Mì Nọte Gligli po Nujikudo Mlẹnmlẹn po
‘Mì Pọ́n! Gbẹtọ Susugege Lọ!’
KANBIỌ de wẹ e yin he ko hẹn devizọnwatọ Jehovah tọn lẹ jẹflumẹ na owhe kanweko susu. Vivẹnu ko yin dido na whenu dindẹn nado dín gblọndo na ẹn sọn Owe-wiwe mẹ. Hosọ lọ ko fọ́n hodọdopọ susu dote. Ṣigba gblọndo Biblu tọn yin mimọ to godo mẹ, podọ e fọnjlodotena plidopọ-watọ lẹ taun to Washington, D.C., to 1935.
Kanbiọ paa de wẹ fọ́n hodọdopọ lọ dote: Mẹnu lẹ wẹ “gbẹtọgun daho” lọ (King James Version), kavi “gbẹtọ susugege” lọ (Biblu Wiwe Lọ Gun Alada) heyin nùdego to Osọhia 7:9 mẹ lẹ yin? Be pipli yisenọ lẹ tọn ehe na nọgbẹ̀ to olọn mẹ wẹ ya?
Kanbiọ He Dẹn-to-Aimẹ De
Sọn ojlẹ apọsteli Johanu tọn mẹ kakajẹ azán mítọn gbè, Klistiani lẹ ko jẹflumẹ dogbọn mẹhe “gbẹtọgun daho” lọ yin dali. Biblu Plọntọ lẹ pọ́n gbẹtọ susugege lẹ hlan taidi pipli awetọ he jei olọn mẹ, yèdọ pipli de he tindo oyọnẹn nugbo Biblu tọn ṣigba he ma yí nususu wà nado hẹn ẹn gbayipe.
Ṣigba, gbẹdohẹmẹtọ Klistiani yiamisisadode lẹ tọn delẹ tin he lẹzun zohunhunnọ taun to azọ́n yẹwhehodidọ tọn mẹ. Yé ma tindo yanwle lọ nado yì olọn mẹ gba. Na nugbo tọn, todido yetọn tin to kọndopọmẹ hẹ togunmẹ hodidọ lọ “Livi Susu He to Gbẹ̀nọ Todin lẹ Ma Na Kú Gbede,” he omẹ Jehovah tọn lẹ dọhodeji sọn 1918 jẹ 1922. Omẹ mọnkọtọn lẹ na yin didona po ogbẹ̀ madopodo po to aigba ji.
Atọ̀họ̀-Nuhihọ́ Lọ Tọn 15 octobre 1923 [Glẹnsigbe], dọhodo oló Jesu tọn gando lẹngbọ po gbọgbọẹ lẹ po go bo dọmọ: “Lẹngbọ lẹ nọtena gbẹtọ akọta lẹ tọn lẹpo, e mayin mẹhe yin jìjì gbọn gbigbọ dali lẹ gba ṣigba mẹhe yin whinwhàn nado wà dodo lẹ, he yọ́n Jesu Klisti to apọ̀nmẹ taidi Oklunọ podọ mẹhe to tenọpọn bo to nukundo ojlẹ dagbe de to gandudu etọn glọ lẹ.”—Matiu 25:31-46.
Titá Hinhọ́n Tọn Dogọ Lẹ
To owhe 1931 mẹ, Justification, Bladopọ Tintan [Glẹnsigbe], dọhodo Ezekiẹli weta 9 ji bo do mẹhe yin hiadogona do nukọn nado mọ whlẹngán yí to vivọnu aihọn tọn lẹ hia taidi lẹngbọ he Jesu dọho etọn to oló etọn mẹ lẹ. Justification, Bladopọ Atọ̀ntọ (heyin zinzinjẹgbonu to Glẹnsigbe mẹ to 1932), basi zẹẹmẹ do walọyizan ahunjijlọnọ Jehonadabi he mayin Islaelivi lọ tọn ji, mẹhe biọ awhàn-kẹkẹ Ahọlu Jehu yiamisisadode Islaeli tọn mẹ bo hodo e nado pọ́n zohunhun Jehu tọn to sinsẹ̀n-basitọ lalo tọn lẹ vivasudo mẹ. (2 Ahọlu lẹ 10:15-28) Owe lọ dọmọ: “Jehonadabi nọtena pipli gbẹtọ lẹ tọn enẹ he tin to aigba ji todin [he] tọ́nsọn kanṣiṣa titobasinanu Satani tọn mẹ, he ze teninọ yetọn to adà dodowiwa tọn mẹ, podọ yewlẹ wẹ yin mẹhe Oklunọ na whlẹngán to ojlẹ Amagẹdọni tọn whenu, bo basi hihọ́na yé gbọn nukunbibia lọ gblamẹ, bo nasọ na yé ogbẹ̀ madopodo to aigba ji. Omẹ ehelẹ wẹ yin pipli ‘lẹngbọ’ lẹ tọn.”
To 1934, Atọ̀họ̀-Nuhihọ́ Lọ Tọn hẹn ẹn họnwun dọ Klistiani he tindo todido aigba ji tọn lẹ dona basi klandowiwe hlan Jehovah bo yin bibaptizi. Na nugbo tọn hinhọ́n lẹ to titá gando pipli aigba ji tọn ehe go bosọ to sisẹ́ deji hú gbede pọ́n tọn!—Howhinwhẹn lẹ 4:18.
Hinhọ́n Nukunnumọjẹnumẹ Tọn de Tá Gblegede
Hinhọ́n nukunnumọjẹnumẹ Osọhia 7:9-17 tọn na tá bo sẹ́ gblegede to madẹnmẹ. (Psalm 97:11) Atọ̀họ̀-Nuhihọ́ Lọ Tọn ko do todido lọ hia dọ plidopọ he yin awuwlena nado yin bibasi to 30 mai jẹ 3 juin 1935, to Washington, D.C., États-Unis d’Amérique, na yin “homẹmiọnnamẹnu po alemọyinu nujọnu tọn de po” na mẹhe Jehonadabi nọtena lẹ. Podọ mọwẹ e yin nugbonugbo!
To hodidọ ojlofọndotenamẹ tọn de do hosọ lọ “Gbẹtọgun Daho lọ” ji, heyin didọna nudi plidopọ-watọ 20 000 lẹ mẹ, J. F. Rutherford na kunnudenu dọ “lẹngbọ devo” egbezangbe tọn lẹ sọzẹ́n hẹ “gbẹtọ susugege” Osọhia 7:9 mẹ tọn lẹ. (Johanu 10:16) To tadona hodidọ ehe tọn mẹ, hodọtọ lọ kanse dọmọ: “Be mẹhe tindo todido gbẹninọ to aigba ji tọn lẹpo sọgan jaale bo fọnṣite ya?” Dile suhugan mẹplidopọ lẹ tọn fọnṣite, Rutherford lá dọmọ: “Mì pọ́n! Gbẹtọgun Daho lọ!” Abọẹninọ de tin, bọ enẹgodo awhá aglinjijẹ tọn bọdego. To wunkẹngbe etọn, Kunnudetọ Jehovah tọn yọyọ 840 wẹ yin bibaptizi, suhugan yetọn do yedelẹ hia nado tin to gbẹtọ susugege lọ mẹ.
Tintin Tofi Ayidego Tọn De
Jẹnukọnna 1935, sọha he to jijideji mẹhe kẹalọyi wẹndomẹ Biblu tọn bo do zohunhun hia to yẹwhehodidọ wẹndagbe lọ tọn mẹ lẹ tọn do ojlo hia to gbẹninọ kakadoi to Paladisi aigba ji tọn mẹ. Yé ma tindo ojlo nado yì olọn mẹ gba, na Jiwheyẹwhe ma ko na yé todido gbẹninọ to olọn mẹ tọn gba. Dido yedelẹ hia nado yin apadewhe gbẹtọ susugege lẹngbọ devo lẹ tọn dohia dọ sọha Klistiani yiamisisadode 144 000 lẹ tọn ko dibla pé to 1935.—Osọhia 7:4.
To whenuena Wẹkẹ-Whàn II gbajẹgbonu, Satani Lẹgba dovivẹnu vẹkuvẹku nado doalọtena bibẹpli mẹhe yin gbẹtọ susugege lọ tọn. Azọ́n yẹwhehodidọ-Ahọluduta lọ tọn yin alọhẹndotena to otò susu mẹ. To ojlẹ todido matindo tọn enẹlẹ mẹ, podọ whenu vude jẹnukọnna okú etọn to janvier 1942, J. F. Rutherford basi zẹẹmẹ dọmọ: “E taidi dọ sọha ‘gbẹtọgun daho’ lọ tọn ma na sù sọmọ gba.”
Ṣigba na dona sọn olọn mẹ wá wutu, whẹho lẹ ko diọ. To ‘teninọ gligli po nujikudo mlẹnmlẹn po’ mẹ, mẹyiamisisadode lẹ po gbẹdohẹmẹtọ yetọn, lẹngbọ devo lẹ po, ko to gbedide gbẹtọ lẹ hinhẹnzun devi tọn hẹndi. (Kọlọsinu lẹ 4:12; Matiu 24:14; 28:19, 20) Sọha Kunnudetọ Jehovah tọn lẹ tọn he to yẹwhehodọ lẹdo aihọn pé to 1946 yin 176 456—he suhugan yetọn yin gbẹtọ susugege lẹ. To 2000, nuhe hugan Kunnudetọ 6 000 000 lẹ wẹ to Jehovah sẹ̀n po nugbonọ-yinyin po to aigba 235 lẹ ji—gbẹtọ susugege de wẹ yé yin nugbonugbo! Podọ sọha lọ to jijideji zọnmii.