodopo lẹ kavi to pọmẹ. Nado sọgan wà enẹ, nọ lẹnayihamẹpọn do nuyiwa titengbe hugan owanyinọ Jehovah tọn to awuwiwlena ofligọ lọ na we ji. Yọ́n pinpẹn owanyi nujọnu mẹmẹsunnu-yinyin Klistiani tọn tọn. Ze gbẹzan towe sinai do aihọn yọyọ Jiwheyẹwhe tọn he ko sẹpọ lọ ji. Podọ na hiẹ ni yigbe taidi Asafu nkọ dọmọ: “Eyin yẹn tọn wẹ, e yọ́n na mi nado sẹpọ Jiwheyẹwhe: yẹn ko sọ hẹn OKLUNỌ Jiwheyẹwhe zun fibẹtado ṣie, na yẹn nido nọ dọho azọ́n towe lẹpo tọn.”—Psalm 73:28.