Alọgigọna Asuṣiọsi lẹ to Whlepọn Yetọn lẹ Mẹ

DOPO to otàn he yọ́n hugan gando asuṣiọsi lẹ go wẹ kandai Biblu tọn heyin Luti po asunọ etọn, Naomi tọn po. Yọnnu awe lọ lẹ yin asuṣiọsi. Ṣigba, e mayin asu kẹdẹ wẹ Naomi hẹn bu gba ṣigba visunnu etọn awe lẹ lọsu ga, he dopo to yé mẹ ko yin asu Luti tọn. Na lẹdo he nọ lẹgle bo ganjẹ sunnu lẹ go tlala de mẹ wẹ yé nọ̀ wutu, ninọmẹ yetọn blawu taun na nugbo tọn.​—Luti 1:​1-5, 20, 21.

Ṣigba, Naomi mọ họntọnjihẹmẹ po homẹmimiọn vonọtaun po yi to Luti heyin asi-visunnu etọn tọn si, mẹhe gbẹ́ nado jo e do. To nukọnmẹ, Luti sọawuhia nado “pọnte hlan [Naomi] hú visunnu ṣinawe”​—e mayin na owanyi sisosiso etọn hlan Naomi kẹdẹ wutu gba ṣigba na owanyi etọn na Jiwheyẹwhe wutu ga. (Luti 4:15) To whenuena Naomi na ayinamẹ dọ Luti ni lẹkọ yì whẹndo po họntọn Moabinu etọn tọn lẹ po dè, Luti gblọn to dopo to hodidọ nugbonọ-yinyin mẹwhantọ hugan he ko yin kinkàndai pọ́n lẹ mẹ dọmọ: “Fie hiẹ jei wẹ yẹn na yì; podọ fie hiẹ jẹ, wẹ yẹn na jẹ: omẹ towe lẹ wẹ na yin omẹ ṣie lẹ, Jiwheyẹwhe towe Jiwheyẹwhe ṣie: fie hiẹ kú do wẹ yẹn na kú do, finẹ wẹ yè nasọ di mi do: OKLUNỌ ni wà mọ hlan mi, podọ humọ ga, eyin nude adavo okú klan hiẹ po yẹn po.”​—Luti 1:​16, 17.

Jehovah Jiwheyẹwhe ma gọ̀n ma doayi walọyizan Luti tọn go gba. E dona whédo kleun Naomi po Luti po tọn, podọ Luti wlealọ hẹ Boazi Islaelivi lọ to godo mẹ. Ovi yetọn, he lẹzun tọgbo Jesu Klisti tọn, yin nukunpedego gbọn Naomi dali taidi dọ etọn lọsu wẹ e yin nkọtọn. Otàn ehe yin apajlẹ lehe Jehovah nọ wlebòna asuṣiọsi he dọnsẹpọ ẹ bo dejido ewọ go lẹ tọn do. Humọ, Biblu dọna mí dọ e nọ yí nukun nujọnu tọn do nọ pọ́n mẹhe nọ de sọn owanyi mẹ nado gọalọna asuṣiọsi lẹ to whlepọn yetọn mẹ lẹ. Enẹwutu nawẹ míwlẹ sọgan nọgodona asuṣiọsi he tin to ṣẹnṣẹn mítọn lẹ gbọn to egbehe?​—Luti 4:​13, 16-​22; Psalm 68:5.

Alọgọ Tlọlọ lẹ Ṣigba E Mayin po Aṣẹpadomẹji po Gba

To whenuena yè to alọgọna asuṣiọsi de, nuhe yọ́n hugan lọ wẹ nado dọ ẹ họnwun podọ tlọlọ ṣigba e mayin po aṣẹpadomẹji po gba. Dapana hodidọ he ma họnwun lẹ taidi, “Eyin hiẹ tindo nuhudo nudepope tọn bo dike ma yọnẹn.” Enẹ sọgan yin nudopolọ po didọna mẹhe avivọ po huvẹ po to hùhù po de dọ, “Awutu mìtọn ni hùnmiyọ́n na mì ni gọ́hò” podọ to enẹgodo ma wà nudepope nado gọalọ gba. (Jakobu 2:16) Mẹsusu ma na biọ alọgọ yèdọ eyin yé tin to nuhudo nude tọn mẹ; kakatimọ, yé ma nọ dọ nuhudo yetọn lẹ na mẹdevo lẹ gba. E nọ biọ wuntuntun nado gọalọna omẹ mọnkọtọn lẹ, yèdọ nado doayi nuhe yin nuhudo yetọn lẹ go. To alọ devo mẹ, nado nọ duklunọ-do-mẹji​—titengbe nado nọ deanana gbẹzan asuṣiọsi lọ tọn​—sọgan dekọtọn do numọtolanmẹ awugble kavi dẹsọ-dẹmẹ tọn mẹ. Enẹwutu, Biblu zinnudo nuhudo lọ ji nado tin to jlẹkaji to nuyiwa mítọn lẹ mẹ hẹ mẹdevo lẹ. To whenuena e to ayinamẹ na mí nado tindo ojlo ṣejannabi matindo tọn to mẹdevo lẹ mẹ, e sọ flin mí ma nado yin ajannọ to ohó mẹdevo lẹ tọn mẹ.​—Filippinu lẹ 2:4; 1 Pita 4:​15.

Luti do walọyizan jlẹkaji tọn mọnkọtọn hia hlan Naomi. Dile etlẹ tẹdo onọ̀ asu etọn tọn go po nugbonọ-yinyin po do sọ, Luti ma nọ gbidikọna kavi dugán do ewọ ji gba. E nọ de nudide lẹnpọn dagbe tọn lẹ, taidi núdùdù mimọ na Naomi po ede po, ṣigba e sọ nọ hodo anademẹ Naomi tọn lẹ ga.​—Luti 2:​2, 22, 23; 3:​1-6.

Nugbo wẹ dọ, nuhe mẹdopodopo nọ tindo nuhudo etọn lẹ nọ gbọnvo tlala. Sandra, heyin nudego jẹnukọn, dọmọ: “Yẹn mọ nuhudo nuhe tọn yẹn tindo to ayimajai ṣie mẹ​—yèdọ họntọn vivẹ podọ owanyinọ he lẹdo mi pé lẹ.” To alọ devo mẹ, Elaine heyin nùdego jẹnukọn, tindo nuhudo ojlẹ susu dogọ na ṣokẹdẹninọ. Enẹwutu, yinyin alọgọnamẹtọ zẹẹmẹdo yinyin ayidonugotọ po jlẹkajinọtọ po to yinyọ́n vogbingbọn to ṣokẹdẹninọ mẹdevo tọn po tintin-to-aimẹ nado gọalọ to whenuena nuhudo tin po ṣẹnṣẹn.

Godonọnamẹ sọn Whẹndo lọ Dè

Whẹndo zohunhunnọ, owanyinọ de, eyin e tin, sọgan wà nususu nado hẹn asuṣiọsi de deji dọ ewọ na penugo nado pehẹ asuṣiọsi-yinyin etọn po kọdetọn dagbe po. Dile etlẹ yindọ hagbẹ whẹndo tọn delẹ sọgan penugo nado gọalọ hugan devo lẹ, yemẹpo sọgan tindo mahẹ. “Eyin asuṣiọsi de tindo ovi, kavi ovivi de, gbọ yé ni plọn nado do azọ́n ovi tọn hia to owhé yetọn gbè whẹ́, na yé ni sọ sudagbehọ mẹjitọ [gọna mẹjitọ daho] yetọn lẹ: na enẹ wẹ yọ́n, bosọ yin alọkẹyi to Jiwheyẹwhe nukọn.”​—1 Timoti 5:4.

To whẹho susu mẹ, godonọnamẹ akuẹ-liho tọn kavi ‘dagbehọ́sumẹ’ sọgan gọ̀n mayin dandannu. Asuṣiọsi delẹ nọ tindo akuẹ he pé nado penukundo nuhudo yetọn lẹ go, podọ delẹ to yé mẹ nọ pegan na alemọyi tohọluduta tọn lẹ, he nọ tin-to-aimẹ to aigba delẹ ji. Ṣigba fie asuṣiọsi lẹ tin to nuhudo mẹ te, hagbẹ whẹndo tọn lẹ dona gọalọ. Eyin asuṣiọsi de ma tindo hẹnnumẹ sẹpọmẹ he na gọalọ lẹ kavi eyin hẹnnumẹ mọnkọtọn lẹ ma penugo nado gọalọ janwẹ, Owe-wiwe na tuli yisenọ hatọ lẹ nado na alọgọ dọmọ: “Sinsẹ̀n wiwe magble to Jiwheyẹwhe Otọ́ nukọn wẹ ehe, nado nọ dla tọṣiọvi po asuṣiọsi lẹ po pọ́n to nukunbibia yetọn mẹ.”​—Jakobu 1:27.

Mẹhe yinuwa sọgbe hẹ nunọwhinnusẹ́n Biblu tọn ehelẹ nọ “gbògbéna asuṣiọsi” lẹ nugbonugbo. (1 Timoti 5:3) To paa mẹ, nado gbògbéna mẹde nọ zẹẹmẹdo nado do sisi hia omẹ lọ. Mẹhe yè gbògbéna lẹ nọ tindo numọtolanmẹ nuhọakuẹ, yin bowlena, yin yẹyidogona tọn. Yé ma nọ tindo numọtolanmẹ lọ dọ mẹdevo lẹ to alọgọ poun sọn linlẹn azọngban tọn mẹ gba. Luti, he ewọ lọsu yin asuṣiọsi na ojlẹ de, gbògbéna Naomi nugbonugbo gbọn dide sọn ojlo mẹ podọ sọn owanyi mẹ wá nado hẹn ẹn diun dọ nuhudo agbasamẹ po numọtolanmẹ Naomi tọn lẹ po yin nukunpedego. Na taun tọn, walọyizan Luti tọn hẹn ẹn nado tindo yinkọ dagbe de po awuyiya po, bọ asu sọgodo tọn etọn sọgan dọmọ: ‘Mẹhe tin to tòdaho omẹ ṣie lẹ tọn mẹ lẹpo wẹ yọnẹn dọ yọnnu jijọ dagbenọ de wẹ hiẹ yin.’ (Luti 3:​11) To ojlẹ dopolọ mẹ, owanyi Naomi tọn na Jiwheyẹwhe, jijọ pekọ tintindo etọn tọn, po pinpẹn-nutọn-yinyọnẹn sisosiso etọn na vivẹnudido Luti tọn lẹ po do ota etọn mẹ matin ayihaawe hẹn ẹn yin homẹhunnu de na Luti nado gọalọna ẹn. Apajlẹ dagbe nankọtọn die Naomi yin na asuṣiọsi lẹ to egbehe!

Dọnsẹpọ Jiwheyẹwhe

Nugbo wẹ dọ, hagbẹ whẹndo tọn lẹ po họntọn lẹ po ma sọgan sú odò heyin jijodo gbọn okú alọwlemẹ de tọn dali gba. Na whẹwhinwhẹ́n ehe wutu nujọnu wẹ e yin na mẹhe alọwlemẹ etọn kú lọ nado dọnsẹpọ “Otọ́ lẹblanu lẹ tọn, Jiwheyẹwhe homẹmimiọn lẹpo tọn; mẹhe to homẹmiọn na mí to [nukunbibia] mítọn lẹpo mẹ” na taun tọn. (2 Kọlintinu lẹ 1:3, 4) Lẹnnupọndo apajlẹ Anna tọn ji, yèdọ asuṣiọsi mẹdezejotọ de heyin owhe 84 mẹvi to jiji Jesu tọn whenu.

To whenuena asu Anna tọn kú to owhe ṣinawe poun godo he yé ko wlealọ, ewọ lẹhlan Jehovah dè na homẹmiọnnamẹ. “[Ewọ] ma fọnyi sọn tẹmpli mẹ, bosọ yí nùbibla po ovẹ̀ po do to Jiwheyẹwhe sẹ̀n to ozán po okle po.” (Luku 2:36, 37) Be homẹ Jiwheyẹwhe tọn hun do mẹdezejo jijọ-di-Jiwheyẹwhe tọn Anna tọn go ya? Mọwẹ! E do owanyi etọn hia hlan ẹn to aliho vonọtaun de mẹ gbọn didike na ewọ ni mọ oviyẹyẹ he na whẹ́n bo wá lẹzun Mẹwhlẹngantọ aihọn lọ tọn dali. Lehe ehe hùnhomẹ bosọ miọnhomẹna Anna do sọ! E họnwun dọ, ewọ tindo numimọ nugbo Psalm 37:4 tọn dọmọ: “Hẹn homẹ towe hùn susu to OKLUNỌ mẹ; ewọ nasọ yí ovẹ̀ ayiha towe mẹ tọn na we.”

Jiwheyẹwhe Nọ Wazọ́n Gbọn Klistiani Hatọ lẹ Gblamẹ

Elaine dọmọ: “Na ojlẹ he dite de to okú David tọn godo, yẹn tindo awufiẹsa agbasamẹ tọn, taidi dọ ohí de tin to adaja-hú ṣie mẹ he to lilẹpe nkọtọn. Yẹn lẹndọ nugomape nado lì núdùdù wẹ. E sinyẹn sọmọ to gbèdopo bọ yẹn lẹndọ yẹn dona mọ doto de. Mẹmẹyọnnu po họntọn gbigbọmẹ tọn ayidonugotọ de po na ayinamẹ dọ awubla ṣie sọgan yin whẹwhinwhẹ́n de bosọ na mi tuli nado biọ alọgọ po homẹmiọnnamẹ Jehovah tọn po. Yẹn kẹalọyi ayinamẹ etọn to afọdopolọji bosọ hodẹ̀ abọẹ tọn de ṣigba he wá sọn ahun mẹ, bo biọ dọ Jehovah ni gọalọna mi to awubla ṣie mẹ. Podọ e wàmọ!” Ninọmẹ Elaine tọn jẹ tepọn ji, podọ to madẹnmẹ to enẹgodo awufiẹsa agbasamẹ tọn etọn lẹ busẹ.

Mẹho agun tọn lẹ na taun tọn sọgan ji họntọn hẹ asuṣiọsi he tin to awubla mẹ lẹ to aliho he jọmẹ de mẹ. Gbọn awuwiwlena godonọnamẹ po homẹmiọnnamẹ gbigbọmẹ tọn gbesisọ tọn po to aliho nuyọnẹn po ayidonugo tọn de po mẹ dali, mẹho lẹ sọgan gọalọna yé nado dọnsẹpọ Jehovah mahopọnna whlepọn yetọn lẹ. To fie e yin dandan te, mẹho lẹ sọgan sọ gọalọ to titobibasina godonọnamẹ agbasanu tọn mẹ. Mẹho awuvẹmẹtọ, ayidonugotọ mọnkọtọn lẹ na nugbo tọn nọ lẹzun “otẹn whiwhla tọn sọn jẹhọn nù.”​—Isaia 32:2; Owalọ lẹ 6:​1-3.

Homẹmiọnnamẹ Tẹgbẹ̀ Tọn sọn Ahọlu Yọyọ Aihọn Tọn Dè

Omẹ lọ he Anna yọnhonọ jaya nado mọ to nudi owhe fọtọ́n donu awe die wayi ko lẹzun Ahọlu Mẹssia tọn heyin Ahọluduta olọn mẹ tọn Jiwheyẹwhe tọn. Gandudu ehe na de nuhe nọ hẹn awubla, po okú po wá lẹpo sẹ̀ to madẹnmẹ. Gando ehe go, Osọhia 21:​3, 4 dọmọ: “Doayi e go, gòhọ Jiwheyẹwhe tọn tin to gbẹtọ lẹ dè . . . Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” Be hiẹ doayi e go dọ “gbẹtọ lẹ” wẹ wefọ ehe dlẹnalọdo ya? Mọwẹ, gbẹtọvi lẹ na yin tuntundote sọn okú po aluẹmẹninọ lẹpo po mẹ gọna aví he e nọ hẹnwa.

Ṣigba wẹndagbe tlẹ sọ tin hugan mọ! Biblu sọ dopagbe fọnsọnku tọn na mẹhe ko kú lẹ. “Ojlẹ lọ ja, to ehe mẹ mẹhe tin to yọdo mẹ lẹpo na sè ogbè [Jesu tọn], bo na tọ́njẹgbonu.” (Johanu 5:28, 29) Taidi Lazalọsi, he Jesu fọnsọnku lọ, yé na tọ́njẹgbonu taidi gbẹtọvi lẹ, e mayin nudida gbigbọnọ lẹ gba. (Johanu 11:​43, 44) Mẹhe ‘wà dagbe’ to enẹgodo lẹ na yin hinhẹn jẹ pipé gbẹtọvi tọn kọ̀n bo nasọ tindo numimọ nukunpedomẹgo taidi otọ́ tọn nkọtọn Jehovah tọn na yedetiti dile ewọ ‘na hùn alọ etọn bo nasọ na pekọ ojlo nuhe tin to ogbẹ̀ lẹpo tọn.’​—Psalm 145:16.

Mẹhe ko hẹn mẹyiwanna de bu to okú mẹ bosọ tindo yise to todido dejidego ehe mẹ lẹ nọ mọ ẹn taidi asisa homẹmiọnnamẹ tọn daho de. (1 Tẹsalonikanu lẹ 4:13) Enẹwutu, eyin asuṣiọsi de wẹ hiẹ yin, hẹn ẹn diun nado “nọ hodẹ̀ magbọjẹ” na homẹmiọnnamẹ po alọgọ he hiẹ tindo nuhudo etọn egbesọegbesọ nado hẹn agbàn voovo towe lẹ. (1 Tẹsalonikanu lẹ 5:17; 1 Pita 5:7) Podọ nọ yí whenu zan egbesọegbesọ nado hia Ohó Jiwheyẹwhe tọn na linlẹn Jiwheyẹwhe tọn lẹ nido sọgan miọnhomẹna we. Eyin hiẹ wà onú ehelẹ, mahopọnna whlepọn po avùnnukundiọsọmẹnu lẹpo he hiẹ na pannukọn taidi asuṣiọsi de po lẹ, hiẹ na mọ lehe Jehovah sọgan gọalọna we nugbonugbo nado mọ jijọho do.

[Blurb to weda 5]

Yinyin alọgọnamẹtọ zẹẹmẹdo nado yin jlẹkajinọtọ to yinyọ́n vogbingbọn to ṣokẹdẹ ninọ mẹdevo tọn po tintin-to-aimẹ to whenuena nuhudo tin po ṣẹnṣẹn

[Yẹdide to weda 7]

Asuṣiọsi mẹhomẹ Anna yin didona gbọn Jiwheyẹwhe dali